~~~~~~~~~~~~~~~~







2010年12月28日 星期二

借東西的小藝人

借東西的小藝人

一名22歲的美少年,日本留學畢業後,回流香港找工作。他英文名叫「Arigato」,無錯,發音是「亞喱亞墮」,即是日文「多謝」的意思。他選擇這個英文名,提醒自己應該時常心存感恩。

Arigato憑著英俊樣貌,高大身材,做了時裝Model,出現在各大時裝雜誌內,成為紙上明星。借助這小小名聲,電視台簽了Arigato做藝人,是一名小藝人。在藝員科旗下做演員,客串吓電視劇的三四線角色,月入幾千元,跟女朋友同居,租住一小單位,經濟狀況促襟見肘。

做藝人要打扮穿潮衣,Arigato人工咁奀點賣得起貴衫?唯有向電視台的贊助商借衫。Arigato見收入咁少唔係辦法,一於向其他演員借鏡,就是「搲撈」(主動要求工作)。Arigato向監製「天哥」搲撈。怎料天哥一向對Arigato存有偏見,所以一直把他投閒置散。天哥借咗聾耳陳隻耳咁,草草敷衍完Arigato後,天哥便借尿遁急急閃人。

Arigato銀行戶口剩餘少少錢,只好向公司借糧。公司無情地拒絕了他。天哥早已對Arigato睇唔順眼,天哥借刀殺人,在藝員科經理面前私下中傷Arigato,電視台借啲咦搵個借口,提早跟Arigato解約。Arigato離開電視台,馬死落地行,唯有做返model囉。

Arigato做model行catwalk,餐搵餐食餐餐清。有時候向模特兒公司借上期解燃眉之急。沒有job接的時候,經濟十分拮据。Arigato硬著頭皮向朋友借錢,但長貧難顧。Arigato走投無路,終於要向財務公司借貸,走上一條負債不歸路。

人衰真係有條路,Arigato認真當黑,行show時不慎扭傷腳,暫時開唔到工。模特兒公司借故把Arigato投閒置散,等佢自生自滅。女朋友嫌Arigato無出色,鬧分手。Arigato十分煩惱,終日借酒澆愁

Arigato趁觀音開庫,排長龍去觀音廟借庫,可惜未見有橫財降臨。Arigato在酒吧內認識「輝哥」,輝哥識得一位茅山師傅,可以幫人「借運」。Arigato決定搏一舖,找茅山師傅進行法事,(不需要上床那一種)。

結果,Arigato並沒有因此而轉好運,反而愈窮愈見鬼。財務公司派人上門追債,凶神惡煞的大漢嚇親女友,女友正式宣佈分手,馬上搬走。Arigato費盡唇舌去挽留女友,只換來女友絕情大聲一句:「借過啦你!」之後頭也不回,拖著行李嘭門而走。

其實女朋友一早已想跟Arigato分手,今次女友正好借追債過橋,大條道理一走了之。女朋友借頭借路搬走後,Arigato真係無錢交租,只好搬離該單位,去朋友家裡暫時借宿。Arigato閃出輕生的念頭。

這天,Arigato向朋友借車,一人駕車入西貢。把遺書留在車廂內,Arigato行到海邊,一躍而下,在水中掙扎,結束自己的性命。

* * * * *

當Arigato再次張開雙眼,發現自已躺在一艘豪華遊艇上;他被遊艇救起。遊艇女主人上前,原來是城中的40歲女富豪「Lucy」。Lucy早於28歲時喪夫,她雖有過億遺產,但她的遺憾是沒有跟丈夫留種,縱然有過億世家,但孤苦伶仃一個人囉。

Lucy看清楚Arigato,十分驚訝,因為Arigato的長相身型,竟然跟Lucy死去的丈夫一模一樣。Lucy不自覺地把思念丈夫之情,投射在Arigato身上。Arigato走投無路,當然接受Lucy這位「救命恩人」的眷顧。

Lucy最希望生到一個像丈夫的兒子,Lucy向Arigato提出借種的要求。Arigato可獲一筆巨款,條件是一切要絕對保密。Arigato心中感謝茅山師傅,師傅果然法力高強,直迫諸葛亮借東風般神奇,絕處可以逢生。

十個月後,Lucy生了一個健康男嬰。但紙包唔住火,某位知情人士(不是Arigato)為了錢向某雜誌大爆料。娛樂雜誌起標題:「富豪Lucy借屍還魂,兒子父親身勢大起底!」、「Arigato瞓身 借女人上位」。還有一些雜誌借題發揮,亂咁作啲失實故事。Arigato被起底,成為城中熱話。前藝員Arigato獲得不少報導,乘機借勢反彈

Lucy除了償還了「一索得子」這心願外,另一個心願就是替丈夫拍一套「傳記電影」,但一直苦於找不到適合人選做男主角。如今Arigato被踢爆了,Lucy決定出資開拍。Arigato被獲通知當電影男主角,開心到跳起,一掃過往霉氣。

Lucy大把錢,找來全城最好的編劇導演攝影美指服裝和配樂。更向電影公司借將,找來最強卡士襯托Arigato。Arigato知道這個黃金機會,百年難得一遇。他背城借一,盡心演好角色,他的出色表演獲得一致讚賞。

在電影金像獎頒獎典禮上,Arigato上了台兩次,領了「最佳新人獎」和「最佳男主角」兩個大獎,Arigato一拍戲便當上影帝。

他站在頒獎台上,十分激動,他致詞時說要借花敬佛,把這獎頂轉送給Lucy。他慟動地說:「我要借呢個機會多謝Lucy,無佢,我就無可能企喺呢度攞獎。」台下的Lucy也十分感動,幻想是自己丈夫拿到這成就。其實事前,Lucy已賄賂金像獎陪審團所有委員,所以對摘下獎頂,把握十足十。

借用一句老生常談:「有錢使得鬼推磨」,有錢人辦事就易過借火啦。而這名借東西的小藝人亞喱亞墮,從此過著名利雙收的快樂生活了。 但正所謂:「有借有還」,Arigato也可能要面對清還的一天,只是遲早的問題。

co-written by 卡臣 & 大隻權




借火 - 麥浚龍
作曲:馮穎琪
填詞:周耀輝

剛剛要去便利店裡
為著香煙無人點火
湊巧你正走出路上
搖搖蕩蕩明明喊過
不借得太多也想借點火
就算不說一句都很清楚
雙方都經過太多
只要接近 別無期望
夜了看電視的光
只要我們不問為何
然後直至忘記誰是我
一起靜靜的過
不需要太認識我

不渴望 你不要令我多幾多渴望
你只要為我點一點火
然後讓我 此刻至少可渡過
我可以令你差不多有快樂
我可以為你點一點火
然後望你輪廓 不講什麼悲壯
不想什麼沮喪 煙圈悄悄墜落
煙灰至少將心事證明燃燒過

天天要看琉璃鏡裡
為著不想重頭愛過
湊巧你也彷彿活著
尋尋覓覓靈魂碎過
不借得太多也想借點火
就算不說一句都很清楚
雙方都經過太多
只要接近 別無期望
餓了渴外賣的湯
只要我們不用話語
感覺是你和我
一起靜靜的過
不需要太認識我

不渴望
你不要令我多幾多渴望
你只要為我點一點火
然後讓我 倦了倦了就如煙 照樣浮過
飄過 根本最好就是忘我
別再笨 別再傻
半支煙勝過殘破的天國
可以令你差不多有快樂
我可以令你差不多傷疤會脫落
我可以為你點一點火
然後伴我
亂了亂了就如絲 最好燒過 燒過
根本只要煙圈在面前穿過
就會忘我 不講什麼好結果
不想什麼沮喪 煙圈悄悄墜落
煙灰 至少將心事證明燃燒過

30 則留言:

  1. 哇,好势利,卡臣唔做编导真系晒嗮咯!
    系呀,你个主角应该系‘买衫’,重有果个富婆有大把‘身家’,岩无?哈哈哈------

    回覆刪除
  2. 找茅山師傅進行法事,(不需要上床那一種)----> 忍唔住笑左
    借東西的小藝人, 哈哈哈, 好搞笑呀


    -K

    回覆刪除
  3. 睇到跳落海結束生命,就好似啲衰運去到盡頭了!

    回覆刪除
  4. 卡臣:

    哈哈!簡直笑到我肚痛!置諸死地而後生!否極泰來!都唔夠!最緊要拋個身出黎,做鴨!茅山師傅無同佢上床,係叫佢D精要用得其所:一條精蟲,咪睇佢細細條,可以好大力強悍,好過生金蛋!嘻嘻!

    這個故事的教訓是:男兒,不要胡亂捐精!那是你身上最寶貴的細胞!雖然你有好多!

    回覆刪除
  5. 犀利啊! 33個"借"系列都沒有重複, 勁啊!

    回覆刪除
  6. 真係唔明究竟你啲橋點“度”的?咁多借放在一起,妙絕!

    回覆刪除
  7. helloninie

    哈哈
    香港的新聞妳也十分熟悉呀
    香港很多淘古井的例子
    唱片騎師.風水師傅.
    乜都有!

    +++

    k

    你笑,我就開心了

    +++

    coffee

    被人追債
    走投無路咪申請破產囉
    唔使死

    +++

    佛爺

    你的睇法果然精闢
    著眼點在精蟲上
    高人呀高人

    ++++

    phyllis

    借妳把口讚我勁
    我都唔好意思
    多謝哂

    +++

    單無雙

    食字電影
    先改名字
    夾硬改到個劇情乎合個戲名

    回覆刪除
  8. 哇!逐套戲食喎;

    下集要向天哥報復呀,咁衰

    回覆刪除
  9. naruto

    天哥?

    無天哥搞搞震
    arigato就唔會有今天成就

    回覆刪除
  10. 借咗咁多,唔知 Arigato 有冇諗過有朝一日還返些少出嚟呢?

    回覆刪除
  11. largeheadboy

    出嚟行,預咗還
    借運都要還
    希望arigato趁有錢
    買樓收租唔賭錢
    咁都可安享晚年

    回覆刪除
  12. 又係gym房,一路做gym,一路構思?

    係咪有下集呀?有借有還

    回覆刪除
  13. I.minor

    係呀
    同大隻權一路流汗一路度出嚟

    有無下集呀?
    睇吓呢排有咩電影有個「還」字先?

    回覆刪除
  14. 卡臣:

    我就通常坐在廁所板上出力,才有靈感的!嘻嘻!

    回覆刪除
  15. 佛爺

    咁橋嘅?
    我都成日都俾人話我度埋啲屎坑橋

    回覆刪除
  16. 哦,原来卡臣系编剧专家来嘅,好耶!
    故事很逼真,系埋真人真事?

    回覆刪除
  17. cindy

    我又不是什麼專家
    只是愛鬧著玩呢

    故事雖然逼真
    但全是虛構

    不過,香港真的有人靠借貸過日

    回覆刪除
  18. 你又攞套戲嘅名嚟借頭借路寫一餐!

    大隻權,好耐無見,乜原來你仲有同卡臣一齊健身。

    回覆刪除
  19. 什么?靠借贷过活?
    债上加债,怎么还?

    好惨!

    回覆刪除
  20. 歪歪

    係喎,仲有「借頭借路」喎
    我借戲名玩吓啫

    大隻權仲好生猛添呀

    ++++

    cindy

    不能還便可申請破產
    破產後不能搞生意和申請信用卡

    回覆刪除
  21. 「借頭借路」打孖上有double points,你竟然要我提。仲有「借歪」呀,睇你又點加落去。

    回覆刪除
  22. 歪歪

    多得你
    「借頭借路」我已加入去

    但文中已有「借過啦你!」囉喎

    「借歪」= borrow you

    回覆刪除
  23. 借我?得!即管攞去使。

    仲有,明哥有首「借借你的愛」。

    回覆刪除
  24. 歪歪

    好嘢喎
    講起明哥我又停唔到口

    1994年,他在文化中心舉行一個叫「借啲耳」演唱會,我有去睇呀

    回覆刪除
  25. 你係明哥粉絲,我最近聽過佢首新歌「絕色」,覺得係佢近年嘅佳作。

    回覆刪除
  26. 歪歪

    好嘢喎
    你在他邦都率先聽過「絕色」
    電腦萬歲!

    我當然喜歡「絕色」
    那種飄逸感
    如同我第一次聽「禁色」一樣

    不果...都係禁色好聽啲
    嫌「絕色」太電子

    回覆刪除
  27. 我無諗起「禁色」,而係「春光乍洩」。

    回覆刪除
  28. 歪歪

    「春光乍洩」是華麗電子。
    「禁色」是仿弦樂,

    「絕色」好似在兩者之間

    回覆刪除
  29. 道盡人生大起大落,錢能解決一切,善哉善哉

    回覆刪除
  30. 圓園學短住持

    多謝你點化,遲啲前來攝太歲。

    回覆刪除

LinkWithin

Blog Widget by LinkWithin