~~~~~~~~~~~~~~~~







2008年4月20日 星期日

打官腔

打官腔

如果有人講嘢無稜兩可,鐘意帶你遊花園,
講咗嘢又好似無講過,既保底又保守;
我哋會話佢講嘢十分之「官腔」,
現在嘗試講吓做官嘅人點樣打官腔?

第十位:「繼續尋求共識」
即是「仲未傾過」、「仲搞緊」、
「仲未傾掂」、「傾唔埋欄」的意思,
「繼續」表示離成功的目標,還有一段距離。
希望記者們放過當時人一馬,唔好成日煩住哂!
等我透吓氣,遲啲先好再嚟問過。
一字記之曰:「耍」!

第九位:「值得鼓舞、高度評價」
即是「幾好!」「OK Good!」、
「今次掂啦!」「威番一次!」的意思,
用於攞獎揚威、成功申辦、大陸派餅、自救自強、舉世創舉。
無奈人生不如意事十常八九,
所以這句只會間中出現一吓,曇花一現。
一字記之曰:「誇」!

第八位:「深切慰問哀悼」
對於所有天災人禍死人塌樓,
高官在電視前擺出一副憂心戚戚表情,
對傷者發出深切慰問、對死者發出深切哀悼!
但公式化慰問變成Programmed咗嘅例行工事,
變成無情感的官式慰問語,
一字記之曰:「假」!

第七位:「成立跨部門協調小組」
爆咗大鑊,幾個政府部門都有份上身,
喺咁嘅時候,就需要成立一個跨部門協調小組去補鑊!
高官回答:「已經成立跨部門協調小組。」
意思即係指:請記者們去問跨部門小組,唔好再問我(纏我)啦!
一字記之曰:「推」!

第六位:「有待獨立小組調查報告」
當媒體揭發政府某部門出錯或醜聞,
政府成立獨立小組,調查有無人需要負責?
高官面對咪高鋒,回答:「一切有待獨立小組調查報告」
叫記者等報告出咗先講啦!一招順水推舟連消帶打!
一字記之曰:「閃」!

第五位:「唔排除有呢個可能性」
即是「或者啦?」的官式講法,
面對記者的問題,
如果答案是「100%絕對無可能!」,高官可以一口堅決否定!
但如果答案是「對」的話,高官會答:「唔排除有呢個可能性」。
就算100%肯定都好,都要為自己的答案留有餘地。
一字記之曰:「Vague」!

第四位:「只係個別事件」
例如警隊有魔警、醫院醫死人、食環署吞泡,
高官回應:「呢啲只不過係個別事件!」
政府的污點只是滄海一栗,其他公務員仍然是高效率、公正嚴明!
但市民不會相信污點只是滄海一栗,而應該是冰山一角。
一字記之曰:「呃」!

第三位:「現階段不作任何回應」
即是「而家我唔想答你」的官式禮貌答法,
現階段不作回應;並非意味着下階段會回應,
記者們也不會天真地寄望下次遇上官員,他會作出回應。
所以記者們如實照寫,寫:「現階段官員不作任何回應」
一字記之曰:「拖」!

第二位:「表示震驚!」
見過大風大浪的官員,泰山崩於前都不動於色!
無奈官員嬌生慣養,容易驚青騰雞。
所以見乜大鑊嘢爆咗就「表示震驚」!
這一句回應只暴露出官員的危機處理經驗不足。
官員們表示震驚,讀者觀眾們對官員如此反應,都表示震驚!
一字記之曰:「騰」!

第一位:「深表關注」
「深表關注」是官腔中最官腔的一句!
記者訪問有關官員,對某事件發表意見,
官員一面正經地說:「深表關注!」
難道有關官員夠膽說:「唔係好關我事!我唔關注!」或者「係咁咦關注吓啦!」
雖然讀者觀眾們未必會「深表關注」官員作出的「深表關注」回應,
但你做得官,納稅人出糧俾你,
你的工作就是需要你去關注事態發展,
如今官員將應有的工作職務來當作自己的回應,糊混過關。

再者,「深表關注」立場中立,沒有附加任何私人好惡語氣、
正面或反面的暗示、buy或唔buy的感緒,
最適合出自官僚僵化的公務員口中,
所以「深表關注」成為官腔的第一位,實至名歸!
一字記之曰:「廢」!




36 則留言:

  1. 【我地會密切關注!】...即亞媽係女人~


    【仍然需要廣泛既資詢 ~】...即有排都未做~

    【香港,係需要發展既!】...萬用借口 ~

    【我地要平衡各方面既利益!】...為有錢佬就真 ~


    【有關既報告評估已經有喇,我地會積極研究!】....研究,但結果通常一樣。

    ...

    回覆刪除
  2. 這篇文章,一字記之曰:「正」!

    回覆刪除
  3. 香港D警察好似成日都用呢D句子wo---「警方對於XXX表示深表關注。」

    回覆刪除
  4. 大文兄,
    笑死我啦!
    果然係新聞從業員,
    一矢中的!
    要心要肺

    回覆刪除
  5. ERIC
    真係有:「高度評價」?
    咁就:「值得鼓舞!」

    回覆刪除
  6. 我地絕對唔容許有lee d 事情發生

    回覆刪除
  7. snow
    係呀!
    仲話「警方表示密切關注事態發展。」

    回覆刪除
  8. 真多手
    直情「天理不容,人神共憤!」
    一定要輯拿真兇

    回覆刪除
  9. 通常到午膳或下課後才留言,但這篇貼文實在正!

    回覆刪除
  10. 這些官腔,不單是空洞,有些還是歐化中文。
    例如:現階段不作任何回應。真累贅!

    回覆刪除
  11. 周身唔得閒,不過都要留番句先。

    這篇文章,一字記之曰:「正」! X 2

    回覆刪除
  12. 卡兄:

    對於你的讚賞,我地各部門、每位同事,都會繼續努力,為市民、為香港做到最好,百呎龜...sorry 百呎桿頭,更進一步,努力向前,永不停步,恭喜發財。

    我地會致力保持香港既和諧,包你有排捱。


    香港,係我地既家、清潔齊參加,人人誇啦啦,唔會俾人屌那媽。


    ********

    觀眾: 呵 ~~ 欠 ~~~ ╭∩╮(︶︿︶)╭∩╮ X 2

    回覆刪除
  13. Laulong
    你梗係要做咗正經事先啦!
    {但這篇貼文實在正!}
    官腔:[不容置疑而令人振奮的正面肯定!]

    回覆刪除
  14. eric

    真累贅?
    整句勁啲!
    [這是一項可持續發展的基建項目,為珠港澳的未來十年潛力發展奠下宏觀的藍圖!]

    回覆刪除
  15. xiao zhu,
    多謝百忙抽空
    我的是磚,你們的才是玉!

    回覆刪除
  16. francis
    官腔擴散現象?
    辦公室泛濫官腔
    [呢個方案可以係考慮,但睇埋客觀環境, 先可以下定論!]

    回覆刪除
  17. 大文兄

    遊花園:[你咁講, 話啱又唔係100%啱哂, 但係又唔可以話你錯, 睇你企係邊度睇番過嚟.
    其實,對錯係無絕對, 反而係原則性嘅問題,
    睇吓妥協嘅底線同大環境,你清楚呵?]

    回覆刪除
  18. 大文兄
    純粹示範遊花園的說話
    跟你的留言無關.
    見諒見諒!
    自隊一杯先
    嗗~嗗~嗗~~

    回覆刪除
  19. you guys are really talented, great feedbacks & quotes.

    回覆刪除
  20. 嘩, 講官腔同遊花園, 我想大陸, 就是老百姓, 也比香港玩弄得更出神入化...

    回覆刪除
  21. 大文兄,
    渣估個 chartroom 應該衣香鬚影啦!
    你係咪真係問佢美食同工藝嘅問題呀?

    回覆刪除
  22. NOST
    第二度我唔知,
    不過呢度就一定係留言精彩過原文.
    仲抵死綴核!

    回覆刪除
  23. sava
    "官腔同遊花園, 大陸比香港玩弄得更出神入化..."
    睇妳工作上同大陸人交手, 奶唔少嘢,有感而發呀?
    算啦!花園空氣好, 行呀啦!

    回覆刪除
  24. 小妮,
    妳係咪喺工作上受咗氣呀?
    唔緊要, 有人忡衰過妳呀!
    低處未見低

    回覆刪除
  25. 一字記之曰:「絕」

    高手眾多,唔敢留言.

    回覆刪除
  26. Carson,
    如果可以的话, 请把你的电邮发给我(erikleung2000@gmail.com), 有一事想问.

    回覆刪除
  27. waaaa. heeeeeeeello.. ya.. very random. just saying HI!!! =D

    回覆刪除
  28. VINCENT
    一字記之曰:「謝」

    "高手眾多,唔敢留言."
    喂!唔好咁諗先!
    朋友有分高班低班嗎?
    嚟打聲招呼都好啊!
    講無謂嘢我最歡迎.

    回覆刪除
  29. desertfox
    當然無問題啦!
    有嘢問? 我突然想起南宮夫人信箱

    回覆刪除
  30. "飛雪+樹"那張係好得ga! 裡面gor張係普通生活照,食緊samusa。你D型好多lor!好man~

    回覆刪除
  31. snowy
    哈哈!
    妳被呃倒啦!
    我FBK張相用photoshop勁執.
    其實我係200磅禿頭肥佬一名!

    回覆刪除

LinkWithin

Blog Widget by LinkWithin