~~~~~~~~~~~~~~~~







2008年9月3日 星期三

員工話…

員工話…

繼《老細話…》之後,
為了持平起見,今次輪到講「打工仔」,
我作為打工仔的一分子,
數一數身邊同事愛講乜?

第十位:「新人靚唔靚呀?」
同事與同事,每日要相對大約8-10小時,
梗係想同事個様好啲靚啲!
所以當一聽到有新同事上任,
同事們第一時間爭相打聽:「新人靚唔靚呀?」
「吓?個女新人之前做過modeL?!」
男同事一聽到,立即執乾淨自己張工作枱,同埋執一執自己個outlook。

第九位:「佢行開咗!」
無論有客來電,抑或有人親身過嚟揾人,
如果嗰位同事咁啱唔喺個位度,
隔籬位同事就話:「佢行開咗!」
再追問:「咁去咗邊吖?」同事答:「唔知喎!」
唔通咁老實話俾你聽:佢遲到仲未返到公司,其實去咗蛇王落街食煙咩?

第八位:「幾時掛八號?」
打風季節的其中一個熱門問題:「幾時掛八號?」
早上收音機一話下午可能掛八號,
同事即刻約人下晝去街,唱K睇戲篤波,
Lunch返嚟立即問「幾時掛八號?」
當電台一聲公佈:掛八號之後,
同事們一早已經執定袋,頭也不回,如走火警般逃跑!

第七位:「老細今日心情唔好!」
其實老細日日心情都唔好架啦!見怪不怪。
但同事們都慣咗將呢句說話掛喺嘴邊,
提醒同事唔好行差踏錯,收歛一吓,
「老細今日心情唔好!你唔好咁揚喺度刨波經啦!」
否則就有可能被老細就地開拖片鑊金!

第六位:「夠鐘食晏!去邊度食好呀?」
每日Lunch前,大家都頭痛今日去邊度食飯好?
唔想揸主意或懶得諗嘢的同事,先發制人問:「今日去邊度食好呀?」
「街市魚蛋粉?」、「茶餐廳?」、「泰國嘢?」
大家最初都話:「你話事啦!」、「無所謂!」
結果最後就嫌呢間難食嗰間污糟!
「一早都話咗唔嚟呢間架啦!」、「早知就唔嚟!」
爭先事後孔明一番!

第五位:「今晚放工去邊?」
接近放工的時候,同事們特別精神!
執嘢準備走或者在lift口等電梯時,
同事問:「今晚放工去邊?」
啱路就一齊夾錢坐taxi,或者揸車隨便兜埋。
另外,如果某同事那天穿得特別隆重,同事都會八卦問:「今晚放工去邊?約咗邊個吖?」

第四位:「咁耐都未出糧嘅?」
除非是即時支取時薪的自僱人士,
否則月尾最常聽到的一句說話,就是「咁耐都未出糧嘅?」
「我窮到就快連電話都要cut!」、「我窮到就快連條底褲都要當!」
反映同事們很少有儲蓄習慣,發窮惡!
又或者,其實是他們扮窮,
以防止其他「真係窮的同事」問佢哋借錢。

第三位:「搞緊!差啲咋!」
老細催促下屬完成工作,或查問工作進度,
下屬口震震地回覆:「搞緊!差啲咋!」
其實十劃都未有一撇,
拖住老細先,再諗吓有乜辦法搵其他人幫手!

第二位:「我諗我有啲唔舒服,今日返唔到。」
假期翌日,玩樂過度,十分疲累,不如攞病假蛇王一吓!
壓低把聲,扮痛苦致電回公司:「我諗我有啲唔舒服,今日返唔到,」
留意:「我諗我」(I think I am…)有推測的意思,
意思是:自己可能一時估計錯誤,以為自己有病,
所以不算是存心欺騙公司。

第一位:「最多咪唔撈!」
打工仔受了老細氣或者客人的怨氣,
激起把火!大嗌:「最多咪唔撈!」
但嗌完又無辭職者,大有人在。
唔通為咗即時走人,大拿拿攞錢出嚟補返俾老細咩?!
嗌咗出嚟!渲洩完股怒氣!咪乖乖地返回坐位繼續做嘢!
但隨着經濟好轉,都有人嗌完之後,就跟手打辭埋封職信。
而「最多咪唔撈!」中的「唔」字和「撈」字之間,
通常會加多一個「L」音的廣東助語詞來加強語氣。



33 則留言:



  1. 謝謝光臨

    你講最多:
    第八位:「幾時掛八號?」
    第六位:「夠鐘食晏!去邊度食好呀?」

    回覆刪除
  2. 打工仔?又冇我份!

    呀有提到自僱人士!其實都未必即時出糧架,係緊係最好cash啦...(咦你個卜有無稅務人員黎嫁?)
    呀我今年報左税啦!

    回覆刪除
  3. at this moment I am listing to a good, but old song.....

    许冠杰的半斤八两

    回覆刪除
  4. 仲有呢...

    「果個又係老細新女朋友囉~~」

    「喂,阿 X 呢,係咪同大老細好熟架嗟?見佢成日望下我地又唔出聲咁既...」


    男同事:「喂,阿 X (通常指女的),係咪結左婚架喇?? 無嘢,問下咁嗟...」

    女同事:「喂,阿 X ( 通常指男的),果日等佢放工果個呢,都唔係以前果個既?佢老婆丫嘛!」


    Customer Service:「 Sorry 你搵果個同事呢,今日放假!」<---通常有客人打電話來媽叉時。


    ...

    回覆刪除
  5. 巴黎/DESERTFOX/大文

    一炮三響!1時15-16分!

    巴黎

    SORRY! 下次個篇有妳份
    姑且忍一忍

    +++++++++++

    DESERTFOX

    半斤八两....打工仔心聲
    1970年代到而家都啱聽

    銅牌輸給Paris<---?

    ++++++++

    大文

    你真拿手!
    被你笑死~~

    回你:

    得把口,你嚟做吖!

    女:一齊去toliet囉!

    男: 落街整飛先

    下午茶, 仲有冇人要?

    好x眼瞓呀!

    回覆刪除
  6. 仲有大秘書叫全世界人同佢食飯,你唔係唔去呀嗎?!

    回覆刪除
  7. 陳大文:

    From Daisy Wong's classical music blog:
    "我總喜歡一邊聽 Rachmaninoff,一邊飲紅酒。紅酒好比男人,製作過程比較粗獷,細味之下原來百般滋味;聽 Chopin 的時候,我則喜歡飲白酒。白酒好比女人,製作過程比紅酒更精巧講究。Chopin 的作品結合了兩種看似互相矛盾的情感:一方面浪漫無比而感情豐富,一方面卻規行矩步而注重優雅。這不正正就是一個女人的寫照嗎?"

    哈哈哈哈哈哈!喂,問吓信報請唔請我去寫Daisy Wong. 起碼我寫D野正常少少.咩都攪到男男女女SATC...!

    回覆刪除
  8. 卡臣:

    呢篇簡直係打工仔常用用語, 尤其no.9, 我成日講...因為d人打黎搵我老細, 我答:「唔好意思,x生行開o左!」um...佢去左邊?/落左邊個site?/去左邊度開會?
    頂...查實佢去左廁所mau塔, 你叫我點講呀? 唔通話..佢爆完堆叫佢覆你咩! 我都唔明d人點解要打爛沙盤問到篤..最好笑係話, 你urgent搵佢? d人又答咁又唔係urgent, 可以下午覆...唉..咁你又死問佢去邊? 吹到啤一聲~

    回覆刪除
  9. 仲有:

    「喂..知唔知佢住邊?我今日係將軍澳見到佢」

    「你就好呀! 搵到好路數..有好野記得預埋我」

    「喂..老細老婆生日,你去唔去? 唔去, 有乜籍口推?」

    「老細今年有無俾利是你?」

    「你知唔知亞邊個同邊個有路?」

    回覆刪除
  10. 我這個打工仔常說的話是:

    最好老細唔好揾我!

    回覆刪除
  11. 小妮

    >仲有大秘書叫全世界人同佢食飯,你唔係唔去呀嗎?!
    ==>咁唔俾面,一於篤背脊

    +++++++++

    自由

    妳是當秘書嗎?

    秘書同老細夾...講點緣份

    妳提供果啲好到肉呀~~

    「啊邊個噚日遞咗信呀!」

    「佢上鹹網又唔logout」

    「佢幫個仔影印教科書」

    回覆刪除
  12. LAULONG

    >最好老細唔好揾我!
    ==>對呀!
    同老細食飯聯歡都可免則免

    回覆刪除
  13. 老細來緊?話我肚痛去咗睇醫生!

    回覆刪除
  14. 小妮, 對於 DW 的「所謂觀點」:


    首先,聽 classic 其實係好個人興趣和生活化,唔駛話乜乜高尚情懆,亦唔駛要飲住紅酒至可以聽囉。

    2: 紅酒的製作,亦係好講求技術,唔係 DW 講到咁粗糙。

    3. 聽 Chopin ,同飲白酒有乜關系呢又?


    好心佢啦,唔好話我話,DW 文,根本睇唔上眼,好似好潮之嘛。


    PS : 又為左公平起見,我覺得 DW 專欄好好睇囉,好正囉,好有時代感囉。

    咁囉....

    回覆刪除
  15. 卡臣:

    >妳是當秘書嗎?
    唔係~但同秘書既功能差不多!咪又係大打雜,打份工~
    就黎連爆屎渠我都要去通呀!

    >秘書同老細夾...講點緣份
    絕對認同~ 唔好話同老細, 同同事都要講點緣~

    >妳提供果啲好到肉呀~~
    全部有真人演繹過架,唔係老作架!

    回覆刪除
  16. hana

    >老細來緊?話我肚痛去咗睇醫生!
    ==> 吓?妳係老細,乜仲有老細?
    咪玩啦!

    +++++++++++

    大文

    >我覺得 DW 專欄好好睇囉,好正囉,好有時代感囉。
    ==> 係嘅~係嘅~

    ++++++++++

    自由
    >就黎連爆屎渠我都要去通呀!
    ==>嘩,識通渠,移民計好多分

    回覆刪除
  17. 老細同員工都係人
    老細一般認為員工唔多願意做野,太容易收人工,所以會不停搵野俾我地做

    員工一般認為老細「太刻薄」,當我地係打雜,咩都要識

    回覆刪除
  18. 佚名

    講得啱!
    階級鬥爭....階級矛盾

    回覆刪除
  19. 係ga~
    你睇人好、人睇你好~唉
    不安於現在,雖然我都係:p

    回覆刪除
  20. 卡兄:

    幾時會有"老婆話", 老公答", "亞仔話", "亞媽話"..既文章出現?
    好期待~我講認真架!

    亞媽話:
    十點呀, 衰仔仲唔訓.聽日唔駛返學呀?
    夜晚又唔願訓, 朝頭早又願起身~
    你執晒書包未?
    仲唔快d拎筷子出黎俾姐姐洗?
    你今日默書默成點, 識唔識?
    我叫o左你幾多次熄電腦溫書?
    你當我講既野耳邊風?

    回覆刪除
  21. 佚名

    >不安於現在,雖然我都係
    ==>咁妳就有機會做老細啦!

    +++++++

    自由

    阿媽話?

    真係有喎:

    http://carson-chung.blogspot.com/2007/09/blog-post_30.html

    回覆刪除
  22. 行姐:
    幾時會有"老婆話", 老公答", "亞仔話", "亞媽話"..既文章出現?
    好期待~我講認真架!
    -->0.0有wow...不過仲差"老婆話", 老公答", "亞仔話"。:P

    卡臣:
    ==>咁妳就有機會做老細啦!
    -->打工仔加學生一名,做好依家先啦~

    回覆刪除
  23. 卡臣:

    睇完條link 呀! 呢十大亞媽話, 我都聽唔少, 好鬼入肉!

    世伯伯母好後生o下~

    回覆刪除
  24. 佚名

    >-->打工仔加學生一名,做好依家先啦~
    ==>妳大把世界呀!

    +++++++++++

    自由
    >世伯伯母好後生o下~
    ==>多謝呀
    告訴他們,讓他們開心一吓

    回覆刪除
  25. 打工仔?打咗兩日啦,你究竟有幾想呢?:(

    回覆刪除
  26. 同老細食飯聯歡?

    嘩,咪搞我,我返屋企揾個白蟻竇玩吓好過!

    回覆刪除
  27. 「佢行開咗!」點會得第九位咁低架...??

    回覆刪除
  28. 卡臣:
    >-->打工仔加學生一名,做好依家先啦~
    ==>妳大把世界呀!

    希望啦^^

    回覆刪除
  29. 數奇門

    係呀!
    我都係打工仔
    朝9晚6

    ++++++

    laulong

    吓?
    你屋企揾個白蟻竇?
    影響結構喎~~

    +++++++

    海火火女

    「佢行開咗!」
    點會得第九位咁低架...??
    ==>係喎!
    升到第三位

    回覆刪除

LinkWithin

Blog Widget by LinkWithin