~~~~~~~~~~~~~~~~







2014年3月28日 星期五

《飛車.毒蛇.迫擊砲》


《飛車.毒蛇.迫擊砲》

眼鏡蛇坐在電影院內,正欣賞一套荷里活C級動作電影《飛車.毒蛇.迫擊砲》。劇情講一名號稱「毒蛇」的美國專業殺手,殺人後正被一大班仇家的追殺,毒蛇駕著紅色跑車在洛杉磯的高速公路上飛馳,左穿右插,險象環生。仇家仲出動到直昇機追捕,直昇機上的一支迫擊砲,正瞄準公路上毒蛇的紅色跑車

坐在螢幕下的眼鏡蛇看得十分無癮,撫心自問:「唉!人哋係殺手,我又係殺手,佢叫毒蛇,我叫眼鏡蛇,但係點解我從來未試過咁刺激呢?連一個飛車槍戰場面都未試過呀!」未經歷過這些場面,自己只是一個唔入流的三四線殺手。

    * * * * 

散場後,眼鏡蛇走到銀行櫃員機,Check吓自己戶口剩餘。咦~上個月嗰單生意仲有十萬蚊剩,不如trade咗架Skyline,換架新戰車喺香港高速公路「片吓」,自我滿足一吓都好吖!

眼鏡蛇撳了幾萬現金去土瓜灣找「車房森」,阿森同眼鏡蛇相識十幾年,以前兩人都是行家,飛簷走壁,專做「老爆」。後來阿森揍夠錢後開車房,從此便金盤洗手。

阿森正在車房抽雪茄,眼鏡蛇好型咁跟阿森揮一揮手。阿森見老友到訪,想和眼鏡蛇嚟過「兄弟式擁抱」,但眼鏡蛇巧妙地側身避開,因為阿森套車房開工衫實在太污漕。

眼鏡蛇講明來意後,兩人入去元朗二手車場揀車,眼鏡蛇用7萬買了一架戰車,叫阿森幫手改車,從新執過避震、呔鈴、死氣喉、煞車皮、加包圍、尾翼、再加1萬,前後8萬蚊埋單,十日後可以攞車。眼鏡蛇如小學生般興奮地等待他的新玩具落地。

    * * * * 

十天後,眼鏡蛇到土瓜灣車房取車時,眼鏡蛇第一眼望見架戰車,嘩!眼珠都突埋出嚟!原來阿森私自替眼鏡蛇揸了個主意,在車身上拉花:「無限、極速、暴走、鬥魂、鬼琢、米芝蓮、熊出沒注意」等貼紙,花碌碌地貼滿成架車身都係。

眼鏡蛇第一眼望見,嘩!嗌了出來︰「真係開心到不得了!」感激地向阿森多謝:「好威呀!果然係好兄弟!知我想要乜!」跟著駕駛這部東望洋新寵,沿整個新界疾飛了幾轉。

    * * * * 

一周後,眼鏡蛇接了一單大生意,要殺死某賭場的大老闆。中午時分,眼鏡蛇把他的戰車泊在灣仔某名人飯堂外,手持裝了滅聲器的手槍進內,在洗手間內一槍搞掂賭場大老板,極速逃離飯堂,一出門口,就見到自己架戰車被「咖啡妹」抄緊牌,眼鏡蛇唔理咁多,推開咖啡妹,跳上車,踩油向銅鑼灣方向逃走。

賭場老闆手下發覺東窗事發,叫救護車之餘,三架寶馬撻匙,極速追殺眼鏡蛇。戰車上了東區走廊,中午時分,公路車多繁忙,眼鏡蛇左穿右插,大叫過癮。終於一嚐荷里活電影式的飛車滋味。尾隨的三架寶馬亦非善男信女,超速緊貼眼鏡蛇,幸而眼鏡蛇平時打機專打賽車game,餐餐都打爆機,技術己經超凡入聖。

在東區走廊上追逐,「砰!」第一架寶馬喺炮台山撞石壆。「砰!」第二架喺北角撞到部雞記貨van。「砰!」最後一架喺鰂魚涌炒埋部冷氣巴士。眼鏡蛇滿足地擺脫所有追兵。哇哈哈!終於飽嚐荷里活式飛車的味道。

怎料好戲在後頭,眼鏡蛇在左邊的倒後鏡見到一部直昇機緊追而至,絕非幻覺。估唔到死鬼賭場老闆咁把炮,出動埋直昇機添呀。嘩!非常荷里活C級片的情節呀。下一步,應該會有迫擊砲出場喇。

直昇機在東區走廊旁疾飛,將至鯉景灣時,眼鏡蛇按下左邊車窗,右手按著呔盤,左手揸槍,瞄準窗外的直昇機,第一槍missing,再補多一槍,「嘭!」直昇機機身中彈,冒出黑煙,向下急墜,被擊中的直昇機,在眼鏡蛇的倒後鏡中失去踪影。嘩!呢一槍真係畢生代表作。一粒子彈搞掂成架直昇機。眼鏡蛇得意大笑,戰車擺脫所有陸空追截,駛向柴灣入到石澳。

    * * * * 

眼鏡蛇駛到石澳某一偏僻處停車,他剛才殺了賭場老闆而未行「完成任務signature」,銀包內找不到現鈔,只好把衣袋中的《飛車.毒蛇.迫擊砲》戲票尾撕毀,隨手一揚!紙碎四揚。下一步是把戰車毀屍滅跡,因為東區走廊的攝錄機,一定已經拍下這輛太過招搖的超速戰車。

眼鏡蛇向車身淋上電油後,眼鏡蛇點一口煙,忍痛將香煙扔向戰車,「嚯」一聲,火光熊熊。把這輛剛落地七天的8萬銀新寵,親手燒毀。離開石澳時,眼鏡蛇致電警方報失車輛,報告自己的車輛被人偷走,相信汽車被匪徒拿去做不法勾當。

    * * * * 

眼鏡蛇截的士回家,眼鏡蛇回家後第一時間睇電視新聞報導。咦?只報導賭場老闆被暗殺和東區走廊四車瘋狂駕駛的兩單大新聞。至於直昇機失事,就隻字不提。

點解空難咁轟動的新聞,政府要全面封鎖?難道直昇機跟賭場和香港政府?有著不可告人的秘密?但咁大件事,一定有大批目擊者,政府點可以封鎖呢?網上討論區又無人講,眼鏡蛇百思不得其解。唔通自己高速下產生幻覺?

    * * * * 

第二天,眼鏡蛇隻身到鯉景灣,嘗試找出直昇機墜機之謎。但現場沒有留下半點蛛絲馬跡。眼鏡蛇見到有兩個中年男士,一高一矮,迎面而來,邊行邊講:
矮佬:「吓?你咁唔好彩?」
高佬:「係囉!尋日我架機飛飛吓,突然出煙,跌埋落海,屍骸都執唔返。」
矮佬:「我諗…..飛飛下燒咗副engine,所以墮機啩?」

原來眼鏡蛇喺東區走廊旁見到嗰部直昇機,是面前這位高佬的遙控直昇機模型,原本好地地在東廊旁飛飛吓,就俾眼鏡蛇的無情一槍,擊毀墮海。

眼鏡蛇獲悉真相後,苦笑一吓,仲以為自己咁勁;一槍搞掂架直昇機。不過算啦,曾經興奮過總好過從未興奮過。眼鏡蛇決定今天下午5:30入戲院睇《飛車.毒蛇.迫擊砲》的續集《飛彈.黑豹.死光槍》。相信眼鏡蛇今次再睇荷里活式的飛車場面時,必定有另一種共鳴


二少爺說︰前排真係有套西片叫《索女‧重炮‧神經刀》(Machete Kills)上演。我有捧場呀。

10 則留言:

  1. 呢篇開頭好緊張,最後都係笑位收尾,去咗直昇機模型度。 :o

    眼鏡蛇一路睇續集《飛彈.黑豹.死光槍》,一路食爆谷,搞到好鬼熱氣,最後生了「飛滋‧毒瘡‧大頸泡」,睇嚟佢要飲番d涼茶先得喇。

    回覆刪除
    回覆
    1. 80年代有一套日本電影叫《飛車.歌舞.三人組》
      近滕曾彥做,後生的你未必知道,當時很紅啊

      刪除
    2. 真係唔識喎,日本電影方面我了解唔係咁深。

      我通常只專注睇演員間嘅肢體語言,好少留意劇情嘅。 :p

      刪除
    3. 係呀,仲有鏡頭角度,大特寫同環境背境,都值得注意

      刪除
    4. 仲有劇中主角們嘅節奏呀。一套好嘅日劇,好似一首好嘅音樂咁,真係會牽動觀眾嘅情緒㗎。

      我睇到好嘅日劇,隻手就會不自覺地被劇中主角帶動,跟住佢嘅節拍郁動㗎喇。 :p

      刪除
  2. 卡臣:

    打模型直昇機難過打真的直昇機,因為細好多,仲要飛車嚟打,瞄準勁過荷李活片。所以眼鏡蛇威過荷李活殺手.

    回覆刪除

LinkWithin

Blog Widget by LinkWithin