~~~~~~~~~~~~~~~~







2010年5月23日 星期日

錯誤的決定

錯誤的決定

《優客李林》於1991年的成名曲《認錯》,其中一句歌詞是:「是我自己錯誤的決定」。每人每天都需要做大大小小的各樣決定,當做了一些錯誤決定後,自己便會忟憎激氣!
今次數一數些會令到自己忟憎的錯誤決定,都是些雞毛蒜皮的決定。而那些人生重大決定,例如:入錯行、移錯民、買錯樓、結錯婚、生錯仔等,都不在今次討論範圍之內。

第十位:幾個聚會同晚撞期
命運弄人,一係就成個星期都無人約,一係就幾個functions撞啱喺同一晚。當你幾班朋友們,不約而同約你在同一個晚上去玩。由於分身乏術,你思前想後,揀了出席一個你以為最開心最過癮的聚會,推掉其他約會。結果,你出席的聚會悶到爆!反而從facebook見到你錯過的聚會相片,十分熱鬧高興!自己揀錯了,哼!真係激氣呀!

第九位:以為有得claim錢
當同事以為可以用公數,便會洗腳唔抹腳,胡亂揮霍起來。例如艱辛工作後,以為可以用公數吃飯當慰勞,狂叫到一枱都係,結果第朝先搞清楚原來無得claim飯錢,要各位同事自費,嘩!肉痛呀!早知唔喪叫啦!又例如OT遲放工,以為搭的士有得claim,飛taxi入天水圍。原來又係無得claim,早知慳啲唔搭的士啦!哼!真係激氣呀!

第八位:無化妝落街撞到朋友
女性有時貪方便或趕時間需要落街走一趟,諗著落一落街好快啫,無咁橋會撞到熟人啩?一於著住街坊裝兼唔化妝落街走一轉。點知在自己最鬆懈的狀態下,竟然撞到朋友同事、暗戀對象、前度情人、仇人等等。真想找個窿捐入去,平日花好哂靚妝著好靚衫,又唔會撞見熟人。哼!真係激氣呀!

第七位:Order的食物最遲來或最難食
同事們吃lunch都是趕頭趕命。叫茶餐午餐快餐包無衰。點知有人「玩有個性」嫌套餐難食,獨自order一些餐牌的冷門食物。結果人人食完,佢order的食物仍未上枱。
又例如餐廳有新菜色,無人夠膽試。而其中一人率先點了新菜,唔介意自己做白老鼠試新嘢。結果新菜色超難食,唔衰攞嚟衰!哼!真係激氣呀!

第六位:考試答是非題
考試答是非題,一半機會啱一半機會錯。當做完試卷而有時間覆卷,看到「是非題」的答案時,突然信心動搖,猶豫起來,把原本的答案改了。結果考完試對返答案時,先知道原來第一個答案才是正確,即是自己衰手多,唔錯攞嚟錯,哼!真係激氣呀!

第五位:轉搭的士,巴士便來
對於慳家一族來說,交通工具首選步行,次之巴士。但有時需趕時間,等了巴士很久,但巴士仍未到站,心裡焦急起來,終於到last minute都無巴士嚟,忍痛揮手叫的士。當跳上的士後,回頭一望,那部望穿秋水的巴士便徐徐駛至。巴士唔遲唔早,趁妳上taxi嗰刻才到站,哼!真係激氣呀!
另外一個例子:等了巴士很久很久,不如點一支煙消磨吓時間,一點起煙,巴士便到,被迫吸一口便趕快擠熄支煙登車。哼!真係激氣呀!

第四位:轉排第二條隊仲耐
香港人去自動櫃員機、超市付款、快餐店、過海關,都是multi-lining(多行排隊)。香港人出名心急,見到自己排緊條隊咁長,好似會好耐,千方百計想轉到另一條更快的隊。看準機會,轉排另一條好似會快啲的隊列。點知過了檔才發覺自己原本排開嗰條隊才是最快!因快得慢。哼!真係激氣呀!

第三位:購物後發覺有其他店舖更平
購物前已經做足research準備功夫,去完多間店舖格價後,幫趁價格最平宜最多嘢送嗰間店舖,開開心心攜著戰利品步出店舖。但購物後最好不要再格價,否則有可能在街尾找到另一間店舖更平更抵,咁就即時大嘆唔抵!點解唔行多一步呀!?哼!真係激氣呀!

第二位:遲到早退,兜路撞正老細
打工仔久唔久會上班遲到或下班早退,因為作賊心虛的心理,便會放棄使用正門出入,改兜後門或其他防煙門。結果咁神奇在那些後門撞正上司或老細!慘被老細怒啤及留下壞印象。可能老細專登捉蛇,打工仔十分後悔:如果行正門可能反而無事,今次真係「聰明反被聰明誤」!哼!真係激氣呀!

第一位:帶了雨傘,天便放晴
見天陰陰,似落雨又似唔會落,左度右度,唔知好唔好帶傘?但唔知點解:帶了雨傘嗰日,天便會放晴?點解唔帶雨傘嗰日,天便會落雨?萬試萬靈。又或者因為太大雨,喺街邊是但用幾十蚊買把雨遮應急,點知一俾完錢,就立即停雨。同樣地:點解帶了厚外套嗰日,天便回暖?點解唔帶外套嗰日,便會返風?點解你早返工嗰日,老細遲返公司睇唔到你早返?點解你遲到嗰日,老細便一早在公司見到你遲到呢?Why?哼!真係激氣呀!



我試過最激氣的決定,就是幫趁那間TLC鏈鎖健身室,我prepay年費後便關門大吉,哼!還我月貴呀!真係激氣呀! 不過識講「是我自己錯誤的決定」都有一樣好,就係不會把自己犯的錯歸咎於他人身上。自己怨自己,唔好賴人嘞。

認錯 - 優客李林
作曲 / 填詞:李驥

I don't believe it 是我放棄了妳 
只為了一個沒有理由的決定
以為這次我可以 承受妳離我而去
不必讓妳傷心 卻刺痛自己

一個人走在傍晚七點的台北city
等著星空就像黑夜一樣的來臨
I hate myself 又整夜追逐夢中的妳
而明天只剩哭泣的心

怎麼才能讓我告訴妳 我不願意
教彼此都在孤獨裡忍住傷心
我又怎麼告訴妳 我還愛妳
是我自己錯誤的決定

我要告訴妳 我不願意
教彼此都在孤獨裡忍住傷心
我又怎麼告訴妳 我還愛妳
是我自己錯誤的決定

20 則留言:

  1. 卡臣:

    仲有一條,有哥仔和女仔,熱情如火時,無帶避孕套,結果就要返深圳。哼!真係激氣呀!嘻嘻!

    回覆刪除
  2. 人生的確要不斷作決定,所以有人有決定困難病症,呢頭剛決定果頭見更好的,衣食住行無一幸免!說到尾,都是各人造化!

    我一直很喜歡這首歌!

    回覆刪除
  3. ps︰不知為何你的網頁難開咗,有少一段日子了!:p

    回覆刪除
  4. 講得好中,1,3,4,7經常啦

    以你寫開嘅,應該會有。。。當年兩個男友,女嘅揀左個有經濟基礎,但結果另一個有名有地位,而自己老公投資失敗兼打佢,哼!真係激氣呀!。。。

    回覆刪除
  5. 第7位我成日都中...
    揀親d野永遠係最難食...''

    回覆刪除
  6. 佛爺

    我尊敬你
    因為有些男人
    無帶袋都要強行
    (最多體外)

    ps.我不是有些男人啊

    ++++

    coffee

    我有朋友有「決定困難病症」
    對住餐牌
    久久未能order

    這首歌我也喜歡呀

    我的blog難開?
    我日日開 都無事喎
    奇異

    ++++

    naruto

    我都講咗:
    「入錯行、移錯民、買錯樓、結錯婚、生錯仔等,都不在今次討論範圍之內。」

    揀差男友
    不可一不可再

    +++

    美麗塋

    我就無這煩惱
    因我永遠order最safe的東西
    唔敢試新嘢

    回覆刪除
  7. 絕對,全情,無限,極力同意你既錯誤的決定呀 ??
    不過我每次做決定時, 都預左會係咁, 所以真係發生左都無咁傷, 嘻嘻~~

    回覆刪除
  8. 卡臣:

    哈哈!我無帶袋在身的,我淫口佛心,唔會亂來的。

    但我有個朋友真係好野,佢雖然風流,但銀包,褲袋等都放有避孕套。隨手都拿到兩三個出來比我睇。

    我問佢係咪怕無端端做咗老豆。佢話唔係。因為個個週末都有一兩件新的,佢自己都驚領野架!嘻嘻!

    回覆刪除
  9. 佛爺

    嘩!
    你朋友真係有計
    夜夜笙歌


    我都係放工回家睇電視
    適合我多啲

    回覆刪除
  10. 卡臣:

    朋友同我講,有很多浦點,一定搵到一夜情,唔明點解有男人要去召妓咁哂錢。不過佢就真係靚仔同外向。

    我問佢那些女人是否單身的?佢話唔一定,有一些結婚只有一兩年,老公出外公幹,佢地就出來偷食,好閒啫!

    我問佢有無試過痴上身,甩唔到身?佢大笑,一夜情,邊會痴上身!痴線!

    但我又唔明佢,一個禮拜搞幾件,唔厭嘅咩?你比我每個星期都食幾次神戶牛柳,就算唔覺膩,我都唔會覺得好味啦!嘻嘻!

    回覆刪除
  11. 佛爺

    有些男人的DNA像森林的雄性動物
    需要多交配
    繁殖下代

    我則吃草多
    回家對牆自閉

    回覆刪除
  12. 卡臣:

    「有些男人的DNA像森林的雄性動物,需要多交配。」

    你這句真係形容得好恰當,佢真係好似動物,唔似人類,無哂抑制力!

    回覆刪除
  13. 佛爺

    睇到「佢真係好似動物」呢一句
    仲以為佢身如猩猩般粗獷
    下體如馬
    持久力如獅子

    原來講緊自制力
    車~~

    回覆刪除
  14. 卡臣:

    一個「車」字,比你笑死我!

    佢成日講到繪影繪聲,聽佢講,真係好似睇緊猩猩、野馬和獅子交配緊咁呀!嘻嘻!

    回覆刪除

  15. 佛爺

    你個friend經常出現於
    National Geography /
    Discovery Planet Channel 架?

    回覆刪除
  16. 卡臣:

    我個朋友唔止出現係National Geography /
    Discovery Planet Channel,佢也有出現在音樂台架!有一次佢搵到兩個女陪佢一齊唱K,其實只有佢一人站著唱,兩個女的就坐在他前面,以「蕭管樂」伴奏,真係羡慕死!嘻嘻!

    回覆刪除
  17. 佛爺

    喺咁嘅情況下唱歌
    應該會走音
    哦~哦~~

    回覆刪除
  18. 卡臣:

    我唔知佢有無走音喎!我聽佢講咋喎!如果我在場,我會立即走人,容乜易比果兩件大食女食埋我架!嘻嘻!

    回覆刪除
  19. 佛爺

    咁嘅情況之下
    你會立即走人?

    法官大人
    係咪真係心果句先?

    回覆刪除
  20. 卡臣:

    我 ... 我 ... 我係咪可以唔答架?嘻嘻!

    回覆刪除

LinkWithin

Blog Widget by LinkWithin