~~~~~~~~~~~~~~~~







2014年6月25日 星期三

無謂勸諭


無謂勸諭

政府經常勸諭市民:戒煙、戒賭、親子、滅蚊、做運動、多菜少肉、定期驗身、選民登記、防止虐畜、環保意識、駕駛安全、工業安全、戴安全帶、戴安全套。以下是十個「無謂勸諭」,講咗出嚟盞嘥氣,左耳入右耳出,無人聽咗會去理會。

第十位:「唔好抄啦!」
駕車時觸犯了交通條例,又被交通警察捉到。司機向阿sir求情:「阿sir,俾次機會,唔好抄啦!」難道阿sir會被你一句簡單求情說話感動到,收番張牛肉乾嗎?結果咪始終都係要抄牌。

第九位:「唔好搞住哂啦!」
當同事同學專心工作溫書,一定有啲友仔行埋去「搞搞震」,騷擾專注中的朋友。被騷擾者可能趕緊功課或趕工中,被人搞住哂當然十分嘮氣,大喝︰「唔好搞住哂啦!」很明顯,搞搞震的人不會因為這個勸諭而卻步,相反,只會更加變本加厲,加多幾分力量去倒亂。

第八位:「唔好食啦!」
父母老一輩經歷過戰火,對食物特別珍惜。如果兒子見到母親吃隔夜飯餸,就會勸諭:「唔好食啦!」對身體無益。但要令到長輩將食物倒入垃圾桶是一件十分艱鉅的任務。母親一句:「食得唔好嘥!」,轉眼就已經將隔夜嘢放哂入口,咀嚼並吞埋。

第七位:「唔好喊啦!」
朋友被愛人撇甩,宣佈失戀。見朋友失戀後眼濕濕或想喊,上前安慰:「唔好喊啦!」唔講猶自可,一講對方就立即淚線崩潰。越勸對方就喊得越勁。另外,中學公開試放榜日,考得差的同學打開成績通知單一看,立即眼濕濕,同學安慰:「唔好喊呀!」同學聽後立即哭了出來。

第六位:「唔好打呀!」
小朋友百厭搞搞震,父母見狀,唔打唔鬧都唔得。如果小朋友闖下大禍,激到父母彈起,非重手打仔不可,孩子先出眼淚,再求情:「唔好打呀!」父母見個仔反抗仲打多兩吓。不過今天「怪獸家」絕對不會施行體罰,另一個極端︰就是虐兒虐妻虐老個案,繼續發生。聽到鄰舍傳出絕望的呼叫:「唔好打呀!」

第五位:「唔好亂諗嘢啦!」
情侶夫妻相處多年,其中一方疑似有外遇,掀起茶杯裏的風波。被懷疑的一方作出解釋:「唔好亂諗嘢啦!」結果另一方聽後,不但不會就此收貨罷休,仲會越諗越猜疑,越入牛角鑽。釀成離婚收場、家庭暴力、或血案收場。

第四位:「唔好講俾人知!」
朋友同事情侶夫妻之間,有秘密要分享。披露者講秘密之前鄭重聲明:「千祈唔好講俾人知!」突顯秘密的機密程度之高。最後,個秘密咪又係揚開哂,通街都知。所以這句「唔好講俾人知!」欲蓋彌彰。

第三位:「唔好死呀!」
醫院病房急症室內,病人彌留之際,親友愛人跪在床邊,緊握病人的手哭求:「唔好死呀!」但生老病死是人生必經的自然定律。難道你叫唔死,就可以阻止到死亡來臨嗎?最諷刺就係呢頭講完「唔好死呀!」,嗰頭病人就立即喺你面前斷氣死埋。

第二位:「咪走!」
警察捉賊,一路跑一路嗌:「咪走!」唔止嗌一聲,仲要一邊跑一邊嗌:「咪走!咪走!」試問邊個賊佬會咁聽差佬話,聽到「咪走!」之後,就會跟著乖乖地停低,然後舉高雙手,等差人拉呢?

第一位:「唔好飲啦!」
朋友失戀、失意、生意失敗、親人去世,玩頹廢,借酒澆愁。作為好朋友的你,勸他重新振作做人,搶走他手上的酒杯,大力搖晃他的肩頭:「唔好飲啦!」但要叫一個飲到醉醺醺的人「唔好再飲啦!」是一件非常艱難而無成效的事情。慳返啲力扶佢返屋企好過喇。



二少爺說︰廣東俗語︰「越撳越出屎」,壓力越大、反彈越大。

12 則留言:

  1. 分手前總會有人講「唔好走啦」......但每次結局都係......唉>.<!

    回覆刪除
    回覆
    1. 示威中,警察叫示威人士「冷靜D」!

      刪除
  2. 卡臣:

    勸人唔好醉駕夠多餘,班友照樣狂飲,跟住去開車。

    回覆刪除
    回覆
    1. AV女優叫「哋咩嗲 (不要啊)」也是無謂勸諭。

      刪除
  3. 道友帶住毒品畀人捉到,第一句通常都係話:「阿Sir,d嘢唔係我o架,我都係收番幾舊水幫人帶o架咋,畀次機會吖。」

    回覆刪除
    回覆
    1. 撞車後,司機對阿SIR講馬路突然衝隻狗出嚟,所以急扭軚,但......那隻狗從不存在

      刪除
    2. 不存在的事情,即假的事情,所以不存在的狗,可稱為「假狗」。

      照合理推斷,這位司機是女性,並且性慾旺盛。撞車前她正駕車回家,忽然性慾起,腦海中只想到床上抽屜內的小玩具。性幻想讓她聯想到大量的小玩具突然在馬路出現,因此......

      她告訴阿SIR:「馬路突然衝隻狗出嚟,所以急扭軚,因而釀成車禍。」

      刪除
    3. 我懷疑一對男女打算去車廂gathering,男人駕車期間,急不及待,突然申條狗出嚟,失控撞車,因男士車牌過期,落車走人,由女士頂包,所以殺出一條狗。

      刪除
    4. gathering喺車廂好危險喎,去殘廁安全d,哈哈。 :)

      刪除
    5. gathering當然要在私人密閉空間最好啦

      刪除
  4. 其实,D差佬追贼,一路追一路嗌,泄晒度气,点仲会跑得快架?睇怕系拍戏先至会甘卦?哈哈哈~~~~~

    回覆刪除
    回覆
    1. 可能那差人十分喜歡飲「米酒」,所以捉賊都嗌︰「米酒!」

      刪除

LinkWithin

Blog Widget by LinkWithin