~~~~~~~~~~~~~~~~







2011年5月4日 星期三

naruto × 卡臣:《點解阿鳳係阿鳳?》


naruto × 卡臣:《點解阿鳳係阿鳳?》

我叫阿龍,做裝修工程。我有個表妹叫阿鳳,佢亦都係我女朋友。大家由細玩到大,而現仲拍埋拖添,親上加親。佢唔鐘意人哋叫佢做阿鳳,所以我通常叫佢英文名「Angela」。

今朝起身,我抽著兩罐漆油,搭巴士去「山卡嘞」咁偏遠地方開工。我坐喺巴士度,見到前面椅背被人塗鴉寫咗啲細字,我好奇望吓佢寫乜:「世上靚女多羅羅,無個肯做我老婆…67534013」哦!原來係搵「囡囡」嘅電話,哼,我做得裝修呢一行,一早已經被同事帶壞,有叫雞嘅習慣,不如打去問吓價錢,睇吓抵唔抵玩?

 
我打通咗電話,對方一把女聲:「喂~哥哥仔,搵囡囡呀?」我一聽把女聲,立即扯火!佢係Angela!我大喝:「妳係Angela!」對方立即嚇到cut線。我立即打俾Angela,電話熄咗,十成作賊心虛!背著我去「援交」?我要話俾Angela嘅媽媽知道,即係去搵我姨媽。 


我姨媽在佐敦西貢街開了間「華麗改衣專門店」,專幫人改衫。我趕到來門口,頂!未開舖!十點鐘都未開舖,乜姨媽咁鬼懶架!唔通個天唔想我話俾Angela父母知?好!我就偏要講!我去搵姨丈囉。


姨丈喺佐敦官涌市政街市賣魚,個魚檔叫「大姨丈海味」。見到佢開舖喎,好!一於講俾姨丈知佢個女做援交妹咁唔自愛先。吓!個伙計話姨丈唔喺魚檔,去咗幫人剪頭髮!又咁蹺!打聽之下,去駿發花園搵姨丈先。


我姨丈表面上是賣魚佬,實際上佢係一個髮型師。佢最大興趣是替人理髮,所以時時放低魚檔去剪髮。佢替人理髮要by appointment。離遠見到姨丈啦,頂!前面成個花槽阻著,咁點呀?踩上去又驚罰錢喎,唯有兜個大圈啦。抽著兩罐油,咪話唔索氣呀!


見到姨丈忘情咁同佢個客人剪緊。佢哋一路剪一路想當年,我走埋去聽到佢哋講緊「日本仔打中國」。我跟姨丈打個招呼,正想開口之際,姨丈先問:「阿龍,俾你張咭片我,有街坊想搵人裝修,我介紹你俾佢。」有生意喎,我立即打開銀包,取出一張咭片遞給姨丈。我見到他有客人在場,當著第三者面前講表妹的醜事始終唔恰當,我收返我的說話:「姨丈,搵日我再講,我走先。」


唔同姨丈講,都係同姨媽講好啲,趕返去「華麗改衣專門店」。哼,終於開咗舖。籮柚大嗰位咪係我姨媽囉,我拉姨媽到一面細細聲講,佢聽後大發雷霆:「咪亂講!你點知呀!」吓!唔通我答:我打電話叫雞撞到正係表妹咩?!我立即淆底收聲,轉身走人。又係嘅,媽媽怎能接受女兒做援交,所以用鬧人嚟掩飾心虛。


我心情複雜,行經佐敦新填地街時,見到一堵牆,是上年聖誕節前夕,我半夜送Angela回家時,一起在牆上塗鴉。
她寫:「乖女Angela到此一遊 24/12/10」,
我寫:「阿龍愛Angela,24/12/10」。
怎料Angela中文程度差,把「乖女」寫成「剩女」。我沒有指正她,免得Angela自卑唔開心啦。

而家我睇到啲字,好眼冤,好彩我手上有兩罐油,用油把牆上文字蓋過,寫上「情若無花不結果」,好型呀我自己。好啦!我宣佈跟阿鳳分手!點解阿鳳係阿鳳?

電話突然響起,是姨丈打來,叫我立即去駿發花園,究竟發生乜嘢事呢?
 
見到姨丈仍然同剛才那個客人剪緊髮。我走埋去聽到佢哋講到「簽署中英聯合聲明」。姨丈說我剛才攞咭片時,不慎掉了自己的身分證也不知道,所以叫我回來取回身分證。
我講了聲唔該之後,說:「姨丈,我有個客做飲食,佢想問人攞魚,不如你call去睇吓。」姨丈說聲:「多謝關照喎。」我遞上一張寫上67534013的紙條給姨丈後,好有型咁轉身離開,我跟阿鳳的一切,都完結了。今天無心情開工喇,一於去砵蘭街散吓心啦


後記:

多謝naruto跟我一起cross over。naruto的豐富幽默感和高超攝影技巧,是我欣賞的一位designer/photographer/blogger。可以一起玩,真是與有榮焉。下次再玩過啦!
 
分手 - 張國榮
作曲︰黎小田
作詞︰黎彼得

不要問人點解分手 也許雙方巳睇透
世事難望永久 悔恨難補救
且將憂慮 也將憂愁送走
心碎後人應該分手 帶走悲哀與咀咒
往事無論美醜 過後無追究
不必失落自疚
仇和怨 心中不再有
情場裡我好比小丑
埋藏我的淚 我的笑
平復我內心的戰抖 啊
灑脫地 無聲的分手
放開心鎖裡的扣
盼以後夏與秋 每念情深厚
始終不忘舊友
啊 能否仍然成密友

26 則留言:

  1. 感覺好得意,無諗過你可以將幾組相拆開再重組嚟用,九唔搭八嘅相,你都可以串得埋一個故仔,真係辛苦哂:)

    回覆刪除
  2. 卡臣,你係得嘅!咁都比你諗到。今次油(尖)旺,下次不如去離島啦。

    回覆刪除
  3. 我都想Cross,然後至Over呀!

    * * * * *

    我去到砵蘭街,見到隻雞,佢叫做阿毛,講惦價,就上樓。

    去到單位,阿毛同我講,佢今日大姨媽到,唔可以接客,怕邪襯D男賓,因為佢做既係社會企業,要用良心黎賺錢。佢呢幾日做緊馬伕,叫我入個單位,裡面有隻仲正斗既!

    我入到去,至知原來係阿鳳,佢好驚訝咁叫我表哥,我地跟著眼甘甘咁望住對方,阿毛眉精眼企,即刻講,咁就收八折喇!當熟客坐的士咁喇!

    我同阿鳳做完之後,我問阿鳳,點解以前唔知佢係床上會咁姣既?阿鳳話,開食肆做生意,緊係落多D鹽花,等客人覺得好味,再翻黎幫襯囉!

    阿鳳話從來唔知我咁勁!我答佢,出街食飯,緊係食到盡,比錢架喎!D飯菜又唔可以留第二日再食架嘛!

    靜靜雞話比你地知呀!我第一次叫雞,有八折,仲送埋香吻添呀!阿鳳話,呢D叫甜品,私人整既!

    從此之後,我就係阿鳳既客仔,佢對我仲溫柔過以前幾百倍呀!鬧都無鬧過我呀!幾好呀!

    回覆刪除
  4. 哈哈~利害呀!

    要用幾多時間寫呢?

    回覆刪除
  5. 佛爺,不如咁!你又用返呢啲相,同一次序,寫返個勵志嘅故仔,比啲年青會考生吖!

    回覆刪除
  6. naruto

    Crossover 玩得開心呀,下次再玩過

    +++

    樂樂

    下次玩「三門仔」添呀

    ++++

    追夢者

    謝~~

    +++

    佛爺

    你寫的故事,果然有你風格

    +++

    I.minor

    構思咗一晚架
    寫就用咗一小時

    +++

    樂樂

    改做勵志嘅故仔?
    good idea呀

    回覆刪除
  7. 卡臣同鳴門火影一樣咁勁,有啲咁嘅相,又諗得出咁嘅故事,仲係一小時寫成,效率奇高!

    我以為『世上令女多羅羅,冇個很做我老婆』,係寫嚟揾女朋友𠻹。照字面睇,寫嗰位似乎係外省人。其餘寫嘅係乜,睇得唔清楚。

    你哋有冇打過67534013呢個電話㗎?

    佛爺,

    原來少少鹹,多多趣,鹹得有道理!

    回覆刪除
  8. 哇!阿卡臣,你个老友naruto真系好野,di幽默感爆晒棚,仲影埋di相又配得甘岩key窝,真系笑到碌地都似架!

    回覆刪除
  9. 歪歪

    哈哈,寫唔耐,係構思先至耐
    之前想了另一版本:是有人遭拋棄,要報仇,搵殺手(髮型師)去街市落手,目標原來是自己老婆,老婆搭巴士逃走....

    +++

    helloninie

    係呀,最初睇啲相,好考人怎樣串通

    回覆刪除
  10. 我覺得...如果每人交一兩幅「無厘啦更」的相片比卡臣,卡臣收集哂啲相之後,寫一個故事,夠哂刺激!

    回覆刪除
  11. 好正呀!
    不過阿鳳無理由識寫“剩”反而唔識寫應該易啲嘅“乖”喎~

    回覆刪除
  12. naruto

    另一玩法:
    你給相片我作上半故事
    之後
    我給相片你作埋故事結局


    樂樂

    Good idea 喎
    雜錦大拚盤


    tat
    是西遊記


    largeheadboy
    記住:認真便輸了

    naruto 就明理喇

    回覆刪除
  13. 卡臣

    好!我行先一步。奉上「無厘啦更」相片兩幅,慢用!

    http://www.flickr.com/photos/62452944@N05/

    - Sushi Bar & Restaurant (Tokyo)
    - Construction Site (Hong Kong)

    回覆刪除
  14. 你地好creative啊! 我覺得卡臣個提議唔錯喎! 你同naruto每人影半part又寫半part!

    回覆刪除
  15. 另外, 佛爺都好勁! 考慮下round加埋佛爺的奇情版!

    回覆刪除
  16. 可唔可以先貼啲相出來,睇下最後你哋寫的故事同各人心中所推斷的差幾遠?

    回覆刪除
  17. 好玩喎,分上下集,上集你文我相,下集你相我文,呵呵呵

    回覆刪除
  18. 樂樂:

    我已先入為主,重寫似有困難!

    回覆刪除
  19. phyllis:

    佛爺只有淫蕩版,卡臣咁純情,無法接受。

    回覆刪除
  20. 歪歪:

    我寫了一篇帖子,回應你的「樂園」,請指教!

    回覆刪除
  21. 我知,我既回應簡直遲晒大到·····我一路睇一路追,故事引人入勝,無厘頭到笑死人!賣賣下魚可以去剪髮,真係阿卡你係得既!編劇人材呀,伯樂去左邊?

    回覆刪除
  22. 巴黎

    我的伯樂呀?
    唔知在那裡?
    呼籲一聲先

    回覆刪除

LinkWithin

Blog Widget by LinkWithin