~~~~~~~~~~~~~~~~







2008年7月5日 星期六

廢話–工作篇


廢話–工作篇

第十位:「如果我無記錯,應該係…」
員工忽然被上司問起一些工作數據或進程,
手足無措地回答:「如果我無記錯,應該係…」
「如果我無記錯」這句說話十分之廢!
唔通你想專登記錯講錯咩?

第九位:「如果未賣哂,就應該有貨!」
雖然政府拍宣傳短片呼籲零售業應該改善服務態度,
但仍有不少售貨員講:「如果未賣哂,就應該有貨!」
「掛哂喺度,有就有!冇就冇!自己摷吓啦!」
如果啲貨未賣哂,就梗係當然掛喺貨架上喇,
完全係唔專業嘅廢話!

第八位:「你有無嘢搞緊?」
上司有份急嘢要吩咐下屬做,
上司會問該下屬:「你有無嘢搞緊?」
唔通下屬會答:「我無嘢做,好得閒」咩?
所以這句「你有無嘢搞緊?」便是攞嚟問的廢話!

第七位:「今朝起身唔想返工!」
同事們一起早餐或lunch時傾計,
例必有一位同事慨嘆說:「唉~今朝起身唔想返工!」
但係佢成個人又明明已經返咗辦公室,仲「生勾勾」咁坐係你面前,
證明佢又講咗句無奈但真實嘅廢話!

第六位:「我同意你嘅講法,但係…」
開會期間,同事們交換意見,或者爭辯一些事情,
同事會講:「我同意你嘅講法,但係…」
「但係…」之後就是一堆反對的意見,亦是講者心中想講的戲肉,
所以「我同意你嘅講法」這句開場白是表面同意實際不同意的廢話。

第五位:「自己執生啦!」
零售業服務業是「以客為本」的行業,
Staff遇到客人有五花八門的要求時,不知如何應付?
問上司日後遇到同樣情況時,應該如何處理?
上司答:「無絕對答案喎!要睇到時實際情況,自己執生啦!」
無交低明確指示,總之自己搞掂佢,千祈唔好「揩嘢」就得啦!
「自己執生啦!」就是好似答咗其實無答的廢話!

第四位:「一定得!除非有突發嘢啫!」
有啲員工喺上司面前爭取表演,
上司委派一份任務給下屬時,
下屬好有自信咁拍心口:「一定得!除非有突發嘢啫!」
咁即係「得」定「唔得」呀?下屬講嘢都好「補底」。
只好求神拜佛無突發嘢發生囉!

第三位:「如果我幫到你,我就一定幫!」
無論同事之間、部門之間、面對客戶、
都聽到呢句:「如果我幫到你,我就一定幫!」
真實下一句就是:「但係今次我真係幫你唔到嘛,唔好意思!」
所以「如果我幫到你」就是一句廢話。

第二位:「俾我中咗今期六合彩頭獎,我聽朝就立即劈炮!」
每當六合彩有金多寶獎金,同事們必買多一個希望。
手持彩票滿懷希望講:「俾我中咗今期六合彩頭獎,我聽朝就立即劈炮!」
結果第二朝咪見齊哂每位同事死死地氣咁如常返工,
到下一期金多寶又重覆這句廢話多一次。

第一位:「咦?仲未走呀?」
同事們放工走人,見到另一位同事仍埋頭苦幹工作,
就會問:「咦?仲未走呀?」
一般打工仔,梗係想放工準時立即鬆人,如果放工後仲留喺公司,梗係OT啦!
OT期間,心情已經唔好,仲要俾人問:「咦?仲未走呀?」
同樣情況:「咦?咁忙!趕緊嘢俾老細呀?」、「咦?星期日仲返嚟公司嘅?」、「咦?飯都未食,有嘢趕呀?」等。
除非身邊有失明的傷健同事,
否則將目睹的事情用聲音描述多一次是十分廢!

待續



收到網友渣估的電郵,他說在家中翻箱倒篋,搵到一張陳年話劇宣傳單張,
得渣估兄同意,一於俾大家喺萬勝節之前一個驚嚇先!


咦?!1996 年4月?已經是12年前的遠古事跡,
原來1996 年4月13日當天,我在灣仔壽臣劇院做話劇,
那麼你又記唔記得在1996 年4月,你大抵在幹著什麼事情呢?

多謝渣估兄提供相片,

如果大家有乜投訴,冤有頭,債有主,搵我好啦!


64 則留言:

  1. 第八位:「你有无嘢搞紧?」

    我老世經常性問我呢個問題,仲要系隔住一定空間,佢把聲唔大唔細,剛剛好所有同事都聽到。

    我惟有死死地氣走過去:ER......唔知有咩可以幫到你呢?

    諗深一層,我答呢句唔知算唔算第十一位廢話呢?

    回覆刪除
  2. carmen

    妳果句「ER..唔知有咩可以幫到你呢?」
    我諗應該唔係廢話,
    因為妳在發問一個問題
    而妳的確唔知道老細委派給妳的工作
    妳是否有能力去幫到手?

    除非你老細唔埋妳能力
    乜都俾妳自己handle解決
    咁妳果句就係廄
    因為妳一定幫到老細手

    回覆刪除
  3. 12 年前的話劇圈正醞釀一場不大不小的同志風潮, 卡兄因緣際會獻身下海, 回首盡是風流.

    回覆刪除
  4. NOST
    嘩!97年前,大家驚將會回歸後無創作自由,
    想做就搏命快做.
    gay film, gay drama, gay bar, gay suana...蔚然成風

    獻身下海<--迷迷糊糊跌落水咋!

    ps:你打中文又進步咗!

    回覆刪除
  5. 「公司攞到今日咁好既成績,全靠大家既努力。。。」然後,人工照舊冇得加。

    回覆刪除
  6. 今次既冠軍「咦?仲未走呀?」同上一篇既「咦?嚟咩呀!」有異曲同工之妙喎,一樣咁廢,但又最多人講既。

    96年我仲係小學生,四月復活節,我應該係屋企邊食復活蛋邊睇卡通片。

    回覆刪除
  7. 太正了,我好鍾意你呢類作品!


    PS : 我現正籌劃撰寫香港文化之:粗口篇。主要談不同粗口的應用方式....

    回覆刪除
  8. 還有零售業廢話:

    【睇下咩 Model 介紹番囉,呢部 Compaq 囉,果部 Acer 囉,本身嚟講上網手提電腦囉,有彩 LCD 啦,有齊功能囉...】


    ********


    似乎店員在 2008 年的今天,真心相信客人仍然是 On- nine 的。除非個客係盲 + 智障,否則明明睇緊 Notebook ,就梗係知 Notebook啦,仲有,乜今時今日,會有【黑白】display 架咩???而上網功能乜仲係賣點咩?乜有電腦係會標明【 Sorry! 不可上網的】架咩?

    回覆刪除
  9. 「我同意你嘅講法,但係…响公司同D同事唔講廢話冇嘢好講。」

    啊...原來你12年前係做呢D起家嘅。
    咁你為藝術犧牲得眞係多。

    回覆刪除
  10. 工作篇對於法蘭西人(freelancer)嚟講,因為每次唔同boss,所以冇乜廢話聽,聽得最多個句:「可唔可以平d呀?」,好似係街市買菜咁架!

    1996年4月13日,我係巴黎,如果唔係做緊野、就應該係咖啡館飲緊咖啡、或者同d法國朋友吹水、再唔係可能去左塞納河漫步....

    請問海報裡面邊一位係卡生?兩個都好大隻喎,係咪講同志架?有冇出DVD呀?可唔可以幫我簽名呀?

    唉星期六大好周末我就要咁早起身做野,真係唔願呀!

    回覆刪除
  11. 陳ウェン部族 提到...
    太正了,我好鍾意你呢類作品!


    PS : 我現正籌劃撰寫香港文化之:粗口篇。主要談不同粗口的應用方式....

    大文兄,先看一下小狗懶擦鞋~~~~~~:P

    Daniel.

    回覆刪除
  12. 你話呢啲係"廢話–工作篇",偏偏對於一啲鍾意玩辦公室政治嘅人嚟講當中嘅"廢話"係好"有用"!

    "那麼你又記唔記得在1996 年4月,你大抵在幹著什麼事情呢?"

    咪就係走去睇你嗰齣話劇囉,我仲記得好好笑𠻹!

    回覆刪除
  13. 卡兄:

    到了今時今日,胸肌依然結實? ^^

    回覆刪除
  14. 渣兄:估你唔到添...

    >到了今時今日,胸肌依然結實?

    咁啱上星期本小姐係佐敦白加士街澳洲牛奶公司附近(係,我係特登去蒲渣老闆嘅)偶遇卡臣,着湖綠色反頂T恤的卡臣總好青春,胸肌依然好結實喎。

    回覆刪除
  15. 同 1996 果幅相年比較,卡兄現在應該結實啲。


    PS : 1996 年四月果段 moment,我係失業的...

    回覆刪除
  16. 卡卡:

    我悟性好鬼低!

    即係話:海報中人係你....

    唉,真係胸襟廣闊,人中龍鳳。你先至係香港先生!

    回覆刪除
  17. Jay
    「公司攞到今日咁好既成績,全靠大家既努力。。。」<---都唔算係廢話吖,起碼老細對下屬有謝意,
    有啲老細連good job, 
    well done都無句呀!

    ********

    孖瑩

    「96年我仲係小學生,四月復活節,我應該係屋企邊食復活蛋邊睇卡通片」
    唉! uncle Car 又要出場啦!
    見到陌生人侵犯就記得嗌「唔好呀!」

    寶寶龍上

    ********

    陳sir
    「香港文化之:粗口篇」?
    嘩!粗口...正呀
    我中一起學識講粗口
    但唔係學院派...需要補習一吓
    大文快啲出啦!

    回覆刪除
  18. 豐澤電器歡迎你:

    街邊做demo的sales就唔同啦,
    少果種廢話

    例句:
    「呢把表面上係一把菜刀,其實佢係一把按摩棒」
    「呢把表面上係一部吸塵機,其實佢係一部抽風機」
    真係唔講唔知喎!

    國美電器

    *********

    素素
    「咁你為藝術犧牲得眞係多。」
    哦,露上半身
    妳咪當喺沙灘見到男泳客咁囉.

    呢排陽光好,facebook朋友上載啲遊船河的相,睇到我好口渴呀!!


    *******


    巴黎旅客

    「可唔可以平d呀?」<--中國人愛講價DNA,改不掉.

    1996年4月13日,妳係巴黎飲緊咖啡、同法國朋友吹水、塞納河漫步....<--除咗羨慕之外,我搵唔到第二個形容詞,
    1996年4月,我接觸到的法國,只是牛角飽,高達,杜魯福咋!

    坐喺度果個係我,同劇講同志架!好彩冇出DVD,仲攞嚟獻世咩?臨老過唔到世呀!

    「唉星期六大好周末我就要咁早起身做野,真係唔願呀!」<--OK廢喎!

    同志旅客上

    *******

    daniel

    小狗懶擦鞋<--DGLCH!
    粗俗中有點童話味道

    回覆刪除
  19. 歪歪
    「咪就係走去睇你嗰齣話劇囉,我仲記得好好笑!」
    吓!你12年前有睇過我?!(滴汗,汗顏)
    成為你終生的劇場陰影恐怖經歷
    唉~

    ******

    渣兄

    再一次多謝你提供
    「到了今時今日,胸肌依然結實? 」
    唉~敵不過地心吸力
    我胸部下墮到肚腩
    肚腩下墮到兩腿之間
    兩腿之間的東西不下墮,反而向上縮
    12年啫,已經搞成咁
    灰...

    ********

    hana

    我父母真係住喺佐敦
    上星期我確實去過寶寧街探父母
    但我沒有湖綠色反頂T恤喎

    我諗妳睇錯果位係「徐綿江」或者「吳剛」(不是月球果位)
    朋友話我似相撲手喎

    回覆刪除
  20. 大文

    卡兄現在應該結實啲<--無錯,我多餘嘅脂肪已經因為無錢開飯而break & burn


    1996 年四月果段 moment,我係失業的...<--你用「失業」嚟代表「隱形富貴」呀?

    **********

    Laulong

    「你先至係香港先生!」
    我未睇你blog啲相之前,我仲以為自己係港男,但睇完你相之後,
    我仲夠膽認咩?

    回覆刪除
  21. 我 1996 年有段時間,真係失業無嘢撈架,你可能奇怪,當時 moment 經濟咁好,點會失業呢?

    理由好簡單,因為好多老細真係日日睇股票,都費 Q 事顧下啲業務,費事請人,真人真事。

    我果段 moment 好手緊,又無錢買電腦,好似文盲人咁架,唔搭地鐵要搭巴士去見工呢。

    回覆刪除
  22. 湖綠色反頂T恤....

    係唔係認錯個馬伕當左係卡 Zen 呢...?


    ( 雖然卡 Zen 都不排除會秘撈...馬伕既 ~)

    回覆刪除
  23. 我見到海報係郭占美編導,佢係無線的配音員,以前好出名呢,但近來佢冇做無線LU,你現在還見到他嗎?

    上禮拜六都有到澳洲牛記食燉奶,有冇人會見到我呢?

    回覆刪除
  24. 大文

    「我果段 moment 好手緊,」
    man,真係要用「幾許風雨」墊底
    唔緊要啦
    而家你都賺夠退休啦!

    做馬佚真係要大隻,保護妓女嘛
    有啲嫖客好變態嘛

    ********

    逍遙小妹

    郭占美去咗美國
    定居紐約

    「上禮拜六都有到澳洲牛記食燉奶,有冇人會見到我呢?」
    澳洲牛記cashier話見到妳呀!

     

    回覆刪除
  25. 但係「我同意,但係...」係一個無咁尖既反駁,實際上面係好work... =) 平時一開口就話人唔岩,啲人唔會聽... 人既心理係咁怪~~ 你一野話佢錯佢好難會聽你講~~

    回覆刪除
  26. hahaha..唔講唔覺..原來呢"炸"野又真係廢得很喎^^

    我某位朋友都成日同我講:[朝朝起身都想sick leave]

    廢到丫

    回覆刪除
  27. >「坐喺度果個係我」
    嘩,原來卡叔叔你咁大隻架,好犀利呀,係咪去佐敦就撞到你架啦,我又去食澳洲牛奶公司先。

    回覆刪除
  28. "成為你終生的劇場陰影恐怖經歷"

    喂,咁你好俾番呢十幾年我睇心理醫生嘅錢我喎!

    其實啲觀眾無咁蠢貼錢買難受,就算有啲係因為你幅養眼海報買飛入場,淨係睇阿肥演員跳健康舞極速減肥嗰場就已經值回票價啦!

    回覆刪除
  29. lo哥
    你講得啱!
    言語的潤滑劑
    「lo哥,講得啱,我同意,但係...今次你真係講得啱!」

    ********

    mona
    [朝朝起身都想sick leave]
    唔止妳同事,妳的學生都係咁諗

    回覆刪除
  30. 孖瑩

    「係咪去佐敦就撞到你架啦,我又去食澳洲牛奶公司先」?

    澳洲牛奶公司撞唔到我
    去上海街男公廁第二格叫聲卡臣
    我就會跳出嚟
    速速去啦

    ********

    歪歪

    阿肥演員跳健康舞極速減肥嗰場就已經值回票價啦!<--你仲記得劇情喎!

    女演員叫deborah
    已經息影
    可惜~

    回覆刪除
  31. 多謝你嘅補充。

    記唔記得响“人山人海演唱會“,你哋成班男人唱“容易受傷的女人/勇敢的中國人“?

    你又知唔知當晚汪阿姐係坐上客之一呢!

    回覆刪除
  32. 歪歪

    又到老人院時間喇:

    「人山人海演唱會」<--1997年6月
    回歸前,poster是明哥穿英國旗衫
    我好高興可以做
    一來紅館, 二來有歷史意義

    當晚汪阿姐係坐上客之一呢!<--我又唔知喎,她坐你鄰座吧!

    補充
    1)我當晚有句對白是:冚家剷!好大反應!
    2)人山人海的v記踩著我背脊彈結他
    3)林海峰都有份唱...好似係「彭小姐」

    老人院時間完畢!

    回覆刪除
  33. 當晚汪阿姐係坐我後面。好可惜個show咁正但係無出碟。

    講起嚟,我仲有keep住你哋嗰隻“非人生活“cd呀。

    哎吔,我驚再傾落去呢度真係變咗老人院!

    回覆刪除
  34. 歪歪

    2人老人院時間 開始

    多謝你有買到「七彩非人生活之向悲慘世界乞錢」

    1995年12月產品
    我地晨早5點鐘中環集合
    影朝早黎明相做唱片封面
    晚上唐樓STUDIO錄歌(雖然我唱兩句咁多)
    隻CD已經絕版啦!我當然有KEEP啦

    2人老人院時間 完畢

    回覆刪除
  35. 第六位:「我同意你嘅講法,但係…」
    We started to learn it durnig our high school time and practice it for long in order to do the HKCEE English Oral exam.
    :[Yes I agree with you! However...]

    回覆刪除
  36. 繼續講多d吖,我好鐘意聽歷史架,尤其係我唔係香港住個十幾年,好脫節!

    啱啱打電話詢問問題,跟指示按嚟按去:1廣東話2英文3潮洲話....最後叫我等客户服務主任,一等等左三個字都係repeat又repeat叫你等....簡直係最最廢話!

    回覆刪除
  37. 我有次去日本,打电话问地址,他们用日文说,1) 日文 2)英文 3)。。。。。
    全部用日文讲,如果我不懂日文,怎知要按(2), 按2)后,电话转到不懂英语的服务生。。。

    回覆刪除
  38. 法國重勁,係冇得揀,全法文!重要係收費电話,你一路等,佢一路收錢!

    回覆刪除
  39. 巴黎旅客

    留法十幾年呀?
    那麼妳由邊年到邊年唔係hk呢?

    講起電話錄音真係幾廢!
    尤其係果句:「對唔住!我哋收唔到你嘅指示,請你重新再輸入過!」

    **********

    蘇記

    日本人啲英文都叫好過以前
    以前真係雞同鴨講
    咁就一定要用漢字溝通
    中國人就話識漢字
    鬼佬真係要身體語言

    回覆刪除
  40. c

    多謝妳的留言先!
    還有第三集(最後一集):情侶廢話

    回覆刪除
  41. 大文

    係呀!
    情侶之間,好多纏綿窩心甜蜜哀怨痴纏動人淒美浪漫嘅廢話

    聽晚見

    回覆刪除
  42. 講起"窮得漂亮", 當年K 房有得唱首主題曲, 盧志新首"若即若離歌" 更是本人摯愛.

    卡叔叔, 係時候寫"我在進念的日子" 喇!!

    回覆刪除
  43. "我同意你,但係 ..."通常是先禮後兵,有時"but"唔返!

    "情侶篇"應該好正!

    你同12年前無大分別,望落差不多.

    Vincent

    回覆刪除
  44. NOST

    老人院時間梗係預埋你啦

    "窮得漂亮"和"若即若離歌" 都是于逸堯作品.
    當時1996年的于逸堯尚未走紅
    窮得漂亮<--華星PLAY MUSIC 出品
    MTV於進念跑馬地會址拍攝

    寫「我在進念的日子」?
    交俾阿強先

    老人院時間 又完畢

    **************

    vincent

    「你同12年前無大分別,望落差不多」
    多謝先!
    係我無乜點老吖?
    定係我12年前已經係一個老樣?
    所以無變呢?

    回覆刪除
  45. 公司廢話,真係唔講唔得。因為講英文,所以聽起嚟冇咁廢...
    "I agree, but..."
    鬼佬開會嘅時候互片,真係激烈過廣東話架,所以廢話係用嚟保護自己嘅...
    "I said I totally agree with your point. But..."

    回覆刪除
  46. P.S. 彭小姐係一首好歌!最衰唱K冇得揀,冇得表現我"獨特"嘅音樂品味 XD

    回覆刪除
  47. 80年代末離開香港、整個90年代、直至2003年,橫誇三「代」,唉吔原來日子在飛!
    許多香港大事:六四百萬人上街、九七回歸...都只從France 2 新聞片段看到。那時候許多民運人士輾轉來法政治庇護。

    另外,我想update番,你而家係邊度既旅客?

    23:45 歡樂今宵!

    回覆刪除
  48. Carson, 大文嗰邊太嚴肅啦,我返嚟你度啦~~!

    I miss you!!!

    回覆刪除


  49. 嘩! 乜你原來除咗酷愛古典音樂之外,
    仲會聽廣東流行曲架?!
    你嘅range都好廣泛喎!

    彭小姐,1996年作品<--講彭定康個女, 回歸後回英國講再見
    題材切入點好幽默
    林海峰有料到

    i agree with you but you're handsome than me, why? God why?


    ***********

    巴黎

    妳話:「80年代末離開香港、整個90年代、直至2003年,橫誇三「代」,」
    咦?當妳89年走,中國10年經濟改革,2003開放自由行回港?
    基於以上原因,我有足夠理由相信...妳就是:柴玲!!!!

    我好敬佩妳同彭丹架! sorry! 係王丹!
    你們是民主先鋒

    果陣黃雀行動運妳去法國,辛苦妳啦!

    我而家係土瓜灣旅客

    回覆刪除
  50. 素素

    大文冰傲冷俊的外表下面
    其實係一顆澎湃熱刺淌血的心
    仲流出一絲玩世的禪理
    令人如沐春風

    so, i miss you too!

    回覆刪除
  51. 【冰傲冷俊】<---好
    【澎湃熱刺淌血】<---好
    果然係 G@y書人,形容得很全神。

    回覆刪除
  52. 借啲啲地方先,卡兄唔好介意啊。

    我個 blog 唔會一味嚴肅的,我仲喺度,個 blog 始終係我話事,我寫我鍾意既嘢,大家睇得開心,就係咁簡單。

    有啲留言者認為【睇唔起、唔夠愛情文雅】,我唔會理的,睇唔起咪唔好睇囉。

    唔會理其他無厘頭既【叉零住】既。

    各位觀眾認為自己睇得開心就得喇。


    PS : 陳大文部落開 blog 一年,而家會完全轉向,只會寫自己想寫的東西,不會理太多無聊留言 ( 但有意思的留言當然除外 )

    回覆刪除
  53. 大文兄

    我當然唔介意你借用地方啦!

    用blog寫自己想寫的東西<--啱呀!
    其實blog紀錄你某段時候的想法經歷
    可以好私人化
    想寫乜就寫乜啦

    支持你

    回覆刪除
  54. 唉我點會係柴小姐呀,佢逃亡法國後很快已經去了美國,仲做埋商家!當年民主鬥士熱血青年,巳被新生活...

    土瓜灣旅客,牛鹏嘅青蛙王子好前衛喎,連法國人都訪問過佢!

    回覆刪除
  55. 巴黎旅客

    牛棚嘅青蛙王子?
    我孤陋寡聞,未聞過
    講多少少吖

    宋皇臺旅客

    回覆刪除
  56. 宋皇臺旅客

    缘起我為一個法國攝影師當翻譯,訪問了一些香港人,作為video installation的材料。有一次到了牛棚(謝謝正字!)做訪問,自稱青蛙王子(又名蛙王)的孟浩然是特立獨行又前衛的裝置藝術家,卻被人稱為瘋癲。法國人對他甚為欣賞,因為他只默默創作,從不理會别人批評。
    香港似乎容不下太突出太驚世駭俗的藝術創作。

    回覆刪除
  57. 巴黎旅客

    多謝資料提供先!

    「香港似乎容不下太突出太驚世駭俗的藝術創作。」<---其實我好顛架!!
    姐姐.....我要飲....電油呀....
    飛呀!!

    回覆刪除
  58. 弟弟電油飲多無益架!不如我教你飲红酒,半醉半醒的感覺最奇妙啊!

    你想飛去邊,巴黎聽啱唔啱?

    回覆刪除
  59. 巴黎

    紅酒用腳踩, 有冇咩酒用手釀架?

    飛去巴黎? 我飛TAXI去「小巴黎越南餐廳」
    就夠錢,

    宋皇臺上

    回覆刪除
  60. 卡臣 提到...
    巴黎旅客

    多謝資料提供先!

    「香港似乎容不下太突出太驚世駭俗的藝術創作。」<---其實我好顛架!!
    姐姐.....我要飲....電油呀....
    飛呀!!

    巴兄,原來你喺PG果度都有朋友,失敬!

    Daniel.

    回覆刪除
  61. 卡臣 提到...
    巴黎

    紅酒用腳踩, 有冇咩酒用手釀架?

    飛去巴黎? 我飛TAXI去「小巴黎越南餐廳」
    就夠錢,

    宋皇臺上

    根據S嘟-2個廣告(有小雪嘅果個),米酒用手釀~~~~~~:P

    Daniel.

    回覆刪除
  62. daniel

    米酒? 好呀!
    孖蒸,三蒸

    不過的唔識飲,
    葡萄汽酒好啲!

    回覆刪除

LinkWithin

Blog Widget by LinkWithin