~~~~~~~~~~~~~~~~







2014年12月1日 星期一

虎鶴雙形拳


虎鶴雙形拳

一代宗師石問,是虎鶴雙形拳第八十代傳人。今年是石問師傅80歲大壽。石師傅70年代初在慈雲山屋邨設館授徒,宗旨在教人練拳強身健體,發揚中國武術精神。全盛期有二百多個徒弟,晚上分班在屋邨天台習武。桃李滿門的石師傅,徒弟做龍虎舞獅或電影替身,徒弟在影圈闖出名堂,飲水思源,都對石師傅尊師重道。

五日後是石師傅的80歲大壽。石師傅八十高齡仍然龍精虎猛,手腳靈活。一眾同門師兄弟,決定替師傅擺大壽,在秀茂坪某酒樓延開三十圍。所有徒弟徒孫,包括已移民美加的師兄弟們,都乘飛機回港飲呢一餐,向老人家拜壽,可說是武術界的一樁盛事。

大師兄虎鶴雙形拳第八十一代傳人,在慈雲山開設跌打醫館,兼營舞獅,這一區的新店剪綵、開年賀歲,所有舞獅助慶,都由大師兄醫館包辦哂嚟做。
二師兄在電影圈當動作指導,很多師弟跟他搵食,當電影動作設計或替身。
三師兄則沒有繼續練武,變成一個大肥佬,經營裝修三行生意。

三人正是這次石師傅大壽的搞手,負責聯絡、召集、訂酒席、搞表演、買賀禮等大小事務。三位師兄弟,年屆壯年,仍然感情要好,大家真心想搞好件事,沒有私心想爭取什麼,只要老人家老懷安慰便已心滿意足。

還有兩天便是石師傅的80歲大壽,壽宴之事務已經搞得八八九九。席間已安排好表演節目:徒孫們集體耍虎鶴雙形拳二師兄在辦公室諗:「師傅雖然80歲,但身手仍然唔錯,不如等佢露一手,大家一定好高興!」

二師兄想出一條橋:在壽宴那晚,安排兩個電影茄呢啡嚟踩場,挑釁石師傅的武術,等石師傅出手,打到佢哋一仆一碌。大家就在旁吶喊助威,石師傅知道自己寶刀未老,一定會好開心!

二師兄不想自己出面,叫助手搵兩件唔識打嘅金毛少年茄呢啡在壽宴那晚去踩場。吩咐茄呢啡要唸出一句對白:「石師傅,聽講你全個慈雲山最好打,咁好打?同我打吖,死老坑!」助手照辦。一切準備就緒,二師兄期待石師傅再出手這精彩一幕。

* * * * * 

石師傅80歲大壽當天,在酒樓內,徒弟跪底向石師傅敬茶,拍照留念。石師傅見咁多賢孝的徒弟徒孫,十分欣慰,笑到合不攏嘴。晚上9時,石師傅說了一番語重心長的感謝說話後,晚宴正式開始,雙眼放了燈泡的乳豬,捧到每張枱上,眾人飲杯!

吃到「菜膽扖鮑魚」時,有兩名身材瘦削的金毛少年,凶神惡煞咁走入嚟,伸手指向石師傅,大聲嗌:「石師傅,聽講你全個慈雲山最好打,咁好打?同我打吖,死老坑!

全場幾百位師兄弟,立即起身:齊聲:「咩呀!你講咩呀!」三師兄先出聲:「想同我師傅打?我一隻手指已經可以捽死你啦!」二師兄知道金毛少年是「臨時演員」,立即向師傅挑撥:「師傅,不如您露一手,教訓吓呢啲死靚仔!」

石師傅很久沒出手,一時技癢,一口答應。大家都習慣了對師傅說話絕對服從,師傅話要出手,大家靜靜退下兩旁。

不出所料,石師傅三扖兩撥,就一拳打中個死靚仔塊面,死靚仔當場暈倒地上。眾師兄弟替師傅喝釆!石師傅也得意地笑了起來。二師兄見氹師傅的目的已達到,就更加開心。

金毛死靚仔的同伴上前攙扶,驚叫:「吓!死咗?」石師傅大驚,上前察看,用手指探鼻,弊!家!伙!金毛死靚仔真係無咗氣,乜而家啲後生仔咁化學?take咗嘢呀?營養不良呀?一拳就打得死?石師傅驚惶向後退了兩步。搞出人命,氣氛急轉直下。大家都手足無措。

就在這一刻,又有兩名身材瘦削的金毛少年,凶神惡煞咁走入嚟,大聲嗌:「石師傅,聽講你全個慈雲山最好打,咁好打?同我打吖,死老坑!

二師兄見到這兩個少年,熟口熟面,記得他們是自己電影公司旗下的某兩名特約演員,二師兄心中大驚:「吓?大鑊!乜頭先嗰兩條金毛,真係咁啱得咁橋嚟踢館,早知唔叫師傅出手啦!」

金毛特約演員見有一個人瞓咗喺地上,又無人答佢,一時間,情況都好尷尬。突然「嘭」一聲,石師傅暈倒在地上,他一時情緒激動、心律不正、心臟病發、昏死過去。眾師兄弟大嗌:「師傅!師傅!師傅……

二師兄見玩出火,向金毛特約演員大喝一聲:「想死呀?仲唔走吖!」金毛臨記聽到自己老細一喝,當然乖乖走人收工。大師兄已經call了白車。大師兄向師傅進行急救。心外壓加人工呼吸,但石師傅似乎無乜起色。

等候白車期間,瞓在地上的金毛少年突然甦醒過來,原來佢未死,剛才休克,呼吸微弱而已。金毛少年見到現場情況咁混亂,趁機靜雞雞走人。

* * * * * 

眾師兄弟來到聯合醫院急症室,關心石師傅的安危。警方以為有黑幫曬馬,立即加以疏散。剩下十位師兄弟,焦急地在醫院等候。半小時後,搶救無效。一代宗師石問,魂歸天國,生辰變忌辰。

急症室大堂,十位師兄弟激動得留下男兒淚。二師兄大師兄最為激動,因為他們相信自己就是「弒師主謀」。

原來大師兄也想氹石師傅開心,竟然跟二師兄想出的一模一樣的屎橋。大師兄book了兩名金毛茄呢啡嚟踢場。為了加強戲劇效果,大師兄吩咐那臨記要扮重傷暈倒。怎料另一名臨記心急唸錯對白,把「吓!暈咗?」唸錯「吓!死咗?」,結果錯手嚇到石師傅心臟病發作,返魂乏術。

大師兄和二師兄沒有勇氣去把自己的秘密,告訴給其他師兄弟知道。自己偷偷背負弒師之罪名,終生留下自責陰影。石問師傅沒有想過自己一生80年,最後竟然由他寵愛的二位大弟子,親手畫上生命句號。


二少爺說︰功夫兩個字

8 則留言:

  1. 玩嘢玩大咗,真係好無謂。何必呢>.<!

    回覆刪除
  2. 卡臣:

    好彩唔喺搵兩個𡃁模,如果唔喺,師傳未出手威幾拳,就升天喇!嘻嘻!

    回覆刪除
  3. 呢D咪叫嚇能死囉,好玩唔玩玩呢D。 :o

    不如安排幾個美女畀師父嘆吓好過喇,師父年紀大,動L好過動武嘛。

    回覆刪除
    回覆
    1. 結局一樣都要死,視乎死喺擋台?定死在床上啫

      刪除
  4. 甘鬼马嘅桥段,真系阿强先至谂到出黎!笑到d观众肚痛。

    回覆刪除

LinkWithin

Blog Widget by LinkWithin