~~~~~~~~~~~~~~~~







2014年3月21日 星期五

滅火戰車


滅火戰車

早上10:01分,眼鏡蛇駕著他的戰車「日產Skyline」,送太太Jessica到銅鑼灣購物,眼鏡蛇在「7時至10時禁區」內讓Jessica落車,之後他駛到街尾,就遭一名交通警截停,要票控眼鏡蛇於禁區內違例上落客,阿Sir話見到眼鏡蛇喺9:59分落客。眼鏡蛇堅持是10:01分,兩人爭吵起來。

鐵面無私的阿Sir無你咁好氣,把告票拋進眼鏡蛇的車窗內,轉身就上電單車駛走。眼鏡蛇誓言要向「警察投訴科」投訴呢位交通警員,立即記低該阿警員編號:PC25922。如果「投訴科」無合理解釋,眼鏡蛇一定會再投訴,投訴到「一哥」為止。

眼鏡蛇在車廂內,要盡快平伏心情;因他中午奉命去暗殺一個黑社會大佬「撈粗哥」,不能讓激動的情緒,影響到自己執行任務的水準。

* * * * * 

停車場內傳來一聲槍響

眼鏡蛇趁「撈粗哥」獨自去停車場攞車之際落手。可能受到今早不快事情影響,眼鏡蛇一出手便「撻Q」。擊不中撈粗哥之餘,更讓撈粗哥跳上他的戰車「三菱Evolution」逃走。眼鏡蛇隨即跳進「日產Skyline」,兩部街車於烈日下,在鬧市中追逐起來。

180咪的「Evolution」駛上觀塘繞道,漸漸拋離「Skyline」,怎料警方竟然咁啱得咁蹺,於高速公路擺「路Block」捉快車,「Evolution」見到前面有警察擺路障,無奈當時撈粗哥身上藏有毒品,只好直衝過去!三名執勤的警員險遭「Evolution」輾過。「Skyline」離遠見到有路障,已經開始減速,在路障前慢慢停低。

一名險遭輾過的警員,花名叫「阿火」,他本來是CID,因做事太魯莽太急躁,闖了大禍,被上頭燉佢冬菇做制服交通警。阿火其實是患了燥狂症,又睇得太多荷里活警匪片,當咗自己係「Tom Cruise」,幻想自己係辣手幹探,嫉惡如仇

阿火剛才險遭「Evolution」車死,身心受到刺激,這刻燥狂症病發。一手截停了眼鏡蛇的「Skyline」,因為在云云路過的汽車中,只有「Skyline」才可跟「Evolution」匹敵。阿火拔出配槍,指著眼鏡蛇大叫:「而家警方徵用你架車,你立即爬過去隔離位,我坐司機位,等我揸!」

眼鏡蛇原本追殺緊撈粗哥,突然殺出一名勇猛幹探,幫手揸車,一齊飛車追截撈粗哥。眼鏡蛇唯有配合警方,一於警民合作。

阿火手車認真辣,如果阿火唔做交通警,做「黑市車手」或者做「打劫駁腳」,應該餓佢唔死之餘,仲可以有一番作為。

由觀塘繞道駛到西貢公路,「Skyline」緊緊追貼「Evolution」。把其餘增援的警車遠超抱離。阿火跟「Skyline」車人合一,喺西貢公路,搵啱機會,踩油狠狠一嘢隊埋「Evolution」車尾,使之撞埋石壆停低,阿火終於成功攔截了部「Evolution」。眼鏡蛇連忙問︰「警方會賠返架車俾我過呵?」

阿火唔埋眼鏡蛇的查詢,立即跳落車,拔槍指向車廂內的撈粗哥,青筋暴現,喝令:「雙手放喺頭度,慢慢行出嚟,蹲底!」阿火正想用手銬鎖起撈粗哥之際,撈粗哥身為黑社會大佬,點會唔反抗?起腳踢開手銬,阿火和撈粗哥拳來腳往,兩人失去重心滾在地上,更相相碌落山坡下。兩分鐘後,山坡下傳來一吓破空的槍聲……

山坡下,撈粗哥胸口中槍,血流如注,奄奄一息。阿火則昏迷在一邊,阿火手中拿著的配槍,槍嘴仍有白煙冒出,很明顯是剛剛發射過。眼鏡蛇在「Skyline」等待隨後趕來增援的衝鋒車和騎警。眼鏡蛇舉手,示意山坡下,還有兩名傷者。

撈粗哥送院途中證實不治,稍後阿火在醫院亦甦醒過來,遭警方扣留,涉嫌誤殺。阿火只記得搏鬥中被撈粗哥一拳打暈,之後便失去意識。對於自己一時錯手殺人,而可能需要入獄,感到十分後悔。經此一役,阿火已經撲滅了心中那團撲滅罪惡的烈火

* * * * * 

其實殺死撈粗哥的兇手點會係阿火吖!眼鏡蛇見兩人碌落山坡,隨後趕至,剛好見到兩人互中對方一記重拳後,相相暈倒昏迷在地上。眼鏡蛇上前,用阿火的手槍向撈粗哥的胸部開一槍。抹去配槍上自己的指模後,放回昏迷的阿火手中。最後眼鏡蛇爬上山坡,返回車廂內,等待警方到來。警方邀請眼鏡蛇回差館落口供,晚上十時才可離開。

眼鏡蛇這一招「借刀殺人」,借阿火的手槍解決了撈粗哥。又係時候做「完成任務signature」。咁啱銀包中無現鈔,只好從袋中拿出今朝收到的交通告票,撕成碎片,按下車窗,黑夜中紙屑四揚,好有型啊!

* * * * * 

翌日,報紙頭條廣泛報導這一單警方濫權,徵用市民汽車去追賊,險象環生,為求捉人,罔顧車主安全。而Skyline的車頭亦被撞毀,市民的財產遭破壞。眼鏡蛇於下午收到「警察公共關係科」的電話,問眼鏡蛇有什麼需要或賠償要求?

眼鏡蛇說有三個要求。第一:要「一哥」親筆寫一封道歉信給自己。第二:要PC25922交通警員,親身向眼鏡蛇道歉,並撤銷昨天的違例票控。第三:維修汽車費用由警方支付。否則就難保會同傳媒有啲搞作。

結果,警方買了眼鏡蛇怕,私底下答應了眼鏡蛇,但警方唯一的條件就是道歉內容和過程,要絕對保密,不得向外界透露。眼鏡蛇同意。他昨天吃了那一口的冤屈氣,終於可以得以宣洩。

此時,「警察公共關係科」在電話中要求他交出「違例告票」作抵消手續。眼鏡蛇「O嘴」︰「吓?張告票….



二少爺說︰而家警權過大,真係啋你都傻。

6 則留言:

  1. 卡臣:

    眼鏡蛇應該叫做幸運蛇,每次行事都好似有神助咁嘅。嘻嘻!

    回覆刪除
  2. 我嚴重懷疑呢個故事嘅第一段係真人真事改編呀。

    今次眼鏡蛇一招真係「借個火嚟駛吓」喎,希望火哥最後冇事,唔駛坐監喇。

    或者火哥坐監被革職後,眼鏡蛇搵埋佢做拍擋,一齊殺人。佢哋兩人一個好彩,一個燥狂,拍埋一齊一定好多火花,好搞笑。

    回覆刪除
    回覆
    1. 哈哈~~如有雷同,實屬巧合

      而家警權過大,火哥可能打得甩官司,只是革職處分

      佢地拍當?...可惜男主角是獨行殺手,一拍人就應該出事

      刪除
  3. 警務署一哥梗係要道歉啦, 點可以得失眼鏡蛇呢挺「良好巿民」...!!!

    回覆刪除
    回覆
    1. 佢年中剷除唔少壞人,應該頒好市民獎俾佢喇

      刪除

LinkWithin

Blog Widget by LinkWithin