~~~~~~~~~~~~~~~~







2014年11月19日 星期三

侍應生


侍應生

香港叫Waiter做「侍應生」,大陸則叫做「服務員」。今次數一數普通餐廳侍應生最經常說的十句說話。

第十位:「我哋今日啲咩好靚好新鮮喎!」
食客在落單時,侍應生落力向食客推銷食店當天的貴價食物,唔理食客衣著如何寒酸,侍應生照搬出推介:「今日我哋啲好靚喎!」、「今日我哋啲北海道和牛好新鮮喎!」食客聽完推介後,不被打動,甚至詐聽唔到,侍應生只有嘴藐藐咁落單,睇唔起食客咁行開。

第九位:「一有卡位我再轉俾你。」
情侶吃飯時希望多一些私人空間,喜歡卡位對坐。但餐廳邊有咁多卡位吖?侍應生帶領食客到普通餐枱坐低後,安撫食客:「一有卡位我立即轉俾你。」有些食客食食吓,怕搬嚟搬去麻煩,便放棄轉卡位的念頭,也有一些死硬派食客唔order住,誓要等到有卡位為止。

第八位:「麻煩邊一位埋咗張單先吖!」
晚間食肆要打洋了,到11時左右,侍應生收哂枱面所有碗碟,拿著一疊帳單,巡迴到各張枱,要求客人埋單,侍應生有禮貌地說:「麻煩邊一位埋咗張單先吖!」務求盡快執收餐桌,可以快啲放工嘛。

第七位:「有無興趣做會員?」
有些具規模的食店或集團連鎖店,都設有會員制度。食客付款成為會員後,享有更多折扣回贈和優惠。埋單時,侍應生問食客:「有無興趣做會員?即時享有折扣喎。」有些精打細算的食客願意入會,有些食客唔會再光顧所以唔打開入會,有些食客雖然join了,但會員卡轉頭便遺失了,或者再光顧時忘記帶會員卡。

第六位:「有啲優惠券送返俾你。」
為了鼓勵「返頭客」,食客在結帳時,侍應生:「有啲優惠券送返俾你。」食客獲送贈優惠券後,當下次光顧時出示,便可享有discount:三人同行二人價錢、送多一碟頭盤、開酒八折、食客於生日月幫襯有生日蛋糕送,啲優惠券塞到個銀包脹卜卜,但通常輪到使用優惠券的時候,才發覺它剛好過了期,變成無效廢紙。

第五位:「Sorry!你叫嘅啱啱賣哂。」
一心諗著去某餐廳吃一道它馳名的菜式,山長水遠去到。落單前,一心諗著:一陣間端上來的色香味美,口水已流。怎料,侍應生抱歉道歉說:「Sorry!你叫嘅啱啱賣哂。」吓?想食的菜式賣哂!心情直插谷底。雖然侍應生問你改叫其他東西,但那份失望,早已令你胃口大減了。

第四位:「我幫你教細啲冷氣。」
香港食肆的冷氣特別強勁,可能希望食客食完後快啲埋單,騰空張枱出嚟。或者希望客人見涷,叫啲熱湯熱飲暖暖身。食客叫侍應生將冷氣調細一點,侍應生:「我幫你教細啲冷氣。」其實侍應生唔會校細冷(可能有食客投訴太焗),不過食客有侍應生應一應,心理上就覺得冷氣真係好似教細咗啲啲咁。

第三位:「甜品送哂啦!」
中式食肆,有一個俗成慣例:食客飯後問侍應生有無糖或水果水送?中國人有平宜唔怕攞。侍應生笑著道歉:「甜品送哂啦!……不如俾個甜品餐牌你睇吓。」其實食客不是真心想食甜品,只不過如果有糖水唔收錢,唔食又點對著自己呢?

第二位:「等等,我叫人幫你。」
在餐廳內提供服務的侍應生,並非全部都是有經驗的侍應生,有些年資較短的實習生、只負責斟水、出菜、收碟、執枱等輕閒工作。當你找這些實習生落單或問問題時,他們便細細聲說:「等等,我叫人幫你。」轉頭急忙找個senior侍應生,回應客人。

第一位:「應該整緊,我即刻入廚房追!」
食飯點菜,總有一味菜式姍姍來遲,食哂其他餸菜,它都未到。食客追問侍應生:「個餸好耐啦!如果漏單,同我cancel佢!」侍應生搶答:「唔會漏單!應該整緊,我即刻入廚房追!」一入廚房,大嗌:「四號枱爭碟嘢!快手呀!」五分鐘後,侍應生端出一碟:「啱啱炒起,新鮮熱辣,各位趁熱食啦!」侍應生一聽到食客話要cancel order時,才會認真極速處理食客的要求。


二少爺說︰Human League的《Don't you want me》,講一名女侍應飛上枝頭,重新生活。

8 則留言:

  1. 佩服侍应生嘅腕力,一个厚厚嘅瓷碟睇怕有几斤重架?一日来来去去都唔知要捧几多十个百个呢?

    回覆刪除
  2. 第N位:「點呀,今晚D菜好唔好食?」

    回覆刪除
  3. 「先生,可唔可以個半鐘比番張枱我呀?」

    回覆刪除
  4. 卡臣:

    我去過一家當天開張嘅酒樓,叫了六和菜,結果嚟咗三味都喺雞。唔通我地成班友都似鹹蟲?嘻嘻!

    回覆刪除

LinkWithin

Blog Widget by LinkWithin