人老啦！

人老啦！

我自覺得年紀大了，
行兩行就想搵張櫈坐吓，
近近哋就唔想行路想搭的士。
如果你出現以下十種情況，
你好可能跟我一樣，
不知不覺已經老了，唔到你唔認！

第十位：被人詢問意見
當朋友或晚輩遇上疑難，都會嚟問吓你意見。
證明你已經成功素塑造出「食鹽多過你食米」的老叔父形象，
如果女孩子問妳關於為何愛情上總是進退失據？
意味着妳已經攀上【姊妹雜誌】中「南宮夫人」的寶座。

第九位：唔使做濕碎差事
當無人再叫你去「銀行入數、買六合彩」、
「影印或碎紙」、「寄DHL、攞掛號信」等差事，
證明在你的工作圈子內，有更年輕的「後生」出現，
並擔任了這些瑣碎雜務，取代了你以前做「靚」的地位！
從此被剝奪「借做瑣事開小差」的權利。

第八位：無人叫你幫手搬重嘢
年輕力壯是後生仔的技能專長之一，
以前同事朋友一有重嘢要搬，就立即想搵你幫手！
但年事漸大，擔心搬唔起之餘，仲驚弄傷筋骨仲手尾長。
從此搬冷氣機、雪櫃、衣櫃等重任便要交捧給胸肌40吋的新晉。

第七位：喜歡講：「我記得嗰陣…」
集體回憶唔係唔講得，不過如果整天嘴巴掛着集體回憶，
就洩漏了你辛辛苦苦遮掩的真實年齡。
人大了就喜歡回味以前的老好日子，
「我記得嗰陣喺迴音閣租黑膠碟，錄落卡式帶。」、
「我記得嗰陣每期必買【玉郎漫畫】睇。」

第六位：唔介意帶雨傘
後生仔貪瀟灑唔愛帶雨傘，
大雨中渾身淋濕是一場浪漫祭典，
就算冷病，只要瞓一覺便無礙。
年紀大就付不起這個代價，太矖或雨天都願跟傘相依為命！

第五位：衣著色彩繽紛
後生仔想扮成熟，衣著方面愛穿黑沉色系，
山本耀司加undercover，黑白藍灰。
年紀大了則愛穿彩虹旗，直攣皆宜，
Colour 18、Papaya、Benetton 成功攻陷中年市場。

第四位：感覺家人重要
年輕反叛時期愛擺脫家人，只想跟豬朋狗友一起消磨，
年紀大了，千帆過盡，總需停泊在一個避風塘。
重新發現屋企人的重要性，
當有一天你想把生日留給跟家人一起慶祝時，
相信你已踏入人生另一頁。

第三位：鍾意飲熱嘢
小朋友一支支冰凍汽水往肚裡灌。
人大了終於知道涷飲對身體有害無益，
改飲熱嘢，連熱茶也嫌它太刺激，驚成晚失眠，
滋補湯水更成為防衰老的甘露。

第二位：去大人嗰枱食飯
當人多一起吃飯時，要分兩檯，自然分大人一檯和年輕人一檯，
當你有一天坐在年輕人檯時感到無形壓力，
同枱人用眼神望着自己，示意「喂！過返去啦老嘢！」
只好死死地氣返回大人檯，
就知道並不是每個人都有本事學謝賢，70歲仍然拖着17歲美少女上街去。

第一位：後生仔食多啲！
從前當你是朋友群中最後生的一個，
你的特權和義務就是把枱上吃剩的食物逐一放入口腔。
同枱的人話：「後生仔食多啲！唔使驚，做多兩吓運動就消化咗啦！」
當有一天，大家把吃剩的食物推到同桌的另一個年輕人面前，
你就會又愛又恨地質疑為什麼那堆食物從今天起便見異思遷地變節了！

* * * * * * * * *

點呀？中咗幾多項呀？
吓？無呀！一項都無？
係無呀？定係唔記得呀？
年紀大的其中一項特徵是：「呢頭睇完，果頭已經唔記得喎」！

完