~~~~~~~~~~~~~~~~







2008年11月4日 星期二

電視劇對白 Part 1 & Part 2

電視劇對白 Part 2

香港電視劇的其中一個特色:
用同一班演員,穿上唔同的制服,扮演唔同的職業,
講著大同小異的類似對白,愛情追逐權力鬥爭復仇雪恨。
數一數十句經典電視劇對白:

第十位:「你千祈唔好行開,我而家即刻返嚟!」
男主角突然收到緊急來電,屋企發生了意外,病危或有人失踪;
男主角帶着慌張的神色,安慰電話的另一邊,
「你千祈唔好行開,我而家即刻返嚟!」
下一幕就是:「的士司機,唔該開快啲,趕時間!」
司機通常冷冷地回答:「開快啲?抄牌你俾呀?!」
務求製造緊張氣氛。

第九位:「媽咪去咗一個好遠嘅地方!」
一家三口相依為命,
母親因意外或惡疾失去寶貴生命。
幼子向父親問媽咪去咗邊?
父親眼濕濕仰望星空說:「媽咪去咗一個好遠好遠嘅地方!」
幼子似懂非懂地輕聲問父親:「去咗NASA太空站?」

第八位:「原來你約咗我又約埋佢!」
男主角一腳踏兩船,新知舊愛同渡情人節,
男主角疲於奔命應付;於同一時間空間相約兩情人。
在同一區穿梭兩間餐廳,分別跟兩人慶祝。
結果事敗被撞破,新知舊愛大怒:「原來你約咗我又約埋佢!」
左右兩巴掌當然是編劇的指定動作!

第七位:「有錢唔係大哂!」
劇情安排兩名由細玩到大嘅沙煲兄弟,
其中一人發達後,財迷心竅,兄弟兩人反目成仇;
無錢嗰位當街遭有錢嗰位,當眾奚落侮辱後,
必會對着坐在Benz中的暴發舊友大嗌:「有錢唔係大哂!」
再補一句:「你睇住呀!有一日我一定會發達架!」
近期則演變成:「靚唔係大哂!索唔係大哂!」
意下之言,金錢和美貌都是量度成功的俗定指標。

第六位:「你睇吓自己嗰樣,振作吓啦!」
失業失戀失財失敗失寵失去親人,
化妝師在男演員面上加鬚根亂髮黑眼圈,
滿地啤酒罐煙蒂和空杯麵,
這時候,男主角的紅顏知己,
朝主角雙肩猛搖,指駡:「你睇吓自己嗰樣,振作吓啦!」
為了加強戲劇效果,大力摑多主角一巴掌:「醒吓啦!」

第五位:「被告裁定:罪名......」
法庭戲,觀眾非常關心劇中好人被屈,能否沉冤得雪?
壞人會否逍遙法外?還是得到法律制裁?
當法官宣佈:「被告裁定:罪名......」
罪名究竟成立定唔成立?當庭釋放?還押監房?
立即彈出廣告!廣告後下一節才揭曉。

第四位:「我要同大家宣佈:我哋要結婚!」
以為青梅竹馬小情侶,終於有情人終成眷屬。
怎料途中殺出一個程咬金,
有錢情敵同女主角當眾宣佈:「我要同大家宣佈:我哋要結婚!」
誓要把男主角逼上「婚禮搶新娘」的奔跑情節!

第三位:「你有冇呃我呀?係咪真架?!」
當主角對某件事情(迫遷、賽果、遣散、債務)打定輸數,
頹頭喪氣地坐困愁城,
另一位演員走上前,興高采烈轉告一個好消息,
主角面露曙光,半信半疑反問:「你有冇呃我?係咪真架?!」
對方點頭,主角歡天喜地大笑起來,一天光哂!
睇咁耐電視,未見過演員答:「係假架!玩你咋!傻仔!」

第二位:「你鐘意人,咪同佢講囉!」
男女主角身邊總有一名閏中密友或手足死黨,
私底下分享感情心事。
遇上有心儀對象又無膽表白,
密友必會鼓勵說:「你鐘意人,咪同佢講囉!」
但劇情最後發展到密友和被暗戀對象結成一對,
製造「情義兩難存」的矛盾。

第一位:「嗰BB唔係你嘅!」
女主角不忍欺騙男主角,經內心掙扎一番後,
向男主角披露這個無情的事實真相!
BB的經手人,竟然是男主角的好朋友,
這頂綠帽,如何能嚥下?
剩下男主角呆若木雞,任雨水打在身上,
向天呼叫:「點解呀!點解呀!」
讓人造雨水打進男主角的口裏!


電視劇對白 Part 1 (寫於2007年8月)

近年來本地拍攝的電視劇,
起用同一班演員,
用不同的角色名字,
去演同樣的情節和講同樣的對白。
就像車仔麵的餸料,
自由配搭出看似不一樣,
但其實差不多面口的車仔麵。
無論制服專業系列、家族系列、
辦公室系列、魔幻古裝系列、
都有愛情、死人、煽情、復仇情節。
肥皂劇對白萬變不離其宗,
數一數其中十大常用對白:

第十位:「你哋唔好嘈啦!」
劇情一定會安排有爭吵,
無論夫婦間、情侶間、兄弟朋友同事之間,
這時候一位較具份量的人見狀,
就會大聲說:「你哋唔好嘈啦!」
通常都會奏效,
然後再分配工作各人行事,
大家收聲後跟著不歡而散。

第九位:「你聽我解釋先!」
劇情一定會安排有誤會發生,
有人製造誤會就有人需要解釋,
通常一方在逃避時,
另一方就會激動地說:「你聽我解釋先!」
結果通常會換來電話cut線、追車仆親、
兜頭一杯水、或一巴掌。

第八位:「你一定無事嘅!」
劇情會安排有人患重病甚至逝世,
場景是醫院病床,
病者躺在床上奄奄一息,
床邊人流著淚、聲音顫動地說:「你一定無事嘅!」
為了加強悲歡離合的元素(或者演員無期)而安排病者要死,
下一場就見到病者的黑白照片放在石碑上。
在香燭前凝視鏡頭。

第七位:「我哋無可能架!」
劇集中的愛情線,
除了青梅竹馬、日久生情外,
還安排身份地位懸殊、有家仇國恨的情侶邂逅,
或者面對世俗道德標準而投降;
一方就會忍痛說:「我哋無可能架!」
讓觀眾替他們的無奈感到戚戚痛,
但歷盡萬劫的情侶結局時終成眷屬。

第六位:「點解你要咁對我?」
無論親情、愛情、或友情,
只要其中一方做了傷害對方的事情,
受害的一方就會問:「點解你要咁對我?」
除了向人質問之外,
這句對白亦適合主角對天狂嗌!
當主角受到命運作弄之後,
大聲問個天:「點解要咁對我?」
當然連編劇也解答不到這條問題!

第五位:「大家都係女人。」
女人在生活中面對家庭壓力、感情糾紛、心理問題,
女人之間當然明白女人之苦。
這句對白指:大家(女性)都是過來人,
不用明言亦心照不宣!
其實這句對白的真正對象(受眾Receiver),
不是劇中對手,
而是電視機旁邊的女性觀眾,
台上台下馬上產生女性集體共鳴。
一定集集追看下去!

第四位:「唔食啦!我返房先!」
當一家人在開飯時,
其中一名家庭成員表示不滿,
或者失戀、被炒、情緒低落,
便會無胃口說:「唔食啦!我返房先!」
如果是有錢家庭,
就會說:「唔食啦!我返上房先!」
留意:「返上房先」表示他的住宅至少有兩層或以上。
隨即跟著一聲大力砰門聲!

第三位:「我會離開香港,」
劇中的男女主角要分開,
無論是被逼、自願、逃避、尋夢、或者放逐自己,
都想引發起觀眾自己的一些離別經驗回憶。
而另一方會答:「我聽日唔去機場送你機,我驚我會喊!」
而最後當主角臨入閘時都會調轉頭,
駁鏡街頭奔跑及最後傻笑擁抱!
其實觀眾都預咗佢走唔成,益咗航空公司。

第二位:「你走咗就唔好再返嚟!」
少年為了理想或鬥氣要離家出走,
父母就會話:「你走咗就唔好再返嚟!」。
太太要離婚拾行李,
丈夫就會話:「你走咗就唔好再返嚟!」
而呢一句通常會跟「你試吓行出呢個門口」一起使用,
但這句話通常收不到阻嚇作用,
主角一定更堅決地頭也不回大步走,
並換來一下大力的砰門聲!
木搭的佈景牆馬上搖晃。

第一位:「就當我無生過呢個仔!」
劇中最Powerful的一句!
父母子女反目成仇,
最能觸動到倫理關係差的觀眾。
下一個鏡頭是父或母心臟病發作,當場倒地!
同樣地把「就當我無生過呢個仔!」變奏,
變成「就當我無識過你!」
「就當我無嫁過俾你!」
都是希望把一些已發生的事情改變。
而當觀眾花時間看了一齣難睇的電視劇,
就會對自己說:「唉~~ 就當我無睇過呢齣劇!」
亦希望你唔會覺得:「唉~~ 就當我無睇過篇文章!」


除了以上十大位置外,
其他落選對白包括:
「媽呀!妳應吓我啦!」、
「醫生,我啊爸點呀?」、
「離(婚)咪離囉!」、
「大家開開心心食飯囉!」、
「我跪喺度求你!」、
「你原諒我一次啦!」、
「你唔好講!我唔想再聽!」、
「我都係被迫!」、
「我唔想幫爹地手,我自己想闖吓」、
「你唔係我,你唔會明架啦!」、
「我係過來人又點會唔明吖!?」等等。
穿插在劇中人的嘴巴!

51 則留言:

  1. 我上個月係巴黎嘅時候,個度d亞洲人已經BT「珠光寶氣」,我以為係香港舊電視劇,因為D人物套套差唔多,好混亂。

    點解個個劇中人嘅電話鈐聲都一樣?

    回覆刪除
  2. 我又狗尾續貂先:

    「死衰仔,你分明喺度玩野遮,你因住呀。」

    隔無幾耐就開晒片....

    回覆刪除
  3. 卡臣,
    呢編文張版頭相...勁得!,原來你係美術大師^^!

    回覆刪除
  4. 巴黎


    >點解個個劇中人嘅電話鈐聲都一樣?
    ==>呢個謎...係咪因為其他鈴聲要俾版權費?

    「珠光寶氣」...太扮貴氣
    用古典樂做配樂
    我吃不消!!

    ++++++

    eric


    >狗尾續貂?
    有冇搞錯?
    係起死回生至真

    回你一句:
    「入面嘅人聽往, 你已經被警方重重包圍」

    +++++++

    denzel

    我係"美術大師"
    汗顏~~~
    你快去以下條link:

    http://www.photofunia.com/

    玩番張post出嚟呀!

    回覆刪除
  5. 卡臣,
    嘩!!!去左啦...呢次有排唔得閒**!
    謝謝推介~~
    btw,你其實係我心目中的短篇小說大師...呢次講真^^!

    回覆刪除
  6. denzel

    短篇小說大師?
    ....超級汗顏中...

    無錯!
    簡稱:「短小師」
    今次我認啦!

    回覆刪除
  7. 你..電視撈飯架? 咁記得既!!

    回覆刪除
  8. 自由

    有瞄吓咁啦
    不過對白太典型啦
    一定中!

    回覆刪除
  9. 抵「」死得你丫...真係「」咁「」絕核嘅,「」「」「」「」「」「」「」「」...


    仲有 d 由細聽到大,聽到想喊嘅對白:

    1. 「啊 ~~你衰喇你 ~~~」<--任何情況都用得。

    2. 「哼!所以話你呢...」<--同上。

    3. 「你知唔知,阿xx鍾意你㗎!你仲...唉!」<---通常男主角另有女友,另一邊的女仔的姊妹死黨實會引出新的情節。

    4. 「你爸爸呢,其實好錫你,一直都唔講出口之嘛..」<--劇中爸爸角色通常木口木面,但愛之心只是不形於色。

    5. 「係!我知我無錢,你估我想㗎咩!?」<--通常食飯時間的劇,常有的戲橋,實有屈不得志的男仔,又想追某女角(或配角),但又無 $$$ ,就會有這種發晦氣的說話。


    ........


    On Panel:陳大文!你攪惦未呀大佬!新仔都醒過你啦阿 Sir...識撈少少好無?! ^%#@&*&%*$ ......

    回覆刪除
  10. 大文sir

    「」「」「」「」「」「」「」「」...
    8個「」?
    我填極只得7個字, 欠一字!

    哈哈~~
    大家都係電視送飯大嘅!
    有共鳴

    回你幾句先:
    「陳大文!你同我企喺度!」<--女朋友揾交嗌前奏
    「你有冇理吓我感受?!」
    「爹地媽咪,你地唔好離婚呀!」
    「點解你要害我??!!」

    回覆刪除
  11. 重溫𠹺你一年前寫嘅電視劇對白 Part 1,睇返先知原來當時你已經承諾會寫Part 2,仲特登安排响一年後發表𠻹,正好代表咗香港電視文化一路都無進步到,角色故事點變,講嘅對白都可以不變,一味循環再用。

    電視台真係唔識貨,就算唔揾你拍劇,都應該揾你寫劇本啦!

    回覆刪除
  12. YY,卡兄可能就係當年憑僵屍系列一炮而紅既陳13,娶左個如花美眷之後就係度印印腳!

    回覆刪除
  13. 歪歪

    嘩!嘩!
    你每次留言都叫我窩心
    明白我所想
    仲摷番封一年前舊文
    (眼濕濕中)

    咁不如post埋part-1喇

    如果電視台揾你我劇本
    我諗.....我都會寫番呢啲典型對白
    不過會誇張十倍
    以毒攻毒
    等人反胃....

    +++++++

    瘋兄

    查實我非陳13
    我係梁十一呀!
    劉國昌「童黨」果位呀

    回覆刪除
  14. 卡臣:
    上頭注香
    許個願先
    工作順利
    -->0.0!點解會變頭注香架!!
    好啦!許個願啦***********
    密碼錯誤0.0!
    xd

    回覆刪除
  15. 佚名

    點呀
    聽日第四日返工啦
    已經習慣適應嗎?

    回覆刪除
  16. 臣哥:

    除了電視劇對白, 另我想起有不少電視劇角色的行為,是很不現實:

    我從小到大看電視劇的角色一回家,總是不關鐵閘,就關木門,特別是處境喜劇
    鐵閘像是裝飾一樣

    回覆刪除
  17. 嘩無嘢下話...?

    一年前承諾會寫 part II ,真係一年後至寫喎大佬,你唔好到 2012 至寫丫嗱...@@~

    講下笑咁嗟.......

    回覆刪除
  18. 人在風裏

    >總是不關鐵閘,就關木門,
    ==>哈哈! 你講起又好覺喎!
    唔通真係咁趕?
    真係一個謎~~~~~

    ++++

    大文sir

    我經過12個月長時間電視旁觀察
    同三所大學set問卷
    訪問十位電視編劇之後
    才完成part 2
    可謂嘔心瀝血
    陰公~~

    回覆刪除
  19. >>「你睇吓自己嗰樣,振作吓啦!」

    嘿嘿,我上次衰咗,不知幾鬼振作,直頭滿面神采,頭上仲有埋光環!

    回覆刪除
  20. 被告裁定:罪名......
    >>>次次都係果個法官呀 !

    我係梁十一呀!
    劉國昌「童黨」果位呀
    >>>>小妖e+係tst 做緊代客泊車...

    回覆刪除
  21. laulong


    哈哈! 校長果然有料到!
    代悲憤為食量!
    活得比妳好~~

    +++++

    篤篤篤

    早期,個法官好似叫Robinson
    近期係由河國榮撈埋

    Eleven Leung....
    多謝你update先

    回覆刪除
  22. 卡臣:
    點呀
    聽日第四日返工啦
    已經習慣適應嗎?
    -->我唔係日日返ga,隔位返,1、3、5

    回覆刪除
  23. 『你每次留言都叫我窩心
    明白我所想
    仲摷番封一年前舊文
    (眼濕濕中)』

    唔好講到咁嚴重!我只係其中一個忠實讀者啫。

    不過,我都俾你呢幾句感動到眼濕濕。

    回覆刪除
  24. 歪歪

    你自稱是我blog的忠實讀者?
    嘩!
    我終於有第一個忠實讀者啦!
    死而無憾~

    都話你的留言令我感動到眼濕濕啦!
    (感動中...)

    回覆刪除
  25. 卡臣:
    你自稱是我blog的忠實讀者?
    嘩!
    我終於有第一個忠實讀者啦!
    死而無憾~

    都話你的留言令我感動到眼濕濕啦!
    (感動中...)
    -->咁我呢??
    我都係個wow!!
    complain !complain!kaka

    回覆刪除
  26. 佚名

    多謝先!

    妳之前唔表態
    我梗係唔知啦
    如今在感動中
    如今死都無憾

    多謝哂兩位
    請受小弟一拜

    回覆刪除
  27. 卡臣:
    多謝先!

    妳之前唔表態
    我梗係唔知啦
    如今在感動中
    如今死都無憾

    多謝哂兩位
    請受小弟一拜
    -->呢d野,心照啦!
    卡臣唔好死啊!你死都同我繼續寫野
    0.0!咁樣咪好得人驚!
    嗯,所以卡臣做返自己啦:P

    回覆刪除
  28. 佚名

    >你死都同我繼續寫野

    吓!吓!吓!

    ~~鬼~~網~~~誌~~~
    ~~妳~~今~~日~~睇~~咗~~未~~
    ~鳴~鳴~

    回覆刪除
  29. 喂...忠實讀者,唔好漏o左我喎! 我係第3名..哈哈 (爭一個就可以開"木台")

    回覆刪除
  30. 行姐

    第三位忠實讀者
    太感動啦!

    我, 妳, 歪歪, 佚名
    四人可以開枱打衛生麻雀啦!

    正呀!

    回覆刪除
  31. 嗱,我都同你講咗『我只係其中一個忠實讀者』,依家咪証實咗囉,咁你唔駛再『眼濕濕』喇,應該開心笑至啱。

    開枱打麻雀?好抱歉,呢樣國粹我需要多啲時間練習,唔係我做梗第一號水魚!

    早排睇過一篇特稿叫潮拜70's電視劇,好明顯當年嘅創作人材,係比依家嘅好千百倍,有興趣可以去睇下。

    回覆刪除
  32. 歪歪:
    講起游乾水,你唔夠我魚,包尾嗰個應該係我。

    卡卡:
    你就好啦,三位美人陪你開枱,記住鬆章呀!

    回覆刪除
  33. 歪歪

    多謝啊!親愛的讀者們:

    果然好推介!
    70年代:譚家明,甘國亮, 許鞍華等等....
    成為電影圈名導演!

    打牌...志在聯誼,可以唔打錢嘛!


    ++++++

    巴黎

    嘩!好嘢呀!
    妳在blogspot開blog呀?
    開分店?
    恭喜哂!

    法國人當然唔識打牌啦
    (雖然有中國熱)
    同妳玩啤牌吧

    PS 歪歪是男非女
    不成「三娘教子」之局

    回覆刪除
  34. 歪歪

    請你教我如何寫html language

    即是像在你的留言中加hyperlink:
    e.g. 潮拜70's電視劇,

    謝謝

    回覆刪除
  35. 巴黎旅客:

    打牌可以預防老人癡呆,我哋一定要趁後生練好啲,唔係第日老咗就已經太遲。

    卡臣:

    我係自學嘅,所以唔敢話教你。其實個做法好簡單,講一次你就會明:

    (1)先揾咗你想link去嘅網址
    例如:http://www.mpweekly.com
    (2)決定呢條link叫乜
    例如:明周
    (3)下面就係你要打落去嘅組合方法,但係要將()括號改為<>,咁你就可以得到明周
    (A HREF="http://www.mpweekly.com")明周(/A)

    特別要留心唔好漏"之類嘅小錯,希望我嘅步驟幫到你!

    回覆刪除
  36. 哎喲唔好意思,原來歪歪係男子漢,你知啦卡卡咁多紅顏知已忠實fans...

    歪歪公子:我知呀,打牌令人頭腦靈活、眼仔精ling...

    卡卡公子:我係B仔blog寫過幾篇,就搬左去Y記,嗰度多friend d,尤其海外親友。

    回覆刪除
  37. 卡臣:
    吓!吓!吓!

    ~~鬼~~網~~~誌~~~
    ~~妳~~今~~日~~睇~~咗~~未~~
    ~鳴~鳴~
    -->哦0.0,離異事件發生啦!卡臣鬼鬼寫日誌,只因為了我地呢班忠實讀者,感動中

    開麻雀,我都係水魚一條><!
    我都唔識,唔識計番,靜係玩過電腦麻雀
    仲成日輸~><~

    回覆刪除
  38. 巴黎

    哦,原來如此
    咁我繼續去妳YAHOO度捧場啦

    我多女fans?
    係就好囉
    可惜事與願違呢
    但得妳們幾位已經很心滿意足
    阿門~

    ++++++

    佚名

    我.死.咗.仲.寫.緊
    咁.妳.有.冇.膽.睇?

    鳴~~鳴~~鳴~~

    下期六合彩號碼係.....

    回覆刪除
  39. 卡臣:
    我.死.咗.仲.寫.緊
    咁.妳.有.冇.膽.睇?
    鳴~~鳴~~鳴~~
    -->卡臣唔好死啊!你生勾勾寫文啦:P

    下期六合彩號碼係.....
    -->六合彩號碼,都好wow...
    咁你死返啦xd:p

    回覆刪除
  40. 佚名

    >咁你死返啦xd:p

    好~我襯地冧~~
    鳴~嘩~~

    回覆刪除
  41. 卡臣,我都話『講一次你就會明』啦,唔洗同我客氣。

    睇嚟呢度無人精於打麻雀喎,呢樣算唔算已經係上一代嘅玩意呢?假設70年代之後出生嘅開始唔打麻雀,呢批人老咗就自然唔會有麻雀耍樂,咁到時老人癡呆嘅情況會唔會變得嚴重咗?

    而90年代出生嘅就只係精於打遊戲機,更加唔會曉打麻雀,咁呢樣國粹會唔會最後失傳呢?當呢批人擺70大壽、個孫嘅滿月酒時,仲有冇人會响酒樓打麻雀,抑或到時啲老人家會係變咗响嗰度打機呢?

    另外,我覺得幾有趣嘅,原來我就算用咗一個無性別嘅名稱,其他人睇我嘅留言時都會憑直覺去斷定我嘅性別,而好明顯卡臣同巴黎旅客就得出唔同嘅結論,當然你哋其中一個係估啱嘅。其實,當初我揀個咁嘅名,唔係為咗想隱瞞啲乜,只係唔希望因為見到個名,而會令人有先入為主嘅感覺啫。

    唔好意思,今個留言長氣咗啲!

    回覆刪除
  42. 歪歪

    你教得好啫
    一學即會

    而家喺MacDonald,見小朋友圍埋打
    連線psp
    我諗第時都係咁
    不過我都識好多人鐘意打牌
    我諗象棋fade out機會大啲

    吓?
    你/妳孰男孰女?
    不過我一直覺得你是男
    文筆理性邏輯

    回覆刪除
  43. 係喎,打麻雀點都算普及過象棋。死啦,我連象棋都唔叻,希望大家張就下,陪我玩飛行棋、波子棋得唔得?

    『小朋友圍埋打連線psp』

    我就係話當呢批人擺70大壽、個孫嘅滿月酒時,仲有冇人會响酒樓打麻雀,抑或到時啲老人家會係變咗响嗰度打機,想像下個場面都會幾得意。

    『文筆理性邏輯』

    嘩!乜我令你有咁嘅感覺呀?係得你一個咁講咋,家陣輪到我感動到眼濕濕啦!
    (感動中...)

    回覆刪除
  44. 卡臣:
    好~我襯地冧~~
    鳴~嘩~~
    -->哦?無事wow
    唔通訓得冧得制??

    回覆刪除
  45. 歪歪

    陪你玩埋鬥獸棋、僕匿匿、康樂棋都得!

    我都係咁意思,這一代70大壽
    圍埋打機
    或網上擺酒
    大家安在家中, online飲杯

    唔使感動
    我講真心話唧

    回覆刪除
  46. 佚佚

    點呀?工作好點嗎?
    記得「早返遲走」啊!

    回覆刪除
  47. 卡臣:
    點呀?工作好點嗎?
    記得「早返遲走」啊!
    -->有啊!但有好多野仲未識

    回覆刪除

LinkWithin

Blog Widget by LinkWithin