爛 gag 十個

爛gag十個 （舊文重溫）

新年流流，香港求得下簽，等我講吓爛gag，沖喜吓先！

原文：

和朋友晚飯席間講起爛gag，
收集一些爛gag跟大家分享。
注意：這些爛gag不是本人原創，
冤有頭債有主，
請你們的噓聲不要對錯目標：

（一）
僱主：「請你講吓你嘅優點，」
見工者：「我識四國言語、兩個master三個PHD、做過跨國集團CEO個人助埋…」
僱主：「咁又請你講吓你嘅缺點，」
見工者：「我鍾意講大話。」

（二）
問：「今晚我哋放工一齊返大陸玩！」
答：「好呀！」
問：「記得護照喎！」
答：「吓？過關唔係用護照，用回鄉証架！」
問：「我話互照：即係『互相照應』呀！」

（三）
問：「你估熊貓一生之中，最想做乜嘢呢？」
答：「係替自己影一張彩色相片！」

（四）
問：「26個英文字母當中，邊兩個英文字母最唔聽話？」
答：「係『E』同『C』；因為EC難教（伊斯蘭教）。」

（五）
問：「第一屆奧林匹克運動會每項賽事有乜特色？」
答：「每項賽事嘅冠軍，都會自動刷新成為世界紀錄！」

（六）
問：「鄭秀文最唔捨得邊個人呢？」
答：「許志安呀？」
問：「錯！係你爺爺！」
答：「吓？鄭秀文唔識我爺爺喎！」
問：「鄭秀文唱：『♬我捨不得你 yeah~yeah♫』（我捨不得~你爺爺）！」

（七）
問：「市面上有咁多間減肥公司，用邊間shop減肥一定可以保證100%有效呢？」
答：「保證100%有效？唔知喎！」
問：「呢間Shop係Photoshop！」

（八）
問：「有一班童黨鐘意圍揪弱者，以多欺少！依家呢班童黨面前有三個目標：藍精靈、比卡超、Keroppi；佢哋會郁邊一個先呢？」
答：「藍精靈！因為藍精靈係迷幻藥物！」
問：「錯！答案係Keroppi（綠色青蛙），因為『綠野仙縱』（綠嘢先摏）！」

（九）
問：「邊個女藝人個仔，你一掂佢，你就會無好下場呢？」
答：「嘩！咁惡？張栢芝個仔呀？」
問：「錯！答案係謝安琪（洋名Kay），政府都話：『掂過Kay仔，無好下場』！」

（十）
問：「真正嘅天空之城，猜香港地方名？」
答：「流浮山？天水圍？」
問：「錯！係：堅尼地城（堅嘅離地之城）。」

延續重溫：爛 gag

完