~~~~~~~~~~~~~~~~







2014年6月13日 星期五

香港電視劇場景



香港電視劇場景

本地電視台拍攝的電視劇,具有強烈的本地色彩和固定場景,但通通都是「不真實」。套套劇都可以找到一些「犯駁」的罪證,屢見不鮮。今次數一數港劇有什麼「不真實」的電視場景和情節:

第十位:車程街景
車廂戲中,男主角駕車,跟司機位旁邊乘客傾偈,從車窗中見到演員後面移動的街景。由於剪接和NG的問題,結果司機和乘客的即時對話戲,司機的背景是尖沙嘴、但乘客的背景卻是大角咀,接下一句時又去咗旺角,回答時去到紅磡,叮噹的「隨意門」咩?

第九位:講電話重覆
鏡頭中,演員的電話響起,他接聽後,神情凝重:「吓?佢被貨車撞倒呀?」、「吓?佢入咗醫院呀?」、「吓?佢有生命危險呀?」,演員將電話筒另一旁的說話完完整整地重複一遍。目的是要將電話旁的對白轉述一次給觀眾聽。但在現實生活中,除非他是「撞聾」或在非常嘈雜的環境下,否則你講一句,我重複一句,聽到扯火cut線都似。

第八位:光猛酒吧夜場
電視劇中的酒吧K場夜總會,為了讓觀眾見到演員的五官,場內燈光都好光猛。但在現實生活中,間間酒吧夜總會夜店都係「黑媽媽」,方便顧客摸黑作樂。除非警察查牌開燈,另作別論。此外,郊外黑夜戲,漆黑的郊外亦照到燈光火著,郊野得個月光照射,但卻有射燈的明亮感覺。

第七位:電腦屏幕桌面
電視劇中的辦公室,由staff到老闆檯頭的電腦屏幕,都是Microsoft的內置的「草原藍天」顯示桌面,沒有人會開word excel powerpointoffice 工作軟件。在現實生活中,哪會有一間office內的全體員工,開電腦只顯示桌面?真係唔使做,白支人工咩。咁嘅公司聽執笠都似。

第六位:Gel頭中西式早餐
電視劇中未發跡的小康之家,早餐必吃白粥油炸鬼。一家大細嘻嘻哈哈,吃飽後溫情地:「我返學!我返工啦!」一旦家庭變暴發戶後,早餐便用刀叉吃西式早餐,桌上冷冰冰,各自修行或單單打打。主角發達後,必會Gel頭,營造大商家形象。但在現實生活中,窮人可以Gel頭,早餐也可以食腸仔蛋。有錢人可以頭髮蓬鬆亦會食白粥炒麵油炸鬼。

第五位:食飯檯電視位
劇中一家人圍埋枱食晚飯,大圓枱中間空出一個電視位,供鏡頭拍攝。原本那個位置當是電視位都make sense,可惜劇中人食飯係唔睇電視。咁點解唔坐鬆啲要貪逼呢?在現實生活中,幾多個無範家庭,食飯唔開電視呢?電視劇更加應該加「食飯睇電視戲」鼓吹一下睇電視的風氣喇。

第四位:駕車車廂打燈
男女主角夜晚駕車,穿梭黑夜街道時,車廂內,在呔盤下,竟然有燈光,從底打到主角面上。目的是讓觀眾見到演員的五官。但在現實生活中,有盞燈由下打上塊面,影響視力,點揸車啊?除非佢想扮鬼,嚇迎面線的司機啦。

第三位:大屋大餐廳大病房
因錄影廠面積大,電視劇中的「室內實用面積」相繼變大。私人住宅、公屋、餐廳、病房、課室、乜都大幾倍。現實幾百尺,經電視劇放大後,變成幾千尺。劇中的住宅:屋內兩廳四房加十尺深走廊、劇中的餐廳:枱與枱之間,可以放多幾張床都得、劇中的標準病房:大過酒店總統套房。

第二位:同事們一字排開高談闊論
辦公室中,發生了一些具爭議性的突發事情,同事們立即放下手頭上工作,離座聚集一起,好似打靶咁一字排開、事無忌憚咁高談闊論。但在現實生活中,除非間公司無政府主義,或搞緊罷工,在辦公時間內,幾何會見到同事們可以一字排開咁曬馬傾偈吖?

第一位:大團圓結局
劇集大結局最後嗰15分鐘,所有美好事情一併發生。場面是一個聚會:郊遊BBQ、新店開張、壽宴、頒獎禮。奇妙的事情接二連三地發生︰醫院中絕症病危的爺爺奇蹟康復、不育的太太誕下三胞胎BB、有賭癮的哥哥戒賭仲做埋傑青、面臨倒閉公司成功被收購翻生、奸人被重判入獄或跌落山崖或失憶、有才華的弟弟獲獎可以去歐洲發展、年長耆英補行婚禮等等。但在現實生活中,好事情一併發生的可能性,微乎其微,反而衰嘢一齊嚟的可能性高啲,屋漏逢連夜雨就見唔少。



二少爺說︰飲著電視奶水長大的人就是靠看電視劇來接觸這個大千世界。

12 則留言:

  1. 第八位:光猛酒吧夜場

    夜場燈光火猛,尤如照妖鏡喎,真面目一目了然,豬扒咪扮唔到索女,大大影響食慾。

    註:食色性也 :p

    第一位:大團圓結局

    其實最後15分鐘係成套劇嘅濃縮版,係for一d忙碌嘅觀眾可以用15分鐘了解晒成套劇嘅恩怨情仇嘅。

    回覆刪除
    回覆
    1. 講得有理,各人的下場用15分鐘交待,幾勁呀!

      有時仲會出現「十年後」男女主角化老妝的天長地久結局

      刪除
  2. 電視台仲好鐘意「造假」...

    若劇情有錢銀交易, 鏡頭影住的銀紙永遠係假錢. 角色用電腦上社交網站, 永遠係假的facelook等假site.

    回覆刪除
  3. 卡臣:

    仲有呀!啲鹹片更加離譜,做愛難過表演雜技,男女雙方都無享受可言,只是「偷窺者」有視覺享受咋!

    真正咁樣做愛,簡直喺折墮!嘻嘻!

    回覆刪除
    回覆
    1. 咪係囉,啲男優30分鐘都得,我就得30秒,超現實呀!

      刪除
  4. 電視劇就係咁,要俾旁邊嘅觀眾唔睇齋聽都知發生咩事.

    回覆刪除
  5. 最搞笑就係電視劇入面啲記者會,個班攝記仲係用緊「菲林機」!!(外型睇得出)
    而且機頂支閃燈除咗唔識閃之外,個種型號而家冇人用架啦!!
    當啲觀眾傻架咩^.^!

    回覆刪除
    回覆
    1. 係呀係呀

      仲有,電視劇中的鑑證科,他們的電腦軟件分析,畫面出神入化,超現實

      刪除

LinkWithin

Blog Widget by LinkWithin