~~~~~~~~~~~~~~~~







2010年7月12日 星期一

Hot Summer

Hot Summer

阿強手中拿著張國榮於1988年的一張黑膠舊唱片《Hot Summer》,阿強並非想寫碟評、玩懷舊、或者讚哥哥有幾咁多才多藝,而是想應一應景,講吓「Hot Summer」。

80年代的夏天,雖然都是炎炎夏日,但比現在涼快得多。因為那時無屏風樓、溫室效應沒今天般肆虐、不是家家裝冷氣而齊齊排出熱氣。阿強13歲前的暑假,差不多每天都在大環山泳池渡過,曬到一嚿黑炭咁。14歲那年的暑假,阿強正式當他的第一份暑期工。

那時候香港的經濟不像今天般差,同學們十個有九個都找到暑假工。阿強第一份暑期工在佐敦區一間玩具錶山寨廠做信差,月薪是1,500元。老細在寶靈街某商業大廈租了一個單位,阿強負責送文件、到銀行入數、去郵局、去報關。唔使出街的時候,阿強就同嬸嬸們一齊包裝入玩具錶。間中也會幫手跟車送貨。

出街送信必備Walkman,是卡式帶的Walkman,聽歌搭巴士自製「眼睛MTV」。跟嬸嬸們入玩具錶最悶,她們的話題阿強又唔啱嘴形。最開心的差事是跟車送貨,貨van司機開大Hi-Fi,狂Fung機、踩油飆車。那時候常播的hit歌是譚詠麟的《愛情陷阱》。在公路上飛馳,真的好爽呀!

* * * * * *

第二份暑期工是在觀塘鴻圖道某製衣廠當離工,月薪是1,800元。那間製衣廠規模相當大,雄佔整座13層的工業大廈。阿強的職責十分瑣碎:搬配料到車間、把車間員車好的衫拾進膠籃內、剪布版、貼版單、等手板眼見工夫。

記得那年夏天在觀塘區爆發霍亂,但阿強無畏無懼,繼續幫趁工業大廈的食堂。記憶中那個車間中年男foreman,十分咸濕,成日借機昅嘢,或摸手摸腳。女工們背後鬧到佢死,敢怒不敢言。阿強當然唔會抱打不平啦。

阿強見工時話自己讀到中三後便輟學,離職時又話自己突然想在暑假後繼續讀中四;任佢點講都得。

* * * * * *

再下一份暑期工,阿強的一位同學睇報紙,見到啟德機場請保安員,同學拉埋阿強一起壯膽去機場見工(辦公室近新浦崗),兩人一起被錄用了,月薪是3,000元。

阿強跟其他保安員,上完兩三堂講解之後,阿強穿上淺藍色制服,正式到機場的禁區內工作,工作範圍是確保旅客把所有隨身行李放進X-ray機內、用金屬探測器找出旅客身上的金屬。

啟德機場客運大樓五樓有一個更衣室供換制服。開工時不準帶錢,因為出入禁區時,身上錢幣會引起金屬探測機的聲響,另一方面,保安員工作時會接觸到旅客行李,如果旅客報失話唔見錢,保安員身上無錢,便可省卻嫌疑。工作需要輪班,早上6時至晚上11時,分成三更。午飯和晚飯則到機場內的快餐店或去九龍城搞掂。

這份工作對未搭過飛機的阿強來說,十分有新鮮感。原來機場入閘後的禁區係咁樣架!又可以接觸咁多唔同國藉的旅客,學了多國的簡單問候語,無奈阿強用廣東話腔發聲,旅客聽極都唔明佢講乜。

機場大堂有荷鎗實彈的機場特警巡邏。個個手持衝鋒槍,胸肌48吋以上,好有型呀!種下阿強日後要去健身的伏線。

那一年,每周有一班南非班機,受恐襲威脅,需要旅客臨登機前,再check多一次手提行李。結果阿強有機會首次隨車出停機坪,在outer bay登機梯前放一張長枱,check旅客的hand carry行李。阿強站在好嘈吵的停機坪上,熱流從四周湧至。阿強見到珍寶客機的勞斯萊斯巨大引擎,只在身邊五米左右,對於未搭過飛機的阿強來說,是何等的震撼!

另外,阿強在閘口見過不少名人,例如:陳百強、許冠傑、周潤發、林子祥、齊秦、任達華、周啟邦伉儷等等,好彩的話仲可以跟偶像握手。這個暑假,阿強獲得了很多。

* * * * * *

最後一份暑期工,阿強「升呢」,由「機場保安」做到「國泰地勤」,月薪是3,500元。工作地點是機場地牢,Check in counter同事把旅客已check in 寄倉的行李,經輸送帶運到機場basement。阿強的職負是確保旅客的行李放進正確目的地的行李大鐵箱內,拖車把行李大鐵箱運到停機坪,行李鐵箱便放進飛機的腹部,阿強需要向控制部報告行李鐵箱的數量和編號。核對完數量和編號無誤之後,飛機便可以上跑道起飛。

阿強在這裡工作,需要監督著一班HATS(機場搬運工人)工作,令阿強第一次有管理下屬的感覺。當然有時候需要放低幾十蚊請HATS工人飲茶,是這裡的工作文化。「請茶」後便會事半工倍,唔易爆鑊。阿強入鄉隨俗,有助他日後明白人情世顧。和搬運工人溝通,粗口是少不了,這暑假後,阿強的粗口更上一層樓。

那時候,在啟德機場對面的富豪酒店三樓,國泰租了一個Common room,供國泰地勤換制服和休息之用。那裡有部熱飲機,咖啡奶茶好立克阿華田任飲,貪平宜的阿強,換完衫後總會沖番幾杯熱飲s,邊飲邊睇電視。

而靠近新浦崗製做飛機餐大樓那邊,國泰設有泳池健身室酒吧供地勤享用。但由於地點太遠,阿強只去過一次,叫做「去過睇過咁啦」!

1998年啟德機場經已停用,那段記憶亦跟隨一起長埋。以前九龍城一帶,大廈樓層劃一不能太高,如今已經紛紛豎立起高聳的屏風樓。今年是2010年,12年來,那塊大空地仍然野草叢生。那個郵輪碼頭,仍然只聞樓梯響。

讀萬卷書不如做暑期工,增進社會經驗之餘、又可學習待人接物之道。知道賺錢艱難,才會珍惜讀書的機會;阿強最深明此道理。可惜阿強讀書始終都係唔叻,又引證了「知而行難」這句傳統智慧。


阿強同大家講聲再見。

臨走前,阿強又學人搞吓爛gag,問一條「牽強IQ題」:

問題:一般來說,「分切」一個生日蛋糕,通常會切幾多刀呢?
答案:

七至八刀,因為『切』=『七刀』,『分』=『八刀』,所以是七至八刀。

講開張國榮的《Hot Summer》,無理由唔揀返隻哥哥的快歌聽吓,天氣咁熱,一於聽《熱辣辣》啦,MV有柏安妮呀。吓?唔知邊個係柏安妮?咁你哋年紀太細了,打擾哂。



熱辣辣 - 張國榮
作曲: Kenny Nolan / Robert Crewe
填詞: 林振強

昨夜她穿著黑絲襪進我夢 夢中音樂頗衝動
她扭出火花對我說話

我這晚熱辣辣 Ya Ya 你這晚熱辣辣 He Ya
趁節拍熱辣辣 Ya Ya 擁抱我身起舞吧

她的咀巴低呼好嗎 跳嗎 她使身心不懂招架
夢境之內我喝著她的酒 讓黑絲襪舖於手
她的高溫肌膚對我說話

我這晚熱辣辣 Ya Ya 你這晚熱辣辣He Ya
趁節拍熱辣辣 Ya Ya 擁抱我身起舞吧

她的咀巴低呼好嗎 跳嗎 她使身心不懂招架

More More More 她的纖腰 湧出洶湧拍子
只可開始不可終止 一觸她的手指
我已叫嚷 More More More 偏偏她只居於深宵腦波
匆匆一刻她即飄過 只好天天等她 再進我夢
Say More More More

我這晚熱辣辣 Ya Ya 你這晚熱辣辣 He Ya
趁節拍熱辣辣 Ya Ya 擁抱我身起舞吧

她的咀巴低呼好嗎 跳嗎 她使身心不懂招架
她的咀巴低呼好嗎 跳嗎 她使身心不懂招架
我這晚熱辣辣 Ya Ya 我這晚熱辣辣 He Ya

我這晚熱辣辣 Ya Ya 我這晚熱辣辣 He Ya

23 則留言:

  1. 我想問阿強哥呢....佢幾多歲開始去做尖攪到心口四十八吋厚呢?

    XDDDD

    回覆刪除
  2. 在讲自己的历史? 原来你有48寸胸肌, 佩服佩服.

    奥斯陆的机场也是1998年搬的. 12年后, 现在这里已经有很多科技公司, 楼房正在建. 还有自然保护区. 当然, 这些都是起步阶段. 估计要建的东西建完应该还要20年, 而我, 就在这地方建立我的家庭.

    回覆刪除
  3. the8

    我18歲便開始玩尖
    不過健談多過健身

    回覆刪除
  4. 沙漠狐

    挪威的城市規劃好過香港好多
    北歐國家嘛

    祝你一家三口生活愉快啦
    幾時預產期呀?

    ++++

    tee

    Park Annie 正呀
    仲有果時嘅李麗珍

    +++

    Ebenezer

    係呀
    呢度啲舊朋友都知道我阿強真有其人
    啲遭遇都堅過美尼堅

    ++++

    coffee

    無錯
    相片攝於舊機場
    不過
    不是拍於1998年
    而是攝於2008年

    ++++

    naruto

    好呀
    多啲出場
    等我同卡臣傾傾
    希望佢肯借啲位俾我啦

    回覆刪除
  5. 好耐冇見啦阿強哥。

    我以前住喺舊機場附近,飛機飛過會有一陣風㗎。細個會喺某公園嘅斜坡睇飛機,個斜坡油上一大幅橙色格仔,應該喺俾飛機師睇嘅。而家睇怕都甩哂色囉。

    回覆刪除
  6. 以前D學生哥多數會做暑期工,
    增廣見聞。
    48寸胸肌阿哥
    引來羨慕目光。

    回覆刪除
  7. eric

    你好
    好耐無見

    嗰個訊號山出名架
    電視劇有取過景

    而家仍然好多晨運客上去

    +++++

    巴黎小姐

    妳係咪rap緊?

    48寸胸肌阿哥
    引來羨慕目光
    佢嫌個胸太方
    接受手術激光
    失敗變咗king kong

    回覆刪除
  8. 咩野係「眼睛MTV」?

    條問題好野喎,又幾過引,下次我又學阿強咁,問下人先!

    柏安妮?女神呀!

    回覆刪除
  9. I.minor

    MTV是影像 + 音樂
    舉例
    如果我walkman播到陳百強的「有了妳」時
    我的眼睛便望著一個巴士站等車的少女
    咪自製「眼睛MTV」囉

    在吐路港踏單車
    快歌就踩快些
    慢歌就踩慢些
    自製「眼睛MTV」

    你又喜歡柏安妮?
    我們可以開「老人院」時間了

    回覆刪除
  10. 卡臣:

    你去了那裡?被阿強謀朝散位乎?嘻嘻!

    回覆刪除
  11. 阿強:

    收到,今次衰咗潻,要你解釋!

    我最後睇柏安妮嘅戲係風塵三俠,前排都重有係有線重播再重播...

    阿強你唔好走住呀!重要開番個「老人院」時間呀!!!

    回覆刪除
  12. 佛爺

    卡臣仍安好
    不過佢有時會借個位俾我講吓嘢

    明天佢又回來了

    ++++

    I.minor

    衰乜嘢呀
    係我寫得含糊啫

    我記得柏安妮在「為妳鐘情」中的演出

    我阿強呢個回憶錄
    一定同你懷緬吓舊事

    回覆刪除
  13. 阿強,終於等到你嘅出現喇!一路睇到最後,好似爭啲嘢咁,原來係無烏龍嘢、俾抽水經歷,呢篇係好正經咁同我哋想當年。阿強,你可唔可以响呢個夏天分享下三份暑期工嘅符碌、趣事?(你唔好話無呀!)

    喂,咁到底你係做邊份暑期工嗰陣聽Hot Summer㗎?

    你講開舊機場,其實我見到卡臣上篇嘅舊機場幅相,都想問佢係咪想講舊機場嘅計劃得個講字。

    回覆刪除
  14. 歪歪

    好耐無見啦
    好嘛你呀?

    符碌、趣事?
    大把啦
    等我回憶吓先

    你真細心
    見到機場張相
    了解我心意

    聽Hot Summer
    應該在製衣廠果陣

    回覆刪除
  15. 预产期, 这个月24号.

    其实规划跟香港差不多, 说要建地铁, 都说了快五年, 还不能落实, 因为方案太多.

    回覆刪除
  16. desertfox

    7月24日
    恭喜哂
    做老豆

    我阿強同卡臣
    祝你們母子平安
    健康快樂

    回覆刪除
  17. 『聽Hot Summer
    應該在製衣廠果陣』

    你成日話我心水清,數數手指,咦,數到你今年貴庚!

    回覆刪除

LinkWithin

Blog Widget by LinkWithin