捉心理

捉心理

如果我遇上新相識的朋友是讀心理學的話，
我會有點抗拒跟他說話，
怕他從對話中看穿我心裡在想什麼！
雖然我都唔清楚自己心裡真正在想什麼？
今天就講吓在日常生活中，
跟別人對話中而反映出的四個心理按例。
（本文全無科學根據，純粹靠估。）

案例一：「你估吓幾多錢吖？」
如果有朋友拿著一件商品走到你面前，
興高采烈地問：「你估吓幾多錢吖？」
我估這件商品的價格一定是驚人地：平宜。
朋友的意圖是想其他人知道他擁有精明眼，
買到筍嘢，價廉物美、物超所值！

如果該商品真是驚人地昂貴，
他不會用「你估吓幾多錢吖？」如此直接的方法發問，
而改用：「呢個袋徐子琪都有，吓！都幾襯我吖！你話係咪？！」

所以當朋友問：「你估吓幾多錢吖？」而你又想氹吓佢開心，
你不妨「有咁貴講咁貴！」
朋友聽到越貴就越開心！
並邊笑邊回答：「唔使10,000蚊咁貴！只係要200蚊咋！」

反如果你想他無癮，
你只需要回答：「我諗100蚊呱！」
他就會立即反駁：「100蚊？我俾1,000蚊你同我買10個返嚟呀？黐線！無senses！」
跟著不是味兒地走開。


第二案例「你估吓我幾多歲吖？」跟案例一有點相似，
發問者必定對自己的外表有一定信心才敢發問。

發問者相信自已的外表年齡比實際年齡輕，
當別人估完之後，從揭曉答案中獲得滿足感！
而發問者通常是長者：「吓？你估我60歲？我今年72歲啦！哈哈！」

如果想氹吓老人家，等佢地晚年過得開心點，
你就要「有咁年輕估咁年輕！」
讓他們覺得自已仲「有心有力」之餘，
你仲要O咀加送：「Unbelievable！Man give me five！」
平日多積點陰德，他朝君體也相同嘛！


案例三：「你行邊面？」
日常生活你總會遇到一些不相熟而你又無興趣去進一步加深認識的人，
甚至是徘徊在無好感和話不投機之間，更甚者是你討厭的人。

但命運偏偏安排你們遇上，例如你在公司加班後放工，
你跟你討厭的人碰巧在lift lobby 遇上；
兩人點吓頭，問候一吓，然後已經唔知講乜好？
入lift後，Dead air 充斥在升降機內。
當升降機門打開，
對方問：「我搭地鐵，你搭乜？」
注意：對方已經先開牌話搭地鐵，
如果你識趣的話，你就最好順勢回答：「你搭地鐵呀？我搭隧巴，拜拜！」
（雖然當日你可能真係想搭地鐵）
這樣做，對大家都輕鬆又好過。

最尷尬是兩人最後又係地鐵站遇上，
「咦？你又話搭隧巴嘅？」，
「呀！…係呀！…我行到半路醒起…今晚要嚟地鐵站攞份【招職】俾我細佬。」
注意：該份【招職】最好話攞俾家庭成員，否則明天公司裡會傳出你想跳糟。


案例四：「小巴空位」香港始終是中國人社會，「男女授受不親」的儒家傳統風氣仍存在，
所以在小巴或巴士的公共交通工具中，
如果有得選擇的話：男乘客會坐在男乘客身旁，
女乘客會坐在女乘客身旁。

所以當有很多座位供剛登車乘客選擇，
如果一名乘客無端端揀跟一名陌生異性同坐，
就會惹來該異性乘客產生：對方有不軋企圖的猜測。

所以如果一人獨自乘坐公共交通工具時，
先會揀跟同性別的乘客同坐，
如果無空座位剩，迫於無奈，就會揀一個較醜樣的異性乘客同坐；
總之越靚的異性，就越少人敢上前同坐，
（驚其他人話自己博懵博大霧，而入罪成功率，隨乘客的美艷程度一拼提高。）

舉例：如果小巴車廂內現在只剩下兩個單座位：
兩個單座位分別位於兩名男乘客的身旁，
此時一名年輕貌美的少女登上小巴，
她通常會揀跟較為無咁靚仔嗰位男乘客同坐，以免瓜田李下。
所以她揀和哪一位男乘客同坐：間接判斷了該名男乘客的樣子比較平庸醜樣！

我在小巴中也經歷過這種形式的比試。
結果剛登車的美少女揀與我同坐，
道理上：有美少女陪坐我身邊，應該感到心花怒放才對；
但她揀我亦即暗示我貌不如另一男乘客！
當中複雜矛盾的感覺非旁人所能了解。
所以有時我會專登扮出一個惡形惡相的表情，
趕走登車的美少女去另一名男士身旁的座位，
來替我贏取保留小巴車廂中最後一個空位的冠軍寶座。

完