~~~~~~~~~~~~~~~~







2010年4月21日 星期三

「最佳新晉導演係……」(下集)

「最佳新晉導演係……」(下集)

場內充滿閃爍的燈光和節奏強勁的音樂,Johnson一踏進舞池,果然被索女包圍!同學們被視為Barry的朋友喎,一樣有女黐埋嚟,大家都得到前所未有的虛榮感。

到五時打烊,眾人一男拖幾女咁步出Club,突然被幾部相機的鎂光燈閃過不停。幾份報紙的娛樂版狗仔隊,蜂擁而上。目標人物當然是「Barry」啦,記者一輪咀咁問了Johnson很多問題。

原來Barry的最新派台歌《一半堂食.一半外賣》,昨天被政府的「淫褻物品審裁處」評級為三級淫褻物品,遭電台禁播。
記者問Barry:「新歌被電台禁播 有乜睇法?」
Johnson面對七嘴八舌的問題,一時間腦裡一片空白,
幸而修讀「公共行政及管理」的Johnson,他的畢業論文題目是:探討政府公務員架構和傳媒生態的關係。Johnson唔理咁多,一五一十唸出論文的Executive Summary同Recommendations。

一班記者目瞪口呆!記者以前都有接觸過Barry,覺得他是個口齒不清、多懶音、膚淺無腦、只懂吃喝玩樂的名牌奴隸。怎料今晚的Barry如脫胎換骨,思路清晰,說話有層次、有深度又具說服力。

Johnson發表完偉論之後,在旁的索女們率先大力拍掌。記者們再追問:「咁你會採取乜嘢行動嚟回應番政府呢?」

咁啱Johnson今朝看完【甘地傳】,轉身側頭,隨口說:「Ghandi said, An eye for an eye will make us all blind.」講完跟著好有型咁登上的士走人。記者們估唔到「Barry」咁型,用呢句英文嚟總結訪問,實在叫全世界走漏眼啦!

* * * * *

星期一上午,金牌經理人Marco在辦公室網上看新聞時,發現Barry昨晨那段「畢生最有sense的回應」,嚇了一跳!乜Barry突然咁叻仔?
立即call Barry助手,答:「乜Barry前晚又去咗中環玩咩?」。
助手回答:「唔係!前晚佢去咗尖東劈酒,飲到三點醉咗,我咪車佢返屋企囉。」

Marco心思細密,知道發生緊乜嘢事,神通廣大的Marco找到載過Johnson之的士司機,知道目標人物住在「港大宿舍利瑪竇堂」內,Marco派人去宿舍明查暗訪之下,鎖定目標,便專程邀請Johnson到辦公室一趟,見面詳談。Johnson以為Marco找他算帳,他知道逃避不是辦法,也想親自向Marco道歉。

Marco在辦公室等待Johnson。Marco愁眉苦臉,他面前最頭痛的問題就是:Barry嚴重濫藥,精神狀態呆滯,影響日常工作。開拍新戲時,Barry癡癡呆呆、又背唔到對白,每一個shot至少要50個take才勉強收貨。燒菲林等於燒錢,嚴重超支。導演監製向Marco強烈投訴。Marco多番勸戎,但Barry唔聽不得止,仲變本加厲、愈食愈狂,就快思覺失調。

Johnson踏進辦公室見Marco,Marco驚嘆乜真係似得咁交關嘅?!Marco問Johnson有無興趣拍戲?Johnson橫豎畢業要揾工,今年經濟咁差好難揾到好工,倒不如拍戲搏一搏喇!咨詢完父母後,立即跟Marco簽約。

Marco有一條件:要Johnson改名做Barry,直情扮Barry接手他所有演藝工作。成功招攬到Johnson後,Marco立即跟「迷幻 Barry」解約。藝人合約中寫明:「只要藝人一證實有濫藥,經理人公司有權即時解約,無須賠償」。Barry遭解約後,繼續自暴自棄,沉淪毒海。

Johnson化身成Barry,聽教聽話、好醒目咁完成手上電影和唱片工作。當Marco通知Johnson公司乘勝追擊,將會開拍最終卷《最終命運都安排我們在路上碰面我會點吓頭問候一吓》,Johnson反提議Marco拍一套寫實電影。Johnson不甘心做「吹波糖奶油偶像派」,其實Johnson在大學時代一早已經寫好電影劇本,曾經寄去各大電影公司叩門,可惜石沉大海。如今正好向Marco賣橋。

Marco知道Johnson非池中物,Johnson建議讓他自編自導自演一部獨立電影。Marco對他投下信心一票,就算電影蝕本,起碼令他的公司也出品過藝術電影。

電影順利開拍,叫《I’m fine》。故事內容講香港有一名患上小兒麻痺的尼泊爾少男、失業失學幾年、變成隱閉青年、愛上自己的七歲弟弟、仲染上愛滋病。電影主角集:傷殘、小數族裔、雙失、隱青、同性戀、忘年戀、亂倫、孌童、愛滋病於一身,探討社會對弱勢社群的歧視問題。

Johnson在沒有超支下準時完成電影。電影《I’m fine》未在香港上演,已經在斧山、鹿特丹、柏林電影節,獲得國際人道精神大獎及獨立精神大獎。Johnson揚名國際,鋒芒一時無兩。雖然電影票房一般,但已令觀眾對Johnson這位全方位創作達人,刮目相看。 

Barry眼紅Johnson的成就,想找娛記爆大鑊,可惜無人相信這個半人半鬼、周身毒瘡、射喱眼、手憻腳震、口齒不清流口水的排骨佬,竟然是曾經風光過的Barry。只當他是一名黐線佬。

* * * * *

今晚是第29屆香港電影金像獎頒獎禮,嘉賓陳果導演拆開手上信封宣佈:「第29屆香港電影金像獎最佳新晉導演係…Barry黃永賢!」穿上晚禮服的Barry興奮地走上頒獎台,從陳果手上接過獎座後,清一清喉嚨,致謝:「首先,我要多謝Marco!」台下的Marco欣慰地笑,替Barry感到驕傲。

在家中對著電視機的原裝Barry,已經肥腫不分,神智不清,看罷這一幕,用力將手上的啤酒樽,怒擲去螢光幕,「砰嘭」一聲,玻璃樽破裂,碎片四飛。Barry突然「哈哈哈!」,狂笑起來,引致哮喘病發作,之後又昏倒過去。

講到呢度,老土啲都要講句:「機會是給予時常裝備好自己的人。」既然講咗第一句,唔爭在講多句:「不可一,不可再,向毒品說不!向自毀說不!」



凡事都要適可而止,上咗癮就被牽著鼻子走,難以戒掉。 蔡一傑咁大隻,唔~我鐘意呀!

上癮 – 蔡一傑
作曲:王菀之 作詞:周耀輝

習慣著你的忽遠忽近
明明受苦不會自拔
但愛是能亂性之物
極難獲得偏吸引

就算知道這是癮
必須戒去 卻不可能
方知對你的依靠 愈來愈深
偶爾博得一吻
很多時候我似土糞

如烈士便能斷臂
可惜我最多顧忌
喜歡太美麗的你
結果成為你男友最悲
就是虐待自己 
都想一起至死
喜歡你
等於上癮 就算隔絕
我都不肯戒掉你

習慣著愛得不見天日
明明是針感覺似蜜
願繼續能令你開心
其餘盡都不吸引

香煙一般的美
嚐過以後自然回味
嗎啡一般詭秘
自問未能退避
假使愛上是癮 是癮 是狂野怪物
或者有救藥的你 會給我

願各位烈士齊來斷臂
可惜我最多顧忌
喜歡太美麗的你
結果成為你男友最悲
就是虐待自己 都想一起至死
喜歡你
等於上癮 就算隔絕
愛不到不算悲 戒不去的才自卑

辛苦的喘氣 都不肯戒掉你

21 則留言:

  1. 上一段仲係口齒不清流口水的排骨佬,下一段變左已經肥腫不分,咁快嘅?

    會唔會有人似成咁呀?johnson班friend無人爆佢料?我唔信。。。

    回覆刪除
  2. 卡臣:

    你這個故事很有教育性,但不合我,因我嫖、賭、飲、盪、吹,都無,只係好色啫!嘻嘻!

    回覆刪除
  3. 唔怪得你上次係 Gym 度攬住我係咁錫!原來你鐘意大隻嘅!!!!







    各位,我係「山寨版」大隻權,我叫大隻妙!
    我係大隻權個分身!

    回覆刪除
  4. naruto

    係喎

    有破綻添
    你好嘢!

    +++

    佛爺

    好色咪好囉
    唔滾唔知身體好吖嘛

    +++

    阿妙

    你想點先?
    係咁爆料

    我的gay形象現形啦

    回覆刪除
  5. 最後果幾句咁有意思,梗係要畀學生睇啦^________^

    回覆刪除
  6. >>Ghandi said, An eye for an eye will make us all blind.

    呢句真係好型!

    回覆刪除
  7. 瑤姑

    妳作為教育工作者
    不妨對學生講多幾句

    +++

    coffee

    我都覺得好型
    所以才引用

    回覆刪除
  8. 大隻權:

    阿妙係女人名,所以你唔係基,係雌雄同體才對!嘻嘻!

    回覆刪除
  9. 佛爺

    話我「敗色素」?
    咁唯有認啦



    「敗色素」= bisexual

    回覆刪除
  10. 點解《一半堂食.一半外賣》會係三級淫褻物品?首歌究竟係講乜呢?

    卡臣,你係敗色素咁就真係好,可惜你凈係鍾意大隻佬!

    回覆刪除
  11. 歪歪

    《一半堂食.一半外賣》
    講一個年輕送外賣仔
    一個50歲怨婦經常到餐廳幫趁
    但她竟然經常一半堂食.一半外賣
    務求外賣仔到她閨中
    一段情慾角力
    憤不顧身,粉身碎骨
    外賣仔身在虎穴...

    我鍾意大隻都鐘意中等身材
    四海之內皆兄弟

    回覆刪除
  12. 原來係道盡千萬怨婦响狼虎之年嘅心聲,好歌!好歌!希望有一日解禁,大家都可以聽到。

    你咁博愛係咪真係傳萬家先?係就千祈唔好漏咗我呢份,請問幾時排到我?

    回覆刪除
  13. 講漏咗:

    係咪因為首歌描述怨婦狼吞虎嚥嘅食相太過露骨,所以被禁?

    回覆刪除
  14. 歪歪

    聽唔到《一半堂食.一半外賣》

    barry創作緊續集《一半出面.一半入咗》
    希望快啲派台啦


    我係「歡樂滿東華」
    在中國東部見到我就有緣啦

    回覆刪除
  15. 歪歪

    「係咪因為首歌描述怨婦狼吞虎嚥嘅食相太過露骨,所以被禁?」
    ==> 因為首歌寫經常外賣
    濫用膠袋膠餐具
    反環保意識, 所以被禁

    回覆刪除
  16. 嘩 一口氣睇晒上、下集,
    好好睇呀!
    卡,
    你真係越寫越多靈感,
    想像力越豐富,
    應該全職做編、寫、導、演。

    回覆刪除
  17. 巴黎

    睇完妳的留言

    我只知道妳是最懂安慰別人
    叫這個香港八線演員感到溫暖

    回覆刪除
  18. 我估到《一半出面.一半入咗》呢首係講乜啦,係講中年麻甩佬鍾意咗援交少女,但係對方欲拒還迎,搞到麻甩佬處於軟硬之間嘅膠著狀態。

    喂,「東華」太遠,你移船就磡嚟「西洋」得唔得?

    回覆刪除
  19. 歪歪

    首歌講乜
    俾你估中哂呀
    勁!

    西洋?
    家陣航空混亂
    火山灰滿天
    都係搵日啦

    回覆刪除
  20. 你推人啲籍口同你啲作品一樣咁有創意,真係唔夠你講。

    回覆刪除

LinkWithin

Blog Widget by LinkWithin