~~~~~~~~~~~~~~~~







2008年6月28日 星期六

紀漢醇 - 10 - 羅馬鬥獸場(完結篇)

紀漢醇 - 第十節 - 羅馬鬥獸場(完結篇)

雅典娜says:
點呀?一於嚟啦!當我求吓你呀,一次咁多吖!

紀漢醇想了十秒後,做了一個重要的決定:

韓信is typing a message:

韓信says:
Sorry!I have to confess that I'm married, and I love my wife very much!

雅典娜says:
無所謂架!我都有老公呀!

韓信says:
Sorry!I don't want to betray her!I love my wife forever!

韓信says:
I love my wife!I love my wife!I love my wife!I love my wife!I love my wife!I love my wife!I love my wife!I love my wife!I love my wife!I love my wife!I love my wife!I love my wife!!!

韓信says:
sorry!this is my last word with u. I won't see u anymore!

雅典娜says:
有事慢慢講!

韓信says:
All ended! case closed!!!!!!!

紀漢醇隨即off line,並跟手在MSN中delete了雅典娜的聯絡account。
紀漢醇不想再終日惶恐,擔心淑芳那枚計時爆彈在什麼時候爆炸?
紀漢醇反過來爭取主動權,借「韓信」的身份,經MSN向太太作道歉聲明!
一對同住夫妻,要用網上的另一個模擬身份,跟對方道歉,修補已冷淡的夫妻關係,紀漢醇也自覺諷刺!

紀漢醇在這場鬥智鬥力的遊戲中敗給淑芳,輸得心服口服!
他就像羅馬鬥獸場的一名鬥士,慘烈地給一頭凶猛獅子吃掉,
他要重新評估一直低調沉潛的淑芳,她的真正面目和本領究竟有幾高超?
紀漢醇今次輸給淑芳,成為手下敗將,他本着「識英雄、重英雄」的宗旨,
既然被淑芳降服,就只得乖乖地做個好丈夫!
而且他記得自己在Alma面前,對淑芳的一切皆一無所知,
實在羞愧當她的丈夫!所以他下定決心要改變自己,重新關心淑芳的一切一切。

紀漢醇跟雅典娜劃清界線後,希望淑芳知道自己已洗心革面,重新做人!
紀漢醇已踏出善意積極的第一步,希望淑芳能夠「得些好意須回手」,
不會向他攤牌發爛,大家就當這次越軌事件如粉筆字抹走!
紀漢醇估不到結婚四年後,經此一役,才令他重新思考婚姻的意義和當丈夫應付的責任。

紀漢醇當天放工回家,買了一份小禮物送給淑芳。
更邀請淑芳外出吃晚飯,看一場9:30電影,吃完糖水後才回家,
淑芳當然樂於接受,正所謂「你敬我一呎,我敬你一丈」,
淑芳知情識趣,作出善意的回應,兩人關係改善,熱情再現!
他們再次行房,紀漢醇更乘機補多一句:「嘩!支『霹靂壯陽針』真係有料到喎!」

打後的日子,夫妻增加見面時間,
晚上,男的不再留在書房,走出客廳,嘗試跟太太一起煲劇,
兩人現正煲緊《HEORS》Season 10的DVD,
女的開始迷上打on line game,夫婦組成一team,跟其他網友網上雙打。
夫妻相敬如賓,重拾新婚時的溫馨感覺;
兩人相識七年,所謂「七年之癢」的相處關口平穩過渡,踏入小陽春。

紀漢醇星期六生日,他以為淑芳會跟他到東涌酒店渡週末,
怎料淑芳隻字不提,她改為提議去澳門吃萄國菜遊玩慶祝。
紀漢醇認為淑芳不跟他去酒店慶祝,是她故意將「雅典娜事件」完全淡化抺掉!
紀漢醇明白她的用意!

一個月後,某個星期三下午5時,紀漢醇在公司收到淑芳的電話,
淑芳說:「Alma間製衣公司有一大堆男女時裝衫版免費送俾我哋,不如放工後,我哋一齊去Alma公司揀?」紀漢醇:「好呀!無問題!」
夫妻約好晚上6:30到Alma公司。

Alma接待兩夫婦後,叫他們到版房慢慢揀衫,
當兩人揀完衫版後,他們抱着幾件衫回到Alma的坐位,
Alma剛剛放下電話筒,怱忙地向淑芳說:「你哋坐陣先,有批貨喺大陸出咗問題,我老細而家搵我入房傾!」
淑芳說:「好啊!我等埋妳放工,見妳送啲衫俾我,今晚請妳食晚飯!」
Alma說:「好!妳幫我call埋阿Man呀!」阿Man是Alma的未婚夫。

淑芳坐低後call阿Man,約好晚飯的時間地點後,
她從銀包中取出兩張六合彩獎卷,對紀漢醇說:「噚晚張六合彩未對,幫我對吖?」
紀漢醇立即用Alma檯上的電腦上網check,都係無個字中獎!
淑芳借用洗手間去了。

剩下紀漢醇一人對著電腦,與其乾等Alma,不如上網消磨吓時間!
他click入「我的最愛」,見到Alma所bookmark首位的網頁是《馴悍記》,
他好奇地click入《馴悍記》,網主名字叫「阿嫲」,
咦?唔通網主「阿嫲」就是Alma?一於click去「登入」,
咦?「使用者名稱」和「密碼」,已經在「請在這部電腦記住我的登入資訊」輸入並儲存妥當,
好奇的紀漢醇,一按Login in鍵,便成功進入了《馴悍記》的「控制主頁」,
紀漢醇諗:「哈!Alma果然係網主呀!乜Alma除咗寫佢嘅養狗整蛋糕嘅日誌外,仲寫多個Blog咩?但係點解佢唔通知我哋班friend去睇呢?咁神秘!唔通呢個Blog寫咗Alma最私隱嘅嘢?」
強烈的好奇心驅使下,紀漢醇馬上瀏覽《馴悍記》!

紀漢醇唔睇猶自可,一睇就冷汗直標!
《馴悍記》內容講:如何將一位未定性的心野丈夫降服到貼貼服服!
雖然男女主角易了名,但紀漢醇一睇就知Blog中的男主角就是影射緊自己!
網誌由Day 1開始,寫到Day 45,每天update事態最新發展,
獲得唔少網民的支持、留言、討論、分析和獻計,每段文章留言過百。

Day 1
淑芳、Alma、Lydia三人吃晚飯傾心事時,淑芳慨嘆和丈夫相處出現問題,感情轉淡,紀漢醇一望見其他女子就色迷迷,對自己就懶得理!Alma替姊妹淑芳感到氣憤不值!

Day 2
Alma決定幫助淑芳,她私下諗出一個名叫《馴悍記》的計劃,但Alma沒有告訴任何人,連淑芳、Lydia和阿Man也瞞着、因為多一個人知道就多一分外洩秘密的機會。Alma開始著手進行步署!

Day 4
Alma化名雅典娜,開了一個寫80年代的懷舊Blog,東抄西取,copy and paste出一大堆懷舊文章。

Day 8
阿Man早上病了,Alma藉詞探訪他,上阿Man家後趁他在床上睡覺,用阿Man電腦的MSN身份跟紀漢醇通話,介紹這個80年代懷舊Blog給紀漢醇看,跟手sent 出blog條link給紀漢醇。

Day 10
紀漢醇看Blog後,對雅典娜感興趣並開始留言,最後終於問雅典娜取MSN號碼,Alma開了一個新MSN戶口,和紀漢醇日夜密密MSN。

Day 16
Alma主動又巧妙地,把話題不經意扯到「性」方面,紀漢醇立即撻著!一於奉陪到底,仲越講越興奮、七情上面!

Day 24
紀漢醇開口約雅典娜見面,大魚終於上釣!Alma應承赴約,並在當夜寫了一篇《交筆友》文章,描述見筆友的興奮期待心情,等多情的紀漢醇飄飄然。

Day 25
Alma下午去淑芳公司找淑芳下午茶,趁淑芳不覺,搗瀉藥入淑芳碗車仔麵,Alma送淑芳入醫院,急call紀漢醇到醫院。6時正,Alma站於急診室門外,用她的3G電話跟紀漢醇通MSN,取消當晚約會。

Day 27
紀漢醇再約雅典娜於戲院見面,Alma上ebay,假扮有一本香港同性戀殿堂級雜誌《雄風》創刊號公開拍賣,引來一名gay man 買家bid中,Alma sent了紀漢醇的相片給gay man,跟gay man相約晚上7:30到百老匯電影中心,憑照片相認,見面交易一手交錢一手交貨,Gay man在大堂認出紀漢醇後,上前相認,問紀漢醇「實收幾多錢?」其實指《雄風》雜誌收幾多錢?Alma輕輕懲戒了紀漢醇!

Day 31
Alma主動約紀漢醇晚上7時見面,紀漢醇反提議於晚上9時於漢口道Starbucks見,Alma約Lydia於同樣時間地點見面,仲叫Lydia應約時,記得穿上Alma今年送給她的生日禮物:一件橙色猿人Tee。當Lydia步入漢口道Starbucks後,等了10分鐘後都唔見Alma,Alma便致電Lydia改地點到海洋中心的Starbucks見面。讓紀漢醇誤會Lydia是雅典娜,即是溝正老婆閨中密友,看他會否就此收手?

Day 37
紀漢醇約雅典娜到又一城吃晚飯,Alma的一位舊同學Samson當上壹週刊記者,Samson訪問過一位由男變女的變性人Lulu後,Samson結識了Lulu,Alma經Samson的穿針引線下,向Lulu說週刊訪問出街後,Alma有一位姓韓的成熟有型男士,對Lulu十分心儀仰慕,韓先生想請Lulu到又一城吃一頓晚餐,交個朋友。諗住上回用gay man,今次用變性人來招呼紀漢醇。
Alma以傾婚宴為藉口,和阿Man上淑芳家作客,期待欣賞紀漢醇給Lulu招呼後的驚愕表情,可惜紀漢醇沒有應約。
Alma收到Samson的電話短訊:「Lulu來電投訴韓先生沒有應約」,Alma立即改用Plan B,取出R11戲票「嫁禍」入淑芳的旅遊書中。讓紀漢醇誤會雅典娜就是淑芳,等紀漢醇自己嚇自己!自我折磨一番!

Day 38
Alma主動約紀漢醇到酒店相聚,作為對紀漢醇的最後試煉,睇吓紀漢醇仲夠唔夠膽應約,最後見到紀漢醇答I love my wife!跟雅典娜劃清界線後,紀漢醇終於修成正果!

Day 44
淑芳、Alma、Lydia三人吃飯傾心事,淑芳近日來心情大好,Lydia詢問下,淑芳說丈夫性格180度改變!現在兩人水乳交融!Alma聽罷,心中宣佈《馴悍記》計劃大功告成!

Day 45
Alma多謝各方網友這個多月來的支持,任務完成,再沒有新文章發要發表了。跟各方網友暫別一段短時間。除非又有姊妹需要Alma再次出手。

文章最後一段,Alma更專登打錯字,把《馴悍記》打成《醇漢紀》!

嘩!連自己個名都開埋俾全世界知道!唉~好鬼醜啊!
紀漢醇全身僵冷,心臟幾乎停頓。
原來Alma先至係雅典娜!

紀漢醇以為一直跟淑芳角力,原來夫妻兩人都在Alma的五指山內兜兜轉轉。
紀漢醇望著電腦屏幕,呆若木雞,突然被淑芳的聲音驚動了,
淑芳去完洗手間回來,見到紀漢醇面如死灰,問他是否身體不適?
紀漢醇馬上close電腦的 internet explorer,強作無事,回答她因為冷氣太凍啫!

此時Alma也回來,道歉:「sorry!唔好意思!要你哋等!而家走得啦!」
紀漢醇千辛萬苦、千山萬水、千方百計想見到的雅典娜,如今就站在面前!
因為紀漢醇裁在Alma手上,覺得很窘,不敢跟Alma有任何眼神接觸。
臨走時,紀漢醇見到Alma案頭上放着阿Man的照片,紀漢醇不禁戥相中人可憐,
心諗:「唉~阿Man,你未來老婆咁識manipulate人,唉~有排你嘆呀!」

如果自己是羅馬鬥獸場的一名鬥士,淑芳就是一頭戰勝了的獅子,
而高高在上,坐在鬥獸場看台上的羅馬大帝,就是Alma!
她遙控擺佈著鬥獸場中每個人的命運,玩弄於掌心裡。

紀漢醇跟着兩位女士的背後一路行,去吃一頓他一生中最難下嚥的晚餐。
紀漢醇跟着兩位女士的背後一路行,覺得自己要走下去的路,陰雲密霾,舉步維艱。

終於他一邊行一邊悟出一個道理:原來自己冥冥中給《馴悍記》收服的命運玄機,
一早已經埋藏在自己名字「紀漢醇」這三個字當中,
自命是Handsome Guy的紀漢醇,原來命中早已注定是《馴悍記》的階下囚。
面對難逃的宿命,他搖頭輕嘆,發出乾澀的苦笑聲!
紀漢醇跟着兩位女士背後,緩緩湮沒在夜幕下的茫茫人潮當中。

全文完


後記

最初落筆之時,故事原名叫《馴悍記》,
但《馴悍記》給讀者設下想像框框,所以改為《紀漢醇》。

《兩花生》和《紀漢醇》是【越軌三部曲】中的首部和二部曲,
《兩花生》講一對未婚男女的越軌衝動,
《紀漢醇》講一位已婚丈夫的越軌疑雲,
構思中,第三部曲講一對已離異的夫妻,離婚後各自再婚,數年之後,兩人再重遇的故事(不日上映)。

多謝大家收看


82 則留言:

  1. 多謝大家收看

    第一段留言,我要留給歪歪
    他在預告看到「紀漢醇」一眼便看穿是「馴悍記」, 佩服佩服

    再一次多謝大家!

    回覆刪除
  2. 拍案叫絕!一衆人物清晰化,各有伏線。

    鬥獸塲上的gladiator、獅子、觀衆....原來都是配角。

    咦你着42号鞋?

    回覆刪除
  3. 我一直都沒有讀這連載小說,因為不喜歡等,一直留待到尾聲的第九篇刊登了,昨天早上(28/6)才一口氣由頭細讀,然後再等這刻看大結局。

    描述香港地都會男女關係,生活化得來抵死傳神,挺有味道。也期待你的第三部曲,相信會更精采。

    回覆刪除
  4. 巴黎(深圳)旅客
    有冇真係拍案先?!
    無就補拍返三吓!

    嘩!果然好眼,真係42號喎!
    勁好眼

    多謝妳支持~~

    小豬
    多謝你一口氣睇哂!
    係咪睇到你目光呆滯呀?
    食粒消化丸啦
    第三部曲嘛...我盡力啦!

    回覆刪除
  5. 點止三下,我為那只拍手小兒上了發條,正不停地鼓掌呢!咦唔識stop嘅?壞左?

    真係42!下次loto買的號碼!

    回覆刪除
  6. 咦,睇來我之前都有估中一DD哦。都系好姐妹幫手整蠱紀漢醇啊。

    其實紀漢醇一早同老婆多點溝通,唔好成日哩系書房度打GAME,感就咩事都無啦。

    話時話,點解有D男人同女人結左婚,就好似當正個老婆系無思想O架公仔呢?將老婆變成屋企O既一件擺設。系都認為野花香D呢?

    回覆刪除
  7. 結構精奇 是改編成電影的上佳劇本.

    回覆刪除
  8. 啊,唔記得一樣也。

    恭喜卡臣,終於連載完啦!

    幾時仲有新作?

    回覆刪除
  9. 巴黎旅客
    「咦唔識stop嘅?壞左?」...快啲揾驅魔人睇睇...


    nost
    多謝你睇哂就真
    「紀漢醇」將會改編成默劇,於上水街坊福利會上演,免費派飛

    carmen
    多謝妳睇先!
    「點解有D男人同女人結左婚,就好似當正個老婆系無思想O架公仔呢?」
    我諗男人貪新鮮,是天性
    電玩,換電話,換車,
    要不斷換,從中取得開心..
    我都問緊自己,向天高呼:點解呀?天!

    7月正常返,上返HKtop10
    小說嘛.咪兩集完果啲囉
    記得睇啦

    回覆刪除
  10. 問個天啊!?你都幾識揀人來問啊!

    HKtop10啊!?一定支持啦~

    回覆刪除
  11. 是人受著荷爾蒙支配,有生育的意識因而結合。如果人生有80歲, 由20多30歲開始只可以得一個異性伴侶,都不太合乎動物的天性(esp.男性).

    Carmen:
    我問了一些已婚的朋友,男的多說對著同一個伴侶多年是很悶的.男人要經常有肉體上的新鮮感.不離婚的好處是家中有女人帶小孩,照顧家人. 但老婆已經不可以令男人有性的興趣,只是生活上的partner. 這合乎我以上說的"荷爾蒙論".

    回覆刪除
  12. Carmen

    係呀!我等緊佢答我,
    如果佢唔答我,
    我唯有一路貪新鮮落去
    呀! 天呀~ 答我呀~~

    回覆刪除
  13. 卡臣 - 女人都貪新鮮,不過女人很會掩飾,做玉女人見人愛,不會被社會批評,但男人花心可以比較公開.

    回覆刪除
  14. 小妮

    多謝妳提供!
    我終於有答案啦!
    原來因為荷爾蒙,
    等我仲差啲要搵精神科添.
    立即cancel booking先

    回覆刪除
  15. 多謝小妮一解疑團~

    卡臣可以慳翻一筆去精神科O架費用啦~

    回覆刪除
  16. 卡門
    係呀!慳返筆錢
    攞嚟換電玩,換電話,換電腦,
    換老....闆先

    回覆刪除
  17. carmen - 女人到更年期就已經玩完,有些唔keep自己的女人在生育後declare就玩完.在婚姻中她們由性伴侶角色變成management(即帶小孩,煮飯).性伴侶角色就由未生育過或比較年輕的女人代替了,所以古代人幾個老娑, 大奶奶老了就做當家, i.e.management/Financial control.之後老爺又娶一個更年輕的太太.

    回覆刪除
  18. 小妮:其實從八歲到八十歲的男人都系中意十八廿二的女仔O架啦。青春無敵,皮膚質感特別好,一過左二十五歲,生陳待謝都會變慢哂O架。再公平點講,我到八十歲都會中意十八廿二的男仔lor。

    回覆刪除
  19. 小妮

    明白哂
    唔怪得「大紅燈籠高高掛」入面
    老爺搞埋丫環啦

    女性年輕時愛靚仔愛花靚
    但到年長時先揀有經濟條件基礎
    跟男人倒轉

    回覆刪除
  20. 卡門

    「從八歲到八十歲的男人都系中意十八廿二的女仔O架啦」<--我唔同意,大過22歲,我都殺架!

    回覆刪除
  21. 卡臣:講落,“銀樓金粉”都系呢一類題材啊~

    22以上都殺啊~ 你人生有點要求好無?!唉~

    回覆刪除
  22. 卡門
    「你人生有點要求好無?!唉~」
    我年老色衰
    無條件同資格講:人生有點要求啦
    啋~~

    回覆刪除
  23. 紀漢醇<->馴悍記
    絕!

    Alma就似乎太過工於心計,有DD恐怖。恐怖過Angela。

    回覆刪除
  24. 抱歉!由於我的擴音機燒了,要整機,所以零晨四點才看。

    結果很精彩,曲折盡在結局篇。這故事也曲線地為【港男】帶來一些反思。很多港男自以為大情人、醒目、作大專家,誰不知自滿沖昏了頭腦,自己的愚笨,已在一些人的掌握之中。

    回覆刪除
  25. 卡臣:

    既然男人係喺女人個肚走出來,點會唔食敢你?不過我無喺題目諗過有何緣機~~~~~~:P

    Daniel.

    回覆刪除
  26. 謝謝你呀,卡卡,給我們很懸疑豐富的思考經歷!

    回覆刪除
  27. >卡臣可以慳翻一筆去精神科O架費用啦

    係丫係丫,哩度有個免費嘅準心理醫生。

    回覆刪除
  28. 非常精彩, 先前小弟留言話過可以出舞台劇, 而家要修正, 精彩劇情絕對可以拍電影呢!

    香港導演, 都係彭浩翔作首選啦...

    回覆刪除
  29. 哇..卡臣,掂啊!!
    超精彩囉~~
    你寫到我到登阿handsome難以下嚥啊~
    Alma超恐佈,阿man真係好慘,好慘~做女人都要咁講!!
    handsome同老婆重修舊好都唔錯既~但背後的好得人驚.

    回覆刪除
  30. Carmen/ Carson - 靚女有手段的另計. 周慧敏/林熙蕾/徐若宣都可以打低18/22. 男人,有錢另計,大劉可以打低千千萬萬的靚仔.

    回覆刪除
  31. 卡卡:

    Mona 啱啱拋咗個問題比我地,去睇下。

    回覆刪除
  32. ERIC
    歡迎回來先!
    angela只是因利成便嚟過一石二鳥
    初級蛇蠍,

    alma就係有智慧組織型,
    遇著佢? 兄弟,速撇!!

    大文
    嘩!你部幾十餅嘅擴音機燒咗?!
    聽到都戥你心痛
    祝部機早日康復

    係呀,有啲男人以為自己handle到
    原來一早已經露哂底

    daniel
    呢個故事係男方輸咗
    下次可以由男方贏番
    筆在我手嘛
    嘻嘻~

    回覆刪除
  33. 素素
    咁遲呀? 攤涷哂
    「淑芳好醒喎」<-- QC仔都同我講妳好醒喎,
    所以QC仔唔會去滾!

    laulong
    我多謝你又睇又留言就真!
    講多次, 故事純屬虛構, 唔係講我呀!

    hana
    「哩度有個免費嘅準心理醫生」
    嘩! 我驚經初步診斷後,要攞去人道毀滅

    回覆刪除
  34. 渣sir
    失禮拙作啫
    多謝你肯睇就真

    彭浩翔..都係70年代出生啲「死仔」,
    所以佢諗嘅嘢...我有共鳴
    另..Wong kar Wai..我都推崇

    mona
    哈~
    妳具邏輯頭腦,都估中哂劇情啦
    仲係大結局前爆哂出嚟添!
    點計先?

    laulong
    miss嘅排位,我排咗啦. 你呢?

    回覆刪除
  35. 卡臣,

    對唔住啊~我不嬲都唔會估中iq題架嘛~點知又會估得岩喎~~

    下次我擺心啦!!

    P.S.卡臣,你真特別~

    回覆刪除
  36. 結局真係好精彩,估唔到雅典娜係Alma,紀漢醇O既一切都操縱佢手中,連淑芳同Lydia都俾佢呃埋先厲害,真係好恐怖

    回覆刪除
  37. Mona
    「P.S.卡臣,你真特別~」
    我同意,妳講得啱:卡臣,你真特別....樣衰!

    rachel
    「連淑芳同Lydia都俾佢呃埋先厲害,真係好恐怖」<---好多人都話alma好恐怖, 估唔到我寫咗個恐怖小說:【Alma怨咒凶靈】

    小妮
    妳講得啱
    「郎財女貌」<--男講錢財女講美貌

    回覆刪除
  38. 「郎財女貌」+ 荷爾蒙論 <--男講錢財女講美貌

    以上和地心吸力一樣,是永不會變的真理.那麼你便會對婚外情,離婚,二奶抱住個仔跳出來分身家的case一點surpise都沒有.

    回覆刪除
  39. 個個都話alma勁,alam恐怖,其實有無諗過呢~系寫個故仔出來果個人勁且恐怖D呢?

    回覆刪除
  40. 小妮
    妳咁後生, 唔好諗嘢咁灰啦!
    凡事有例外架

    carmen
    寫呢個故仔出來果位人兄,勁(低能)兼且恐怖(面貌)呀!

    回覆刪除
  41. 雖然我無看整個故事,但這類都市愛情,男女關係小說好像是你小小的心理投射.

    用古希臘的框框,good try!

    回覆刪除
  42. 卡臣- 連你也不例外. 次次我同比我年紀大的人說以上的真理,佢地都聽唔入耳.出左事又喊苦喊Fuk...又成日問點解我冇咩壓力咁開心,因為我已經對人類的期望減至無可再低的level,所以一切好少少的事情,已經是喜出望外了!

    這不都是做人的真理嗎?

    回覆刪除
  43. Vincent
    「男女關係小說好像是你小小的心理投射」
    哈哈!唔多唔少咁啦!

    小妮
    係嘅!係嘅!
    妳有妳嘅道理.

    回覆刪除
  44. 難得卡臣對自己有如此透徹的認識。

    小妮其實講得非常正確lor,因為實際情況就系感樣,好無新意,次次睇親點感O架新聞,都忍唔住要講聲:“好悶啊!”。

    對於“人類的期望減至無可再低的level,所以一切好少少的事情,已經是喜出望外了!”呢句,我舉手舉腳贊成!!!!

    回覆刪除
  45. 小妮,咁你就唔啱喇,同年紀大過妳既人講,即係 19 歲啦,太 young 喇。

    喊苦喊 Fuk <---sorry 係咪好似打少左個英文字母呢?例如... c 字?

    回覆刪除
  46. 笑 聽
    多謝你收看呀!

    大文
    【少林足球】口吻:「師兄!你終於返嚟啦!」
    (好擔心你真係返咗火星整膽機)

    回覆刪除
  47. 燒左,係部睇電影既 AV amp,無得整,已換過部 ( 二手機嗟,屋企成棟仲有好多 )

    回覆刪除
  48. 陳大文部落集團(粵港澳)暨遠東發展策略研究第三支部 -

    Hahahahahahahahahahahahaha!

    哈!可能我誇張了少少...沒太多不必要的期望可以快樂D啊!:)

    回覆刪除
  49. 好睇好睇...

    不往我追咗好一段日子... 期待下一篇 =)

    回覆刪除
  50. lo哥
    多謝你睇就真!
    下集嘛....聖誕節睇吓得唔得?

    二打六
    多謝你肯追看!
    希望你滿意結局啦

    回覆刪除
  51. 結果真係出人意表呢~~~

    期待下一輯新故事呢^^

    回覆刪除
  52. 逍遙小妹
    「結果真係出人意表呢」
    係咩? 妳一早估中哂啦
    佩服!

    mona
    下一篇是HKTOP10
    講「廢話」


    小西
    向您问好!

    回覆刪除
  53. So nice to see Kim Tae Hee and Karena Lam here!! Carson, your blog is getting popular!

    回覆刪除
  54. 呵呵,來了個杭州美女!卡卡,你個 blog,對我哋哩麻甩,另有意義!

    回覆刪除
  55. 素素 & laulong

    嘩!位杭州美女路過咋!
    transit咋
    佢嘅最終目的地叫:過眼未雲煙
    杭州美女嚟呢度問路之麻!

    回覆刪除
  56. 咩呀? 係夢幻女神呀 =DDD
    正呀~~~咁靚女。

    回覆刪除
  57. 搞乜鬼,一個拎去 Yahoo, 一個拎去 google. 我就唔理咁多,得卡卡仙人指路,我我我...

    小西,我上黎杭州揾你!

    回覆刪除
  58. 終於睇完喇....故事情節好吸引我..gayman相約嗰段啦..老婆不是電腦idiot啦.仲有「阿麻」blog係一個驚喜...等等....我頗喜歡alma的角色..好鬼馬又有正義感...好似我啊...hehehhee

    不過對於我來說,看完結局之後有一點失落感,,可能都習慣看了。
    人就是這樣,當開始看一本小說時,便很想快快看結局;當完結的時候又很想回到之前一些精彩的情節內,不論結局是悲是喜,都不想那麼快出現。如果世界上有一本「沒有完結的小說」有多好呢....

    至於劇情方面...我個人認為handsome guy在一個不太情願的situation下才妥協....今次佢只不過唔好彩才會被太太個朋友整估.換句話說,日後如果佢真係有一個偷情的機會...佢一定會試....

    那作者又有什麼見解呢?

    回覆刪除
  59. 大文
    喂!好靜喎呢排
    係咪情場得意先?
    係就....介紹多個俾我呀大佬!

    laulong
    「小西,我上黎杭州揾你」x2
    等埋我吖!

    回覆刪除
  60. 米米

    多謝你咁好心機寫回應俾我先

    「不過對於我來說,看完結局之後有一點失落感」<--仲有新小說嘅. 暫時未封筆

    「日後如果佢真係有一個偷情的機會...佢一定會試....」<--邊有唔食魚的貓?
    紀生下次會學醒啲
    先要見到其人先至追
    再ensure佢唔係受人指示

    唉!咁辛苦做乜
    算吧啦..............去嫖算吧啦

    回覆刪除
  61. >>人见人炳的卡卡's blog 提到...

    「小西,我上黎杭州揾你」x2



    去咯去咯,成棚人開心啲,同小西去樓外樓食龍井蝦仁!

    回覆刪除
  62. 劉sir
    我查到..原來小西係男人

    我突然醒起出門口,唔忘得閂窗
    你上去先
    我或者隨後到

    回覆刪除
  63. 頂,比你玩死!

    係喎,龍井蝦仁香港都有得食!

    回覆刪除
  64. 卡臣:

    多謝你將第一段留言留俾我,等我留最後一段留言啦。

    我一個月前衰多口單嘢,差啲攪喎你嘅心血,好在你delete得快,無影嚮到太多讀者。

    其實我佩服兼多謝你一路俾咁多有趣嘅文章同留言至啱!

    Keep up the good work!

    回覆刪除
  65. 歪歪
    唔好客氣!
    你見微知注啫!
    叻!

    你呢排忙呀?
    咁少見你嘅?

    ps. 最後一段留言俾唔到你

    回覆刪除
  66. 卡臣兄,不得不給你一個「服」字,完全估唔到Alma才是最有計謀嗰位,今次真係“估你唔到”!勁!

    Handsome要偷食但頭頭踫著黑,很可憐耶!呢個故事教訓啲要去滾嘅唔好當身邊嗰個咁流,仲要防埋佢朋友。一句講哂,出黎行,預咗要還,都係咪咁咸!

    回覆刪除
  67. 男人老狗

    多謝你真的肯抽時間睇小弟舊作

    如果有空咪逐個label慢慢睇番
    以前作品空間大些
    現在驚重覆舊橋段
    反而綁手綁腳
    有些乾塘之感添

    看了 兩花生 未呀?

    回覆刪除
  68. 哈哈...
    引得我一口氣看完~

    婚外情,係幾吸引嘅。

    回覆刪除
  69. 釨好睇呀~~~~仲好想睇喎~~
    計落..卡臣仲欠我地第三部曲 !!!
    hahaaa

    回覆刪除
  70. kateyip

    多謝收看
    第三部....未諗到呀

    回覆刪除
  71. 兩個越軌既故事都好好呀~~~
    最終都無做出越軌既事, 無教唆之嫌呀!! hahaa

    有拖無欠呀 ! 等你呀 !

    回覆刪除
  72. kateyip

    妳看穿我心意:只是內心爭扎沒有做。

    好啦,不日上演

    回覆刪除

LinkWithin

Blog Widget by LinkWithin