~~~~~~~~~~~~~~~~







2014年10月17日 星期五

找得著藉口


找得著藉口

當人做了壞事或不道德的事情後,遭人揭發或良心發現時,便會啟動腦部的防衛機制,找來一些老生常談來替自己的行為辯護、使惡行正常化、合理化,淡化自己罪行的嚴重性。
現在數吓邊十句「老生常談」最多人掛在嘴邊,用嚟解脫自己的惡行。

第十位:「一醉解千愁」
好杯中之物的者,日日飲到酩酊大醉。朋友勸佢唔好再飲酒,對身體對個肝都唔好。佢會自辯呢排好煩惱,需要「一醉解千愁」,只有酒精才可以舒緩壓力。所以「飲酒有理」、是有必要性。又或者說「酒逢知己千杯少」,難得遇到好朋友喎,先自隊兩杯再講啦。

第九位:「有賭未為輸」
病態賭徒的格言:「有賭未為輸」,如果離場唔賭或者從此戒賭的話,那麼之前輸了的錢便無仇報、無得追返轉頭。只要賭仔一日在世,一日仍有希望贏錢收復失地,香港賽馬會的廣告話:「運氣話嚟就嚟!」賭仔就是有這種積極進取性格,任人點潑佢冷水佢都唔會聽入耳。

第八位:「人不風流枉少年」
靚仔靚女們留連夜場,廣泛結交異性或同性,天天換伴。上一代稱之為「風流」、現代冠以「溝女王」、「溝仔王」之稱,沉迷男女歡好之徒遭人詬病時,好色之輩自辯:「人不風流枉少年」,後生唔玩?難道要等到風蠋殘年、手騰腳震、有心無力的時候,先去學人去溝仔溝女咩?有得玩就趁後生。

第七位:「有風梗要駛盡
有人一朝得志,意氣風發,目中無人。當紅的時候持勢凌人,是部分香港人的核心價值。被人批評「得戚」的時候,他會辯稱:「有風梗要駛盡」,在條件最優越的時候,唔瞓身去到最盡,有幾多攞幾多。唔通等到「兜踎」時,才發圍咩?所以機會主義者信奉「時勢造英雄」,「有風就當然要駛盡」。

第六位:「地上執到寶 問天問地攞唔到」
人之貪念一起,見到他人財物跌在地上,拾而不報,據為己有。但遭人發現後,自己辯護說:「地上執到寶 問天問地攞唔到」,十分無賴。這一句「地上執到寶」通常出自小朋友口中,成年人說這句的話,就較為骨痺和難為情,(年老拾荒者是逼不得已)。

第五位:「槍打出頭鳥」
儒家的「中庸之道」深遠地影響中國人思想,做人切忌鋒芒太露、招惹是非。在香港做「叻人」的路很困難,太高調會惹來妒忌,給人群起針對或整蠱。所以有些又懶又消極的人,被人批評不思進取時,就會自辯「槍打出頭鳥」、「人怕出名 豬怕肥」,大條道理不能太拼搏和自我表現突出,否則會招人嫉妒和迫害。

第四位:「無毒不丈夫」
某些男人做事心狠手辣,麻木不仁。被人指為惡毒、殘忍、暴戾、陰險、禽獸不如,尤其是指責那些「冷血殺人犯」。這個時候,佢會聲大夾惡搬出一句:「無毒不丈夫」。做得大丈夫,就要狠!要狼!要毒!呢句跟「蛇蠍皆不毒,最毒婦人心」有異曲同工之妙。

第三位:「事不關己 己不勞心」
除了天災人禍的籌款行動能籌募得巨款之外,某些香港人對身邊陌生人漠不關心,唔會主動幫助別人、讓座給予有需要人士。問到點解唔願意幫人?他們的理由是:「事不關己 己不勞心」!三唔識七,又無著數攞,我做乜要幫你呀?「各家自掃門前雪」、「不在其位 不謀其事」的心理,仍然根深柢固。

第二位:「有仇不報非君子」
記憶力好的人通常好記仇,你得罪過我,無論過咗幾耐,我一定要找會機報仇。「你做初一 我做十五」,有仇必報。問佢點解唔可以「以德報怨 化解仇恨」、「冤冤相報何時了」?他的理由就是「有仇不報非君子」、「君子報仇 十年未晚」。如果男士想做謙謙君子,就要記得報仇啦。

第一位:「人不為己 天誅地滅」
人唔多唔少都有自私的念頭,只是程度上的多與寡。為自己打算、為自己利益而犧牲別人。指責一個自私自利到出哂面的人,他拿出的擋箭牌就是:「人不為己 天誅地滅」。原來不懂先為自己著想和打算的人,係會遭天譴架!咁就要快啲同自己爭取多啲好處,不埋其他人死活;靠自私自利嚟保著自己條命仔啦。



二少爺說︰香港人善於辯駁,乜事都多多藉口。


8 則留言:

  1. 卡臣:

    仲有一句:食得唔好哂呀!嘻嘻!

    回覆刪除
    回覆
    1. 美女在床,食咗先講。d人改自當年嘅tbb綜藝節目「美女廚房」 :)

      刪除
  2. 葉振堂,好歌喉!《浴血太平山》尼套几十年前嘅电视剧,几时都胜过而加拍个d 啦!

    回覆刪除

LinkWithin

Blog Widget by LinkWithin