~~~~~~~~~~~~~~~~







2014年5月29日 星期四

多餘口頭禪



多餘口頭禪

廣東話中有好多加強語氣的口頭禪,但這些口頭禪其實無乜實際意思和作用。日常講嘢時,就算省去這些口頭禪,都唔會影響句子的意思和完整性。今次數一數這些多餘的口頭禪:

第十位:「就係咁囉!」
當敘述完一宗事件經過後,臨尾加一句:「就係咁囉!」作為概括的總結。
例句:「落車之後就唔見咗嗰銀包啦!唉~就係咁囉!」
就算省去「就係咁囉!」,亦不損原本敘述事件的完整意思。

第九位:「好話唔好聽!」
「好話唔好聽」有「忠言逆耳」的意思,苦口婆心的說教說話,通常較難入耳。
「好話唔好聽」通常用作一段有教誨性說話的引子。但現代人唔理乜情況之下,想幾時講就幾時講。
例句:「唉~好話唔好聽:原來『好話真係唔好聽』架!」

第八位:「講真吖!」
可能現代人講得太多謊言同大話,所以喜歡加一句:「講真吖!」來加強說話的真實性和肯定性。這是「此地無銀」的心虛表現,或者是慣性的心理條件反射。不過,旁人不會因為你說話前有講到「講真吖!」而提高你說話的真實性。
例句:「講真吖!邊個會講真嘢吖?」

第七位:「嘩!真係
當某人描述完一件事情後,會加上一句感嘆句子,表示該情況之嚴重程度。但講完「嘩!真係」之後就留白。讓聽眾自己去聯想「真係」之後是什麼形容詞。
例句:「妖!佢份人出哂名衰格啦!仲升佢職?唉!真係
講完「真係」之後沒有再詳述或補充,咁其實講唔講都無乜必要。

第六位:「咪話我話喇!」
現代人喜歡逃避責任,連講說話也不想負上說話的責任。所以有「咪話我話喇!」的出現。有人擺明切切實實講咗一句說話出嚟,講完又叫旁人聽咗之後,又可以當唔係佢親口講過,邏輯上好多餘,變成純粹的廢話了。
例句:「咪話我話喇,有啲人講嘢講咗又唔認有講過!」

第五位:「計我話呢
「計我話呢」同「I think」一樣,都是表述自己的意見的開場白。當你論述自己的意見時,旁人當然明白你正講出你的想法,所以這句「計我話呢」便變成「畫蛇添足」般多餘。
例句:「計我話呢我都係答唔知道會好啲!」

第四位:「話時話,」
「話時話」和「講開又講」一樣,意思是「既然話題扯到這一點,不如就這一點再講多一些吧!」其實無乜實際意思,又沒有附加新的意義或額外價值。而且「話時話」的語氣十分中性,說了也沒有加添任何情緒或語氣。
例句:「話時話,人幾時講嘢唔係講開又講吖?!」

第三位:「吓嘛?!」
「吓嘛?!」是反問詞,意思跟「係咪?!」相同。但香港人多懶音,慢慢由「係咪?!」讀歪演變成「吓嘛?!」表面是詢問其他人意見,實際是用反問句來肯定自己的想法。想人表態支持自己與否。
例句:「呢個係顧客權益!吓嘛?!」、「咁你識做喇!吓嘛?吓嘛!」
好多人喜歡連續使用,來加強說話的說服力,吓嘛?!

第二位:「你知啦!」
未講說話之前,早已預先假設對方已經知道咗,咁講出嚟仲有乜嘢意義同價值呢?唔通真係揾嘢嚟講?定係驚對方一時醒唔起,要提一提醒佢已經早道咗?
例句:「你知啦!你係男人嚟架喇!」
如果對方早已知道他是男兒身,咁又何須冗贅?

第一位:「唔講你唔知!」
「唔講你唔知!」是「你知啦!」的銅板兩面。「唔講你唔知!」重複著一個十分淺白的邏輯因果道理:「我唔講出嚟,你又點會知呢?!」將這個因果關係,好直接好簡單咁講出嚟,雖然多餘,但很多人喜歡掛在嘴邊,真係唔講你唔知!
例句:「嘩!唔講你唔知!原來我唔講呢,你真係可能唔知架!」

綜合例句示範:
「喂!唔講你唔知!原來阿邊個咩呀!唉!真係你知啦,呢啲嘢,好話唔好聽,可大可小嘛!哼!就係咁囉!計我話呢,唔好埋咁多啦!咦!講開又講,佢同你都叫friend喎!咪話我話吖!佢實搵你!講真吖!你要同自己打算呀!吓嘛?!」



二少爺說︰而家啲人用WHATSAPP溝通咋,見面唔傾計,玩電話咋。

12 則留言:

  1. 仲有「講你都唔信呀」,呢句可以連埋「講咗你都未必信」一齊用,再加多個「有圖有真相」。

    例句:講你都唔信呀,彭順原來有小三,唔好睇佢人前人後同李心潔咁恩愛,都話講咗你都未必信o架喇,嗱嗱聲買本八卦雜誌睇吓狗仔隊影嘅相喇,有圖有真相呀。

    回覆刪除
    回覆
    1. 好句好句!都話你好嘢,例句傳神,寫多啲喇

      刪除
  2. 卡臣,仲有「咁都得」。
    例句:奕山咁就當係留言,咁都得!

    回覆刪除
  3. 卡臣:

    點解無「除褲放屁」嘅?嘻嘻!

    回覆刪除
  4. 睇唔出,你講廢話嘅功力,如來如此莫測高深,欽敬!欽敬!

    回覆刪除
  5. 好话唔好听,睇相佬话斋,呃得你一时,唔呃得你一世!你话呢?

    回覆刪除

LinkWithin

Blog Widget by LinkWithin