* 新聞報導 -（小說）- 上集

新聞報導 -（小說）- 上集

星期五下午2時15分，陽光普照，
Kenneth和Yuko在尖沙咀文化中心對開的海濱長廊，
兩人情不自禁地，閉目輕吻。
突然聽到背後一聲：「cut！good take！」

* * * * * * * * * * * * * * * * * *

已婚的Kenneth，當保險經紀，他經朋友介紹下，認識了Yuko，
並發展婚外情，關係已維持了三個月。
Kenneth和Yuko都在尖沙咀區工作，
男的經常需要外出見客，女的工作也需要經常巡視集團附屬的零售店，
有時候，他們會相約一起乘天星小輪渡海到中環，
在船上偷取片刻的相聚和歡愉。

Kenneth今季保險業績彪炳，公司將送他去泰國開會，
開會為名、渡假為實，公司會定期獎賞表現出色的員工。
Kenneth今天又約了Yuko一起渡海。
他倆行到文化中心對開，Kenneth把一個白信封交給Yuko，
Yuko拆開信封，內裏是一張印有Yuko Lam名字的泰航機票，
Kenneth背着妻子，邀請Yuko一起去泰國渡假偷歡。
Yuko見到機票，說不出的興奮！感激地望著Kenneth，
兩人情不自禁地，閉目輕吻。
突然聽到背後一聲：「cut！good take！」

睜開陶醉的雙眼，發覺他倆站在的地方，正是攝影機的正面，
原來無線電視台的一支新聞攝製隊，於文化中心外進行錄影！
大家都記得在收看電視新聞時，間中會看到一位記者站在鬧市街道上，
以熙來攘往的途人做人肉佈景，報導當日某一段新聞。

剛才Yuko折開信封發現是機票時，興奮得立即駐足跟Kenneth親吻，
而停步的地方剛好就是新聞記者身後的幾尺位置。
因此Kenneth和Yuko kiss的溫馨景緻，便無意被攝入鏡頭，
最攞命的就是那一take仲係good take，即是今晚6:30新聞一定會播出來！

Kenneth知道片段經電視播出來，事情一定會鬧大！
他諗有什麼方法能夠令這段新聞footage今夜不被播出？
他向Yuko藉詞有急事要回公司，叫Yuko先自行過海，然後自己留在現場善後。
Kenneth 立即call他的好朋友David，向他說出事情經過，求他給予意見。

David在公司正忙得不可開交，帶講笑口吻敷衍Kenneth說：「嗱！你而家做單大嘢，要勁過記者頭先報嗰單料，咁今晚咪播你嗰單料，唔播佢嗰單囉！係咪？喂！我老細叫我！唔同你傾啦！自己搞掂啦！拜！」

Kenneth掛線後，因他的老婆乃標準惡妻一名，
Kenneth平日怕老婆之餘又好色好滾，而家當然越諗越驚，
千萬不能被老婆或她的朋友家人同事見到這節新聞，否則死梗！
最後Kenneth終於鑽入牛角尖；決定要落手做單大嘢！
他現在正猶豫緊：應該做單什麼勁嘢呢？

此時，一名巡警剛巧「行咇」經過，Kenneth雙眼不自禁地望着巡警的鎗袋，
心裡產生「上前搶鎗」的霎時衝動。
但自己平日少運動，加上自己著緊西裝黑皮鞋，搶鎗後未必夠差人跑！
如果搶完鎗又最終被差人捉到，則只會淪為一樁中小型案件而已，未必夠震撼！

此時，Kenneth聽到兩名自由行的大陸遊客剛好行過，
其中一人用普通話說：「今天可以在這裡看到奧運聖火！」
Kenneth腦中「叮」一聲！醒起今日奧運聖火到達香港第一站。
如果奧運聖火炬被人搶走或整熄，咪即刻可以成為國際大新聞囉！
論轟動程度，一定可以勁過今日任何一單新聞料！

但Kenneth記起新聞中，火炬手前後左右有聖火護衛隊護航，
又有鐵馬、警車重重包圍，犀利過對付韓農示威，如臨大敵！
自己連支左輪手鎗都搶唔到，守衛深嚴嘅聖火火炬又點可以埋到身吖？
況且火炬手已經跑離咗尖沙咀，自己可以做得啲乜嘢？

遙望星光大道，突然想起某套電影的情節，
好！一於虛報傳送聖火終點站有炸彈襲擊！
Kenneth打算call 999，虛報話有幾個炸彈已經裝咗喺沙田運動場同港澳碼頭！
他希望見到啲嘉賓疏散的混亂情況，今夜晚間新聞一定會全力報導。

Kenneth當然唔會蠢到用自己手提電話打999，
他走到天星碼頭的公共電話亭，在褲袋取出一元硬幣。
凝望着公共電話，呆望幾分鐘，問自己應否臨崖勒馬？有沒有其他更佳辦法或選擇？
最後答案都係：非做不可！

因為報案中心可以追蹤電話來源，
所以他要限自己7秒內講完，並立即離開現場。
他對着電話筒，一手望錶，試講一次，
唔！OK啦！5.9秒講完，都幾滿意。

好！心中不其然哼著：「♬ we"re ready ♬」，
拿起電話筒，投下一元，按999後，
向電話另一邊說：「我知道法輪功放咗三個炸彈喺沙田運動場，藏獨份子放咗五個炸彈喺金紫荊廣場，快啲派人去睇吓！」
講完馬上啪一聲cut線，但全身仍在顫抖…

待續…