~~~~~~~~~~~~~~~~







2014年1月24日 星期五

明天開演唱會



明天開演唱會

紅磡體育館不是一個體育館,而是給歌手開演唱會的場地。歌星以到紅館開show為奮鬥目標。香港歌星開演唱會時,除了歌曲rundown、歌衫舞台唔同之外,歌與歌之間嘅對白其實都係差唔多,可以循環再用。以下十句是演唱會的百搭對白。

第十位:「我一話開演唱會,以下呢位嘉賓就立即話要嚟幫手。」
歌星唱到無氣,需要找個嘉賓嚟撐場,換吓衫抖吓氣補吓妝。介紹嘉賓的其中一個方法就是打「友情牌」,江湖兒女講義氣相肩插刀義不容辭拍心口做嘉賓。其實藉以增加自己曝光率,一家便宜兩家着。歌星有時會肉緊加多一句:「佢認真唔話得,啱啱由外地飛返香港,一落機就趕嚟呢度!」

第九位:「我今晚喉嚨唔係好舒服,唱得唔好,大家原諒!」
有啲歌手唱Live根本好「牙煙」,走音唔跟咇甩嘴忘記歌詞。事先張揚自首投案話喉嚨痛失聲,打埋類固醇針,唱得唔好變成順理成章的護身符。難怪歌手愛用煙用酒用夜蒲去保養他的爛聲,否則便會失去這度護身符。

第八位:「送上今晚最後嘅一首歌。」
如果歌星想製造一個小高潮,只需要宣佈以下一首歌係今晚最後嘅一首歌,歌迷立即頓足大嗌encore!唔好咁快完場呀!消費者希望已付的門票能夠獲得最大效益,就算12點,開哂場地燈光都唔捨得離座走人。

第七位:「邊個有睇我上次嘅演唱會?有就嗌一聲嚟聽吓!」
歌星想現場測試一吓自己嘅人氣,問那些現場觀眾對自己不捨不棄,開親concert都嚟捧場,便會問以上問題搞熱氣氛。但香港觀眾向來比較冷漠,無咁容易就被你隨便講一句,就樂意替你造勢,吶喊助威。

第六位:「揮動你哋嘅電筒/電話,嘩!好靚呀!」
入場時派給觀眾一支小電筒,唱冧歌時叫觀眾一齊開電筒,製造浪漫星光氣氛。或者叫觀眾開啟手提電話的螢光幕,一樣有同樣滿天星的效果。歌星一定好陶醉咁,賣魚讚魚新鮮,感動講一句:「嘩!好靚呀!」

第五位:「邊面嗌得大聲啲,我就去邊面先!」
如果歌星開四面台,歌星面對那一面觀眾多啲,等如剝削其他三面觀眾。大家都俾咁多錢入場,如果歌星行嚟自己坐嗰邊多啲,就等於賺多咗。在這情形之下,觀眾受誘因驅使,就唔介意嗌大聲啲啦!情形就如跳艷舞的dancer,邊面老板願意俾多啲,dancer就去邊面。

第四位:「識唱嘅朋友一齊唱吖!」
香港卡拉OK之風氣根深柢固,演唱會的監製,想將紅館變成超大K房。或者想觀眾更加投入演唱會。歌星呼籲觀眾一齊拍手一齊唱,咁就可以製造「萬人大合唱」的動人場面。日後推出DVD都多個賣點吖。

第三位:「希望佢喺第二個空間聽到!」
歌星向樂壇已故前輩歌星獻唱致敬,唱完之後眼泛淚光、聲音微震,感性地說:「希望佢喺第二個空間聽到!」歌星輕易借力讓觀眾在這個演唱會中找到感動位。其實已故歌星泉下有知,見到後輩們唱得差之餘,仲不斷借自己過橋,唔知應該感激定係感嘆?

第二位:「我哋今晚唱通宵!好唔好?」
又到搞熱氣氛嘅時候,歌星話唱通宵,對成萬觀眾開空頭支票,唔使負責任。邊有歌星會咁蝕底唱通宵?邊個賠錢俾紅館呀?觀眾聽完之後,又好開心咁大叫「好呀!」其實諗深一層,都知道只係一個大話。

第一位:「無咗你哋,我無可能企喺呢度!俾啲掌聲你哋自己!」
飲水思源,歌星多謝完各大贊助商之後,梗係要多謝一吓台下各位米飯班主啦。歌星自己一個人替萬幾位觀眾鼓掌,只會顯得太過勢孤力弱,不如叫觀眾俾返啲掌聲佢哋自己,自己替自己鼓掌。其實情形好似有朋友生日,同佢食飯,埋單果陣叫佢都夾返一份錢。自己慳水慳力之餘,大家又好似各得其所。

其他句子:
「我要多謝台前幕後各單位」、
「我今晚唔講咁多嘢,唱歌把啦!」、
「大家企起身跳舞啦!唔好俾佢停!」、
「我真係要唱出今晚最後嘅一首歌!」、
Keyboard…Gary!高音結他手…Peter!鼓手……
「你哋嘅反應,係咁多晚觀眾之中最好!」、
「等我飲啖水先。」、「我件衫閃唔閃呀?」、
「就算得番一個觀眾,我都會繼續唱落去!」。



二少爺說︰我第一次去紅館睇show,是廿幾年前的王傑。

10 則留言:

  1. 哎呀齋睇標題仲以為卡兄開演唱會添!

    回覆刪除
  2. 卡臣:

    我從來無去過演唱會,紅館一次都未入過,因無迷歌星,只鍾情AV女星。嘻嘻!

    回覆刪除
    回覆
    1. 國內公司年夜飯請AV女星做大獎,希望你有這種機會

      刪除
  3. Hello,打大家好,握吓手你哋就咁high喇,等我過埋嚟呢邊先。

    回覆刪除
  4. 阿强有无想系红馆演番场音乐喜剧甘啊?

    回覆刪除
  5. 回覆
    1. 邊位觀眾上次有睇我嘅演唱會,就嗌聲聽下

      刪除

LinkWithin

Blog Widget by LinkWithin