~~~~~~~~~~~~~~~~







2011年3月30日 星期三

孖女



孖女
 深宵中環SOHO一間酒吧,少女攙扶著一名飲醉了的西裝男士離開。行到馬路邊截的士,返回於司徒拔道的高尚住宅區。咦,睇真啲,那名剷青的西裝男士,原來無喉核,哦!原來是女兒身,這兩名Lesbian是一對戀人。

比較Man啲嗰位叫Sherman,在中環某上市證券公司做管理階層,薪高職優,位高權重,有車有樓。同事們知道她的「同性取向」,背後叫「Sherman」做「She is man」。Sherman家境富裕,家人早年移民到美國,在紐約定居,自己則留港工作。她還有一個在紐約讀書的弟弟。

而比較女性化、留有一把長髮的嗰位TBG叫Eliza,她是一位Visual Designer。Sherman如何搭上Eliza呢?在某次朋友生日派對上,Sherman遇上剛跟男友分手的Eliza,驚為天人。Sherman花錢力追Eliza,Eliza在感情最脆弱的時候,給Sherman乘虛而入,成功「拗攣」了Eliza。兩人在肇輝台同居,Sherman在金錢上全面照顧Eliza。Eliza很享受過這種物質生活。

 * * * * *

Sherman收到電郵:她在紐約讀戲劇的弟弟Julian將於明年畢業,他用電郵跟幾個香港劇團聯繫上,他要親身回港一趟,考察一吓香港劇場界有沒有發展空間。Julian打算在Sherman家中暫住一周。家人早已清楚Sherman的性取向,亦知道Sherman在香港跟一女子同居。

Sherman告訴Eliza弟弟將會暫住書房一星期,間屋是Sherman所擁有,Eliza沒有異議。

這晚,Sherman從機場接Julian回家,Julian首次見到「阿嫂」Eliza。Julian稍大Eliza一年。Julian知道Eliza是lesbian,雖然她靚女但沒有想入非非。首晚,一屋三人,睡在兩間房,相安無事。

 * * * * *

第二晚,夜半兩時許,Julian因為美國時差,半夜睡不著,見肚餓走到廚房找東西吃。在客廳遇上Eliza正用手提電腦工作。原來Eliza是「貓頭鷹」,喜歡在夜晚工作,她通常在書房工作,但因要讓出書房給Julian,Eliza改在客廳工作。而Sherman在睡房熟睡,仲發出好man好嘈的鼻鼾聲。Julian和Eliza打了一聲招呼。

家中是open kitchen,Julian在bar枱弄點東西吃,碰巧Eliza又肚餓,兩人便在bar枱前邊吃邊傾。傾吓傾吓,話題無邊際:話劇電影音樂旅遊,不經不覺便是黎明了。Eliza很享受跟Julian聊天,因為Sherman開口埋口,不是財經金融便是政局形勢分析等悶死人之話題。

 * * * * *

第三晚,Julian在書房忐忑,他希望Eliza會在客廳中工作,可以繼續單獨見面。結果Eliza真的在客廳工作,他們又傾過不亦樂乎,其實Eliza在睡房等Sherman一熟睡,便第一時間出客廳扮工作。

第四晚,Sherman跟Julian和Eliza到金鐘外膳,奇怪在於當Sherman在場,Julian和Eliza便變得陌生,好明顯是「此地無銀」的心理作祟。

Julian讀戲劇,感情豐富,暗裡對Eliza有好感,但對方是家姐的女人喎!想死咩?

Eliza其實「孿唔哂」,仲有少少「直的DNA」。但對方是「男友」的細佬喎!點可以呢?結果兩人進退維谷,唯有「玩曖昧」囉。

第六晚,是Julian在香港最後一晚,明天乘夜機回紐約。深宵2時半,兩人又好有默契出客廳。兩人都知道剩下最後一夜,傾到興起,索性開支紅酒送芝士。在酒精薰陶下、燈光又暗、情歌塾底、加埋又係最後一夜喎,情況相當之危急。嘩!兩人突然無言,近距離四目交投,兩人咀唇相距三吋咋,喂!想點先?

 * * * * *

Sherman駕車送Julian出機場,Julian乘夜機回美國。七天之旅完成,一切都結束。真的一切都結束?

Julian回到紐約,一齊回復正常。Julian在電腦前見Sherman的MSN online,hi家姐。

Julian says:多謝妳過去一星期嘅接待。
Sherman says:哼!我借地方你住,你仲想打Eliza主意?
Julian says:我無呀!
Sherman says:你以為我每晚真係瞓到乜都唔知呀!
Julian says:無呀!只係傾偈之嘛,沒有其他!
Sherman says:你走咗之後,Eliza乜都講哂,你好自為知,我唔想再講第二次!
Julian says:明白。

Sherman之後offline,嚇死Julian,以為跟Eliza的曖昧,神不知鬼不覺。原來一切盡在家姐的監視下。「你站在橋上看風景,看風景人在樓上看你。」

Julian決定以後唔在家姐面前提起Eliza,況且經考察後,香港劇場界沒有演藝發展機會,Julian決定留在紐約工作。

Eliza在電腦前舒一口氣。原來十分鐘前,Sherman的手提電腦碰巧出現問題,交給電腦知識較豐富的Eliza去檢查一吓。而Sherman沒有log out MSN,咁啱Julian 叫佢家姐,Eliza借用Sherman身份,跟Julian展開剛才的一段對話。

Eliza始終戀棧Sherman帶給自己的豐裕物質生活,Julian只是一個搞藝術的戲劇學生,沒有經濟基礎和事業保證。Eliza驚Julian日後會回港工作或苦纏自己,唯有出言終結這段關係的發展可能性。

其實,工作緊張的Sherman壓力很大,一上床便瞓到隻死豬咁,一覺瞓到天光,客廳發生什麼事她並不知道。

Julian對Eliza有好感,但Eliza選擇要飯票,對Julian投了棄權票。Julian可以省回鈔票,唔使買飛回香港的機票,不用兌現感情的期票。

「玩曖昧」沒有結果不重要,精彩之處在於它的過程。無論過了幾多年後,Julian仍然記得那一夜的旖旎。



故事靈感來自以下呢一首歌:

兄妹 - 陳奕迅
作曲:徐偉賢
填詞:林夕

對我好 對我好 好到無路可退
可是我也很想 有個人陪
才不願把你得罪 於是那麼迂迴
一時進 一時退 保持安全範圍
這個陰謀讓我 好慚愧
享受被愛滋味 卻不讓你想入非非

就讓我們虛偽 有感情 別浪費
不能相愛的一對 親愛像兩兄妹
愛讓我們虛偽 我得到
於事無補的安慰 你也得到模仿
愛上一個人的機會 殘忍也不是慈悲
這樣的關係你說 多完美

眼看你 看著我 看得那麼曖昧
被愛愛人原來一樣可悲
為什麼竟然防備 別人給我獻媚
不能退 不能要 要了怕你誤會
讓我想起曾經 愛過誰
我所要的她不給 好像小偷一樣卑微

64 則留言:

  1. 卡臣:

    我同你加插一段電視劇都出得既!

    嘩!兩人突然無言,近距離四目交投,兩人咀唇相距三吋咋,喂!想點先?

    Eliza跟著閉上眼睛,一張期待的嘴唇,於靜寂的客廳中,微微張開。她沒有白白地等待,Julian的熱唇,很快便滿足她的渴求。

    他倆初吻的滋味,使Julian失卻了自制,雙手突然摟抱著Eliza,兩張熱唇隨即糾纏不清。

    熱吻過後,Julian解開Eliza的睡袍,玲瓏浮凸的胴體,教Julian忘卻了現實。他把Eliza抱至梳化椅,共赴巫山。

    翻雲覆雨後,Julian對Eliza說:「我不會忘記妳!」

    Eliza伏在他裸露的胸膛上,柔性地回答:「希望你會再回來!」

    回覆刪除
  2. 佛爺

    嘩! 吓?
    咁激?

    其實我無寫下文
    只想留下想像空間
    可能佢哋乜都無做過呢
    只係醉酒的幻覺

    回覆刪除
  3. 卡臣:

    唔係激呀!電視劇都常有喇!我又無寫三級,聊齋都有味過我果段喇!

    回覆刪除
  4. 過程係緊要過結果
    多謝卡兄同佛爺帶俾我咁多想像空間
    諗返讀書個時見到個d tbg
    幾想幫佢重獲新生
    可惜只可遠觀!

    回覆刪除
  5. 卡臣:

    你可能遺傳佐維多利亞時代的保守DNA呀!咁都叫激?

    吾! ..... 你要去佛洛伊娃診所治療一下喇!嘻嘻!

    回覆刪除
  6. 韋嚇凸:

    你來說句公道話,你評下我係咪寫得太激喇!

    回覆刪除
  7. 佛爺

    明白
    你都係用一句:「共赴巫山」啫
    好含蓄

    請問:巫山在那裡?

    +++

    韋嚇凸

    男生想拗直TBG
    是一種自我挑戰
    我就無咁嘅自信
    正如女生問:點解張國榮係基咁嘥料?

    回覆刪除
  8. 佛爺

    可能我性抑壓得太犀利
    你寫少少嘢,我已經大呼夠激

    睇怕我要找人醫醫先

    精神科醫生,有無介紹?

    回覆刪除
  9. 我一路等緊孖女,以為係twins㖭,完場都無孖女,好失落

    回覆刪除
  10. naruto

    有孖女呀!

    最後julian在紐約結婚
    婚後,太太生了一對孖女
    十分趣緻

    回覆刪除
  11. 我記得有套戲"神探磨look"
    劉青雲一個拗直返對TBG夫婦
    一箭雙鵰!

    回覆刪除
  12. 最後julian娶左一對孖女,左右逢源得唔得呀?

    回覆刪除
  13. 卡臣:

    網上有解釋巫山:

    「傳說楚襄王和宋玉一起遊覽雲夢之台的時候,宋玉說:“以前先王(指楚懷王)曾經遊覽此地,玩累了便睡著了。

    先王夢見一位美麗動人的女子,她說是巫山之女,願意獻出自己的枕頭席子給楚王享用。楚王知道弦外有音非常高興,立即龐幸那位巫山美女兩相歡好。

    巫山女告訴懷王,再想找自己的話,記住就在巫山,早晨是‘朝雲’,晚上是‘行雨’。”

    現常用“巫山雲雨”形容男歡女愛,是自此留下來的。」

    回覆刪除
  14. 卡臣:

    精神科醫生?

    搵佛洛伊娃喇!佢高曾祖父係佛洛伊德!

    回覆刪除
  15. 韋嚇凸

    我記得有套90年代的電影「姊妹情深 」
    講袁詠儀拗直梁家輝

    +++

    naruto

    julian娶了一對孖妹
    孖妹懷孕了
    孖妹再生孖妹
    結果一家七口
    一個先生兩個老婆四個女

    回覆刪除
  16. 佛爺

    多謝資料提供

    原來紀錄了楚懷王的一次夢遺經驗

    佛洛伊娃<---正呀!
    佛洛伊娃 是否住在 佛洛伊甸園?

    回覆刪除
  17. naruto

    四個孖女長大以後
    她們嫁給一位中東石油王子
    一夫多妻制之下
    因為四個孖女都是樣貌相似
    下了更多孖女
    如細胞分裂一般倍增
    ...一個科幻故事

    回覆刪除
  18. 開了男葷,仲抵得住,真係錢能戰勝一切?唉....

    回覆刪除
  19. 校長

    其實這是一個真人故事:
    我認識一對TB情侶
    其中一個真的很Mam
    TBG就好女性化

    之後,他們分手
    聽說是好man那位提出分手

    之後,那位TBG就和一名佬一齊
    仲結埋婚添

    回覆刪除
  20. 我覺得TBG係有得拗,不過TB就難拗d

    我覺得某程度上,TBG都係留著鍾情男人的DNA...

    回覆刪除
  21. 『男生想拗直TBG
    是一種自我挑戰』

    你錯喇,佢地咁做唔係為咗自己㗎,係想用自己嘅性/愛嚟救贖TBG,帶佢哋走入正途,令佢哋領略真正嘅真箇消魂,好偉大㗎!

    回覆刪除
  22. l.minor

    「TBG都係留著鍾情男人的DNA...」
    這樣說;
    「喜歡女性化男子的男同性戀者都係留著鍾情女人的DNA...」

    +++

    歪歪

    原來是「祟拜陽具」心理
    唔怪得女人詬男士用陽具思考
    (呢一句包括埋我)

    回覆刪除
  23. 阿卡臣真系好唎架,听首歌都可以揾到灵感!

    死咯!di人又直又挛,又挛又直,好系万能插苏敢,唔系乱晒大龙咯?

    回覆刪除
  24. 你用陽具思考,嘩,能夠諗到咁多故事,即係…

    回覆刪除
  25. helloninie

    唔犀利
    無靈感,唯有聽歌找靈感

    +++

    歪歪 & I.minor

    即係:具剛陽味的故事

    回覆刪除
  26. l.minor,我都未講完你就笑先?

    卡臣,點止具剛陽味,仲係持久亢奮𠻹!

    補充多句,你話『男生想拗直TBG是一種自我挑戰』

    其實如果想挑戰應該去拗直TB!

    回覆刪除
  27. 歪歪

    男士拗直TB?
    雖有成功感
    但苦了他囉

    除非他有gay的傾向
    否則又如何跟一個咁man的(女)人一起呢?

    回覆刪除
  28. 唔駛要有gay嘅傾向,揾個「微直」嘅男人就得。

    回覆刪除
  29. 歪歪

    揾個「微直」?
    it is magic!
    咁都俾你諗到

    回覆刪除
  30. 卡臣,歪歪:

    咁,若果微孿遇上微直?兩位拗「孿/直」大師,有何高見呢?

    回覆刪除
  31. 佛爺

    若果「微孿」遇上「微直」,
    演變成雙性戀
    「微孿」愛男人之餘又間中試吓女人
    「微直」愛女人之餘又間中試吓男人

    回覆刪除
  32. L.mimor

    「得閒炒飯」
    我無睇呀
    不過聽我的lesbian朋友講
    該戲不盡不實

    回覆刪除
  33. 啱啱呢個禮拜喺電視睇咗《得閒炒飯》
    普普通通喇~

    《兄妹》超喜歡,個 video 又好睇~

    回覆刪除
  34. largeheadboy

    講開又講
    我因為超喜歡《兄妹》首歌和video
    所以寫成《孖女》這個故事
    更因為有《孖女》而寫埋《孖仔》
    揍成一對

    回覆刪除
  35. 『it is magic!
    咁都俾你諗到』

    食字王,呢句應該由我講!

    *********************

    佛爺,『若果「微孿」遇上「微直」?』

    我認同卡臣所講,因為相對於「極直」同「極攣」,「微直」同「微孿」應該比較有更多可能性,叫佢哋做「雙性戀」更為貼切,咁就唔駛拗攣拗直。

    回覆刪除
  36. 歪歪

    『就算「微孿」遇上「微直」』
    若果對方唔啱眼緣
    只會變「微軟」

    回覆刪除
  37. 咁「微軟」都好過「微硬」!

    回覆刪除
  38. 歪歪

    「微硬」?
    咪同腳指尾無異?
    愛嚟做乜?

    回覆刪除
  39. 搞暧昧?
    杨丞琳的【暧昧】也适合吧?
    红极一时呢!

    回覆刪除
  40. 原來攣直係可以隨物質而改變...

    回覆刪除
  41. cindy

    講起【暧昧】
    怎能不提王菲的【暧昧】?
    眉目裡似哭不似哭..
    還祈求什麼說不出..

    +++

    Desertfox

    你没有喉核
    但生到個BB仔

    +++

    SKII

    吳X如跟完俞X
    咪又跟陳X辛

    回覆刪除
  42. 唔 Logic ,其實 「微直」男 同「微孿」男 相愛,都係叫同性戀,「微直」女 同「微孿」女相愛,都係叫做同性戀, 佢哋都可以叫做「雙性戀」? 根本就係雙性攣多啲。

    回覆刪除
  43. Tee

    你有道理喎
    我搞錯了

    我以為「微直」是指直佬,不過帶「多孿」
    我以為「微孿」是指基佬,不過帶「多直」

    anyway 都係你睇得透

    回覆刪除
  44. Tee,

    假設「微直」男同「微孿」男相愛,「微直」女 同「微孿」女相愛,咁「微直」男同「微直」女 係咪算雙性戀?

    其實男女攣直已經夠煩,仲要分𠹺等級就更加分化,最好就係有朝一日,啲父母會問:「阿仔,你有冇女朋友?」之餘,仲會問多句:「咁有冇男朋友呀?」

    回覆刪除
  45. 歪歪

    有朝一日,啲父母會問:「阿仔阿女,你有冇愛人呀?」
    原來愛人包含了: 男、女、動物、電腦、人形公仔、靈魂...

    回覆刪除
  46. 如果同一時間我嘅愛人包含了: 男、女、動物、電腦、人形公仔、靈魂...會被人話我博愛定抑或濫交呢?

    回覆刪除
  47. 變性人不等於孿人。

    微硬,即係「極軟」。

    回覆刪除
  48. 歪歪

    會被人話你博愛定抑或濫交呢?
    應該話你撞邪
    要驅魔

    +++

    佛爺

    好嘢!咁都有得駁

    回覆刪除
  49. 卡臣:

    我被人做過一些心理學實驗架!有些問題,從極直到微直,分九級,諗到我黐線。

    回覆刪除
  50. 撞邪?要驅魔?係咪要咩嗰啲呀?邊位法師咁抵得諗呀?

    佛爺,變性人不等於孿人,但都可以係孿人,例如男變女後,依然鍾意女。

    回覆刪除
  51. 佛爺

    諗到你黐線?
    唔會
    諗到你「超直」啫!

    +++

    歪歪

    啲驅魔法師中年又大肚腩
    咪制呀

    回覆刪除
  52. 歪歪:

    但都可以係孿人,例如男變女後,依然鍾意女。

    你這個見解,我真係未諗過!男變女後,鍾意女人,為何他在男兒身時,不去追求女人呢?因為那時他覺得自己是女人,而他那時已喜歡女人了。

    那麼,他在變性前,是直佬!變成後,卻成了孿人。即是話,變性,也同時改變了他的性傾向!

    回覆刪除
  53. 卡臣,啲驅魔法師中年又大肚腩?我都老年又大眼袋啦!唉!

    佛爺,個男人未變性前對女性有興趣,但係覺得自己應該係以女兒身去愛另一位女人,所以變性前係性別認同障礙,換性之後就係攣人。

    回覆刪除
  54. 歪歪

    你老年又大眼袋?

    哈哈~我聽過你把聲喎
    咁young扮老?

    至於大眼袋,我懷疑你大春..

    回覆刪除
  55. 歪歪:

    咁,個男人變性前,靈魂是女人,若果他有性伴侶,他的性伴侶是直人,他卻是孿人。

    他變性後,他就要離開原來的性伴侶,而去重新找一個孿人。邏輯上很合理,現實是怎樣的,我就不清楚,有機會要上網問功課!

    回覆刪除
  56. 『我懷疑你大春..』

    卡臣,袋大有鬼用咩!

    ******************

    『邏輯上很合理,現實是怎樣的,我就不清楚』

    佛爺,現實真係有發生,有啲原來嘅伴侶,仲依然繼續一齊,因為在佢哋眼中伴侶換性之後都係同一個人,對方嘅性別已經不必考究。

    回覆刪除
  57. 歪歪

    係喎!
    又唔係袋鼠
    袋大有鬼用喎。

    回覆刪除
  58. I am genuinely pleased to glance at this webpage
    posts which contains tons of valuable facts, thanks for providing these data.


    Also visit my blog ... diets that work

    回覆刪除

LinkWithin

Blog Widget by LinkWithin