~~~~~~~~~~~~~~~~







2015年1月19日 星期一

今日CID


今日CID

大輝哥是一名駐守旺角區的CID,當差25年,可以用「老差骨」來形容他。三個月前,「Sir」導演,透過警民關係科,想找一些資深CID傾吓偈,做資料搜集。資歷深的大輝哥,被警民關係科選中。出memo叫大輝哥,見賭Sir導演。

大輝哥下班後,在咖啡店見賭Sir和另一編劇,話題從大輝哥「為什麼要當差?」開始。賭Sir要求他講出一單印象深刻的案件。

大輝哥講出一個經歷:他當差生涯中,最頑強的一個死敵:Rocky」。一個他生平見過最好打的黑社會大佬。故事的結局,當然是邪不能勝正,大輝哥講述他如何神勇地跟Rocky惡鬥連場。最後Rocky慘死在夜總會。

Sir很喜歡這個故事,謝過大輝哥之後,回去跟編劇合寫成劇本,拍成這部《今日CID。在電影海報上,大輝哥掛上「特別顧問」一名銜。大輝哥獲送電影贈卷,在電影上映時,大輝哥第一時間欣賞,見到有型有款的任達華扮演自己,跟由張耀揚扮演的Rocky在隻揪,拳來腳往,大輝哥感到十分滿意。

        * * * * 

熟識大輝哥的同僚「蛇皮」都有睇電影《今日CID》,睇完立即call大輝哥:「唓!大輝哥你亂24Rocky單嘢邊度係咁架!」大輝哥:「唓!拍戲之嘛!又唔係落口供,我鐘意點噏咪噏囉!

究竟大輝哥和Rocky的恩怨情仇,故事的真實版本是怎樣呢?

        * * * * 

兩年前,大輝哥駐守旺角,他是一名「講就天下無敵、做就有心無力」的吹水王,做嘢卸膊、貪生怕死、支配槍從未開過、等退休食長糧的因循肥差佬。

大輝哥還有一位拍檔叫「蛇皮」,負責一起查案。大輝哥和蛇皮都是偷懶一族,兩人話揸車出街查案,其實將架車駛去偏僻地方,消磨時間,等夠鐘就揸車回差館放工,話乜都查唔到,單案好複雜、千絲萬縷等等藉口。

某一個下午,大輝哥和蛇皮揸車去西貢某偏僻茶座偷懶,叫了個下午茶餐,大輝哥睇吓馬經、蛇皮打機,等太陽落山。這個茶座的老闆,也知道大輝哥和蛇皮是CID,對於警務人員公然偷懶,老闆都見怪不怪。

突然有一隊人馬到來幫襯,一個六十歲叔父坐低,其餘二十個門生坐在他身後四張枱,大輝哥知道將會有大鑊嘢發生,自己得兩丁友,又餚底,只好按兵不動。

五分鐘後,另一隊人馬又操到,行頭位好英嗰位大佬,就是「Rocky」,Rocky跟叔父對坐,Rocky的二十個門生,坐在他身後四張枱。氣氛極度緊張。

原來Rocky和叔父就一單「走私貨賣買」起了紛爭,相約在西貢茶座講數。大輝哥和蛇皮把身體盡量縮低,噤若寒蟬。結果唔駛三分鐘,Rocky和叔父一言不合,大打出手。四十個門生亮出架生互片,場面混亂,枱櫈四飛。混亂中,兩人的手提電話跌咗,欲call總部求救無從。大輝哥和蛇皮立即「低身」,爬出餐廳。

茶座老閣見狀,間舖就快被拆爛,立即向大輝哥和蛇皮求助:「阿sir,叫佢哋停手呀!」大輝哥和蛇皮差不多爬到餐廳門口,打了個突!一個打四個的Rocky突然聽到有人嗌阿sirRocky:「有差佬?好呀!」哈哈大笑起來!

一分鐘後,Rocky那黨已經一面倒打贏叔父那邦。控制了場面後,Rocky揪出大輝哥和蛇皮。門生們圍圈,把兩名警務人員,重重包圍。

Rocky見到震騰騰的大輝哥和蛇皮,鄙視地說:「做差佬做到咁撚契弟,我都係第一次見!」
大輝哥求情:「大佬!我,…打工啫我乜都睇唔到
Rocky見狀:「你係唔撚係男人嚟架?」示意手下狂打兩人。

大輝哥和蛇皮慘遭門生們圍揼,雙手護身,力保配槍不失,三分鐘後,Rocky見打得差不多,夠鐘收隊,揚長而去。現場只剩下豬頭模樣的大輝哥和蛇皮,餐廳老闆代為報警。

警車來到,將大輝哥和蛇皮送去醫院醫治,幸而無大礙,只是皮外傷。之後,大輝哥寫report,說收到線人報料有黑社會集會,立即飛車前往西貢現場,可惜敵眾我寡,被人打鑊金。大輝哥誓要報這仇,但自己呢一世都唔會夠Rocky打,又學咩人報仇呀?

        * * * * 

十日後,Rocky的屍體被發現在旺角某夜總會後巷。手筋腳筋被挑、死前遭殘酷虐待,應該是遭黑社會執行家法。大輝哥收到Rocky的死訊,立即拍爛手掌。大輝哥那個仇終於報咗。

Rocky的死,是大輝哥一手策劃。大輝哥在警署的電腦開了一個高度機密的檔案,內容記載了Rocky是警方臥底,正滲透入社團搜集犯罪證據。之後,大輝哥把這個偽造的警方檔案上載至「Fox分享軟件」,等睇好戲。

傳媒大又肆報導警方於Fox軟件外洩內部資料。一日之間,Rocky便由黑變白。社團對Rocky下了江湖追殺令,Rocky點解釋都無用,唯有著草走人,可惜最後都走唔甩,被人刮到中伏,最打得的黑社會大佬,最終死在同門手下。大輝哥沾沾自喜,殺人焉需用手?用腦一樣可以。

《今日CID》的電影票房報捷,大輝哥十分高興,人生中擁有兩次勝利,死而無憾。其後,大輝哥買了幾套《今日CID》的DVD回家,作為傳家之寶。等他退休之後,向兒孫細述當年自己如何跟Rocky單挑隻揪,日月無光,鬼哭神號。


二少爺說︰男人講嘢…..難免會作大少少。

14 則留言:

  1. 大輝哥好嘢,食腦好過郁手。

    屈Rocky係臥底就過份d,搞到人冇咗條命,屈佢勾義嫂咪算囉,最多搞到佢冇咗條鞭。 :p

    回覆刪除
    回覆
    1. 立即屈自己有AIDS, 即刻無人埋身。

      刪除
    2. 上司要求佢交醫生報告,最後奸計唔成功

      刪除
    3. 調返做軍裝,負責守大嶼山水塘

      刪除
    4. 喺大嶼山水塘,遇上一個隱世高僧......

      刪除
    5. 隱世高僧叫大輝哥命中注定會拯救香港
      需要他去暗殺一個人,

      刪除
    6. 隱世高僧講完呢句,忽然晴天霹靂、風雷大作,之後就化成一團紅色嘅煙,沖咗上天喇......

      刪除
    7. 原來隱世高僧要大輝哥暗殺喜歡穿紅衫的GY太太
      嘩! 好大殺氣喎,大輝哥不禁倒抽一口涼氣

      刪除
    8. 大輝哥倒抽一口涼氣之後,感覺極之憤慨和遺憾,並指隱世高僧是「淺薄、無知」、「冷血、涼薄」,跟住就冇咗件事,繼續行必喇。

      一個月之後,佢沿水塘行必時見到一對母女迎面而來,兩人都著住紅衫,仲撈亂隻鞋嚟著添......

      刪除
    9. 呢對母女的髮型是剪了「齊蔭」。
      個女行路如同行CATWALK,好似扮緊MODEL緊,
      就係呢個時候,一隻巨大龍蝦由水塘爬止岸
      大龍蝦向大輝哥邁進....

      刪除
    10. 電光火石之際,一個「機械人」喺草叢度走出嚟,將手上嘅甜筒掉向大龍蝦,大龍蝦頓時倒地。

      呢個時候,紅衫母伸出食指及中指作蟹鉗狀,將龍蝦鉗起,打算用嚟煮伊麵。

      而紅衫女就對住「似機械人嘅男人」大讚:「未遇到一個男人,好似我阿爸咁叻!」

      刪除
    11. 「似機械人嘅男人」突然失控,一嘢打死兩母女,天下太平,市民熱烈慶祝! 瘋狂消費,燒炮仗~~

      刪除
  2. 卡臣:

    英文有句諺語:Working smart, not working hard。

    回覆刪除
    回覆
    1. 我看過一句口號:
      聰明人做事找方法、蠢人做事找藉口

      計我話︰
      蠢人做事找方法、聰明人做事找藉口
      才對。

      刪除

LinkWithin

Blog Widget by LinkWithin