~~~~~~~~~~~~~~~~







2013年9月27日 星期五

印象落差

多謝desertfox送我相片

印象落差


Stereotype某一類型人士給予別人的一種集體表面印象,例如︰高收入專業人士放工後,愛到蒲蘭桂芳happy hour、成功男士必愛玩名錶、golf、紅酒、跑車,富太愛high teashoppingspa、買衫去ball等。可能係啱、可能係錯、可能係啱與錯之間。以下是十個普遍落差的印象:

第十位:十個賭徒九個抽煙
賭徒長期處於緊張搏殺的狀態中,需要用抽煙來鎮靜神經、分散注意力。麻雀館、賭場、投注站外、都見賭民擔住口煙。隨着賭徒口中唸唸有詞,煙蒂在跌與未跌之間,輕輕擺動。
實際上,有些賭徒已戒煙。因為賭徒輸清光,如果有錢,都寧願攞落注,而唔攞買煙。

第九位:影痴睇戲多數獨來獨往
做得影痴梗係要「型」要「chok」咁去欣賞高深的藝術電影。向電影大師朝聖時,切忌跟朋友喋喋不休。所以絕對自我的影痴們,愛獨來獨往,從不需要人陪睇戲。
實際上,影痴都想在戲院大堂遇上認識的朋友,互相交換一個眼神,惺惺相惜,眼神示意:彼此都是識貨之人,懂得欣賞這套深奧的大師經典戲寶。

第八位:返大陸長駐工作的男士多數有小三
男港客在大陸長駐工作,特別係好耐先返香港一次嗰啲。在普遍印象中,認為十個男港客九個喺深圳有二奶,生埋幾個私生子。
實際上,香港經濟衰退後,此消彼長,港客變港燦,未必個個男士再有經濟能力養二奶。再加上二奶生育嘅小孩有要幫手撲奶粉,好多有手尾要跟。令男士放棄包固定二奶,改玩嫖妓算啦。

第七位:專業人士多數獨居
專業人士收入豐厚,有經濟能力租買物業自住。他們在自己的私人空間內享受高質素的yuppies生活。由於獨居,方便帶不同的異性(或同性)回家渡宿。
實際上,部份專業人士風光不再,失業減薪,或把熱錢押在股票市場上進退失據,故未能於獨居中吹saxophone或細味陳年紅酒。

第六位:男同性戀者多數愛健身
男同性戀者的身體,就是他們受歡迎的指標和工具,越大隻越有粗壯線條,在圈中就越吃得開。所以他們愛健身。
實際上,很多直佬都愛健身。另外,有說男同性戀者多數愛聽林憶蓮、黃耀明、關淑怡的歌,實際上,很多直佬都直認愛聽林憶蓮、黃耀明、關淑怡。也有為數不少的直佬:既愛一邊聽林憶蓮、黃耀明、關淑怡的歌、一邊做健身。

第五位:Designer多數著黑色衫褲
設計師如何能給予客戶良好的第一印象和建立信心呢?就是穿黑色衫褲,手持ipad,再配上黑色粗框眼鏡,講嘢玄之又玄,一半中文撈一半英文,就可以扮成一個出色的Designer
實際上,我識啲Designers有部分係all black,亦有啲著得好colourful。穿all blackDesigners話佢啲黑色都分唔同層次虛實冷暖,係啲人唔識分啫。

第四位:靚女多數高竇
在學校、公司、社會、總之有人嘅地方,擁有天賦本錢的靚女,她們行的路會較醜女的路,來得平坦寬闊容易。靚女由於追求者眾,靚女可以選擇具有較好條件的男士作男友。所以培養到靚女們眼角高,無錢無權者,唔該彈開。
實際上,也有些靚女,沒有追求者,並非因為她們性格高竇,而是因為她們實在太靚,男士們估自己只有吃檸檬的份兒,所以先打定退堂鼓。讓單身靚女喺佳節時,留在家中無人約。

第三位:清潔阿嬸多數八卦
Office內的清潔阿嬸可以穿梭通行整個辦公室,由廁所、pantry、影印房、會議室到老細房,對各人恩怨瓜葛都瞭如指掌。結果阿嬸聽埋聽埋唔少路邊社消息。
實際上,Office內最八卦的可能是老闆秘書或receptionist,清潔阿嬸聽的只是表面嘢,而秘書和接待員受過專業訓練,定期給老闆打各同事的小報告,或於女廁內聯誼,講是非當作人情。

第二位:洋化Model多數性關係隨便
年輕的外籍混血或本地model,都慣了出show時在後台隨便當眾脫衣換衫,培養成她們減輕對身體的禁忌,加上model年輕貌美又愛蒲,被八卦雜誌炒作新聞,男讀者的主觀聯想,Model給人性關係隨便的印象。
實際上,有些model思想好保守好傳統。至少我所認識的model都是,唉~~~

第一位:老闆多數心情差及愛鬧人
老闆憂心盤生意做唔好,要養起成間公司的員工,承受沉重精神壓力,所以心情點會好?仲要黑起塊面,與員工保持權力距離。又要經常鬧人,否則員工唔驚你就難駕馭下屬。鬧得有咁金得咁金,員工先唔會重複犯錯。老闆出得糧俾你,員工就預咗要俾老闆鬧。老闆太和善就無人會聽佢支笛,老細款係要適當地擺吓。
實際上呢…..老闆都係逼不得已先鬧伙計,鬧伙計時,可能老闆係真嬲,也可能老闆交戲扮嬲。你估老闆好想死咁多腦細胞咩?鬧人傷自己身體架嘛!


二少爺說︰第一印象決定了老闆請唔請你。

16 則留言:

  1. 聽講話靚仔多數無本心...應該都唔係呀>.<!

    回覆刪除
  2. 第六位,你講緊你自己?

    嘻嘻,咁啱我都係聽佢地喎 ^_^

    回覆刪除
  3. 你的第六位真係金石良言. 有次去林憶蓮演唱會, 以為走錯咗入去gay party呀撞鬼!

    回覆刪除
  4. 回覆
    1. 有我都自己要咗先啦,執二攤你mind唔mind?

      刪除
    2. 都冇咩所謂嘅,你揀得嘅嘢,質素一定有保證喇,一於過戶畀我喇。 :)

      刪除
  5. 卡臣:

    西方的賭場都是禁煙的,沒有澳門的賭場那樣,成個毒龍谷咁.

    回覆刪除
  6. 即係天兔係超強颱風,一定要係超巿掃定貨以備不時之需,點知冇錯佢係好強,係行斜咗少少啫。

    回覆刪除
  7. 對呀,以前打風好勁,這是我童年的印象

    回覆刪除

LinkWithin

Blog Widget by LinkWithin