~~~~~~~~~~~~~~~~







2008年3月7日 星期五

事先張揚的大話–友情篇

事先張揚的大話 – 友情篇

有些大話講得多、聽得多之後,大話本身已很失去欺騙別人的作用。現數一數這些大話:
香港人事先張揚大話三部曲,第一篇是朋友間的十句典型事先張揚大話:

第十位:「我得張1,000蚊紙咋!」
同朋友出街當然要使錢,例如搭的士俾隧道費買雜誌時;需要俾錢時有人會話:「我得張1,000蚊紙咋!」藉詞驚人無得找贖而獲得「免俾金牌」。這張一千蚊紙當然如護身符般經常放在銀包內。

第九位:「我就快到!轉個彎就到!」
朋友約會,必有一位慣性遲到。戲睇演唱會旅行累到全世界要等佢。追魂call催促之下,他必會七情上面回覆:「我就快到!轉個彎就到!」查實仲未換衫出門口!

第八位:「即刻還返俾你。」

朋友之間當然要「分享」,DVD、CD、書、衫、相機、袋,並應承用完之後:「即刻還返俾你!」結果追吓拖吓唔記得咗,死後變成自己的陪葬品都仍未能歸還。

第七位:「我記得!嗰日啊邊個咩呀嘛!」
朋友之間吹水想當年,講集體回憶。席間大家都記起某一件事,講到眉飛色舞!唯獨某人毫無頭緒,他只好扮知,說:「我記得!嗰日啊邊個咩呀嘛!」時間人物事情經過,都通通籠統地輕輕帶過算數。係人都知佢死充啦。

第六位:「下次等我俾,記得唔好同我再爭呀!」
朋友飯局,有人爭埋單請客,被招待的朋友「係咁咦」扮爭俾錢後,收回銀包說:「下次等我俾,記得唔好同我再爭呀!」輪到下次食飯俾錢時,又會忘得一乾二淨!仲第一個話要去洗手間。

第五位:「你哋話事啦!我乜都無所謂!」
三五朋友去睇戲食飯,睇邊齣戲?食乜菜?行邊個商場?意見紛紜,有人會話:「你哋話事啦!我乜都無所謂!」結果講乜都唔贊成,佢先至係最有所謂嗰位。

第四位:「呢度講,呢度散!」
朋友聚會講其他人的八卦是非,講者例必講:「嗱!呢度講,呢度散!」大家都拍心口應承:「得啦!快啲講啦!」結果呢:消息當然傳遍天下眾人耳朵。

第三位:「搵日出嚟吖!叫埋啊邊個吖!」
朋友在街上巧遇,寒暄幾句後,一方意猶未盡說:「搵日出嚟吖!」另一方和議說:「好啊!叫埋啊邊個吖!」兩人揮手道別後,這個約會承諾便馬上告失效。

第二位:「我有個朋友,佢…」
朋友之間有些難以啟齒的尷尬事情,只好化名成為:「我有個朋友,佢患咗性病…」、
「我有個朋友,佢老婆紅杏出牆…」、「我有個朋友,佢爭人週身債…」等等,眾人都知「我有個朋友」的那位朋友,其實是指他自己本人。無人蠢到會問:「咁你可唔可以介紹你嗰位朋友俾我識吖?」

第一位:「我無醉呀!」
三五知己去劈酒,不醉無歸。酒量淺的人很快醉倒!又劏又嘔!朋友扶他去廁所、去搭的士,酒醉朋友一定左搖右擺大嗌:「我無醉呀!」這是一個最終極的事先張揚大話!

12 則留言:

  1. "待續"是事先張揚的大話?haha

    回覆刪除
  2. "White lies" are sometimes a "must" in life - as to maintain better relationship with others ... quite "mo loy", but true, agree?^_^

    回覆刪除
  3. 「我地好似晌邊度見過?」 算唔算架?

    回覆刪除
  4. "鐘意飲咖啡多啲" - 你飲那類咖啡? 一些甜酒也有咖啡味.

    回覆刪除
  5. vicky,
    "待續"係咪事先張揚的大話?
    星期日晚妳就知囉

    回覆刪除
  6. 渣兄,
    「我地好似晌邊度見過?」 更係啦!
    仲有:「妳好似係做model喎?」
    「妳點解唔做歌星呀?嘥料!」

    回覆刪除
  7. vincent,
    即磨果隻,
    大快活的咖啡 我已經收貨.
    平嘛.

    回覆刪除

LinkWithin

Blog Widget by LinkWithin