紀漢醇 - 04 - 旺角機神

紀漢醇 - 第四節 - 旺角機神

Gay man既俏皮又淫邪地斜眼問紀漢醇：「你收實幾多錢吖？計平啲呀！」
紀漢醇連眼珠都突了出來，吓？你當我係鴨呀？！
心裡極度震驚！原來跟自己一直在網上談「性事」的對手，
竟然是一個gay man！

紀漢醇接受不了這個殘酷的事實，只想立即消失於戲院大堂內；
當紀漢醇想轉身走人之際，襯衣衫尾已給gay man扯住。
Gay man：「喂！你約人出嚟，做乜粒聲唔出就走？」
Gay man又尖又姣的聲線和說話內容，引起大堂內旁人的側目！
紀漢醇：「黐線！你認錯人啦！」
Gay man：「Handsome guy；我無搞錯呀！」
紀漢醇不想再跟gay man糾纏，一手甩掉他的手，發足狂奔！
剩下gay man在大堂內捶胸頓足，不依地大叫：「喂呀！喂呀…激死人啦！喂呀…」
Angela當然目睹這一幕男男驚心糾纏，心想：「咦？嗰個男人咪係公司電腦部嘅…」

紀漢醇逃離戲院，到達安全地方後call大嚿，報告剛才的驚險遭遇，
大嚿在電話旁笑到碌地！仲幸災樂禍：「等你仲話好想溝佢！哈哈哈~~」
紀漢醇亦覺瘀到爆，大嘆運滯！
紀漢醇獨自於旺角街頭遊蕩，需要散吓心，才可平服心情回家。
他10:30回家時，發覺淑芳仍未回來，
開電腦見到雅典娜off line，心想應否delete此聯絡人？
但如果一時搞錯，Angela才是雅典娜，
咁咪會誤手殺錯良民？

第二朝10:45分，紀漢醇辦公室的電腦傳來呼喚聲，
是雅典娜says hi！紀漢醇腦內的「恐懼同性戀情意結」又發作，
唔知答好定唔答好？他連忙按下MSN的「繁忙狀態」，問大嚿點算好？
大嚿在旁見狀，安慰他說：「可能咁啱得咁橋，阿gay man認錯人啫！」
紀漢醇：「認錯？佢知道我嘅花名叫Handsome guy喎！」
大嚿：「大佬呀！基佬撩仔，逢仔都叫佢做Handsome guy啦，有乜出奇啫？」
紀漢醇：「咦！又好似幾有道理喎！等我……試吓佢先！」
紀漢醇馬上回覆雅典娜：

韓信says：
sorry！i don’t show up last night！

雅典娜says：
我正想問你為何不應約？我看完整套戲你也沒有出現！

韓信says：
Sorry！something urgent happen to my dad, that’s why I can't come last night！

雅典娜says：
沒所謂！他又食物中毒嗎？已經無恙嗎？

韓信says：
Thank you！he’s fine！BTW, do you like 吳彥祖？金城武？Brad Pitt？Jude Law？

雅典娜says：
OK啦！但唔算係忠實fans！

韓信says：
how about林憶蓮？黃耀明？林一峰？George Michael？Village People？

雅典娜says：
一般啦！做乜咁問？

紀漢醇鼓起勇氣，斬釘截鐵直接問：「are you a man？」
雅典娜聽後，MSN回覆：「哈哈哈哈哈哈！真好笑！」
紀漢醇問雅典娜可否能夠證明她自己是女性？
紀漢醇發問後也覺得自己很傻！
在虛擬的網上世界，如何能夠拿出證據去證實自己的真正性別？身份？
雅典娜回覆：「我是女性，相信與否，悉隨尊便。」

紀漢醇見到雅典娜好像有點怒意，又想起大嚿剛才的睇法，
如果雅典娜真是一名靚女，或者是Angela，咁咪自己扼殺咗一個黃金機會？
紀漢醇有時睇完飲食雜誌介紹，慕名去幫趁某間出名餐廳，發覺原來唔係咁好味，
紀漢醇都唔會一次過判佢死罪，會再給該餐廳second chance，
如果下次都係咁難食，先會列佢入黑名單，永不幫趁！
紀漢醇決定再次給雅典娜多一個機會。

紀漢醇開始主觀地相信：昨夜的gay man只是純粹巧合白撞點錯相！
紀漢醇馬上向雅典娜為昨夜爽約而道歉，相約下次再見面，
雅典娜同意再約吧，隨後off-line。

Lunch時，紀漢醇一邊吃飯，一邊思考Angela會否是雅典娜呢？
如果係都唔錯，因為Angela也算樣貌娟好，小家壁玉！
下午回到辦公室，紀漢醇久唔久就行去pantry洗杯酙水，
希望製造巧遇到Angela的機會，因為走到她部門見她是一件十分刻意突兀的事情。

皇天不負有心人，他終於在當天下午4:45在pantry遇上Angela，
碰巧蒸餾水機無哂水，紀漢醇自動請纓，展起手瓜，替Angela更換蒸餾水；
Angela多謝紀漢醇的幫忙後，紀漢醇見機打蛇隨棍上，
在pantry中，兩人一邊沖咖啡，一邊打開話題吹吓水。

Angela說自己公司部電腦呢排行得好慢，都想叫人睇吓，
紀漢醇好熱心話：「妳放心，我除咗叫做Handsome guy外，我又號稱『旺角機神』，所有電腦我都救得番！等我而家去幫妳check吓！」
Angela當然求之不得啦！
兩人一起回到Angela的座位，

紀漢醇坐下，一邊check電腦，一邊不經意咁問：「呀！妳有冇睇過《咖啡杯邊的唇印》呢套戲呀？」
Angela：「啱啱噚晚睇咗！幾好睇吖！有幾幕都幾感人架！」
紀漢醇心想昨夜百老匯電影中心有六套戲同意上映，
Angela揀咗《咖啡杯邊的唇印》，她是雅典娜的機會又提高了。
紀漢醇：「妳同邊個睇呀？」
Angela：「自己睇咋！」
嘩！紀漢醇有進一步証證據相信Angela是雅典娜了！
Angela：「不過我想問…」
紀漢醇：「妳即管問吖！」
Angela欲言又止：「你…係咪…gay架？」

很明顯，Angela指的是昨夜戲院大堂內的一幕男男拉扯，
紀漢醇口疾疾未知如何回答是好之際，兩人背後傳來一把女尖聲：「吓？！」

原來在他們背後，早已站著一位女同事阿Ling，剛巧路經駐足偷聽，
阿Ling是全公司數一數二最八卦無聊嗰位諸事精，
阿Ling張到嘴巴成O型：「吓？乜阿Handsome哥…原來你係…你係…」




次回《48吋的胸肌》6月13日星期五2345