~~~~~~~~~~~~~~~~







2009年10月29日 星期四

升降機 - 下集

升降機 - 下集

Ringo步行至9樓的後樓梯時,在他毫無心理準備之下,在轉角處,碰見站在那裡的Pamela,被迫跟她打個照面。

Pamela手執薄荷煙,在後樓梯抽着。Pamela跟Joe夜夜笙歌,染上煙癮。她於工作時間內,偷到後樓梯抽煙。因為Joe不在,Pamela表現熱情點,問好:「Ringo好耐無見!」Ringo見到右手持煙的Pamela,心中反而關心她起來,
Ringo勸諭說:「妳唔好食煙啦!對身體唔好!」
Pamela聽罷,好乖咁馬上把手上那支煙擠熄。因為在這段關係中,Pamela覺得自己始終負了Ringo,所以對Ringo作出的勸告,她毫不猶豫便接納,算是對Ringo的一種精神上的補償。

Ringo心諗:「做唔成情侶啫,做返普通朋友都得啩?」於是他鼓起勇氣問:「搵日食餐飯吖?」Pamela答:「好呀!搵日吖!」

Ringo再說:「妳把聲好似有啲沙,唔好咁夜瞓啦!」Pamela聽入耳中,以為Ringo妒忌自己和Joe晚晚蒲到三更夜半咁開心。Pamela安撫他說:「唔使擔心,我會去少啲夜街啦,會早啲瞓。」Ringo得到Pamela正面的回應,笑說:「係呀!唔夠瞓好易病好易殘架!」

Pamela反問:「你做乜行樓梯?乜電梯壞咗咩?」Ringo一時語塞,無理由如實直說:因為我唔想見到妳同阿Joe如膠似漆。Ringo編了一個藉口:「係呀!我趕時間去見客,等好耐都無lift,咪行樓梯囉!」Ringo需要配合劇情,扮趕時間,所以講完之後便向Pamela怱怱告別,然後離去9樓後樓梯。

Ringo落到地下時收到SMS,Pamela寫短訊話:「我會戒煙」,Ringo回覆「支持妳!」其實Pamela沒有打算戒煙,因為阿Joe喜歡吸煙,愛屋及烏。她知道那個SMS會令Ringo多一點安慰。從那天重逢起,Pamela改到女廁廁格內抽煙,自此以後,Ringo再沒有在後樓梯遇上過Pamela了。

Ringo覺得自己已經克服了「電梯恐懼症」,可以再次步入電梯,坦然面對Pamela和Joe。但他發覺自己的肚腩開始縮細,傷風喉咳少咗,拜「行樓梯」這運動所賜。打後三個月,他每天必要上落行樓梯,身體才感到舒服。三個月總共減去50磅。原本俊朗的他,現在鍛鍊得一身肌肉好線條。他從情傷中康復過來,加上外表的提昇,令他重獲自信心。
 
分手後第四個月,Ringo從網上知道有一個「跑樓梯的慈善比賽」將要舉行,他決定參加,既可做善事又可測試自己的實力。離比賽還剩下一個月,Ringo每天加緊鍛鍊。

一個月後,比賽正式舉行。結果Ringo在比賽中奪得亞軍,冠軍是一名美藉男士、季軍是一名香港女OL。Ringo在頒獎禮上重新肯定自己的能力。

第二天,Pamela閱讀報紙時,看到慈善比賽的報導,從照片中見到眼前一亮的Ringo站在頒獎台上,Ringo又靚仔又fit又有自信,好charm呀!Pamela不相信自己曾經拋棄的Ringo,如今竟然脫胎換骨,變成大隻型男。

她記得四個月前,Ringo曾經在後樓梯說過會約她吃晚餐聚舊,Pamela撥電話找Ringo見面,兌現承諾。Ringo樂意赴約,當晚在商業大廈附近一間餐廳見面。

Ringo準時出現,修身後的他,Pamela覺得他很迷人。兩人交換近況後,Pamela說她已戒了夜蒲戒了煙。最重要的是,就是她宣佈已回復單身。

她跟Joe分手剛好一星期,因為Joe和Pamela在同一間公司內工作,備受同事的指指點點,說三道四。而且兩人日見夜見,關係變得平淡如開水。雖然晚晚都去蒲,但蒲得多都厭啦!最終Pamela向Joe提出分手,Wet仔性格的Joe,easy come easy go,無乜所謂啦。

此刻Pamela眼濕濕望着Ringo,楚楚可憐咁搏同情,低聲問:「不如我哋再重頭開始吖?」

這時Pamela的電話突然響起,她立即打開手袋取出電話接聽。Pamela不耐煩,敷衍回答:「唔好意思,我無呢個需要喎!」之後cut線。原來是電話推銷員的貸款cold call。Ringo把頭望向餐廳窗外的街景,若有所思。

十秒後,Ringo回頭向Pamela說:「唔好意思,我都無呢個需要!」Pamela聽後,終於嘗試到被人拒絕的滋味,又真係幾難受喎!

Pamela為了維持僅有的自尊,沒有搲爛自己塊面,死纏難打。晚餐餘下的時間,Pamela變得默言寡語。結帳後,Ringo沒有送Pamela回家,免她會錯意。

Ringo獨自踏上回家的途中,手提電話突然響起。
「喂!……真係?……多謝哂!……咁聽晚我哋見面啦!……」
原來一名叫Pansy的少女,在HMV找到一隻Ringo渴望以久的絕版CD,Pansy替Ringo先購下CD,相約明晚見面吃晚飯,再把交CD給Ringo。

Ringo拒絕Pamela,唔多唔少都係因為Pansy。而Pansy就是當天「跑樓梯的慈善比賽」的季軍健兒。他們在頒獎禮相識後,Ringo在facebook找到Pansy,add埋做朋友,繼而電郵傾偈,再相約見面、約會、一起做運動,繼而發展成一對情侶。Pansy的樣貌更勝Pamela,容易相處,性格更適合Ringo。

而另一個拒絕Pamela的原因:就是剛才Pamela在餐廳打開手袋取出電話接聽時,Ringo偷望到Pamela手袋內有一包「特醇薄荷萬寶路」。Ringo一來怕女人吸煙、二來最憎人欺騙自己。如果又吸煙又講大話的女人就更罪無可恕。所以他就拒絕了Pamela,讓這段感情和記憶永遠定格於今晚步出餐廳時的最後一聲話別。其實,有多少愛可以重來?

人每天需要做很多大大小小的決擇,有些決定是正確有些是錯誤。做了一個決定後,又會帶你去到下一個意想不到的地步,可能出人意表。Ringo當初受心理因素影響,做了一個攞苦嚟辛嘅痛苦決定:日日行樓梯。結果人又靚咗仲識到新女友,估唔到最後來個本利歸還的大結局。大抵這就是人生有趣的地方。



29 則留言:

  1. 哎呀!! 我都要日日行樓梯!!

    回覆刪除
  2. 喜歡這一個故事~
    其實自己最近對一些事情很苦惱(是否應該讀多一個master degree?).....

    巧合地,在重讀 Paulo Coelho的"The Alchemist"時,有一小段與卡臣故事帶出的寓意很相似-----
    Quoted from "The Alchemist":
    "He still had some doubts about the decision he had made. But he was able to understand one thing: making a decision was only the beginning of things. When someone makes a decision, he is really diving into a strong current that will carry him to places he had never dreamed of when he first made the decision."

    如果當時Ringo一直頹下去
    沒有站起來
    便沒有之後的"果"了~

    回覆刪除
  3. 自由

    我直情要行中銀大廈

    另外, 讀書果陣, 同學話我似黃仲崑
    嘩! 我邊有佢咁有型呀!
    (不是反話)

    +++++

    佑志

    讀唔讀多個master degree?
    如果你有時間,經濟又許可咪讀囉
    不果唔好期望這degree會帶給你工作上的提昇,咁唔會失望

    「行步見步」中國人古代智慧, 其實都work喎

    回覆刪除
  4. 一個吸煙夜蒲的女人,離開了一個男人甲,跟了另一個男人乙一段短時間,又返回男人甲身邊.
    男人甲就和他新相識有學識的女人馬上分手.跟著男人甲就和她結婚了.那個男人甲是一個只會吹水的二世祖,他只可容納品格低劣的女人.

    回覆刪除
  5. 佛爺

    係外傳故事?
    定係你突然感觸起嚟?

    兜兜轉轉, 化作段段塵緣
    紛紛擾擾作架, 春宵戀戀變卦

    回覆刪除
  6. 幾鍾意呢個故事,尤其最尾個paragraph。
    又不知何故會有點感觸...?

    多謝你個story呀 :)

    回覆刪除


  7. 有所感觸呀?
    可能妳曾經為了一些「應該做而無做到」或者「唔應該做而做了」的事情後悔啩?

    呢一步唔知會影響到下一步
    早知我就咩啦....

    回覆刪除
  8. 有意思,
    喜歡這個結局!

    每一個選擇,
    都影響人生的路軌....

    回覆刪除
  9. 係喎,好耐都無運動啦喎...
    好,等我而家去九龍仔公園跑步先,返黎沖涼訓教啱啱好...謝謝提醒^^!

    回覆刪除
  10. 我日日都行樓梯
    上落樓仲要同D細佬打波
    都冇瘦過
    唔怪得之仲係一支公!!KEKE

    成日都覺得咩野都係整定既
    如果唔係有PAMELA既離棄
    就唔會發奮
    遇見PANSY

    幾時到我遇到PANSY呢
    KEKE

    回覆刪除
  11. 吸煙的確喺好趕客嘅。點kiss呢?除非雙方都喺煙民。

    溫馨提示:是愛屋及「烏」。不是「污」。

    回覆刪除
  12. 巴黎

    「每一個選擇,
    都影響人生的路軌....」
    係呀!妳唔去法國留學
    就識唔到老爺啦!

    ++++++

    denzel

    九龍仔公園?
    我以前中學校運會喺度肇行過
    好似係1948年...

    +++++

    多謝singer抽空閱覽

    回覆刪除
  13. 佚名

    故事中ringo可以苦中甘來
    但現實中
    可能雪上加霜
    唉~幸福唔係必然呢
    都係襯開心時盡情開心

    ++++

    韋嚇凸

    運動之外, 還要注意飲食
    快快轉食麥皮戒甜

    可以的話,兩日一餐,吃五成飽
    咁應該好快就可以....遇見pansy

    ++++

    eric

    多謝正字指正

    如果對方靚到爆, 但吸煙
    你會唔會介意呢?
    .
    .
    .
    >>>我估你會
    因為你邏輯行先過感性

    回覆刪除
  14. 點靚都好
    好難接受吸煙既女仔

    正所謂能醫不自醫
    我可以幫人減肥
    但係自己咁多年都未成功到

    回覆刪除
  15. 韋嚇凸

    好一句:「能醫不自醫」
    我都肥呀

    鬼咩, 工作多坐少行
    唉~~

    回覆刪除
  16. 其實我唔係架
    份工要郁架
    不過打通左"任篤"二脈之後
    乜都通晒
    飲水都肥

    睇完你今次既"升降機"
    開始積極又keep fit先
    kakaka

    回覆刪除
  17. 韋嚇凸

    咁我戥你開心啦!

    多做運動
    呢一步影響到下一步
    可能在運動場上遇上你的pansy呢

    回覆刪除
  18. 卡臣:
    故事中ringo可以苦中甘來
    但現實中
    可能雪上加霜
    唉~幸福唔係必然呢
    都係襯開心時盡情開心
    -->卡臣好感歎咁bor
    又係時候唱"愛得太遲"啦XD

    回覆刪除
  19. 佚名


    最心痛是 愛得太遲
    有些心意 不可等某個日子

    多少抱憾 多少過路人
    太懂估計 卻不懂愛錫自身.

    回覆刪除
  20. 我妹的前男友分手后都减了六十磅. 当然不会变成肌肉男, 但自信肯定有的.

    抽烟那段, 又勾起我和另一个前女友的回忆. 当年我就是因为她瞒着我抽烟而和她分手的.

    回覆刪除
  21. Desertfox

    失戀後fit了
    真是化悲憤為力量

    如果我失戀後學一種外語
    我應該已經可以去了聯合國工作

    回覆刪除
  22. "如果對方靚到爆, 但吸煙你會唔會介意呢?"

    在我眼中,吸煙就唔會靚到爆,所以呢個情況喺唔會發生嘅。

    回覆刪除
  23. eric

    明白哂
    你係綠色環保新世代
    向吸煙說不!

    回覆刪除

  24. 係外傳故事?
    定係你突然感觸起嚟?


    是我身邊相識的人.我簡直好詫異,世上竟有男人,會選一位吸煙的潑婦做老婆,也不要正當女人!

    回覆刪除
  25. 佛爺

    你似乎將「吸煙」和「不正當」畫上等號喎
    必定內有原因

    不過我唔問啦

    回覆刪除
  26. 你似乎將「吸煙」和「不正當」畫上等號喎

    係喎!為何我會這樣想?我也不明白!

    回覆刪除
  27. 佛爺

    香港自由社會
    你鐘意點諗咪點諗囉
    同時間
    有人鐘意吸咪吸囉

    回覆刪除

LinkWithin

Blog Widget by LinkWithin