~~~~~~~~~~~~~~~~







2015年4月22日 星期三

明晨有什麼?




明晨有什麼?

中午一時許,一些白領人士帶外賣飯盒到香港公園,坐在長櫈上吃飯盒。樹蔭下某張長櫈上,坐著一名西裝salesman和老伯。兩人互不相識。

西裝友望著手中那盒飯,吃下兩啖,又嘆一口氣,跟著又發「牛哣」,係人都知道佢煩惱緊。阿伯主動略坐近西裝友,用帶有大陸口音的廣東話問:「後生仔,煩乜嘢呀?」

西裝友見有人問自己,絕對不反感,(西裝友得一個人吃飯就知道佢無乜朋友可以訴苦),難得有人肯關心吓自己。加上阿伯是個陌生人,可以盡情無後顧之憂地訴苦。

西裝友如缺堤般講出他心底的壓力和鬱結:老細苛刻、生意淡薄、同事奚落、朋友玩佢、一事無成、無錢無樓、女友厭棄、髮絲後移、氣虛血弱、中年危機…..

阿伯聽後,大聲地笑了起來!笑說:「哈哈你就係為咗呢啲嘢煩惱?哈哈呢啲嘢就算點衰,都唔使死人架!

阿伯解釋說:他患有睡覺窒息症,無得醫,每晚上床瞓覺,第二朝都有可能醒不過來,阿伯說每次早晨醒來,能夠張開雙眼,知道自己未死,便是賺了多一天。西裝友的所謂煩惱,又算是什麼?

一講到生命喎,西裝友點接呀?他的所謂煩惱通通都要行埋一邊。

西裝友似乎頓悟了,自己四肢健全,沒有絕症,已經值得慶賀。西裝友立即彈起身,如充了電般,向阿伯講了聲多謝後,步履輕快地跑走了返工。

阿伯見西裝友跑離視線範圍後,才偷偷地拾起西裝友留下的飯盒,望左望右後,繼續食「二手飯」。

原來呢個阿伯並沒有患什麼絕症,只是年老沒有積蓄,攞綜援不夠用,他要到公園找目標,向頹廢目標sell一個「希望」,十個有九個都會留下個剩半的飯盒後,昂首闊步跑走了,阿伯就可以解決了當天的午餐。

一個西裝友,失去「希望」,苦海茫茫地殘喘生存下去,
一個窮阿伯,向失意者兜售「希望」,想盡辦法生存下去。



二少爺說:在生命中發掘一些小樂趣,去苦留甜。

6 則留言:

LinkWithin

Blog Widget by LinkWithin