~~~~~~~~~~~~~~~~







2008年7月1日 星期二

廢話–人際篇

廢話 – 人際篇

香港人雖然出哂名生活節奏急速,
但仍然留有足夠的時間去講廢話,
喜歡講一啲講咗但又好似無講過嘅說話。
先數一數人際交友之間的廢話:

第十位:「凡事有兩面,睇你點睇啫!」
朋友遇上難題,需要做決擇:走或留?抓定放?
搏唔搏?追定縮?想朋友俾啲意見,
結果朋友就答:「凡事有兩面,睇你點睇啫!」
「有好有唔好啦」、「都係你自己先至最清楚」。
講咗但又好似無講過嘅三毫子一擔做人道理。

第九位:「你知我份人係點架啦!」
朋友之間發生誤會,搞到要當面對質,
被冤枉的一方百詞莫辯之際說:「你知我份人係點架啦!」
這樣說是先假設對方非常了解自己,希望對方相信自己的為人。
但係,如果對方真係咁了解你,就唔會有誤會發生啦,
亦唔需要大家三口六面講清楚!
對方就係知道你份人係咁打橫嚟架啦!

第八位:「俾我後生返十年?我一定可以…」
人會年老,身體機能轉差,這是不能改變的自然現象,
但有些人放不低昨天的光輝歲月,對自己的不濟感不滿!
「俾我後生返十年?我一定可以打低個賊!」
「俾我後生返十年?我一定可以跳Bumji Jumping!」
唉~ 連小學生都知道光陰一去不返啦!
唔通日日講,就真係會後生返啲咩?

第七位:「就當我無講過囉!」
朋友言談之間,無意講出一些不應講的說話,
例如冒犯說話、攻擊性言論、秘密、誨氣說話等,
朋友會補一句:「就當我無講過囉!」
無奈講咗出口的說話,如同撥出去的水,
點可以話收返,就真係可以收得返?

第六位:「早知我就咩啦!」
意思等如「有早知,無乞兒!」的馬後砲說話。
朋友遇上倒楣事情,呻笨大嘆:「早知我就唔做啦!」
「早知我就買啦!」、「早知我就去啦!」
講完都無補濟於事!

第五位:「你唔好再飲啦!」
朋友遇到失戀挫折打擊,要借酒澆愁。
旁人見到他酩酊大醉,劏緊仲要追酒飲,
朋友好言勸道:「你唔好再飲啦!」
結果當事人梗係唔會理你!聽完仲越飲越多添!
所以呢句「你唔好再飲啦!」似乎唔講好過講。

第四位:「如果我係你,我就一定…」
見到朋友吃虧,身邊人忿忿不平,
便插嘴講:「如果我係你,我就一定去報警啦!」
「如果我係你,我就一定要追究到底!」、
但係人都知道,一個人又點可以變成另一個人呢?

第三位:「搵日出嚟食飯吖!」
朋友偶然街上碰到,傾完兩句,交換近況之後,
某一方實會先開聲:「搵日出嚟食飯吖!」
「搵日出嚟飲嘢吖!」、「搵日出嚟吹水吖!」
結果,沒有講明「時、地、人」的約會,
當然是一個無傷大雅的廢(笑)話。

第二位:「你見到我咪就即係到囉!」
朋友搞聚會,問你出席定唔出席?
最老土的答覆就是先反問聚會發起人:「如果阿邊個去,我就去!」
另一種無菱兩可的答法就係:「你嗰晚見我到,咪就即係到囉!」
「見到我就見啦!」、「我到就自然會出現啦!」
朋友唔重視個party,就會答啲無重量的答案。

第一位:「咦?嚟咩呀!」
在茶樓遇到朋友:「咦?嚟飲茶呀!」
在健身室遇到朋友:「咦?嚟做gym呀!」
在戲院遇到朋友:「咦?嚟睇戲呀!」
在廟宇遇到朋友:「咦?嚟拜神呀!」
唔通嚟紋身?跳水?劈友?彈結他咩?
這是最「明知故問」的最佳示範例子。
講嘅無謂、聽嘅唔想答,一句講哂:「多餘發聲」!
成為廢話第一位!當之無愧!


待續

46 則留言:

  1. 今晚 google blogspot 有點問題,好多時 load 唔到去 blog,就算去其他人的 blog 去係,連 gmail 去 down 左。

    回覆刪除
  2. hahahahahahah...第一位真係非常第一位,無可取代~~~
    真係細至小朋友大至公公婆婆都會講呀!!

    回覆刪除
  3. 大文

    唉!唔怪得斷線啦
    blue jeans: 豈有此理~豈有此理~

    廣告多咗<---即delete

    回覆刪除
  4. 咦! MONA, 嚟留言呀?!

    ps
    妳就快生日呀?

    回覆刪除
  5. 咦?笑聽哥,嚟聽我講廢話呀?

    講廢話,可以充實我內容空洞的對話

    ps
    5點鐘咁早起身練琴呀?

    回覆刪除
  6. 早定晏,凡事有兩面,睇你點睇啫!而家係三藩市下午五點鐘,返工好悶。

    回覆刪除
  7. 卡臣兄:

    呢劑PK啦,我最鍾意講呢句噃~~~~~~:P

    凡事有兩面,睇你點睇啫!

    因為我好多朋友聽完意見後,既無聽我意見,但又唔跟自己原來諗法去做而變咗Plan C呢:P

    Daniel.

    回覆刪除
  8. 卡卡:

    哩啲叫做,揾啲嘢講吓咁囉!

    把嘴,唔係食嘢就講嘢。相對無言(唯有淚千行),都慘架!

    唉,撩撩吓,又黎啦!

    回覆刪除


  9. 吓! 原來你身處舊金山?
    失覺哂!失敬哂!
    嘩!cable car, golden gate...

    你話工作悶?
    「凡事有兩面,睇你點睇啫!」
    「你知我份人係點架啦!悶都要做架」
    「俾我後生返十年?我一定可以轉工」
    吓?你話我講廢話?
    「咁...就當我無講過囉!」

    回覆刪除
  10. daniel

    「因為我好多朋友聽完意見後,既無聽我意見,但又唔跟自己原來諗法去做而變咗Plan C」

    如果我係佢, 我都會咁做!
    我話...如果啫

    回覆刪除
  11. laulong

    「唉,撩撩吓,又黎啦!」

    喂! 忍住淚水呀!
    miss同班學生望著你呀!

    你快啲望住支國旗啦
    話見到中國旗飛揚,
    就感動到想哭

    回覆刪除
  12. 卡卡:

    miss 掛住望啲後生靚仔 sir, 學生掛住望啲後生靚仔同學。係得街邊隻流浪狗望吓我,諗,乜條友咁似我!

    回覆刪除
  13. 劉sir
    唔好咁悲觀
    人生仍是美麗的

    你張blog相已給芭堤雅歌舞團睇中
    誠邀你走埠登台
    讓你在工作中淡忘情傷

    阿門~

    回覆刪除
  14. 半夜被電話鈴聲吵醒,對方說:
    「咦重未瞓呀?有冇嘈醒你?
    都係無野啦,早d瞓啦!」

    乜野人嚟架!!!!
    €$*ù¤£é@î*xö=&*......

    卡臣你食左飯未?

    回覆刪除
  15. 還有一種超級 Ultra / Extreme 廢話呢:

    【嗱,我個 friend 個fd 識得有個人,話呢咁咁咁。我又有個 fd 識得有個人呢,話又識得有個人例子係咁咁咁、仲有呀,我親眼見過,有個人咁咁咁,仲有添呀,好多人都講我知,咁咁咁添呀,所以你要信。】


    *********

    基本上,【那些人】永遠是 unknown ,同【 我聽過有人話見過 UFO 】道理差唔 L 多。即係唔會有真人證明,但你要信既。因為【好多人都講架,我係咁聽番嚟架~】。

    回覆刪除
  16. 巴黎旅客

    妳又會咁橋上嚟嘅?!
    上緊網呀?
    無嘢啦, 唔阻妳啦!

    妳今日飲咗expresso未?

    * * * * * * *

    陳大文部落集團(大中華)控股
    CEO 陳主席

    呢種神秘朋友真係無處不在架!
    朋友話接吻會懷孕,
    朋友話呢套戲好悶,
    朋友話佢好姣,人人都啱....

    頂!...都唔係嘅!

    回覆刪除
  17. 分手廢話:
    「就當我地有緣無份,不如以後做番好朋友!」

    「你究竟有冇愛過我?」

    回覆刪除
  18. 人生哲理三毫子廢話 ver 2.0 :

    【針無兩頭利、無話啱定錯、錯中有對、對中又未必真的對、無話人人啱,無話人人錯,都唔係咁講既,你又唔啱既,但我又唔係話你錯囉,總之無話你點啱點錯囉。】......<---咁即係點呢,亞師傅?

    回覆刪除
  19. 每事問:想借問聲,點解叫三毫子?係咪有典故嘅呢?

    回覆刪除
  20. 三毫子 ---> 三毫子一擔。

    解作( 比喻 ) 為:沒甚價值的

    例如: 人生總有逆境...不如意事十常八九...( <--- 這就屬三毫子一擔人生哲學,等於說亞媽係女人 ,幾多餘。但又唔可以話錯,但潛台詞即是:係人都知。 )

    回覆刪除
  21. 咦! MONA, 嚟留言呀?!

    haha..真係呆左幾秒先load到呀~~~
    勁!!!

    ps
    妳就快生日呀?

    唔係喎..何出此言

    回覆刪除
  22. 巴黎旅客

    「愛一個人有罪咩?」
    「妳可以唔愛我,但係妳唔可以阻止我愛妳」
    「全世界話愛妳係錯,我唔想啱!」


    * * * * *

    陳大文部落暨糧油食品批發有限公司

    阿ceo, 你寫果段廢話
    真係殿堂級班霸,廢話中的XO
    無敵啊!

    三毫子小說-->廉價薄裝袋裝奇情小說
    請參考
    http://www.threepennyopera.org/

    回覆刪除
  23. mona
    妳話朋友跟妳生日只差兩個月...

    回覆刪除
  24. 第四位:「如果我係你,我就一定…」

    呢一句我都幾常講。 特別係對著自己緊張D嘅朋友。

    回覆刪除
  25. 我突然間想起一句癈話,"咁啱呀,係呢度撞度你"其實同對方必講的開場白.

    回覆刪除
  26. 素素

    我立即示範:
    「如果我係你,我就一定嫁俾QC仔啦!」
    「如果我係你,我就一定派幾打餅卡俾卡臣啦!」

    * * * * *

    逍遙小妹
    其實「係呢度撞度你」都幾奇妙
    妳諗吓,每日擦身而過,七百萬人之中,竟然有兩人可以不約而同撞見(專登跟蹤另計)

    所以我撞到人都講架!

    回覆刪除
  27. 「唔係呀!」對一些巳經發生的事情、現象的懷疑,雖以置信...我常常聽到別人或自己說的驚嘆號。

    緣份真奇妙,沒早一步、沒遲一步!不過有些人你不一定想遇見....

    回覆刪除
  28. 巴黎旅客
    「唔係呀化?!」<--香港加多個懶音
    鬼佬都話:「Oh~ really?」

    不過有時真係對方搞錯,
    俾妳大一大佢:「唔係呀化?!」
    對方:「噢!sorry 真係搞錯咗」

    緣份呢家嘢, 唔遲又唔早
    唔係他,唔係她, 只是妳
    唉~一陣秋風蕭颯人~~

    廁所旅客上

    回覆刪除
  29. 唔係呀化?!幾時變左廁所旅客?

    做乜咁大感觸悲秋呀,唉凡事有兩面,睇你點睇啫!得到未必好,得不到永遠完美(想像)....

    咦阿邊個話琴日撞到你喎,你啱啱行緊路喎。

    回覆刪除
  30. 二打六

    sorry! 立即改番!

    * * * * * * *

    desertfox
    你現身處中國還是挪威?

    * * * * * * *

    巴黎旅客
    廁所旅客...因為喜歡在廁所門背寫現代詩.

    得到未必好,得不到才永遠完美
    失去未必唔好,甩唔到才永遠痛苦

    咦阿邊個話琴晚撞到妳喎,妳啱啱透緊氣喎。
    仲同啊邊個一齊咩添~

    回覆刪除
  31. 啊呀,啱啱入笠唔講住。

    轉頭打俾你,有交通警係隔離,我冇用hand free啊

    回覆刪除
  32. Hana

    嚴格嚟講,妳果兩句都唔係廢話
    因為說話中有資訊,信息傳遞出

    等我示範一吓:
    對方是清醒,問佢:「仲未瞓」
    嗱!呢句先係廢

    回覆刪除
  33. 咦卡臣,咁夜仲未瞓呀?仲上緊網呀?

    原來公厠內d打油詩係你既傑作,有關部門打攞揾緊你喎,佢地話要學佛羅倫斯市政府調查教堂graffiti。

    回覆刪除
  34. 其實“廢話“同你之前嘅“打官腔“都一樣係唔講好過講,不過無人鍾意啞口無言,因為只要你個口有噏啲嘢,咁就可以令聽嘅人一時間覺得你有講過嘢,但係諗真啲原來都係廢話嚟嘅。

    回覆刪除
  35. 巴黎

    啱啱瞓醒,而家真係上緊網呀!

    關於廁所文章
    我朋友,注意是我朋友被人整蠱
    將她的手電號碼
    寫在廁格門背:「做足四味,9xxxxxxx」
    妳話死唔死吖!
    而家佢仲未知凶手係邊個
    都係我掩飾得好囉!
    唔好爆響口呀

    回覆刪除
  36. 歪歪
    你話:「因為只要你個口有噏啲嘢,咁就可以令聽嘅人一時間覺得你有講過嘢,但係諗真啲原來都係廢話嚟嘅。」

    恭喜你!
    你係第一個講出我寫呢個blog的動機和宗旨
    你又一眼利鐵証

    回覆刪除
  37. 我都係多得你嘅文章先至有感而發啫!

    p.s.多謝你响另一篇嘅留言,雖然我忙少咗留言,但係我日日都有嚟睇㗎!

    回覆刪除
  38. 歪歪
    嘻!使乜咁客氣呀!
    工作要緊!
    忙咪好囉!
    得閒睇吓,我已經好開心

    回覆刪除
  39. I went back to Norway 2 weeks ago. Now back to work and 2 more months till my next vacation. Overstayed a little bit in China. Overall it was fun.

    回覆刪除
  40. desertfox
    咁就好啦
    今年旺呀
    好多人成親呀!
    花好月圓,良辰美景!

    回覆刪除
  41. that's because of 2008 olympics. Although I did not decided to get married this year based on that.

    looking forward to more posts from your blog.

    My wedding pictures:
    http://s168.photobucket.com/albums/u181/kongmingo/wedding

    回覆刪除
  42. desertfox
    嘩!啲結婚相好靚喎,
    你太太又靚
    特別喜歡橙色t-shirt果張合照
    感覺好舒服

    祝福你們~!

    回覆刪除

LinkWithin

Blog Widget by LinkWithin