紀漢醇 - 06 - 蛇蠍美人

紀漢醇 - 第六節 - 蛇蠍美人

阿Bill沙煲咁大嘅拳頭，朝向紀漢醇的心口，打摏機咁揼落去，
力度強勁的重重一搥，實而不華咁窩落紀漢醇的胸膛，
紀漢醇的五臟六腑立即來過大翻騰，慘叫一聲！
掩着心口應聲倒下，痛得死去活來！
旺角途人見到有戲睇，火速圍觀，立即將街頭變成「跳蚤擂台」。
阿Bill得勢不饒人，舉起第二拳朝紀漢醇的面部揮下！
Angela大叫：「停手呀！黐咗線呀你！」
阿Bill聽到Angela的求情，更加怒火沖燒！
加重力度的第二拳勢不可止！

當阿Bill嘅拳頭和紀漢醇面部剩下半吋距離之時，拳頭去勢突然停止了！
原來另一位健身教練出手，拉住阿Bill的拳頭，並說：「打夠啦！有差佬嚟緊！」
Angela叫：「阿醇！你走先呀！阿Bill，你聽我講吖……」
倒在地上的紀漢醇，連忙爬起，轉身逃跑！
在旁圍觀的途人見咁快就KO打完散場，大呼無癮唔夠喉！徐徐散開。

紀漢醇逃到安全地方後才敢停下來，拉高T-Shirt 檢查傷勢，
心口瘀黑了一片，隱隱作痛！大嘆倒楣！
急call大嚿，大嚿提議他立即回到安全地方，今夜運氣唔好噃！
紀漢醇也想取消跟雅典娜的9時約會，但因為沒有辦法通知她，
只好帶傷去尖沙咀赴約。

Angela拖着阿Bill去另一間餐廳，坐低慢慢解釋，
容易衝動的阿Bill聽Angela解畫後，慢慢平靜下來，兩人冰釋前嫌。
其實這一幕是Angela一手策劃，精心舖排而成！
Angela和阿Bill拍拖一年後，阿Bill開始對Angela若即若離，唔嗲唔吊，
例如阿Bill只喜歡睇荷里活式的飛車爆炸動作電影，
當Angela叫阿Bill陪自己睇文藝電影《咖啡杯邊的唇印》時，
阿Bill眼也不望一眼，只冷冷淡淡一句：「吓！嗰套《咖啡杯邊的唇印》？妳想悶死我呀！？無興趣呀！如果係《毒蛇．Turbo．逼擊炮》我就睇！」搞到Angela極度無癮，要自己孤伶伶一個人去睇《咖啡杯邊的唇印》。
Angela打算求求其其揾個男仔嚟激吓阿Bill，
讓阿Bill產生醋意，繼而對自己會著緊返啲！

結果，昨天下午，當紀漢醇在pantry撩Angela傾計時，
Angela順水推舟，搵紀漢醇過橋。
買電腦只是「藉口」，引紀漢醇到旺角才是「目的」，
因為阿Bill任職教練的鏈鎖式健身院位於旺角。
點解Angela揀8點鐘到達那間旺角餐廳？
因為Angela知道阿Bill當天輪班時間表，晚上十一時才下班。
而公司編排了阿Bill於晚上7點放dinner，
懶得諗去邊度吃飯的阿Bill，習慣了晚晚都會幫襯那間餐廳。
所以Angela選擇阿Bill差不多吃完飯的時候，
在餐廳門前跟紀漢醇打情駡俏，等阿Bill出嚟見到，刺激吓阿Bill。

Angela知道火爆的阿Bill一定會出手教訓紀漢醇！
Angela覺得紀漢醇對自己色迷迷，不懷好意。
這樣做一石二鳥，一來可以教訓一吓紀漢醇呢名鹹濕佬，
二來可以爭取到阿Bill再次對自己緊張，
一舉兩得！Angela何樂而不為呢？
可憐的紀漢醇，不知道自己慘遭「蛇蠍美人Angela」利用，
他正撫着傷痛的胸口，趕去尖沙咀漢口道見雅典娜。

受過教訓的紀漢醇，驚俾人再次點錯相，
在途中想出一個方法保護自己：就是躲在Starbucks的對面街，
留意進入Starbucks的每一個顧客，
如果係靚女就立即行動，上前相認，　
如果係醜女或男人就馬上走人，回家塗跌打酒療傷。

紀漢醇於8:55分抵達漢口道的Starbucks，
他身穿紅色捷古華拉T恤，雅典娜則穿橙色猿人Tee作記認。
紀漢醇躲在Starbucks對面馬路停泊的一部七人van之後，
留意每一個進出的客人和尋找橙色猿人Tee。
曾經有一名40餘歲「麻甩佬」穿橙色T-shirt路過，
幸而他的T-shirt牌子是Baleno，他也沒有步入Starbucks，紀漢醇才鬆一口氣。
雖然這名「Baleno麻甩佬」咁啱路過，但他的衣著已教紀漢醇的腎上腺急升！

終於喺9:05分，目標人物，千呼萬喚終出來！
一名20多歲的女子，穿著橙色猿人Tee步入Starbucks，
但由於晚間光線不足，加上她戴上cap帽，紀漢醇只能夠離遠看到她輪廓。
紀漢醇心裡很高興，因為起馬確定了雅典娜是一名後生女，而非痴肥婦人或甩髮基佬。
當目標人物在店內找尋位置時，
她終於扭轉身，臉龐正面朝向店外的紀漢醇。
咦？佢個樣咁熟嘅！？
Oh my God！目標人物竟然是Lydia！
雅典娜竟然是Lydia？！
雅典娜竟然是淑芳的閨中密友Lydia？

嚇得紀漢醇馬上從袋中取出黑色風褸，急急穿上，
並把風褸的拉鍊拉上至頸喉位置，
將紅色捷古華拉T-shirt全面封鎖。
轉身朝廣東道方向極速逃走！

紀漢醇見到街口前面有一部的士，毫不猶豫就跳上的士趕回家，
他今夜先俾人打，再知道雅典娜是Lydia；
坐在的士裏，一時間無法整理腦裡混亂的思緒。
只想快些回家，回到一個安全的地方！

他扭鎖匙打開大門，大廳已經亮了燈，淑芳早已回到家中。
她坐在廳中的沙化上，神情凝重，
她劈頭第一句，帶有質問的語氣：「阿醇，你今晚去咗邊？」
紀漢醇強扮鎮靜：「咪同阿祖去睇電腦囉。」
淑芳厲了他一眼：「哼！你講大話！」

吓！唔通Lydia剛才已經昅到自己，
並且將事情經過一五一十咁講哂俾淑芳知？
紀漢醇心裡冒出冷汗，
淑芳再嚴厲追問：「你好講啦……」




次回《霹靂壯陽針》6月19日星期四2345