~~~~~~~~~~~~~~~~







2008年8月26日 星期二

作狀說話

作狀說話

去年香港坊間曾經流行「作狀」這個形容詞,
「作狀」解作:扮作有型、煞有介事、懶有深度、自稱高級品味等等…
講「作狀」嘢時,要配合super model姿勢聲線和高傲不屑的表情。
務求獲得風靡萬千的戲劇效果。
以下是我聽過的典型十句「作狀說話」:

第十位:「唔知點解我食極都唔肥?」
這句說話的潛台詞是:「我是得天獨厚!」
通常一位瘦女在一班肥妹面前,
裝出一個懶「迷惑」的樣子說:「唔知點解我食極都唔肥?」
等旁邊一班抖啖氣飲啖水都會肥的肥妹們聽到後,咬牙切齒!
某些女名模在人背後狂做運動、節食抽脂,
然後在眾人面前炫耀自己係「得天獨厚!」

第九位:「太pop啦!我唔鍾意!」
懂聽歌和愛睇電影的人,
都喜歡在人前顯示自己有深度和品味偏鋒。
「吓?英瑪褒曼?太pop啦!我唔鍾意!我鍾意維斯康堤多啲。」
扮影癡者必熟讀世界電影大師的profile。
品味越另類越小眾越難明越深奧,就自覺得越有型。

第八位:「下次等我帶你去見識吓啦!」
朋友聚會商量去邊度食飯邊度玩?最初大家梗係話無所謂!邊度都得!
結果有一些自命品味高級的朋友,一坐低就彈三彈四,「嘩!呢度咁渣架!」
之後就會如數家珍般講自己去開邊度的高檔地方;
「係members only,你哋入唔到架!」、「下次等我帶你去見識吓啦!」
結果下次,當然又無咗回事啦!

第七位:「愛情對於我嚟講係奢侈品!」
一些沒有拍拖的獨身主義者,
偶爾防禦鬆懈時都會輕嘆一句:「愛情對於我嚟講係奢侈品!」
決心把所有時間放在事業上、或者用在改革社會、綠色環保等巨大義意任務,
相比之下,愛情真是微不足道的瑣事兒。
但如果你心中沒有「愛情」的意念,或者直情唔在乎,
口中又怎會掛着愛情這兩個字?恨有愛情又要扮唔志在。

第六位:「我太細個,未聽過!」
香港社會歧視年紀大的人,歌手明星要嫰口,高齡又難搵工,
結果人人都愛扮後生,如果一班人講從前集體回憶時,
有人說:「我太細個,未聽過!」
林黛、梅蘭芳就扮大霧可以話未聽過啫!如果連「彭定康」都話:「我太細個,未聽過!」就未免太作狀!

第五位:「如果用錢可以解決嘅問題,就唔係問題!」
體驗財大氣粗的豪氣精神,
暴發戶信奉「財可通神、錢是萬能」的信仰教理!
並非人人都有資格和膽量說出這句話,
所以講這句時,不妨留意旁人聽後的反應。
並且作好心理準備,你有可能會成為綁匪的下一個目標。

第四位:「It's my show time!」
遇到難題時,眾人束手無策之際,
有人在人堆中步前,先用眼神橫掃在場所有人士之後,
滿懷信心講一句:「It's my show time!」
跟着三扖兩撥施展渾身解數及高難度動作,
順利解決難題,獲得全場讚嘆!
但若果失手的話,就會由半空撻落無底深淵,
It's my worst time!

第三位:「Sorry!我啲中文唔係咁好。」
混血兒、ABC、留學生、國際學校學生,
或者跟以上人士一起玩樂的香港土著,
紛紛對人講:「Sorry!我啲中文唔係咁好。」
就大條道理加重「R」音,從此跟中文一刀兩段,
特別在酒吧和的士高內,大家爭著扮鬼仔鬼妹,咁先有market。
並加入大量Cool!hey~man!check this out!Shit!

第二位:「我要係18歲前掘到我第一桶金!」
對於某些人來說:錢的比重排最前位置。
他要用賺錢來肯定自己的存在意義價值。
他在父母朋友同事情侶前發誓:「我要係18歲前掘到我第一桶金!」
至於那桶金確實有幾多錢?用什麼手法去掘?
點解係18歲前?則無明確交待。
大抵講出來時,覺得自己有型有理想有氣勢便可以!
之後又有誰會認真地去記起你講過乜嘢「黃金」定「帛金」吖?

第一位:「我係一個完美主義者!」
喺人面前稱自己係「完美主義者」都幾肉麻!
自己係唔係「完美主義者」,應該由旁人定論;
並而唔係自己話係就係!
講出這句話的人已經好唔完美!太扮嘢而且overdone咗!
再者,這些所謂「完美主義者」都是雙重標準;
對別人的要求非常嚴謹,要求自己的則極為寬鬆。



51 則留言:

  1. 十八歲前掘第一桶金?好易嗟,茅廁大把.....

    回覆刪除
  2. :「唔知點解我食極都唔肥?」
    -->又真係幾令人mung..知你瘦啦~

    :「Sorry!我啲中文唔係咁好。」
    -->hahaha,講完呢句轉頭拎過去同朋友講哂一堆好流利好地道的廣東話[喂,你竟然潛水,好屈機姐]

    回覆刪除
  3. 你平時响呢到啲對答咁鬼精景,咁當你聽到呢啲典型「作狀說話」後,你係會點樣「潤」翻對方,等佢知道你唔受佢呢套?

    請指教。

    P.S. 睇咗你俾我嘅回覆,多謝鼓勵。

    回覆刪除
  4. mona

    妳真人咁瘦...有資格講呢句吖~~

    「Sorry!我啲中文唔係咁好。」同
    [喂,你竟然潛水,好屈機姐]沒有抵觸.
    因為中文唔係咁好先咀邊常掛潮語

    +++++++

    歪歪

    其實....我成日被人窒
    所以唔係咀gel gel一類
    唔好被我呃到呀~~

    ps : 大家...在心中

    回覆刪除
  5. "Cool!hey~man!check this out!Shit!"

    "Exactly!"
    "Well, you know, ..."
    "Fine!"~~~~~~~~~~

    回覆刪除
  6. 「我不嬲都唔睇荷里活果 d 動作片囉,well, 我唸我唔會係呢類人囉;但我唔係話果 d 咁既電影唔好...」


    >>> 潛台詞即是想說明自己「我好 High 卡 ,好 Art ,好有文化品味 ~~~」,而且一刀切得罪晒其他睇不同類別電影的人。

    回覆刪除
  7. 第六位---> SPECIAL:

    「唔好意思,嘿嘿,我年紀大過你,我比較傳統,同比較著重正統學術派,係我古老嗟,新款嘢唔係我杯茶 ~」



    >>>> 相反來講,一些很想突顯自己「我食鹽多過你食米」的所謂「老屎忽」,潛台詞想曲線說明自己是以前的精英,認為較新派的思想都是「非正統、欠缺學術 ~」.....

    回覆刪除
  8. 笑聽

    哈哈
    你呢位三藩市華僑
    真係可以大聲講:「Sorry!我啲中文唔係咁好。」
    我get到哂!

    +++++++

    大文

    哈哈!勁呀!
    你都係牙尖咀利!

    「今年電影節我買咗pass呀,好忙架!
    你搵唔到我架!實睇到黑眼圈囉~」

    「我接受唔到一夜情!太令我噁心!」
    -->因為對象唔靚先咁講~

    「呀!呢陣風嘅味道令我想起布達佩斯」

    回覆刪除
  9. >「唔知點解我食極都唔肥?」
    嘩..對於一個肥婆既我黎講, 呢句一聽就火都黎埋, 講者如果配埋個眼啤啤既眼神, 直情想打佢添呀!

    >「Sorry!我啲中文唔係咁好。」
    但我又唔見佢d英文講得特別好喎...

    >「我要係18歲前掘到我第一桶金!」
    仲唔拿拿聲買張機票去舊金山掘, 遲左就俾人掘晒架啦!!

    對於你講既10個作狀說話, 我通常會回應一個咀miu miu 既表情俾佢..

    回覆刪除
  10. 我冇聽過人講D咁野.可能我更作狀之故...

    仲有人扮ABC咁老土? 我扮大陸人埋堆搵食.

    回覆刪除
  11. 很奇妙的雲照,有千鈞重壓的感覺!


    >>「唔知點解我食極都唔肥?」

    唔知點解我揾極都唔富 :(

    回覆刪除
  12. 大文/卡臣兄/歪歪-

    對付呢D衰人總有方法:

    扮ABC:「Cool!hey~man!check this out!Shit!」

    小妮:「Bonjour! Guten Morgan!我英文唔係幾好...Entschuldigen! Do you speak Ger文?」

    我係咪更作狀?
    ------------
    有人扮High卡? 睇唔起人咩?

    問佢管弦樂團入面邊樣樂器佢玩得o店,叫佢出來表演一吓; 梅蘭菊竹佢畫得o店邊樣,叫佢即場示範畫國畫.

    -------------
    我見過有比較後生的女人寸四十幾的嫁唔出,我話你一定要sure自己可以白頭到老先好"up"D咁野,仲有如果你老公有第二個女人,你怨都唔好怨一句比人知.咁佢冇野講.
    ------------

    其實高級低擋都去吓, 識多D野唔好咩?

    回覆刪除
  13. [ 我覺得 woody allen 真係真正既導演囉]...



    >>> 呢句屁話我聽唔少.......但通常呢 d 人,無乜真係會睇 woody allen 的戲的。

    回覆刪除
  14. 自由

    >嘩..對於一個肥婆既我黎講
    ==>唔好咁謙喎!妳唔肥啩?


    >我通常會回應一個咀miu miu 既表情俾佢..
    ==>通常我哋會立即散開,剩下主角一人企喺度

    ++++++

    小妮

    >我冇聽過人講D咁野.可能我更作狀之故...
    ==>嘩!呢句高呀!
    攤十位之首!

    ++++++

    >很奇妙的雲照,有千鈞重壓的感覺!
    ==>在故居露台拍攝

    >唔知點解我揾極都唔富
    ==>唔知點解我學極都唔識變叻啲

    回覆刪除
  15. 小妮

    好嘢喎!
    咁欉回應對方
    對方啞口!

    ++++++

    大文

    又有人真係太鐘意小津安二郎, 因為驚人話佢扮嘢而改話自己鐘意周房正行

    回覆刪除
  16. 卡兄:

    > 唔好咁謙喎!妳唔肥啩?
    咁..大隻(妙)咯!

    >唔知點解我學極都唔識變叻啲
    唔知點解我減極都唔變瘦啲

    回覆刪除
  17. 卡臣/大文/歪歪-

    好多人喜歡show-off自己很有錢,有品味.見佢咁醒,咪叫佢表演吓琴琪書畫是但一飯囉,一係就講一口流利德文(英文唔計做外語, sorry)...咁呢種人冇野講.

    去邊到食飯,旅行,用錢就可以做得到.琴琪書畫要由小培養,識就識,唔識就唔識,冇得作大.

    回覆刪除
  18. 有啲茂利真係好扮嘢,講埋啲九唔搭八廢話。

    呢篇文大部分既扮嘢說話我都聽過,尤其是我本身有聽 Classic 的,只係個人興趣,但好頂唔順有啲茂利話文中果句:

    「太pop啦!我唔鍾意!」

    喂大佬,Classical Music 聽邊個音樂指揮和聽邊系列樂章,係好個人口味,要點至「唔 pop」呢又???


    香港好多呢啲扮嘢茂利的.....


    仲有,「我太細個,未聽過!」<----呢句我又係覺得好臭串,有啲廿八、九歲既人,仲成日扮 baby ,有幾細丫?

    回覆刪除
  19. 有人扮野話最鐘意奇斯洛夫斯基,問佢睇過邊套片?
    - 四百擊!
    - 吓,乜四百擊唔係杜魯福拍既咩?
    - 係喎,記錯左添!


    有人話係外國住左五年,但日日往唐人街跑、食义燒飽糯米雞、睇港產片...返到嚟話唔係好記得D中文。
    其實,無論你去左外國10年、20年,始终係中國人,唔會真係變左金頭髮、藍眼晴既鬼佬、鬼妹仔。

    回覆刪除
  20. 自由

    >咁..大隻(妙)咯!
    ==>哈哈
    我廿幾歲時, 朋友叫我「大隻西」!
    咁橋?!

    +++++++++

    小妮
    >去邊到食飯,旅行,用錢就可以做得到
    ==>市面咁多飲食旅遊雜誌
    睇吓幻想吓作吓
    就可以充去過

    回覆刪除
  21. 大文

    >香港好多呢啲扮嘢茂利的.....
    ==>見你心中有團火喎!
    太多茂利充斥身邊

    題外話:
    「呀!以前有間眼鏡舖叫茂利定茂昌?」
    「茂利定茂昌? 我太細個,未聽過!」

    ++++++++

    巴黎

    嘩!杜魯福~法國新浪潮導演
    妳最清楚啦!

    我都試過:
    有人話鐘意高達,
    我問佢: 有冇睇過breathless?
    答: 高達喎!Z Gundum喎!

    吓,乜唔係講緊Jean Luc Godard 咩?

    回覆刪除
  22. 咀gel gel,作狀說話...對自己事業一點好處也沒有, 我正在磨練自己成為一個成功的刷鞋妹.

    回覆刪除
  23. 小妮
    >我正在磨練自己成為一個成功的刷鞋妹.
    ==>刷鞋妹?唔好咁謙喎!
    我都係搵兩餐~~

    回覆刪除
  24. 我最憎D加重「R」音的所谓ABC和所谓“咸水生”以为落“老栏”加重「R」音=上等人。i always tell those guys to "R- "9" instead.

    回覆刪除
  25. 唔知點解我食好多朱古力同雪糕都唔肥?
    我太老啦!好多野都唔記得囉!包括啲電話號碼。
    用錢可以解決嘅問題,真係唔係問題!
    我唔係一個完美主義者,我中文好叻,音樂素養都好高。我25歲前已經掘到第一桶金。


    我咁講係咪總串呢?呀?

    回覆刪除
  26. 巴黎人:


    講樣嘢你知,我曾經遇過不止一個聲稱「我好係外國人的華人」,可以數晒香港而家最 hit 既歌星爛歌,而且電視劇劇情,比 [ TVB 周刊 ] 還要清楚!

    ......

    回覆刪除
  27. 小妮 sweetie~ :

    [ 我正在磨練自己成為一個成功的刷鞋妹...]



    妳做乜曲線話我嗟 ~~~ :P

    回覆刪除
  28. 多謝小妮嘅建議,好同意你話:『去邊到食飯,旅行,用錢就可以做得到.琴琪書畫要由小培養,識就識,唔識就唔識,冇得作大.』

    一個無修養嘅人要靠講『作狀說話』嚟踩人而抬高自己,又有乜真功夫可以耍得出。

    ————————————————

    卡臣,你講乜嘢會成日被人窒㗎?
    你就算『唔係咀gel gel一類』都應該唔會係語無倫次呱?

    回覆刪除
  29. 鑽石人:

    我明呀!我都遇過好多以為外國回歸就威水d 嘅扮野之士。


    十多年既法國生活,深深體會到,無論我既法文講得幾好,內心深處,原來最想用作表情達意既,始終係中文....

    回覆刪除
  30. 廣東話,
    詞源豐富、鬼馬抵死、可以無厘頭、可以一針見血。
    無論讚人、鬧人、寸人、疾人....D 形容詞無與倫比,真係另類文化遺產(雖然好多都唔寫得出街)。

    係Utopia旅客(我幫你新改既名)呢個blog裡面,學左好多特别廣東話!

    回覆刪除
  31. 蘇記

    難得你係番書仔
    都沒有染上扮鬼惡習


    ++++

    hana

    全個香港blog界都知妳係最寸個位
    無容置疑!

    回覆刪除
  32. 大文

    >係「茂昌眼鏡」呀~~ :P
    我當然知啦
    果陣我7-8歲
    不過我咁問,只係想親身試範:「我太細個,未聽過!」啫~~

    我都遇過一個聲稱「我好係外國人的華人」,
    「我性方面比較隨便啲,鬼仔性格嘛!」

    小妮查實話我係刷鞋仔,
    唔好同我爭呀!大文

    回覆刪除
  33. 歪歪

    >你就算『唔係咀gel gel一類』都應該唔會係語無倫次呱?
    ==>哈哈
    真係就俾你估中,我講嘢語無倫次
    思覺失調
    言語障礙

    +++++

    巴黎

    >係Utopia旅客(我幫你新改既名)
    ==>多謝妳呀!
    烏托邦旅客!
    理想都~~
    交通方便
    靜中帶旺
    名校網絡
    坐擁全海

    回覆刪除
  34. 出來打工,「咀gel gel」把鬼咩,根本就冇好處.真實的我是名刷鞋妹軟皮蛇.

    身為香港人,我覺得香港人好敏感(包括自己),可能壓力太大,人地講少少野唔順耳,就以為人地寸自己.我有時也有這個問題...所以唔係生死尤關殺我全家的事,求其人地happy就算,comment都廢鬼事.

    可能我真的老了...參加左"不參與任何團體組織並不發表任何個人意見society Ltd"

    回覆刪除
  35. 小妮
    >參加左"不參與任何團體組織並不發表任何個人意見society Ltd"
    ==>嘩!正呀
    預埋我一份啊!

    回覆刪除
  36. 張相好有氣勢...請問在那裡拍?我想試拍一張。

    回覆刪除
  37. 話自己係「完美主意」者o個D人short gar!又話對愛情,生活抱完美主意bla bla bla...我"cup"過呢D人線啦!

    回覆刪除
  38. 「咁快又交稅嗱? 唉....又要大嗱嗱俾十萬
    八萬政府」

    「年紀大咗,食嘢講 QUALITY 唔係
    QUANTITY」

    「暑假有冇打算出去呀? 我啱啱去完東歐
    返嚟,好抵玩,一個人四萬零五萬之嘛」

    「依..你住九龍個河...我住香港架」

    「我都係鐘意歐洲車,好力D」

    「俾個賓妹激死,好鬼蠢架佢」

    「最近去開邊度食飯?」


    最作狀係:

    「老婆你今日好特別啵?!」

    回覆刪除
  39. Denzel

    張相在土瓜灣
    宋皇臺道傲雲峰某小單位個小露台影
    用nokia 6300電話影
    2007年夏天7月早上7時左右

    你的相真是大師級!

    ++++++++++++

    小妮

    >我"cup"過呢D人線啦!
    ==>cut自稱完美人的線~
    爽呀!!

    回覆刪除
  40. 與她最近的距離只有 0.03mm

    多謝你留言先!

    「與她最近的距離只有 0.03mm 」
    呢句重慶森林內金成武的對白
    我都好鍾意

    仲有:「你知唔知飲酒同飲水嘅分別?」

    「何寶榮,不如我哋重頭開始」

    「如果有多一張船飛,妳會唔會跟我走?」

    回覆刪除
  41. 呀!係呀..土瓜灣附近都有好多靚海景..多謝提醒..我的照片是生活裡的一些紀錄..過獎了..謝謝欣賞**!

    回覆刪除
  42. DENZEL

    唔好咁謙呀!
    你的器材唔講得笑

    回覆刪除
  43. 哈哈!
    作狀說話人人也有,有時候連自己說了也不知道呢!

    完美主義,誰不想完美呢~但最多只可以說"我要求高",但談不上完美。

    如果那人說他很完美,他一定發了瘋?因為世上沒有美,因為人喜歡發掘人的缺點,雖然他們會邊發掘你的缺點,邊驚嘆"似完美"的你:p

    回覆刪除
  44. 佚名

    >我要求高",但談不上完美。
    ==>係喎!
    通常聽到啲人話:「我對自己要求好高架!」
    結果....吓!?咁就叫要求高?
    如果普通水準咪死梗??

    回覆刪除
  45. 卡臣:
    係喎!
    通常聽到啲人話:「我對自己要求好高架!」
    結果....吓!?咁就叫要求高?
    如果普通水準咪死梗??

    -->哈哈,這是自以為高尚:p
    他們這樣說:「我對自己要求好高架!」只會令人覺得他們自大
    但如果你這樣說:「我要求高,但談不上完美。」另人會認為你謙虛,反而會敬仰你!

    哈哈,這就是說話技巧
    所以說話也要懂用方法,同樣意思,但不同方法,就會帶出不同效果,這是人們為之忽略。

    我有個奇怪問題?我說話是不是很老?
    怎麼人們會認為我說的話是別人教我的?這全是我所想所感,沒有人教過我!!

    回覆刪除
  46. 佚名

    >我說話是不是很老?
    怎麼人們會認為我說的話是別人教我的?這全是我所想所感,沒有人教過我!!

    ==>唔!妳是一名學生
    以學生標準來說,妳的說話算是老練
    (當其他同學仍然玩hello kitty,kerroro)

    我相信妳不用別人教妳講嘢
    因為妳可能:
    1)多睇書
    2)父母,家庭環境,耳濡目染,已老成
    3)妳先天早熟,十幾歲軀體,幾十歲心境

    又或者睇環境
    如果環境係朋友間白痴吹水之際
    妳突然講句語重心長的說話
    其他人覺得妳老積扮深度
    或者抄人地口水尾

    唔緊要啦!忠於自己啦~
    我都成日被人話我白痴
    我唔mind
    因為我真係白痴嘛~~

    回覆刪除
  47. 卡臣:
    ==>唔!妳是一名學生
    以學生標準來說,妳的說話算是老練
    (當其他同學仍然玩hello kitty,kerroro)

    我相信妳不用別人教妳講嘢
    因為妳可能:
    1)多睇書
    2)父母,家庭環境,耳濡目染,已老成
    3)妳先天早熟,十幾歲軀體,幾十歲心境

    -->我幾歲大已經係咁既口吻...汗^^0

    又或者睇環境
    如果環境係朋友間白痴吹水之際
    妳突然講句語重心長的說話
    其他人覺得妳老積扮深度
    或者抄人地口水尾

    -->嗯!俾個狼心當狗吠,我被吠慣^^0

    唔緊要啦!忠於自己啦~
    我都成日被人話我白痴
    我唔mind
    因為我真係白痴嘛~~

    -->岩,無需介紹別人眼光,做好自己便足夠,我對天對地,還算是不塊吧...好猶疑地說:P

    回覆刪除
  48. 第九位:「太pop啦!我唔鍾意!」
    好中!!!!!!!!!!
    好煩的!成日听到這一句我只會應一句(下~係呀?)轉話題

    「唔知點解我食極都唔肥?」
    而家D人係擺明係瘦但口口聲聲扮由衷讚個肥過佢既人:「你好瘦呀~~~」又或是不停說「呀~~好肥呀我」

    回覆刪除
  49. JESSIERITAYIP

    「太pop啦!我唔鍾意!」
    >咦?妳睇果啲嘢都好偏果喎!

    「唔知點解我食極都唔肥?」
    >真心話,相中的妳好瘦呀~~

    回覆刪除

LinkWithin

Blog Widget by LinkWithin