~~~~~~~~~~~~~~~~







2009年4月1日 星期三

超人片集

超人片集

我讀小學返下午校,
放學後第一件事是趕回家,因為要趕著睇電視;
最愛看日本的「鹹蛋超人」和「幪面超人」!
現在用依稀的記憶,數一數十句典型超人對白:

第十位:「毀滅地球!統治地球!」
超人和怪獸要製造正邪對立的死對頭宿敵關係,
惡魔黨的首要任務是:「毀滅地球!統治地球!」
製造就業機會給超人去「保衛地球」。
片集開首先講惡魔黨今次製造什麼危機去「毀滅地球」,
「今次一定可以毀滅地球!嘿嘿~嘻嘻~哈哈~」沾沾自喜!

第九位:「首領!呢隻奴隸獸……」
惡魔黨的「首領」是極度樣衰陰深邪惡恐怖的大奸角,
「奴隸獸」就是劇中張牙舞爪的怪獸,通常戲份只得一集而已。
在「奴隸獸」破壞地球之前,惡魔黨會向觀眾介紹它有什麼「把炮」?
例句:「首領!呢隻奴隸獸專食債券架,今次一定可以消滅人類!」

第八位:「出動!出發!」
「基地」不是指「Propaganda」。
「基地」是超人片集必有的,地球防衛隊返工的地方。
「基地」的地址通常是「秘密」,
「秘密基地」內備有戰機、戰車、機械人等先進武器、
每次隊員出發,例必好似保險從業員嗌一嗌口號:「出動!」或「出發!」
之後,從森林或瀑布底射出幾架戰機或機械人。

第七位:「變身!合體!」
超人分「有機性」和「機械性」,
「有機性」指超人本身擁有超能力,而非機械構造、
「機械性」指超人是一副機器或半人半機器,
「有機性超人」需要嗌一聲「變身!」才可令自己進入作戰狀況,
「機械性超人」需要嗌一聲「合體!」才可跟其他組件部分結合、提昇戰鬥力!

第六位:「我要收拾你!」「即管放馬過嚟!」
當超人由「正常人」變身而成之後,正式開始正邪大戰!
超人不需經過法律審判的正常程序,將「奴隸獸」未審先判、就地正法處死,
超人見奴隸獸喺度「吔文吔武」,大嗌一句:「我要收拾你!」
奴隸獸馬上回應:「即管放馬過嚟!」
搏鬥一觸即發!正式埋牙砌鑊金!

第五位:「哈哈!認輸啦!」
奴隸獸有頭威,一起手打到超人一仆一碌,
奴隸獸沾沾自喜,以為今次實贏,
向處於下風的超人,好得戚咁講:「哈哈!認輸啦!」或者「哈哈!投降啦!」
因為始終是兒童節目,片中潛移默化地向兒童灌輸「輸就要認」的觀念。
免得兒童日後長大「死雞撐飯蓋」、「死剩把口」。

第四位:「太可惡!太豈有此理!」
超人打「機械獸」或「奴隸獸」,超人例必先吃點苦頭。
超人被打到「攤攤腰」,在旁觀看的地球人替超人擔心,
超人不忿地:「太可惡!太豈有此理!」
將超人寫得人性化、有情緒:被人打鑊是會令自己心煩氣躁!

第三位:「好!出絕招!」
因為時間關係,每集大約三十分鐘,
處於劣勢的超人唔想阻住全世界收工,施展絕招收拾呢隻怪獸。
超人絕地反擊,大嗌一聲:「好!出絕招!」、「受死啦!」
三扖兩撥搞掂面前隻大嚿衰,收工!即閃飛走!
既然如此安排,點解超人唔一早出絕招?
係都要身痕,俾怪獸打鑊金先肯出絕招?

第二位:「下次唔會再放過你!」
當惡魔黨的「首領」知道今次派出的奴隸獸失敗,又慘遭消滅後,
會憤怒地向手下出氣,施行大懲罰,發洩一吓!
之後,咬牙切齒,咀咒超人:「下次唔會再放過你!」
希望下一集編劇會有大膽新突破,怪獸終於可以打贏超人一次!

第一位:「又一次拯救咗地球!努力呀!加油呀!」
每集最後三十秒,有VO總結一吓今集講乜,
其實集集都千篇一律,在黃昏遠鏡之下,超人畢直地飛翔,
VO:「超人又一次解決咗地球嘅危機!多謝你呀超人!」或
「超人一次又一次粉碎惡魔黨嘅奸計,負起保衛地球嘅責任!」或
「超人又一次拯救咗地球!努力呀!加油呀超人!」
之後打上「つづく」。

阿媽嗌:「熄電視!做功課呀!」
熄機~

Co-written by 卡臣 & 阿賢

30 則留言:

  1. 記得呀哥扮超人要我做巴魯坦...但到衣家都吾知巴魯坦係乜?

    卡臣你知冇?

    回覆刪除
  2. 真係,睇親卡通片,一定會有句“豈有此理吖”sometime somewhere出現。確是一經典~

    回覆刪除
  3. 我細個最鍾意個句係

    枯顱頭寶,賜我力量!

    嘩哈哈哈哈,

    回覆刪除
  4. 哈哈
    不過你所寫幾我一句都冇印象幾...

    回覆刪除
  5. 以前啲日劇臨尾會出現 「つづく」, 宜家唔多見, 好懷念!

    回覆刪除
  6. 我係臺灣大又少睇電視,你所寫幾我一句都冇印象幾...

    不過都幾有趣吖!

    回覆刪除


  7. 巴魯坦....全名:巴魯坦星人
    極度樣衰之Y咀怪獸

    提議妳都係唔好find out巴魯坦星人個樣
    妳會憎恨妳呀哥

    +++++

    ingrid

    哼!真係 豈有此理呀!
    受死啦!

    +++++++

    c+

    嘩!
    播he man 果陣...我讀緊中學啦!
    uncle car 上

    回覆刪除
  8. 小莫

    阿小莫同學
    我諗我同你隔幾代

    如果你聽過
    反而離奇

    ++++++

    肥貓

    「つづく」<--點解而家啲日劇無嘅?
    我都想知道答案

    ++++

    hana

    呢啲打打殺殺嘅超人片
    邊啱妳睇!
    又唔係「蕭邦大戰巴哈」

    回覆刪除
  9. 『比達囊』......

    鹹蛋超人變身果個工具,叫做『比達囊』...

    到而家為止,『電腦奇俠』主角成日好有 feel 咁彈幾手結他,但從來都無彈完整一首歌嘅.....

    究竟佢用咩牌子結他呢?

    佢其實識唔識彈㗎呢??

    『電腦奇俠』,係咪用『 Cuo 2 Duo』㗎呢???


    一個謎....


    つづく ...

    回覆刪除
  10. 有套鹹片,叫做『㗎妹大戰機械獸』....


    簫邦大戰巴哈<---咁都俾你諗到!

    可能你用左『比達囊』..

    回覆刪除
  11. 惡意匿名留言:「毀滅 blog!統治 blog!」

    眾 blogger 問卡臣:「首領!呢隻奴隸獸 .....」

    卡臣話唔駛驚,照寫:「出動!出發!」

    眾 blogger 一呼百應:「變身!合體!」

    卡臣對付匿名:「我要收拾你!即管放馬過嚟!」

    匿名仲係亂咁留言:「哈哈!認輸啦!」

    Hana 睇唔過眼:「太可惡!太豈有此理!」然後講:「好!出絕招!」即刻搵咗警司朋友攪掂。

    卡臣對惡意匿名:「哼!下次唔會再放過你!」

    眾留言:「又一次拯救咗 blogger!努力寫 blog 呀!加油呀!」

    ******

    無錯,係有 D 儍咗。應該唔關匯控事。

    回覆刪除
  12. 大文sir

    講起呢種集體回憶
    大家都興奮
    姑且放低「港女」話題先

    * * *

    電腦奇俠 1 揸的電單車, 在香港用作賣雪榚

    電腦奇俠 2 是吹喇叭的

    七星俠的變身眼鏡, 兒時我曾擁有

    彩虹化身俠 rainbow man 是第一代gay icon ~~

    大鐵人17號的brother 叫大鐵人18號

    鐵甲萬能俠的女朋友叫愛美神
    她的飛彈仍是津津樂道

    今次係咁多先

    回覆刪除
  13. 維京人

    我要叩個響頭俾你
    咁都俾你諗到!

    好彩有你維持blog界和平
    努力呀!維京人!
    blog界需要你!

    飛入雲中....

    回覆刪除
  14. 我哥曾對我許諾如果冇人養我會養我一世.所以我點會恨佢,雖然我家下吾洗佢養!

    記得果時我扮港姐冠軍佢就扮何B
    至於扮巴魯坦他要我載上廚房洗碗用的菊花牌王色膠手套重要比個麵粉袋笠住...呀哥夾住條大浴巾...叫我一聽佢講變身就扮比佢死...!

    回覆刪除


  15. 聽到妳兒時和哥的玩樂情況
    我都好有共鳴

    我記得跟鄰居玩上海灘
    重演上海灘大結局
    諗起都好好笑

    those will the days

    ++++

    巴黎

    小甜甜...我又無睇喎
    高達/超時空要塞 就有睇
    不過妳又唔知我講乜!

    回覆刪除
  16. 我細個唔鐘意睇超人, 太樣衰了, 不過有買過超人面具, 搞到成個面銀色~~

    我至爰既係"少雄三傑" !!!

    回覆刪除


  17. 「少雄三傑」
    呢位白獅頭人真勁!
    我都鐘意架!

    回覆刪除
  18. 我亞媽講, 話我亞哥扮超人o係張"木台"跳落黎, 整爛左張"木台", 俾亞媽打到飛起.

    回覆刪除
  19. 卡臣你好

    我介紹你睇一個日本海上自衛隊既廣告
    mms://stream.mod.go.jp/msdf/mso/koho_cm/cm/h18_cm.wmv

    如果睇唔到,去下面個website click 平成18年果段片黎睇啦. 唔好講笑我覺得個廣告好正

    http://www.mod.go.jp/msdf/formal/gallery/cm/index.html

    回覆刪除
  20. 市場維京人 :嘿嘿,我絕招點止咁少呢?得罪我係街行,係網上招搖都要小心吖!我冇咩多係朋友多同埋有些少唔等使嘅錢咁囉!

    假到出汁我睇唔過眼就會出聲/手/錢啦!

    hahaha

    回覆刪除
  21. 唔...我整返句..."你睇住嚟吖!我一定會收拾(返)你架!"

    唔啱呢句都得..."唔制吖、唔制吖"

    回覆刪除
  22. 卡臣,
    仲有超人心口個紅燈到時到候就會閃,一閃就大家都好緊張...不過次次最後都總會無事~.~!現實生活係咁就好啦...

    回覆刪除
  23. 卡臣 提到...
    『高達/超時空要塞 就有睇』

    卡臣,你嗰陣緊讀幾年班㗎?以我嘅記憶,高達係第一套打破咗傳統「一集三十分鐘正派打贏壞人」嘅框框,似乎係寫俾年青人睇,太細嘅小朋友都幾難跟到劇情。幾年之後嘅超時空要塞都係類似,但係劇情就簡單得多。

    呢兩套真係經典!

    回覆刪除
  24. 「少雄三傑」
    呢位白獅頭人真勁!
    >>>>
    風力神, 光力神, 賜我力量 !!!

    『高達/超時空要塞 就有睇』
    >>>兩套前後腳無記同麗的播出, 機動戰士0078,應該在79年左右首先播出, 之後大概80年就麗的播超時空。其實我冇乜睇超時空, 只係知道佢d武器設定好勁~~~

    回覆刪除
  25. 哎吔,哩個我唔識!

    我反而最中意係大力水手!

    回覆刪除
  26. 卡臣:
    記得小時候我很崇拜超人的,但他的口頭蟬,我就忘了。
    另一位就是包青天內的展昭

    回覆刪除
  27. 阿媽唔俾我睇超人呢啲野。所以係答唔上嘴嘅。

    不過都好似睇過下千年女王,記得露雲娜首插曲:傳說中有個女王在世上,長長頭髮,兩眼似星光。。。

    回覆刪除
  28. 請問有那個幪面超人的口頭蟬係"我只係一個路人",咁上下ga???

    回覆刪除

LinkWithin

Blog Widget by LinkWithin