瘦身廣告

瘦身廣告

香港娛樂雜誌的內文，
瘦身廣告和八卦新聞的比例，
已差不多去到一比一的比例。
如果加埋化妝、護膚、脫毛、美甲、
靈芝、健身、胸圍、spa的廣告，
剩下的內文就真係所剩無幾。
現在數一數瘦身廣告的十種板斧：

第十位「淨腸暢便，收腩最掂！」
此句針對患有便秘的客人，
香港人飲食唔定時，唔多食菜蔬，
又愛食油炸食物，容易患有便秘。
此廣告一箭雙鵰，
客人既可通便又可減肥，
仲使猶疑？立即買啦！

第九位「豐胸之王，即時升cup」
此句針對某些女士瘦身的動機是為了取悅男士，
而多數男人有祟拜「大胸部」的心理，
女士想要在男士們面前受歡迎，
就要先聲奪人，人未到，胸先到！
身材升cup，身價也升級。
不再自卑，自信心返番哂嚟！

第八位「巨躉追擊手」
繼「股壇追擊手」後，
出現「巨躉追擊手」！
此句針對大屁股的女士，
「追擊手」有專業、準繩、百發百中的意味，
客人願意將自己的「巨躉」交給專家去殲滅！
可見客戶對自己大屁股的深仇大恨，
誓必殺之而後快！

第七位「拜拜肉，即時消失」
「拜拜肉」指手臂下則的贅肉，
「即時消失」有連根拔起的快速節奏！
從此「拜拜肉」與手臂永久分離。
此句重點是「即時」，
客戶不需要再慢慢等，
效率之快令人蠢蠢欲試。

第六位「姿色改變命運」
打動女客戶的字眼是「改變命運」。
那個客戶不想扭轉自己因肥胖而遭冷待的命運？
雖說「知識可以改變命運」，
但讀書要花咁多時間又要考試咁辛苦，
倒不如先行瘦身，用「姿色改變命運」，
嫁得頭好人家後，再搵書讀吓都未遲！　

第五位「全港首創納米療程」
全句重點在於「納米 Nano」，
客戶未必知道納米技術如何能夠運用在減肥療程當中，
但總之覺得「納米新科技」一定好掂！
用咗納米技術後，部ipod薄到張紙咁，
納米技術用落瘦身技術上，一定不得了！
此句hit中愛嘗試新科技的客戶。

第四位「合約保証，唔得減到得，不另收費」
香港講「法治」、尊重合約精神。
簽署瘦身服務合約後，客戶權益受到保障。
一紙保証：「唔瘦減到瘦」，
仲話不另收分毫，
吸引講求實際成績的客戶；
合約中雖然很多法律罅有利於減肥公司，
但客戶仍願意博一博。

第三位「零反彈，效果永久」
客戶最怕減肥後，只要稍一放鬆，便會打回原型！
此句重點在於「零反彈」。
最怕先瘦後肥，反彈後本利歸還，雙重打擊！
如今保證效果永久，一勞永逸！
客戶當然一定會buy。
但撫心自問，有什麼可以保證效果永久？
除了醫生宣佈某病人死亡，他的心臟會才永久唔再跳番！

第二位「無需節食運動」
此句針對怕辛苦的客戶，
想減肥的人士雖有減肥的意欲，
但他們要面對節食和做運動等program，咁辛苦！
往往3分鐘熱度過後，便輕言放棄；
此句話「無需節食運動」
仲唔引來大批意志薄弱的客戶？
最好瞓完一覺，醒來瘦哂就最理想！

第一位「食1粒，瘦8點」
「瘦8點」的8點指：肚腩、厚背、肥腰、
pat pat、大骴、甲組腳、拜拜肉、雙下巴，
食1粒藥丸便可瘦齊以上8個位置，
每個位置都是肥胖女士的弱點和禁忌。
最緊要的selling point是該藥丸能夠「定點瘦」，
只會鎖定以上8處體位消脂，而唔會減到個胸部。
當8點相繼消瘦後，胸部自自然會脫穎而出！
咁著數嘅神丹，真係百年難得，可遇而不可求！

不同手法的瘦身廣告，
都會hit中唔同需要的讀者，
其實核心價值就是：「以最少時間金錢、付出最少的努力、
受到最少的痛苦、以最安全、最快捷、最穩陣的方法得到最大、 最恆久的驚人顯著效果！」

同場收錄：
問：何謂「十肉」？
答：鬼祟肉、下巴贅肉、肚皮浮肉、
小腹腩肉、腰則肉、拜拜肉、
call機肉、燈皮紋股肉、水腫肉、象腿肉。

完