~~~~~~~~~~~~~~~~







2014年3月26日 星期三

讀心術


讀心術

七日前,眼鏡蛇接了一單生意,殺死了一名江湖大耳窿。大耳窿的兒子要眼鏡蛇填命,聘請一名超級殺手剷除眼鏡蛇,一報殺父之仇。

兩日前,眼鏡蛇在便利店買煙時,首次遭該名超級殺手埋伏,殺手綽號叫「穿心」。點解叫穿心?因為他懂得「讀心術」:只要兩人四目交投,穿心便可以看穿對方心裡面想什麼,所有目標的心意想法都會給穿心看穿,殺人易如反掌。

眼鏡蛇在便利店遇伏時,腦裡盤算用什麼方法反擊、用什麼途徑逃走、都一一被穿心看穿而攔截。最後眼鏡蛇全靠幸運才能逃出生天。

眼鏡蛇向殺人組織打聽之下,知道穿心的來頭和背景後,心裡發毛。遇上比自己強勁的對手,今次條命岌岌可危。但眼鏡蛇不會坐以待斃,他問殺人組織介紹了一個心理醫生,去睇吓有無方法可以破解穿心的「讀心術」?希望找出穿心的破綻和對付方法。

眼鏡蛇拿著心理醫生的咭片,循咭片上的地址,來到一幢商業大廈正門。正想踏進門口時突然給人攔腰截著,立即退後,伸手入腰間準備拔槍還擊。睇真啲原來只是一個手持傳單的肥阿嬸:「先生,三樓眼鏡直銷中心,上去參觀吓!全部貨品八折。」眼鏡蛇知道不是遇襲,才鬆一口氣。

眼鏡蛇上到診所,向護士說:「約咗Dr. Lo三點正。」
眼鏡蛇入房見到Dr. Lo,問如何對付「穿心術」?
Dr. Lo在書架找出幾本參考書,翻兩翻之後,好有自信咁提議:「若要避免給對方看穿自己心意,一於避開對方的目光便可。」

眼鏡蛇點頭,追問:「如果我心裡面專登諗著一個錯誤嘅答案,咁可唔可以用嚟誤導對方,等佢信以為真呢?」
Dr. Lo:「應該係……唔得!因為對方嘅閱心術,會睇得出你係存心『煽佢』,而唔會被你呃到。」

眼鏡蛇:「咁~我有無辦法可以令到……」未講完,突然傳來「嘭」一聲巨響,劃破寧靜的診所。嚇得Dr. Lo連本書都跌落地,目瞪口呆!

醫生房外傳來一下槍聲,眼鏡蛇好敏捷、碌地滾到房另一端,拔出曲尺手槍,躲在屏風後。房門被一腳大力踢開,持槍的「穿心」,殺氣騰騰、慢鏡頭步入房間。可惜沒有白鴿從左右飛出作陪襯,嘥咗咁好的氣氛。

穿心一望Dr. Lo雙眼,運用「讀心術」已知道眼鏡蛇躲在屏風後,穿心立即轉身送出一槍,眼鏡蛇閃身避過子彈,順勢碌出醫生房外。

房外早已空無一人,剛才穿心闖入診所,向天花板開了一槍。嚇到護士病人雞飛狗走。眼鏡蛇拾起地上一副病人慌忙逃走時遺留下來的太陽墨鏡,衝出診所。經後樓梯,朝大廈天台奔上去。

穿心的追殺對象只是眼鏡蛇,他不會對Dr. Lo浪費多餘的子彈。穿心隨眼鏡蛇往天台跑。兩人走到烈日當空的天台,上面有大廈水箱、電梯機房、泵房、衛星碟型天線等等設施,成為兩人追遂的屏障。互相向對方開槍及還撃。

「嘭!」「嘭!」「嘭!」「嘭!」「嘭!」.....作為一個專業殺手的眼鏡蛇,他每開一槍都要用心數著自己有幾多發子彈報銷。結果眼鏡蛇數了13吓,換言之,他槍膛內的13子彈已全數耗盡。

一輪槍戰後,兩人都沒有中槍受傷。穿心神出鬼沒突然出現在眼鏡蛇面前,兩名殺手立即互相用手槍指著對方的額頭;大家都Freeze咗。沒有子彈的眼鏡蛇知道今次死梗喇。

穿心哈哈大笑:「你唔使出聲!你心估緊我支槍仲有無子彈吖嘛?」
「你點知架?……
「你唔使講喇,你仲想問明明戴著黑超,點解都可以睇穿你個心吖嘛?」
「係呀……
「因為我嘅閱心術係可以睇穿黑超…..哈哈!你鬧頭先個心理博士都無用架啦!」
「咁你仲睇到乜呀?」
「哈哈!你個心話俾我聽你支槍仲無哂子彈!」
仆街喇!」
「你仲好驚喎!哈哈!受死啦!」

眼鏡蛇下意識退後,右腳踩到地上一盒紙包檸檬茶的空盒,唔覺意踩爆紙盒「嘭!」一聲!穿心應聲倒下,一顆子彈穿過穿心的胸膛。穿心痛苦地抽搐,用顫抖微弱的聲音問眼鏡蛇:「點解咁架?」

眼鏡蛇好招積、嘴藐藐咁回答:「哼!乜都俾你估到?我仲係眼鏡蛇咩!」穿心死不冥目斷了氣,眼鏡蛇確保他死後,無力跌坐地上,全身乏力,他也問自己:「點解…..會咁架…..?」

原來眼鏡蛇一向數口唔好,開了12,就以為自己已經開咗13槍,無哂子彈。而他的手槍改裝成「聲音操控」,一聽到「嘭」一聲(踩爆檸檬茶紙盒)便會自動開槍。射出第13發子彈。穿心就這樣一個唔好彩被眼鏡蛇的最後一顆子彈,打進他的心窩。

黎明曾經講過「要贏人,先要贏自己。」估唔到眼鏡蛇就「要呃人,先要呃自己。」穿心估唔到眼鏡蛇「真亦假時 假亦真」的做人哲學。真係死咗都唔知為咗乜嘢事。

眼鏡蛇解決了殺手界一哥,自己在殺手排行榜排名又高咗,咁接生意時可以叫高價啲。忍不住哈哈哈大笑起來。既然今次咁威,一於乘「大廈抹窗的吊船」落樓。咁先叫做「型」呀嘛!

在下降的吊船內,咁啱有幾隻白鴿飛過,眼鏡蛇好型咁點起一支煙,睇吓四周的樓景,風涼水冷,大地在我腳下。又喺時候做「完成任務的signature」,咦!現金又用完,袋中只有肥阿嬸派過的眼鏡直銷中心宣傳單張,照撕可也,散於風中。

「轟隆」抹窗吊船震一震,停了。
「哎呀!點解隻吊船遲唔壞早唔壞,係都要揀係呢個時候嚟壞呀!?」

前面一嚿大黑雲漸漸飄近,睇嚟將會來一場傾盆大雨將要降下,電話剛剛無電,眼鏡蛇叫天不應,叫地不聞,超無奈︰(

一隻黑色烏鴉,由左至右,慢速飛過眼鏡蛇的頭頂,發出「哇~哇~」的乾澀叫聲。



三少爺說︰心病還須心藥醫。

12 則留言:

  1. 呢集食番上集提過嘅「手槍改裝成「聲音操控」」,好嘢喎,眼鏡蛇一向好運,數錯子彈再呃錯人呢條橋好得。

    呢個系列可以拍番套笑片,票房起碼會好過王晶,最好搵埋張家輝用「化骨龍」腔嚟做眼鏡蛇呀。

    回覆刪除
    回覆
    1. 每個人心目中都有眼鏡蛇的模樣

      如果拍成電影,我希望男主角係林雪

      刪除
    2. 每集嘅死者搵羅樂林做,佢喺TBB都死慣o架喇,佢可以一日死五次o架,每次都死得好pro。

      我想做阿火多d喎,圍圍可唔可以搵娜姐做呢?

      刪除
    3. 羅樂林做哂所有死者,太好啦呢個主意!

      如果「圍圍」搵娜姐做,我做「豬肉榮」
      你做阿火, 啱呀

      吳孟達做李SIR

      刪除
  2. 卡臣:

    心理醫生喺做實際啫,讀心術要靠江湖大佬!見得大場面多至醒嘅。嘻嘻!

    回覆刪除
  3. 忽然間由周潤發feel 變左IQ博士/小丸子feel, 眼鏡蛇果然大人細路都0岩睇

    回覆刪除
  4. 一气呵成,看到心惊胆战,虚惊一场!眼镜蛇真是大命!
    (卡臣为何偏爱他?^^)

    回覆刪除
    回覆
    1. 我偏愛男主角.....因為男主角一死,便無戲可做下去。

      刪除

LinkWithin

Blog Widget by LinkWithin