~~~~~~~~~~~~~~~~







2008年7月9日 星期三

廢話–情侶篇

廢話 – 情侶篇

第十位:「係你就係你!唔係你就唔係你!」
情侶分手後、閨中密友、身邊朋友忙加上前安慰:
「唉~ 係你就係你!唔係你就唔係你!隨緣啦!」
屬於你嘅,就當然係屬於你架啦!
唔屬於你嘅,就梗係唔屬於你架啦!
煞有介事地講一個非常簡單的邏輯。

第九位:「喂!我吖!」
情侶講電話,第一句:「喂!我吖!」
假設對方已經知道自己是誰,所以不用報上姓名。
但如果對方早已知道係自己打電話嚟,
咁呢句「喂!我吖!」就無需要。
除非你身份証登記姓名真係叫「我吖」。

第八位:「總之鍾意就係鍾意啦!」
情侶之問,鐘意問對方:你鍾意我啲乜嘢?
期望對方講出自己嘅優點、好處、長處,
結果對方答:「唔知呀!總之鍾意就係鍾意啦!」
「鍾意就係鍾意」就是等於間接地唔想回答,
提供一個無答案嘅答案!

第七位:「如果我改到嘅,我一定會改!」
情侶之間,如果其中一方好煙好酒好賭好滾好揮霍,
另一方要對方改過自新,否則分手,
被屈服的一方會假扮誠心悔改:「如果我改到嘅,我一定會改!」
注意:「如果我改到嘅」是一句假設性說話,
實際上無答應過一定能夠改到!
所以只是用一張空頭支票,施行「拖」之訣。

六位:「如果我早啲識到你就好!」
情侶遇上第三者,相逢恨晚!
無奈受困於世俗枷鎖,又不想背負任何人,
只好說:「如果我早啲識到你就好!」
唉~ 又是「有早知,無乞兒!」的一派!
明知時光唔能夠倒流,咁講「如果」嚟做乜?

第五位:「我最初識妳嗰陣妳都唔係咁架!」
情侶的感情日久變淡,甚至產生磨擦。
受傷害一方抗議說:「我最初識妳嗰陣妳都唔係咁架!」
唉~ 情侶初相識,盡力表現自己的優點,隱藏缺點,
日後才慢慢暴露各自缺點,不再掩飾矣已。
另一方到這一刻才如夢初醒:「我最初識妳嗰陣妳都唔係咁架!」
會問這種問題的人,反映他不明白「日久見人心」的顯淺道理!

第四位:「如果我有錢,我一定俾最好嘅妳!」
又是假設性的說話,通常出自無乜錢的情人口中。
「如果我有錢,我一定俾最好嘅妳!」
但係我而家無錢呀嘛!又點俾到最好嘅妳呢?
但又無辦法保證到自己日後會大富大貴,
所以講這句說話時,只是一時「貪有型」的豪情壯語!

第三位:「妳好似已經有件係一模一樣囉喎?」
男方陪女友行街shopping,當女友見到時裝店某商品要買下之際,
男友阻止:「咦?妳好似已經有件係一模一樣囉喎?」
女友怒听:「梗係唔一樣啦!個款同色都唔同啦!唔識嘢!」
男友點樣講都阻止唔到女友的購物慾望,
咁講嚟做乜呀?!

第二位:「我而家同妳講緊電話囉!」
情侶日日晚晚通電話,或者報到,
女方可能問男方:「你而家做緊乜嘢呀?」
原本出發點是關心對方,再發掘新話題,
但不解溫柔的男方會答:「我而家做緊乜?我而家同妳講緊電話囉!」
鬼唔知你講緊電話咩?
女方最唔想聽到這句毫無誠意的敷衍廢話!

第一位:「我想點?你知架!」
男方不明女方心意,演變成爭拗,
男友問:「咁妳究竟想點?」
女友答:「我想點?你知架!」
唉~ 若果男友知妳諗緊乜,就唔使明知故問啦!搏妳鬧咩?
同樣地,「我想食乜?你知架!」、「我點樣先唔嬲?你知架!」
「我想要乜嘢生日禮物?你知架!」
若果兩人真係咁心靈相通,唔使明言都已經心照啦,
咁就唔使講呢句「廢話之王」啦!
正如我講咗咁多嘢係乜意思,你知架!



42 則留言:

  1. 卡兄:都話你男女通殺架啦!原來我個閨中密友有你以前演話劇啲相,過來攞啦!(他總想搵你簽名添)
    嘻嘻!

    回覆刪除
  2. 咁陳年嘢都keep?
    除了渣估外? 妳個閨中密友是男?是女?
    女就肯簽名
    男就妳幫我代簽

    回覆刪除
  3. 其實,情侶間的無聊話如天上恆星。
    愛一個人的時候,對方說的全是甜言蜜語,當感情轉淡,都變成了廢話....

    「你知架?」
    其實自己也不知,無聊。

    回覆刪除
  4. 我的閨中蜜友是男人耶!

    http://hanna527.spaces.live.com/default.aspx?_c01_BlogPart=blogentry&_c=BlogPart&handle=cns!5CCBD60064CD2DE!1853

    回覆刪除
  5. 喂,阿 Sir ,呢 10 句情侶廢話,幾乎全部我都遇過喎!但唔係情侶同我講囉~~

    eg:

    「係你就係你!唔係你就唔係你!」<--見工失敗,朋友安慰。


    「喂!我吖!」<---幾乎全部打俾我既人( 女人 ) 都會咁講既~~




    「如果我早啲識到你就好!」 <--好多女士唔知點解都會同我咁講 ( 有點自豪 + 自卑 )


    @@V~

    回覆刪除
  6. 我最憎人講"你知架",聽到嗰陣好想即刻冚線,因為如果唔冚,之後大約會有五至十分鐘嘅靜默,隨時訓著。

    回覆刪除
  7. Hana
    哦!原來是妳的閨中密友A!
    兩人好長情啊!
    我也是!結婚8年!

    **********

    巴黎旅客

    「你知架?」其實自己也不知<--又真喎!
    好多人只知道自己唔想要乜
    而唔知自己想要乜

    **********

    回覆刪除
  8. DIAMOND

    好嘢吖!

    有人向你講,你無向人講

    「如果我改到嘅,我一定會改!」
    中學時,被老師捉到我講粗口!

    「如果我早啲識到你就好!」
    山窮水盡, 遇上朋友肯借錢俾我

    *********



    對方向你說:「你知架」
    潛台詞就是: 你知架, 你好想即刻冚我線吖嘛!又被我睇穿你啦!

    回覆刪除
  9. 除咗【第九位:「喂!我吖!」】之外,我其他都唔講咖Wo。

    QC仔都唔講呢D咖Wo。佢就算冇錢都會俾最好嘅我,雖然我本身要求並唔高。

    回覆刪除
  10. 真係好悶,好"行"!

    最頂唔順是情侶在公眾地方講baby talk!

    Vincent

    回覆刪除
  11. 依家有咗Caller ID,連「喂!我吖!」都可以慳番,直接入題。

    而「妳好似已經有件係一模一樣囉喎?」呢句似乎係老公為咗慳錢對老婆,情侶關係嘅多數只係敢喺心講。反而試咗件衫出嚟問:「好唔好睇?」呢句廢話較多聽,廢嘅原因同樣係「男友點樣講都阻止唔到女友的購物慾望」。

    回覆刪除
  12. 素素

    「佢就算冇錢都會俾最好嘅我,」
    自己汗顏之餘,我只有羨慕兩個字

    *************

    vincent

    baby talk?
    豬豬, bb, 傻b, 乖啦! 啜啜!

    *********

    歪歪

    老婆問我:「兩件邊件好睇啲?」
    我指着價錢平果件:「呢件好睇啲!」

    回覆刪除
  13. 「兩件邊件好睇啲?」

    剛開始拍拖時答:你著乜都咁好睇!

    拍咗拖一排就會扮認真睇完比較過先答:嗰件好睇啲!

    結咗婚嘅就指着價錢平果件答;呢件好睇啲!

    所以結論係:問嚟為乜呢?

    回覆刪除
  14. 歪歪

    仲有男女熱戀,打得火熱之際

    女: 我著邊件好睇?
    男: 妳唔著最好睇!

    回覆刪除
  15. 情侶電視劇式超級廢話( 通常女問男 ):



    【你愛唔愛我?】<---得閒就問

    【你愛唔愛我?】<---等車又問

    【你愛唔愛我?】<---點菜吃飯又問

    【你愛唔愛我?】<---Shopping又問

    【你愛唔愛我?】<---甚至病左請假又問

    【你愛唔愛我?】<---公司嚟左新同事,又問。


    答案: 愛呀, D L L M 。

    回覆刪除
  16. 我同意 巴黎旅客 所講... 愛一個人的時候, 幾無聊都是甜言密語... 所以「廢話」特別多...

    我覺得呢, 人唔係logical/rational既, 所以會講類似呢句 :

    第六位:「如果我早啲識到你就好!」

    係好正常, 反正我都飽受呢句折磨過...

    卡臣兄呀卡臣兄... 呢句... 係一種無奈感歎無助感慨時講, 唔廢架... ~

    不過, "隨緣" 就真係廢到爆. 我懷疑呢句係啲多情侶既人去陰啲單身人仕唔好去努力而作既句子 - 即係用來老點人放棄既句子.

    嘿, 聰明人有太多方法想令蠢人更蠢.

    回覆刪除
  17. 唉,半個月打前嘅個多月,我講啲情話多到一籮籮,現在回望,原來結果就係得個字:傻!

    回覆刪除
  18. 女方可能問男方:「你而家做緊乜嘢呀?」
    呢句我會問,因為我唔想騷擾朋友,可能佢地忙緊,所以我會問呢句的.

    愛情就係一堆修飾過的癈話同空頭支票,幾時兌現? 咁要睇雙方啦!
    由逍遙小妹所提供:P

    回覆刪除
  19. 「如果我早啲識到你就好!」
    其實,相逢恨晚的遺憾,不斷上演。講這句話徒令對方感到無奈....

    「係你就係你!唔係你就唔係你!」
    都幾真!無論你點努力去挽留,也只是遲早的事實!

    回覆刪除
  20. diamond

    女「你唔愛我啦!」
    男「我愛呀!」
    女「你呃我,你知架!」
    男「我點唔愛妳呀?」
    女「你咁都要問,證明你唔愛我啦!」
    男「但係我真係唔知喎.」
    女「哼!你知架!」
    男「妳咁嚟屈我,妳都唔愛我啦!」
    女「我點唔愛你呀?」
    男「妳咁都要問,證明妳唔愛我啦!」
    女「但係我真係唔知喎.」
    男「哼!妳知架!」

    ***********

    lo哥

    「如果我早啲識到你就好!」係好正常, 反正我都飽受呢句折磨過...<--lo哥, 睇開啲,

    正所謂:係你就係你!唔係你就唔係你!
    oh sorry! 我又跌落廢話陷阱

    回覆刪除
  21. laulong
    忍住淚水呀!
    得返一個「傻」字?
    都好呀
    有得傻,總好過無得傻吖!

    這夜, 我想聽呢首歌

    「輸完又嚟賭過」

    ***************

    逍遙小妹

    「愛情就係一堆修飾過的癈話同空頭支票,幾時兌現? 咁要睇雙方啦!」<--睇得通吖
    唉~~留下一滴淚

    回覆刪除
  22. 巴黎

    「相逢恨晚的遺憾,不斷上演。講這句話徒令對方感到無奈....」

    巴黎旅客
    請忍著淚水,立即遞上紙巾

    回覆刪除
  23. 謝謝皇臺兄遞上紙巾(最好係tempo啦,想起廣告個女仔)!邊個話香港人情如紙薄?今晚我就睇到萍水相逢人間有情!

    回覆刪除
  24. 巴黎旅客

    同是天涯淪落人,在這傷心者通道上同行
    也許不必知道我是睡,無謂令妳再度灑淚...

    回覆刪除
  25. >>巴黎旅客

    係囉... 下次係咪都係廢事講,心裡知算呢? ( 起碼唔好對嗰位咁無奈ge人講?? )

    「係你就係你」 係我覺得一貫陰人的陷阱...

    >>卡臣
    嘩你用啲勁廢既來回應我喎..... 哈, 呢句真係廢到爆. =) 我成日都同啲人講 : 「喇, 你講啲咁廢既野, 你都插喇, 你係咪想我插你先? 」

    咁啲人就識做好多~~

    回覆刪除
  26. lo哥

    如果你被女朋友飛甩
    你的一位男性朋友嚟安慰你:「係你就係你」
    咁,好有可能, 就係佢撬你牆角喇

    你亦都唔好同別人講:「係你就係你」
    以免瓜田李下

    回覆刪除
  27. 閨中密友A想搵你食飯喎,不過又話千奇咪講俾B知喎...
    hehe...

    回覆刪除
  28. 為免引起A和B的誤會,
    妳閨中密友A的好意,我心領啦,

    呢排好忙,忙睇電視同瞓覺
    密友A..遲啲再約啦

    回覆刪除
  29. 咦皇臺,d歌詞好熟喎?

    lo哥,真的,有些東西,藏於心底,盡在不言中....

    回覆刪除
  30. 第一位:「我想點?你知架!」

    呢句真係R頭.唔通有女仔同你講過????

    回覆刪除
  31. >>巴黎旅客

    有道理!... 真係up少兩句好有時.

    >>carson

    嘩,好驚~~

    呢句從來唔up... 太廢la! =)

    回覆刪除
  32. 巴黎旅客

    妳咁法國,當然唔係咁清楚香港K歌
    呢首歌係:相逄何必曾相識
    K歌典範

    *********
    mona

    「我想點?你知架!」唔通有女仔同你講過?<--只有女仔同我講:「你想點?我知架!不過你唔好妄想喇!」

    *******
    lo哥

    同「嘩,好驚~」同級:「嘩,好邪~」,
    「嘩,好乜啫~」,

    回覆刪除
  33. 有句:[你在外面是否有其他女人?]
    有句:[你爱不爱我?]
    算废么?

    回覆刪除
  34. 「你想點?我知架!不過你唔好妄想喇!」

    hahahhahaha...掂喎~呢句又真係耳熟能詳~
    男生未必妄想,乾脆付諸行動.

    回覆刪除
  35. 蘇記

    你提供的兩句廢呀!

    回你兩句:
    「如果我同你阿媽跌落水,你救邊個先?」

    「你愛我?點證明先?」

    *****************

    mona

    男生未必妄想,乾脆付諸行動.<---好彩有啲男人無膽, 得個想字,
    妳又唔使咁驚

    ****************

    hana

    A想你係佢本劇照度簽名喎<---好呀!
    承蒙錯愛, 安排一吓

    回覆刪除
  36. [你愛我?點證明先?」
    答:晚晚做给你看!

    回覆刪除
  37. 蘇記

    [你愛我?點證明先?」
    答:晚晚做给你看!<-----呢句唔廢喎!
    仲充滿哲學性同包含真理!

    回覆刪除
  38. 突然間諗翻前度講過句廢話:我地可唔可以當咩事都無發生過啊?!

    回覆刪除
  39. 回你第八句:「鍾意就鍾意」
    其實如果對方真係答到鍾意自己的地方都會係一句廢話。
    例一:密運時:因為妳好可愛啊、分手時:妳都唔成熟嘅、仲好任性。
    例二:密運時:因為你好隨和囉,咩都就哂我、分手時:你好無主見、無性格啊。
    例三:密運時:因為妳性格開朗,人緣好、重情義、分手時:妳只係掛住妳d朋友,當我無到。
    情侣分手的時候所有的優點都自然地變成缺點,即係問咗等於無問...廢話一堆。

    回覆刪除
  40. 回你第八句:「鍾意就鍾意」
    其實如果對方真係答到鍾意自己的地方都會係一句廢話。
    例一:密運時:因為妳好可愛啊、分手時:妳都唔成熟嘅、仲好任性。
    例二:密運時:因為你好隨和囉,咩都就哂我、分手時:你好無主見、無性格啊。
    例三:密運時:因為妳性格開朗,人緣好、重情義、分手時:妳只係掛住妳d朋友,當我無到。
    情侣分手的時候所有的優點都自然地變成缺點,即係問咗等於無問...廢話一堆。

    回覆刪除
  41. carmen,

    「我地可唔可以當咩事都無發生過啊?!」

    我回妳一句:
    「不如我地從頭開始過.」

    +++++++++++++++++

    米米
    「情侣分手的時候所有的優點都自然地變成缺點」<---係呀!好中呀!
    不過講的時候由衷
    臨分手前才變質
    所以當初唔廢
    日後諗起才廢.

    回覆刪除

LinkWithin

Blog Widget by LinkWithin