~~~~~~~~~~~~~~~~







2008年11月10日 星期一

情信 - 上集

情信 - 上集

1986年的冬天,深水埗一間男女中學。放學後,幾位男同學正在籃球場上打籃球。他們來自中三E班,都是成績麻麻,唔愛讀書愛打籃球。他們等放學鐘一響,便衝向籃球場,把書包和校褸掛在籃球架上,雖然他們投入地打籃球、但他們的書包銀包都在安全的視線範圍之內。

剛射籃但擦邊的黃德明,他手腕上Casio電子錶突然「嘟一聲」響鬧。原來已經是下午4點鐘。黃德明需要去教員室,見英文科的Miss Chan,Miss Chan在黃德明的英文作文薄上用紅色原子筆大力寫:「Come to see me at 4:00 p.m.!」黃德明的英文作文寫得狗屁不通,Miss Chan當然要見他。

黃德明向同學說:「喂!我去見一見Miss,我好快返嚟!」

黃德明走向籃球架取回自己軍綠色的背囊和深藍色的校褸,往二樓教員室走上去。其他同學則繼續打籃球。黃德明在教員室被Miss Chan鬧足十分鐘:「你呢啲係英文嚟架?」、「你英文唔掂?第時死梗!」、「你啲英文程度停留喺小三程度!」

黃德明垂頭喪氣走出教員室,對於自己不是讀書材料,他十分清楚。他決定盡快返回球場,用籃球發洩出心裡的悶氣。

當黃德明路經合作社時,他突然想飲汽水,他傱校褸右袋中,想取出銀包時,卻發現銀包不翼而飛。右袋內只有一個粉藍色的信封。不知道是誰人放進去?信封沒有封口,他站在合作社前閱讀該信件內文。

原來是一封暗戀的情書,信中沒有抬頭人,上款只是寫「Hi!」內容大致是在課室中留意了他很久,想結識交往,並進一步發展成為情侶。如果願意的話,相約今個星期五放學後3點半,於學校圖書館內,在擺放中國明清小說的書架前見面。署名是「一個傾慕你的人:William」。

黃德明眼睛張大!吓?封情信係William寫嘅?!在24年前,黃德明的字典中,男人一定只會喜歡女人。黃德明驚訝點解William會寫封情信俾自己?一時間不能接受!

William,中文名是潘家浩,跟黃德明都是3E同班同學,都幾老友。他們都是張國榮fans,曾經跟譚詠麟的fans嘈交,只要張國榮有新唱片推出,潘家浩就會第一時間去旺角信和中心的東急唱片舖,租黑膠唱片回家轉錄成卡式帶,並且會替黃德明多錄一盒卡式帶,有福同享。而黃德明逛尖沙咀智源書店時,購買【Hobby Japan】高達模型雜誌,又會借給潘家浩看。

黃德明百思不得其解之際,突然心血來潮,摷一摷校褸的左袋,咦!袋內有一個銀包,他立即高興地取出來,銀包終於失而復得!

吓!個銀包唔同咗款同顏色嘅?!打開一睇,銀包內的學生証是潘家浩!
呀!原來黃德明在籃球架攞錯咗潘家浩件校褸。大家都係同size嘅國產「大地牌」同色同款校褸。

黃德明完全明白了。潘家浩暗戀班中一位女孩子,剛寫好完情信,還未封口,放在校褸內,打算稍後送給暗戀對象,怎料被黃德明誤穿校褸而無心揭發。

黃德明當潘家浩是講義氣的好朋友,他不打算唱通街。若無其事地歸還校褸給潘家浩,並裝作從未看過該封情信。

黃德明回到籃球場,把潘家浩的校褸掛回籃球架上,他立即落場再打波。估不到如波牛般橫衝直撞的潘家浩,已經踏入思春期有意中人。

5時30分,天色已經全黑,他們各自取回校褸書包回家,這一次,黃德明準確地取回屬於自己的校褸。

第二天,是張國榮推出新唱片《有誰共鳴》的大日子,潘家浩相約黃德明,不如放學後一起去旺角租唱片。黃德明由於早已約了另一位同學去買模型,所以拒絕了潘家浩的邀請。

當晚黃德明返回南昌邨家中,對那盒未砌的高達模型已愛不釋手。在媽媽的催促下,他才肯做功課。黃德明趁媽媽擰轉面行開去煮飯,他第一時間從開書包中,攞出最新一期【好時代】 雜誌出來睇,是他今朝返學前在報攤買的,封面是英國五人樂隊Duran Duran。

哈!今期有中森明菜做中間拉頁海報,正!
咦?點解本雜誌夾着一封信嘅?
吓!個粉藍色信封仲係同噚日潘家浩嗰封一模一樣嘅?
啊!今次個信封口已經用膠水黐實,(手震震拆開信封),
嘩!呢封信根本就係噚日睇過嗰封!佢做乜放封信入我書包呀?
乜!原來係潘家浩專登寫信俾我,
呀!~~點解會係咁架?!…
點解佢會鐘意男人?!…
點解佢會鐘意我呀?!…

待續



有誰共鳴 - 張國榮
作曲: Tanimura Shinji
填詞: 小美

抬頭望星空一片靜
我獨行 夜雨漸停
無言是此刻的冷靜
笑問誰 肝膽照應
風急風也清 告知變幻是無定
未明是我苦笑卻未停
不信命 只信雙手去苦拼
矛盾是無力去暫停
可會知 我心裡睏倦滿腔
夜闌靜 問有誰共鳴

從前是天真不冷靜
愛自由 或會忘形
明白是得失總有定
去或留 輕鬆對應
孤單中顫抖 我知我實在難受
問誰願意失去了自由
想退後 心裡知足我擁有
前去亦全力去尋求
風也清 晚空中我問句星
夜闌靜 問有誰共鳴

孤單中顫抖 我知我實在難受
問誰願意失去了自由
想退後 心裡知足我擁有
前去亦全力去尋求
風也清 晚空中我問句星
夜闌靜 問有誰共鳴

116 則留言:

  1. 又吊人癮!好想知春光乍洩校園版下集,唔該寫快啲快啲快啲!!

    回覆刪除
  2. 卡臣:
    我仲諗住你會唔會寫男鐘意男tim
    點知就有啦!xd
    期待下集!!

    回覆刪除
  3. desertfox:
    如果我睇完覆就變第二
    hee
    你下次都學我咁啦:P

    回覆刪除
  4. 其实, 封信是给隔离班的阿珍, 本来William 也买了本雜誌, 打算用雜誌夹着信, 送给阿珍, 可是刚巧班主任经过, 他一时情急, 胡乱将雜誌塞进了黃德明的书包.

    后来, William 在小息时, 想从黃德明的书包偷偷拿回那本雜誌的时候, 却见到黃德明的柜里有本一模一样的雜誌, 他以为是黃德明从书包把那本雜誌拿了出来. 所把William便把那本雜誌直接塞进了自己的书包, 以为神不知鬼不觉.

    回覆刪除
  5. whoa, bottle, is that the story or were you guessing?

    回覆刪除
  6. 點解啲人寫情信,總係唔寫上下款,或者寫啲唔寫啲,搞到咁多誤會呢?

    回覆刪除
  7. 首次留言,多多指教。

    隊 band 係咪 Duran Duran?
    打錯字呢…

    你寫既小說好精彩,寫密o的啦~

    回覆刪除
  8. 佚名妳奸賴喎,不過,証明好多人等睇卡卡新作。

    少男十五情懐,最無憂無慮也最敏感。
    寄情書的年代,幻得幻失,卻叫人難忘。

    同性的愛,似乎仍不被大部份人接受,尤其在亞洲。這短篇,要帶出其他劇情?

    回覆刪除
  9. duran duran, 1984年, 係出hungry like a wolf 定係union of snake ?我唔要simon le bon, 要nick rhodes...
    講男同男, 可唔可以要美艷既japan ?

    仲有, 好彩係中森明菜, 幾驚你出聖子姨姨, 仲有仲有, 好時代應該送跨頁海報, 我估呢期一定係河合奈保子bikini, 係潘浩明撻左?

    (一講80s, 興奮到收唔到聲tim~~~)

    回覆刪除
  10. 唉! 13不祥添. 無計呀! 睇完就做左13妹. 佚名, 做乜霸我個位呀! 而家玩音樂椅呀!
    其實, 係咪你d少男回憶黎架?

    回覆刪除
  11. 小佚

    妳第三次上頭注香囉喎!
    恭喜
    心想事成啦!

    +++++++

    c+

    12/11 wed 2345
    好快架咋!
    飲支酒點支煙
    已經係星期三啦

    ++++++++

    佚佚

    >點知就有啦!

    哈~ 上完頭注香
    立即心想事成
    靈呀

    回覆刪除
  12. desertfox

    上頭四香
    都吉利架!

    揸車冼呔都無事
    必有後福

    +++++++

    nost

    80年代
    我們的年代呀!
    美好的回憶~~


    +++++++

    佚名

    正所謂:執輸行頭,慘過敗家
    叻女吖!

    回覆刪除
  13. 小瓶子

    恭喜哂!

    妳估中哂! 100%中哂結局!

    下集提早post咗添~

    * 星期三晚另上其他故事 *

    +++++++

    desertfox

    中哂呀陰公!
    如肚裡的蟲
    一清二楚

    回覆刪除
  14. folium

    sorry!
    如果無誤會
    我的故事就無法寫下去

    所以,請容忍一吓

    +++++++

    alan

    多謝觀看及留言

    係呀! 係 Duran Duran
    改番啱先, sorry 呀! John Taylor

    你寫既小說好精彩<--失禮就真!

    寫密o的啦~<--寫得太密,我好快會乾塘架!

    回覆刪除
  15. 巴黎

    巴黎果然係巴黎
    留言都留得分外詩意

    我讀中學時
    好有些同學是「恐同」
    同性的愛...其實都是愛的一種

    現在和1984年比較
    當然現在開明點啦

    +++++

    篤篤

    嘩!撻著了!
    1984年 duran duran 的 reflex
    Queen 的 radio ga ga
    日本首推 安全地帶
    rocky 1-4
    rambo 1-3

    嗱!
    今個月我會整多篇80年代先!
    等我呀!

    回覆刪除
  16. 自由

    哈哈
    我的回憶?
    一半半啦~~

    成世人收過一封情信
    女生寫嘅
    中三果年
    嘿嘿
    真架

    回覆刪除
  17. >>佚名

    好過份呀你!!!未睇又霸位!

    差唔多病死... 終於返來.

    回覆刪除
  18. 呵呵呵,喺唔喺真人真事先。。。

    回覆刪除
  19. Carson,
    I don't worry about the tire gliding because my car (or most cars in Norway) has the anti-skid system that will lock one or more wheels to balance the car in the case of the car loses grip of the road.

    回覆刪除
  20. 家誠同學:

    自從離開學校以後,大家都沒再聯絡。過去這些年,只有在劇場裏靜靜的坐在一角,看你飾演不同的角色,方可跟你見面;透過你寫的文章及留言,才得知你的生活近況,但怎都沒想到你會提起當年我給你的那封信。信裏的內容我已不記得很清楚,只記得那時每天上學能夠見到你,便已很開心和滿足,現在回想起才知道人生所追求的,原來是可以這麼純真、簡單。

    祝安好!

    中三女生

    回覆刪除
  21. lo哥

    你保重呀
    上海凍呀

    香港流感好勁
    我身邊同事50%傷風感冒

    我做多啲運動先!

    +++++++

    eric

    真唔真?
    半真半假

    李安話:每個人心目中都有一座斷背山

    +++++++

    desertfox

    原來如此
    咁你就放心揸車喇

    我喺香港搭van唯有袋定平安符

    回覆刪除
  22. 卡卡:

    原本我都唔信你只收過一封情信, 點知...真係唔只一封喎!
    你睇中三女生幾默默支持你! 你快樂等於佢快樂! sweet sweet la~
    啊..咁你坐我隔離, 咪好多人羨慕咯! 呵呵..個位應該有炒價!

    回覆刪除
  23. 中三女同學:

    妳好!

    終於可以再跟妳聯絡上,十分高興。我自畢業後曾致電妳家找妳,可惜電話已經不通。我曾到YES雜誌尋人專欄尋找妳,facebook都試過,估唔到今天終可網上重聚。

    其實我做每一套劇,都是希望可以讓自己keep住曝光,等妳可以找到我,如今皇天不負有心人。妳令我記起很多中三的真摰片段,如果這記憶非愛情,連天都不會太高興!

    相隔26載,不如見面再講,這個星期五晚上8時銅鑼灣sogo正門等,希望妳還認得我。


    不見不散
    (請妳記得不要帶老公兒子前來)

    祝安好!

    家誠同學

    回覆刪除
  24. 自由

    我成世人只收過一封咁大把咋!
    (可能真有其他,或者誤點交不到我手啦)

    我終可跟中三女同學重聚
    早知我就早啲post呢篇!

    妳坐我隔離,我只擔心妳,
    因為當我仇家突然尋仇
    淋我老鏹,殃及池魚
    妳咁靚,毀容就唔好啦
    係咪?

    回覆刪除
  25. 哦呵呵,好啦,情信牽出重聚時刻。
    好好珍惜,加油!!!
    希望有個happy ending.

    回覆刪除
  26. 拜服拜服,果然蹻王,引人入勝!

    回覆刪除
  27. Shania

    妳好

    多謝觀看及留言先!

    今個禮拜五晚
    我set「衝」頭,
    著番套戰衣,
    噴哂古龍水

    誓要攞番26年前原本屬於我的東西
    wish me luck~~


    +++++++

    Laulong

    無錯!

    我的確係蹻王
    不過係屎蹻王


    你學校有冇gay couple?
    學校會否開明對待?
    定要見家長?

    回覆刪除
  28. 卡臣:

    唔係喎! 淋一淋, 轉一轉個look 都好喎. 起碼仇家情敵從此唔認得我, 行街都行得放心d!
    喂..各位聽到呀! sogo 門口等(睇戲)呀!哈哈
    啊...咁咪紀漢醇真人版! (我睇左呀! sorry, 我無聽你pg指引, 睇左紀漢醇先..一個字...正! 如果呢篇擺o係佛堂、教堂, 應該有景tick作用. 情況同停一停, 諗一諗一樣, 離婚率即時小好多)

    回覆刪除
  29. 我在2004年2月創辦了“The Facebook ,
    你個年代應該只用hotmail

    回覆刪除
  30. 自由

    多謝妳睇紀漢醇
    阿紀漢醇叫我代佢向妳講聲多謝!

    被人淋老鏹,妳都咁開心?
    都話妳樂天積極架啦!

    friday night 8:00 pm sogo 門口
    大家有興趣一齊嚟
    我嚴陣以待
    我諗中三女應該到啩?!

    ++++++

    阿mark 哥

    我知吖!

    上文我指:
    90年代我用yes雜誌尋人,不果
    2006年用facebook尋人,也是不果

    我年代得飛鴿傳書
    如果80年代通訊有今天般發達
    便可以減少這麼多誤會

    回覆刪除
  31. 張國榮我最中意佢首《儂本多情》。

    回覆刪除
  32. hana

    >張國榮的《儂本多情》?

    「情愛 就好像一串夢 夢醒了一切亦空」

    回覆刪除
  33. Desertfox:

    >>whoa, bottle, is that the story or were you guessing?

    I am just guessing. I think it's the writing style of Carson to let the story develop in that way.

    回覆刪除
  34. 講起情,大家傾得寧舍投入!
    卡公子,我諗當年曾經暗戀、明戀、狂戀你...嘅美少女,會陸陸續續出現。
    Sogo門口人咁多,你唔好認錯人,祝你好運氣!
    p.s.我後日先出門,所以呢排忙法蘭西(freelance)。

    回覆刪除
  35. 家誠同學:

    想不到原來你曾經嘗試聯絡我,可惜那時我已經搬了家,我只好相信這是上天的安排吧。

    其實,你建議大家出來見面,我想還是不用了,這樣至少你對我的印像便能永遠停留在26年前的我,請你好好珍惜這份回憶。

    仍記得當年流行的一首歌"天各一方"嗎? 歌中的每一句都正好代表了我的心聲。

    最後,只想告訴你,你太太實在是世上最幸福的女人。

    請保重!

    中三女同學

    回覆刪除
  36. 小瓶子

    妳已估中大部分
    不過我不會更改已寫好的結局
    因為...我懶囉~~


    +++++++

    巴黎

    見妳唔覆留言
    以為妳已踏上旅途

    鐘意我的女士或男士?
    大抵已經送往精神病院接受治療
    (鐘意我的,應該精神出現問題吧
    或一時被鬼迷)

    回覆刪除
  37. 巴黎

    咁妳努力freelance啦
    have a nice trip!

    不過同老爺去
    一定開心啦!

    回覆刪除
  38. 中三女同學:

    80年代,徐小鳳說過:「有緣無份空痴想,有份無緣暗淒涼」鄺美雲說過:「未嘗酒醉已清醒,未曾深愛已無情」
    這樣也好,就讓彼此的印像停留在26年前的年輕模樣,大家可以好好保存這份回憶。

    我想仍記得當年流行的一首歌:何家勁的"也許",歌中的每隻字都正好代表了我的心聲。

    最後,我亦想告訴妳,妳未能成為我的太太,實在是妳今生中最大的福蔭。因我不想暴露我的缺點於妳眼前。

    但星期五,我仍會依時赴約,萬一妳回心轉意的話。(請妳記得不要帶老公兒子前來)

    請保重!

    家誠同學

    回覆刪除
  39. oh! 等我仲買埋爆谷腸仔添! 唯有...留番
    o係公司睇戲食!!

    回覆刪除
  40. 自由

    妳啲爆谷腸仔送俾我食啦!
    等我代悲憤為食量!

    向天狂嘯~
    天呀!
    點解?點解?

    回覆刪除
  41. 中集:

    William 向黃德明的解释:

    其实, 封信是给隔离班的阿珍, 本来William 也买了本雜誌, 打算用雜誌夹着信, 送给阿珍, 可是刚巧班主任经过, 他一时情急, 胡乱将雜誌塞进了黃德明的书包.

    后来, William 在小息时, 想从黃德明的书包偷偷拿回那本雜誌的时候, 却见到黃德明的柜里有本一模一样的雜誌, 他以为是黃德明从书包把那本雜誌拿了出来. 所把William便把那本雜誌直接塞进了自己的书包, 以为神不知鬼不觉.


    下集:

    黃德明知道原来封信不是William 写给自己, 落下心头大石, 继续与William 称兄道弟, 而且还向William 献计去追阿珍.

    实际上, 那封信, 真的是William 写给黃德明的. William 暗恋了黃德明一段时间了. 平时黃德明搭William膊头谈话, 都会令William 有如触电.

    后来, William 想试探黃德明对自己的感觉, 便写了一封没有抬头的信, 夹在他的雜誌里面, 观测一下黃德明看后有什么反应. 由于William 害怕黃德明不接受同性恋, 会搞到连朋友都无得做, 所以预先想好一个暗恋阿珍的故事, 令自己进可攻退可守.

    现在既然知道黃德明对自己无意思, 那么这份爱意只好永埋心中.

    小瓶子继续踩场.........

    回覆刪除
  42. 小瓶子

    寫得好!
    佈局好!
    妳寫的小說描寫很細膩啊!

    真是厲害啊!

    回覆刪除
  43. 其实要玩, 种可以玩落去..

    讲黃德明帮William 追阿珍其间, 发现自己中意左阿珍.

    而阿珍, 又偏偏喜欢高高瘦瘦, 斯斯文文, 阴声细气的William.

    哈哈哈!!!!!

    回覆刪除
  44. 小瓶子

    嘩!好嘢!
    妳果然多橋!
    出神入化

    回覆刪除
  45. 卡臣:
    ~><~嗚~嗚~嗚
    為左上你呢度頭注香,我被desertfox、巴黎、行姐同lo哥鬧啦~><~嗚嗚嗚

    中三女同學?
    星期五晚上8時銅鑼灣sogo正門
    ??等我地去捕卡臣先hee...奸笑中

    回覆刪除
  46. 佚名,
    你去踩场, 就不只被骂了, 还会被打的.

    Carson,
    你说的那些歌, 我都会背. 看来我們还是同年代的人. :)

    回覆刪除
  47. 佚名妹妹,妳唔好喊啦,我地邊捨得鬧妳啫!不過下次唔好啦!
    妳知啦,呢度好多人都想霸頭話,哈哈好似細個玩爭凳仔坐!

    回覆刪除
  48. Merci卡卡!
    我地會盡情吃喝玩樂。

    至於你同昔日小女生嘅蕩氣迴腸故事發展情況,我番嚟會繼續睇。
    好担心,星期五係Sogo門口等待見你一面嘅女fans,會逼爆玻璃....

    回覆刪除
  49. 小佚

    我哋呢班哥哥姐姐邊捨得鬧妳!
    其實佢地邊個恨上頭注香呀?

    friday night
    我地玩「快閃黨」
    一見即閃即散!

    ++++++++

    desertfox

    我哋同一代?
    你後生過我好多
    你識聽懷舊金曲啫

    ++++++++

    巴黎

    後日上機啦?
    中三女和我的故事將越洋報導
    妳唔使擔心
    我一定去

    女fans?
    哈哈? 網上虛擬就有

    妳盡情吃杭州菜吧!

    回覆刪除
  50. desertfox:
    你去踩场, 就不只被骂了, 还会被打的.
    -->我講笑話去者^^0

    巴黎:
    佚名妹妹,妳唔好喊啦,我地邊捨得鬧妳啫!不過下次唔好啦!
    -->哦,知道^^~~

    妳知啦,呢度好多人都想霸頭話,哈哈好似細個玩爭凳仔坐!
    -->凳仔得一隻,好難爭啊!
    所以變左「泛眾憎」啊><!


    卡臣:
    我哋呢班哥哥姐姐邊捨得鬧妳!
    其實佢地邊個恨上頭注香呀?
    -->所以話你多fans啦!上頭注香都要爭餐死啊!!

    回覆刪除
  51. 杭州係好想去,不過,我地可能隨時轉目的地,你知啦,視乎stand-by情形。或者失驚無神,去咗非洲都唔定架!

    喂,阿邊個邊個,千祈唔好去杭州遇我呀!(自我陶醉幻想好似卡公子,擁有眾多粉絲....)

    唉吔我真係要專心做嘢啦,唔可以一路做一路睇blog、MSN、Facebook加埋聽新album Incanto....Oh la la,呢個世界實在太多誘惑啦!

    回覆刪除
  52. 巴黎:
    唉吔我真係要專心做嘢啦,唔可以一路做一路睇blog、MSN、Facebook加埋聽新album Incanto....Oh la la,呢個世界實在太多誘惑啦!
    -->居然蛇王!仲咁多節目!!

    回覆刪除
  53. 佚名妹:妳千祈唔好學呀!
    我係巴黎太耐,習染左法國人嘅吃喝玩樂旅行大過天,仲成日罷工既習慣。
    我會慢慢戒架喇!
    咦,我係巴黎個老友放工啦,上線啦....(Paris time:16:40)

    回覆刪除
  54. 佚名:

    聽晚又要爭頭位呀! 哈哈
    呢度攪到好似d康體署呀,婚姻註冊咁, 一到12點要爭上網霸位.

    回覆刪除
  55. 如果可以擺份報紙, 放張摺凳霸位,你話幾好呢!

    回覆刪除
  56. 巴黎

    mood 到就可能去非洲?
    好浪漫呀!
    學陳智能去北極呀!

    >阿邊個邊個,千祈唔好去杭州遇我呀!
    嘩!有痴漢纏身?
    老爺今次頭痛矣!

    >唉吔我真係要專心做嘢啦
    哈哈, 趕緊freelance呀?
    加油呀~
    不過妳一心十用
    同一時間可以同50個朋友msn

    +++++++

    小瓶子

    我的版本
    12/11 (明晚 2345)見

    回覆刪除
  57. 佚名

    >-->居然蛇王!仲咁多節目!
    啍~
    人地巴黎係自僱人士
    自己就係自己老闆
    唔似我地要睇人面色架!

    ++++++

    巴黎

    法國人的「慢活」幾好呀
    心理衛生好多呀!


    +++++++

    自由

    係咪真係有人爭上頭注香先?
    其實無人吼就真
    不過....我都好想知道邊個得到?
    明晚2345
    we are ready!

    回覆刪除
  58. 家誠同學:

    我聽了一整晚"也許",希望從中得到一些啟示,可惜直到天亮,我仍然找不到一個理由去跟你見面,尤其是你已有一位會包容你所有缺點的好妻子,而我則還在找尋一位有你一半好的愛人。

    再送你一首當年流行的歌曲,那就是"心債"。

    有緣的話,不用刻意安排大家都會再見!

    珍重!

    中三女同學

    回覆刪除
  59. 其实中三女同学的信, 是不是卡臣老婆写的吖?

    回覆刪除
  60. 小瓶子

    中三女同学的信
    絕對不是卡臣老婆写

    我估是其中一位經常在此出現
    但今次未出現的朋友所寫

    對嗎?

    回覆刪除
  61. 中三女同學:

    我聽了一整夜"心債",梅艷芳的歌聲勾起許多中三的回憶。每聽到「原來今生心債,償還不是一世,千代千生難估計」我都鼻酸.

    妳尚在找尋妳另一半,我希望這位幸運兒會比我更疼妳!但26載不見,我提議妳要update一吓我的樣子和為人,好讓妳找到比我好的心上人.

    所以,我仍會在sogo等妳!(原來妳未婚,那麼我擔心妳帶老公來是多餘了)

    再送你一首當年我咀邊掛著的流行歌,那就是「濃本多情」。

    祝安好!

    家誠同學

    回覆刪除
  62. 卡嫂=中三女同學?? 哈哈..

    呢首歌送俾你同你個舊同學!

    告別校園時 - 李克勤
    http://music.geocities.jp/lokloklok1027/lok109.mp3

    一天一天的我在期待放學
    一轉眼卻要告別校園
    一張一張的快樂同學笑臉
    粉筆似的消失不再遇見

    終於終於不懂得老師所講
    祇知道 此刻想多聽一遍
    終於終於不需要再管積分
    祇恐怕 更多的考試未見

    *這校園 這班房 這走廊 這禮堂
    告別時 是我心的家鄉
    到未來 那一方 人飄泊 路茫茫
    仍然在這裡找到一點點光 *

    # OOh... 曾同遇上
    今孤身走遠方 誰願這樣
    OOh... 昂然踏上
    雖分開走遠方 明晨能共創 #
    Repeat * # #

    回覆刪除
  63. 自由

    回妳一首歌
    30歲以下,應該唔識:

    「小妹妹日記」 李麗蕊

    班房裡偷望他, 時時望他
    想寫紙仔暗暗掟給他,
    難明瞭內心
    為何如大蝦?
    蹦蹦跳千吓!
    可惜他卻不望我,從無望我,
    真想將他眼鏡也打破!
    無明怒火?
    長期令我,
    做習題亦錯!
    怎知當垂手出班房,
    肩膀卻撞到他,
    他竟斗膽來逗我說話,
    並問何時才能共我渴茶?渴茶!
    垂頭弄髲,
    含糊地答:
    現是時候啦!

    回覆刪除
  64. 自由

    吓?
    妳都識?
    咁都都唔出奇嘅
    妳都聽過莫札特啦!

    回覆刪除
  65. oh..sorry 喎. 我無聽過莫札特, 我淨係聽過任劍輝同新馬司曾o者!

    p.s. 你做乜口震呀~?

    回覆刪除
  66. 『中三女同学的信

    我估是其中一位經常在此出現
    但今次未出現的朋友所寫』

    喂,咁我算唔算係「其中一位經常在此出現但今次未出現的朋友」嘅嫌疑之一呀?

    其他人我唔知,但係我未留言係因為留意緊你同「中三女同學」嘅發展,千祈唔好誤會係我寫,我寫唔到啲咁感性嘅嘢㗎。

    不過八掛問句,點解你抹殺咗呢啲真係佢嘅留言呢?你當年收到「中三女同學」嘅情信後點樣處理?有冇拒絕佢,定抑或真係同「中三女同學」有發展?

    計一計數,如果你廿六年前讀緊中三,咁你今年係咪踏入四十呢?

    回覆刪除
  67. 自由

    >任劍輝同新馬司曾?
    正喎!
    20歲女都聽
    國粹粵劇唔會失傳啦!

    我口窒因為同靚女傾偈

    +++++

    歪歪

    吓?封信不是你寫?
    oh sorry~

    當年收到信
    叫我第二朝早上7:45去地鐵站恆生等
    我有去
    但見唔到熟人,亦無人上前
    等了10分鐘,自己走人
    我相信是俾男同學整蠱!
    事後,再無嘢發生

    我非40歲
    我53歲
    老過laulong
    我讀書差,
    不斷repeat
    23歲才讀中一
    陰公

    回覆刪除
  68. 家誠同學:

    若然你當年是這般的堅持,只要你多等我五分鐘,也許今天大家的身份處景都會截然不同。

    放心,以後我仍會繼續看你在劇場的演出,細閱你寫的每一篇的文章。

    星期五晚上8時,我將會獨自坐在家中,重溫那些屬於我們的歌曲,翻看當年的舊照,回味昔日的快樂時光。

    再見!

    中三女同學

    回覆刪除
  69. 『我非40歲
    我53歲』

    首先多謝你嘅補充。

    其實男人四十,又唔係件羞家嘅事,唔明點解你要將自己嘅年齡報大數,莫非你好想早啲攞生果金?

    回覆刪除
  70. 佚名:

    你又去九龍灣? 記得大嗌卡臣3聲呀!

    卡兄:

    睇怕你個豆芽夢唔出黎呀! 鬼咩..約o係鬆糕等, 萬一卡嫂知道, 去淋佢老漒點算? 唔係人人都好似我咁要轉look 避仇家.

    男人四十XXX~ 哈哈

    回覆刪除
  71. 我都諗咗個『情信』Alternative Ending:

    黃德明嘗試想了很多理由來解釋這封信,在媽媽一聲『開飯啦!』,才將黃德明叫回現實中。

    同枱吃飯的還有剛中學畢業的大家姐,和比黃德明大一歲的孖女二家姐、三家姐。由於黃爸爸是當夜班,每晚吃飯,三個家姐都會七嘴八舌的討論被男仔追求時,怎樣把他們當作觀音兵,如何將他們呼之則來,揮之則去。黃德明身為唯一一位男性,除了感到被侮辱之外,更連開口反駁都有心無力。

    於是黃德明一邊吃飯一邊想,其實自己未拍過拖,一直覺得女性就是麻煩的根源。而William是自己最好的朋友,打贏籃球比賽後興奮相擁,即使大家一身臭汗,但一點都不嘔心;又或者大熱天時一枝汽水兩份飲,從來都不感到核突。既然大家都有共同的嗜好,平時都是雙劍合壁的好拍檔,於是黃德明覺得雖然怎都沒想過會和一位男性拍拖,但這一位並不是一般男同學,而是William,黃德明決定接受William的愛意,明天便會告訴他願意跟他一試。

    待續

    回覆刪除
  72. 小佚

    妳去九龍灣?
    我現在身處銅鑼灣呀!

    +++++++

    自由+ desertfox
    xxx=戇居居

    +++++++

    歪歪

    我真係好想攞生果金呀!

    你個idea正喎!
    幾時落筆寫?
    我拾卜你!

    回覆刪除
  73. 中三女同學:

    那個早上,因飲了一盒過期鮮奶,突然肚子打風.就是這五分鐘,改變了彼此的下半生!

    如妳堅持不見面,我亦不會強人所難.以後我一個劇場演出,都為妳而演,以後每一篇文章,都為妳而寫。以後每一口氣,都為妳而喘。

    星期五晚上8時,我也會獨自坐在家中,重溫那些屬於我們的歌曲和舊照,兩人在兩個不同的地方,做著相同的事情.幻想妳在我身邊,雖然我們相隔百里,或者其實只在隔壁。

    我的心留在1984.

    真的再見!

    家誠同學

    回覆刪除
  74. 下集將於11月12日星期三2345見
    仲有5小時,早Dee得唔得

    回覆刪除
  75. 泰知訂

    多謝觀看及留言
    一於早少少啦


    你對電影和音樂的知識很廣博呀
    佩服!

    回覆刪除
  76. 【好時代】雜誌?係咪「年青人周報」同「音樂一周」個年代?共鳴呢樣野真係奇妙^^!

    回覆刪除
  77. 歪歪:

    正当黃德明下定决心与William 一试之际,来赴会的竟然是隔壁的女同学阿珍.

    原来William 与黃德明平时虽然称兄道弟, 但对于黃德明搭着他膊头说悄悄话或是球赛胜利时兴奋地拥着他, 这类肢体动作感到有些不安. William 害怕黃德明是同性恋者, 所以与他的红颜知己阿珍商量过后, 决定用一封情信来试他.

    回覆刪除
  78. 小瓶子,
    已经佩服得五体投地. 有否考虑做篇剧?

    回覆刪除
  79. Desertfox:

    卡臣先多ideas, 平时我嗰脑系闭塞的.

    篇剧太难做啦, 我文笔麻麻, 生活经验不够, 知识层面狭窄, 好难写到D吸引人的剧本.

    回覆刪除
  80. 行姐:
    你又去九龍灣? 記得大嗌卡臣3聲呀!
    -->行姐,下次我地一齊去九龍灣,你嗌我就嗌...hee

    卡臣:
    妳去九龍灣?
    我現在身處銅鑼灣呀!
    -->哦?我依家身處家中啊!

    回覆刪除
  81. denzel

    係呀!
    除了【好時代】雜誌
    還有【新時代】雜誌
    有冇keep番本呀?

    ++++++++

    小瓶子

    妳同歪歪一起創作
    果然是雙劍合壁
    勁!

    ++++++++

    desertfox

    小瓶子 寫嘅「愛情兩面書」小說
    盡顯功力!
    睇咗未呀?
    去她blog look look!

    回覆刪除
  82. 小瓶子

    妳平时嗰脑系闭塞?
    有冇搞錯?
    妳幫我接寫
    一定精彩過原文


    ++++++


    >下次妳地一齊去九龍灣,一齊嗌卡臣
    必會好運齊來!
    嗌啦!
    大聲啲!

    回覆刪除
  83. 卡臣,
    無keep到呀...由細到大搬左幾次屋, 好多野都無左lu:-(

    回覆刪除
  84. denzel

    我啲中華英雄單行本也失了
    鳴~鳴~

    回覆刪除
  85. 卡臣,
    中華英雄單行本也失了?我都係:-(
    仲有A4 size的「號外」都唔見左...>.!

    回覆刪除
  86. 卡臣:
    下次妳地一齊去九龍灣,一齊嗌卡臣
    必會好運齊來!
    嗌啦!
    大聲啲!
    -->真架??真係會好運架??你唔好呃我wow!

    回覆刪除
  87. 『情信』Alternative Ending之完結篇:(上回可從上面留言中找到)

    黃德明從來沒想過一頓晚飯竟然能令自己茅塞頓開,突然感覺到世上很多事物,原來不過是因為一些俗世的眼光,而令人卻步。即使是同性戀,亦不過是屬於兩個人之間的愛情,只要自己想通了,便能放開成見勇敢接納。現在更明白為何最近William常常說很煩,但又不肯講是為甚麼,黃德明希望明天見面時能令William同樣地開竅。他甚至想到之後若然大家一起拍拖的話,往後彼此的默契自然會更好,在籃球場上必定戰無不勝,甚至下半生都有這一位可以分享所有共同嗜好的好伴侶。躺在床上想到入了神的黃德明,就連自己身為黃家唯一男丁,一直被父母命令要擔當傳宗接代的重任,通通都拋諸腦後,心中只想快些能跟William見面。

    第二天早上,一如以往黃德明和William都會先到住處附近的公園會合,才一同前往學校。黃德明預感今天將會是人生中一個重要日子,因為終於可一嘗戀愛嘅滋味,於是他比平時更早到達公園。由於難掩心底的興奮他更是坐立不安,只懂徘徊踱步期待William的出現。終於,黃德明發現William正從遠處過來,忍不住揮手大叫:「William!」

    William一見到黃德明便加快本來慢條斯理的步伐,匆匆的走過來,連早晨都未講便開口說:「黃德明,我有啲嘢想同你講…」

    黃德明一聽見便搶先截住William:「你唔駛講喇!我已經完全明白點解你最近成日嗌煩,我亦都決定咗去支持你!」

    William聽後喜出望外仿如遇見救星一樣,便話:「真嘅?」

    「換轉係第二個我都唔洗諗就已經拒絕,但係見你係我最好嘅朋友,我會接受同你拍拖,仲好有信心我哋會係天生一對。」黃德明一邊說一邊伸手從校褸袋中取出那封情信。

    William被黃德明的說話和舉動嚇了一跳,只懂望着那封已打開了的情信,口震着回答:「嗰封信唔係寫俾你㗎!」

    聽後便輪到黃德明被嚇呆,心想花了一整晚說服自己去接受和一位男性拍拖,怎也估不到原來是表錯情,於是滿面通紅的黃德明老羞成怒喝道:「你唔係寫俾我,咁封信係寫俾邊個呀?」William垂低頭說:「係俾你家姐㗎!」

    黃德明聽後更覺侮辱便大聲指責William:「你有同性戀唔搞,搞忘年姐弟戀!」

    William雖然覺得黃德明無理取鬧,但都不敢反駁,只有說:「唔係你大家姐,係大孖同細孖呀。」

    黃德明越聽越生氣,繼續喝罵:「你咁貪心,想一箭雙鵰!」

    這時William覺得自己越描越黑,一定要將整件事交代清楚,便說:「其實我成日响學校見到大、細孖,對佢哋產生好感,但係兩個都一模一樣,都唔知揀邊個至好。有時想從你口中打聽下,點知你一味彈佢哋,連我借啲意話上去你屋企,你都話唔想我俾你啲家姐煩,我又點敢叫你幫手喎!於是我咪諗咗個方法,就係將封信偷偷地攝入你本【好時代】度,等你帶咗返屋企,我就打電話叫你將本雜誌放响廳,由個天決定會係大孖定細孖睇到封信先,所以我咪無寫上款囉。點知尋晚你個電話打極都唔通,上天仲要安排咗你去睇封信𠻹,令到你誤會真係唔好意思!」

    黃德明聽了William的解釋,才明白到愛情的魔力之大,除了能令自己一夜變攣外,竟然可以令到一向醒目聰明的William,做出這般愚蠢的示愛方式,而且明知黃德明的三位家姐經常都霸着電話來用,他又怎能輕易打得通呢!黃德明覺得William的安排和策劃都是非常失敗,忍不住問:「咁…你有冇諗過如果係我阿媽打開封信會點?」

    William被這樣一問才突然醒覺到自己有多笨,終於抬起頭望着黃德明,兩人四目交投,然後大家忍不住一同放聲大笑起來,隨著此起彼落的笑聲,一封產生大誤會的情信都已不放在心上,兩人知道彼此間珍貴的友誼才最重要。

    William很辛苦終於能停住笑聲,喘着氣說:「要我同伯母?咁…我寧願揀你囉,Honey!」

    黃德明也不放過William說:「係就俾我錫啖先啦,靚仔!」然後在公園裏追着William獻吻,兩人你追我逐互相嗌對方「Darling!」「傻豬!」「BB!」…朝着學校方向走去。



    ------------------------------

    今日我將自己嘅第一次獻咗俾卡臣,希望各位唔好柴台,因為個台係屬於卡臣㗎!

    真係好感謝卡臣寫咗一篇咁有趣嘅上集,令我有靈感寫呢篇Alternative Ending,亦因為卡臣一直嘅鼓勵,我先至能夠寫得完,仲要借用你呢度嚟發表。

    更加無想過「小瓶子」為我呢篇Alternative Ending寫多個Alternative Ending𠻹!

    回覆刪除
  88. 歪歪:

    这个世上, 一向充满着许多的可能性, 你的故事很精彩吖.

    回覆刪除
  89. 歪歪

    今天下午三時外出見客
    晚上排戲宵夜
    1時才回家

    一開電腦
    嘩!
    感動到不得了!
    你咁好心機/盡心去續寫
    好抵死
    你扭橋好叻啫
    估你唔到
    叫好!

    第一次獻俾我?
    我笑納啦

    你下次再寫
    我幫你post
    繼續努力啊!

    +++++

    小瓶子

    我把掌聲給妳和歪歪

    回覆刪除
  90. 首先要多謝卡臣同小瓶子嘅讚賞,小瓶子所講嘅:『这个世上, 一向充满着许多的可能性』,就正係我想達到嘅目的,你睇得出証明我嘅勞力無白費到。而卡臣你話我『扭橋好叻啫』,就真係點敢同師夫你比呢!

    其實當我一睇完上集,憑直覺覺得卡臣會寫黃德明唔接受呢封情信,於是我想諗個故仔係寫佢會接受嚟做一個對比,諗諗下就出咗個Alternative Ending嘅大綱出嚟。

    細個成日聽媽咪講故仔,讀書時就好自然咁鍾意上作文堂,因為我只不過係將平時天馬行空嘅白日夢寫落嚟;但係自從十幾廿年前離開學校以後,白日夢我有繼續發,只係到今次我先至第一次寫出嚟。希望日後我會有其他更好嘅作品俾大家睇。

    回覆刪除
  91. 『friday night 8:00 pm sogo 門口
    大家有興趣一齊嚟
    我嚴陣以待』

    『今天下午三時外出見客
    晚上排戲宵夜
    1時才回家』

    你明知尋晚要排戲,竟然夠膽約「中三女同學」去Sogo門口等?仲呼籲其他人一齊嚟,你都算衰囉!

    回覆刪除
  92. 歪歪

    >希望日後我會有其他更好嘅作品俾大家睇。
    嗱! 你應承咗
    一於見啱就寫啦


    中三女同學話唔赴約
    我先去排戲咋
    童叟無欺!

    回覆刪除
  93. 好有趣!今時今日睇,愛係無公式嘅,愛就愛吧!

    回覆刪除
  94. 歪歪:

    你獻給卡臣的「初夜」已經很細膩,但篇幅不長,未能顯功夫。但「黑星手槍」那章,功力明顯飛躍,見文猶如看電影,教我印象很深刻。

    回覆刪除
  95. 卡臣:

    你個中三同學,是真是假?真係似層層!後來有無再出現?

    回覆刪除
  96. coffee

    證明妳開明囉
    唔係個個得架

    +++

    佛爺

    歪歪越寫越好
    他說今年聖誕有新作喎
    拭目以待

    這故事全屬虛構
    不過對80年代的回憶
    卻是真的

    回覆刪除
  97. 一定有D野,邊有咁簡單。。。

    話時話,大地牌應該發左好耐,而家仲有無架呢?

    回覆刪除
  98. 我都覺得無咁簡單!我諗男校應該有唔小呢d case

    回覆刪除
  99. 佛爺:
    其實你睇咗我呢四篇,睇到我唔同嘅路線,希望聖誕嗰篇(如果到時卡臣真係復筆),會帶俾你一啲驚喜。

    回覆刪除
  100. naruto

    而家啲後生仔
    點會著大地
    唔似我以前穿國貨

    ++++

    I.minor

    除了男校
    監獄也有唔少

    +++

    歪歪

    咁我12月一定回來
    等你的新作了

    回覆刪除
  101. 你呢篇究竟叫做愛情小說好呢? 抑或係驚嚇小說好呢? 還是係喜劇呢?

    回覆刪除
  102. 呢套有睇過,表白情信我都有寫過,俾人turn down左。

    回覆刪除
  103. Tee

    唔使灰心
    我都成日被人turn down
    大把人陪你

    回覆刪除
  104. 我都係睇「好時代」,最鍾意中森明菜,硬係重有張國榮!

    回覆刪除
  105. 歪歪:

    你同卡臣也開明過我,所以可以有不同風格的故事。雖然我讀過一科「性學」,也不是基督徒,但不太接受男同性戀,而女同性戀就無所謂。所以我不寫男同性戀的情節。

    我期望看你的新作!

    回覆刪除
  106. 單無雙

    我仲有睇「新時代」,「玉郎漫畫」添呀
    喜歡達明一派

    +++++

    佛爺

    人各有取向,無所謂啦

    回覆刪除

LinkWithin

Blog Widget by LinkWithin