~~~~~~~~~~~~~~~~







2008年8月16日 星期六

一個人的天荒地老

一個人的天荒地老

雅文;

我心裡有很多說話想對妳說,但不知從何說起?
我最後選擇寫一封信給妳,用文字整理我的一些思緒。

我坐在沙發上,看妳背着我執拾行李,
妳的歸妳、我的歸我。
如果每段婚姻都有一個「賞味期限」,
我們的婚姻則印着「十年」。

這個小單位見證著我們這3650天的生活和喜怒哀樂。
我們搬進這小單位時,兩人歡天喜地去揀傢俬地板瓷磚,
妳一句我一句,慶高釆烈地討論傢俬如何擺放。
妳愛IKEA加上G.O.D.,我嚷著要貼電影海報。
牆壁上有一口釘,原本掛著我們的結婚照,
半年前已經除了下來,可能大家都愧對那份逝去的幸福,
任由牆壁空了一片。

我記得很多美麗老好年華,仍歷歷在目,
我記得新居入伙時,我邀請我的朋友回家吃飯,未開飯前我已經醉到不醒人士,剩下妳招呼我一班陌生朋友,我醒過來的時候,妳剛好正在送客、
我記得兩人入西貢看流星雨,那片人頭湧湧的沙灘、
我記得1999年12月31日零晨,我和妳一起跨越千禧,一份經歷兩個世紀的感情、
我記得兩人坐在電視機前吃即食麵,妳嚷著要用碗盛,我偏偏連煲上,因貪懶可以洗少兩個碗、
我記得沙士時期,兩人回到家後,才敢脫下口罩喘一口氣、家門內外的安危差異、
我記得我某年的生日禮物,是一個小產的胎盤、
我記得的,還有很多、很多….很多….回憶….
有些妳甚至可能已經忘記,但這些溫馨光境,我仍然記得很清楚。

妳執拾書本時,一張封了塵的囍帖從書架跌下,
是妳和我的囍帖,不經不覺,它已經十歲了。
我拾起並打開它,紅色囍帖內金箔印着妳和我的名字一雙,
一張只可以容納一個新郎一個新娘的囍帖,親朋戚友看過我們的文字承諾,
如今讀起來,它的約束力如同倒下的黃沙堡壘。
我記得印刷這張囍帖的店舖,是位於灣仔的囍帖街,
囍帖街也快將清拆重建。
一條製造婚姻承諾的街道亦自身難保,更遑論帖上的尋常男女主角?
花無百日香,感情隨歲月轉淡流逝,要走的,時辰夠,始終要走,
伸手不可將煙花採摘、窗花不可將落霞幽禁。

妳沒有說一句話,拖着兩喼行李,離開這單位,無聲把大門關上。
閂門一聲後,我要開始面對一個人的生活;
雙手掩面坐在沙發,心裡數五聲,希望五聲之內,妳會回心轉意…

數到第三聲,門鈴「叮噹」!清脆一聲,奇蹟還是會眷顧失意的人,
我跑去開門,門外見妳站著……

妳把頭垂下,
只將右手舉到我面前,右手食指和母指箝着一串鎖匙,
沒有說話,我接過鎖匙後,妳仍然沒有告別,轉身便走。
妳以右手無名指穿戴起結婚戎指作開點,再以右手食指和母指交還鎖匙作終點。
用同一隻手興建,用同一隻手摧毀。

一朵原本以為明天會開的花,在昨天已先凋謝。
一人有決心有熱誠,兩人就可以一生一世?
跟自己天荒地老的,原來只有自己跟自己的影子。
一個人的天荒地老。


祝妳生活愉快


國明

* * * * * * * * * * * *

文字靈感取自:謝安琪《囍帖街》


42 則留言:

  1. 一陣悵惘,冉冉升了上來....

    1999年12月31日,我從巴黎飛到香港,與仍是陌生的他一起倒數,跨越二千年的第一夜。
    也從那時候後,生活起了變化。

    夫妻的緣份,今生、來世,不是你決定的...

    回覆刪除
  2. 巴黎

    妳都有個(當時仍是陌生的)他,
    一起擁有一份跨世紀的感情吖!

    如果在1999年12月前仍獨身或失戀
    就沒有此福份

    夫妻的緣份,今生、來世,不是你決定的...
    ==>應該是互動,
    所以任何一方可以很無力,亦可以很重要

    唉~悵惘
    等我飲啖red wine先
    咕嚕~~~

    回覆刪除
  3. à votre santé!
    飲勝!

    半醉半醒、有點朦朧的世界,似乎更美...

    回覆刪除
  4. 巴黎呀巴黎

    妳帶鵝盰醬
    我出花生 (我抵啲)
    飲~飲~飲~

    紅酒加expresso merci~~

    à votre santé!

    回覆刪除
  5. 唉~好悲傷!!! 連一句bye bye 都唔願講...真係無聲的告別!!

    回覆刪除
  6. 自由

    妳婚後自會明白......

    浪漫已死~浪漫已死~
    數百次我撲向空屋的破窗~~~

    回覆刪除
  7. 鵝盰醬、花生= 高胆固醇 + 高卡里,會把原本瘦小的身影,脹大一倍!
    淺斟後,夢裡再尋佳肴好吧。
    這St Julien,傾倒了....

    回覆刪除
  8. paris

    >淺斟後,夢裡再尋佳肴好吧。
    這St Julien,傾倒了....

    嘩!好感性啫~~
    這支豉油,傾倒了....

    回覆刪除
  9. 哎我睇得法國文藝片多,你知啦d對白好鬼性感,呀應該係感性!

    「如果你不存在,我為會而生?
    太陽隨着你的離去,暗淡無光...」





    阿喂!做セ仲唔入嚟瞓呀?又同邊個msn呀?(咩呀!趕稿吖嘛!都無解既!)

    回覆刪除
  10. 巴黎

    講開感性對白,等我整番句先:

    「曾經有一份真摰的愛情擺在我的面前,但是我沒有珍惜,等到了失去的時候才後悔莫及,塵世間最痛苦的事莫過於此。如果上天可以給我一個機會再來一次的話,我會跟那個女孩子說"我愛她"。如果非要把這份愛加上一個期限,我希望是一萬年」....西遊記之月光寶盒

    快啲瞓啦, 如果唔係, 可能變小說主角

    回覆刪除
  11. 麻甩:底衫短褲,踢對人字拖,夾著份馬經係加拿大。

    回覆刪除
  12. 開頭仲以為你真係寫比你老婆添....一路睇一路擔心你..睇到最後先知係story.. haha....嚇死人咩...

    回覆刪除
  13. 喂eric

    點呀你?
    settle down啦!
    快啲蒲頭啦!

    你講果位麻甩佬...唔係指你嘛?!
    你係倫敦


    ++++


    kaka
    >睇到最後先知係story.. 嚇死人咩...
    ==>多謝關心先!
    近日愛聽那首歌, 加鹽加醋,
    隻歌填詞唔錯架
    聽聽please

    回覆刪除
  14. 卡臣:

    >妳婚後自會明白......
    唔駛婚後, 拍過拖都有機會知..

    >我會跟那個女孩子說"我愛她"。如果非要把這份愛加上一個期限,我希望是一萬年

    你用月光寶盒+呢段對白同你老婆求婚架?

    回覆刪除
  15. 落霞都80歲了總使幽禁嘅?

    回覆刪除
  16. 未睇你個new post之前已經開始聽呢首歌..同你一樣覺得好好聽..(^^)

    回覆刪除
  17. 自由行

    >你用月光寶盒+呢段對白同你老婆求婚架?
    ==>用呢段?笑死咗先!

    +++++

    hana

    趙紫陽被終生幽禁添...

    +++++

    kaka
    妳都鐘意聽呢首歌,..同我一樣覺得好好聽..
    係呀!係咁repeat聽

    回覆刪除
  18. so sad...

    暑假呢D戀愛既季節睇悲劇好down啊~~

    回覆刪除
  19. MONA

    本故事純屬虛構
    唔好sad呀~~
    阿叔叔無事呀~~~

    回覆刪除
  20. 這是作者成功之處。
    人生如戲,因為投入,所以
    看到悲劇便哭
    看到喜劇便笑....

    回覆刪除
  21. 巴黎

    >這是作者成功之處。
    看到悲劇便哭
    看到喜劇便笑....

    ==>我仲犀利!
    我寫的悲劇,讀者看到便笑!
    我寫的喜劇,讀者看到便哭!

    服未?!

    回覆刪除
  22. 我已經同你分開咗, 仲post出黎,

    回覆刪除
  23. 前妻呀前妻


    雖然我地已經同你分開咗,
    但係我仲要俾贍養費
    咁我咪有權講~~

    回覆刪除
  24. 一篇“喜出望外“嘅作品,唔係因為你“寫的悲劇,讀者看到便笑!“,係因為你好少寫傷感嘅故事,你將呢封“不寄出的信“當中嘅無奈寫得好到肉,加上畫面描述得好細緻,令人睇得好投入。

    個人精選:

    我記得我某年的生日禮物,是一個小產的胎盤

    一張只可以容納一個新郎一個新娘的囍帖

    妳以右手無名指穿戴起結婚戎指作開點,再以右手食指和母指交還鎖匙作終點。
    用同一隻手興建,用同一隻手摧毀。

    回覆刪除
  25. Carson -

    "浪漫已死~浪漫已死~
    數百次我撲向空屋的破窗..."

    --即係你正在"hum"頭埋牆???

    "我記得我某年的生日禮物,是一個小產的胎盤..."

    -- 故事突然變成「三更之胎盤」?


    故事中的女主角走了,佢有冇出律師信要番層樓呢? 人走左冇緊要,最重要係攞番層樓!

    回覆刪除
  26. 歪歪

    多謝你!
    等你看到我性感的一面,
    sorry! 打錯!
    感性的一面!

    (嘔~嘔~嘔~)

    你的精選也是我的心水!

    ++++++++

    小妮

    浪漫都被妳喜劇化

    我剛有朋友分手
    憧樓賤賣
    一人一半
    唉~~

    要番層樓呢?

    回覆刪除
  27. 如果要忘記,便不會選擇留在舊宅,牽起昔日各種回憶,最好快快遷離....
    Out of sight , out of mind.

    回覆刪除
  28. 唉,傷心哉!

    緣來緣去,前事的喜與淚,在今天裏讓我盡還你!

    http://www.youtube.com/watch?v=yWYdCRCd_Xc

    回覆刪除
  29. Carson - 今晚去了看奧馬!

    唔係講笑,層樓好重要!人到中年(男女都好)已經很難再搵錢,已經留不住人,如果連錢都冇晒要瞓街...做左咁多年人得個吉,為咩?

    喜帖街之"家好月圓圓圓圓圓"!!!!

    回覆刪除
  30. ..."清風下手裏那鑰匙...業權比番我好嗎?"

    回覆刪除
  31. 巴黎

    搬離舊居,分散吓注意力
    妳知啦
    一張兩座位sofa
    一張雙人床
    好礙眼~~~

    ++++

    laulong

    果然...舊夢不需記!!

    回覆刪除
  32. 小妮
    妳今晚去了看奧馬!
    我今晚去了看奧巴馬!

    好啦!
    唔爭喇!業權歸妳啦!

    回覆刪除
  33. 卡臣:

    連你前妻、北方小姐(上一個post)都出黎講2句....犀利..犀利!!!

    回覆刪除
  34. 昨晚睇完你篇文, 今朝再聽埋首歌, 感覺好正, 好貼題

    回覆刪除
  35. 自由

    >連你前妻、北方小姐(上一個post)都出黎講2句....犀利..犀利!!!

    ==>佢話我犀利..我好犀利!
    咁短小嘅人仲可以夠膽生存...

    ++++++

    rachel

    >昨晚睇完你篇文, 今朝再聽埋首歌, 感覺好正, 好貼題
    ==>其實係首歌填詞填得好
    我畫蛇添足啫!

    回覆刪除
  36. "其實係首歌填詞填得好
    我畫蛇添足啫!"

    我之前未聽過呢首歌,只係覺得你篇文好感人,但係當我睇完歌詞,我就覺得填詞人今次少咗神來之筆,而個MV嘅導演就直頭交白券𠻹。

    多得你用呢首歌嚟借睇發揮就真!如果首歌加埋你篇文嚟做“劇場版“咁就如虎添翼喇。

    回覆刪除
  37. 囍帖街幾有特色,雖然已有點過時,但有特色。那些囍帖商號有些不太願意接受現實,因為現在很多人結婚,都在酒店擺酒,酒店有提供一條龍服務,全部幫你搞惦。

    而且也有很多人上大陸深圳印帖,大陸人頭腦比香港人開通,很多老牌香港店,老實講,有時態度真是令人 O 嘴。

    回覆刪除
  38. 歪歪

    嘿!我反而喜歡這首詞:
    借囍帖街的清拆比譬婚姻破裂
    正喎!

    個mv直情毫無誠意啦!
    你鐘意個故事,我就高興!

    ++++++++

    diamond

    係呀!酒店有提供一條龍服務
    真係無乜人再幫襯

    喂!幾時輪到你印帖先?

    回覆刪除
  39. 我當然鐘意呢個故事啦,感性得嚟一啲都唔婆媽,唔煽情,已經係好難,再加上當中有好多新嘅ideas,係抵讚嘅。

    讚咗咁來唔爭在講埋喇,响我心目中呢一篇作品係你咁多篇之中最突出,所以以後唔好令我失望呀!

    回覆刪除
  40. 歪歪


    >响我心目中呢一篇作品係你咁多篇之中最突出,
    ==>多謝美言先, 我會努力!
    介紹多一篇我的心水:

    http://carson-chung.blogspot.com/2007/10/blog-post_13.html

    必看啊!

    回覆刪除
  41. 你推薦嘅嗰篇作品,我未去睇之前就預感到你講嘅係邊篇。Click咗之後見到題目同張照片,我就已經眼濕濕。

    因為我記得你响文章中講述表妹嘅離世,而令我諗翻起早幾年過身嘅妹妹。今日再重溫,雖然無第一次睇咁激動,但係依然令我好傷感。

    所以我好佩服你即使有過咁唔開心嘅經歷之後,從你嘅文字間仍能感覺到一份幽默感,同埋“人間有情“ 嘅人生觀,我就特別鍾意睇你個Blog。

    回覆刪除
  42. 歪歪

    sorry! 原來你有位早幾年過身嘅妹妹。
    同病相憐~~~

    生離死別
    看透.放下
    共勉之!

    回覆刪除

LinkWithin

Blog Widget by LinkWithin