~~~~~~~~~~~~~~~~







2011年1月5日 星期三

唱K回憶錄

photo by Edgar Hung

唱K回憶錄

第一次唱K
我第一次唱K,應該是1988年吧。那年聖誕節前夕,我跟中學同學去旺角火車站上蓋的一間酒廊餐廳吃晚飯。因有一名男同學之前去過,大讚好玩,叫我們一起去玩。

現時位於旺角火車站的美心快餐店,23年前是一間酒廊餐廳,餐廳中央置有一座電子琴。菜單是多款「扖餐」,枱上有紙筆,填上枱號和想唱的歌,交給侍應。8時許,琴師出現,他的外貌有點像「大L」,是那種喉沙煙酒夜鬼Feel(當然我知道他不是大L)。他開始叫枱號,顧客便興高釆烈走上枱,由電子琴伴奏,顧客引聲高歌。

第一首K歌
當我飲緊忌簾湯時,琴師叫我們的枱號。第一次唱K喎!我唔多唔少都好緊張啦!我怕醜唔夠膽獨唱,我一行三人走上台,琴師按琴鍵,音樂引子起。是齊秦的《大約在冬季》。這首歌在那個年代十分火紅,國語歌再打入本地市場。沒有它,就沒有後來的張洪量、趙傳、陳淑華、李宗盛和滾石。

講返唱K,有人壯膽下,唱完最後一句:「♪ 我說大約會是在~~冬~~季 ♫」之後,台下同學們鼓掌,我沒有自我放大扮歌星的投射,只像初中生上音樂堂的感覺。我返回位繼續飲凍了的忌簾湯。這就是我第一次唱K的印象。

K歌養大我
踏入90年代,卡拉OK如雨後春筍,由借LD入房唱、到DJ入歌、到電腦自動化。由K Buffet、K Lunch、睇英超、打遊戲機到K房獨立廁所,卡拉OK經歷過幾次脫變。

唱K最瘋狂的時候是大學時代,放學放假走堂去唱K。一百幾十元買一個私人空間供我們唱歌發洩。我成長的愛情觀,也是由K歌中汲取,所以難免會偏向悲觀。林振強、林夕、黃偉文、周耀輝就是神父,K房就是教堂,K歌就是聖詩,培養虔誠的K教徒。

時代再壞 時代再好 也只是唱一種悲歌
卡拉OK的光輝不再,以前生日過節迎新送舊升職洗塵annual dinner,都去唱K,好難訂位。現在則隨時都有位。年青人唔出街唱K,在家中上網就可以消磨整個晚上,經互聯網一樣可以跟朋友聯誼。難怪卡拉OK邁向末路。加上商場租金昂貴,卡拉OK經營艱難下,不斷收縮。以前有Big Echo、第一、Energy、加州紅等,現在只剩下Neway,還有新開張的Red MR。但我相信只要唱片公司仍有新歌推出的一日,卡拉OK就不會絕跡。

現在我好間中先會撞啱跟朋友去唱一次K,我的K腳早已變得心歸。我的唱K時代已成歷史,所有唱K的片段,都變成回憶。



一連三篇:《回憶像無涯的鐵路》、《唱機回憶錄》和《唱K回憶錄》都是和回憶有關。

《verykaraoke》動畫創作:利志達


懷念 - 蔡琴
作曲:陳瑞楨
填詞:葉逸芳

青紗外 月隱隱
青紗內 冷清清
琴聲揚破寂岑 聲聲打動了我的心
想起了他 勾引起了情
還深深 留著他的唇印
到如今人兒呀 天涯何處去尋
忘了吧 鼻兒已酸
淚珠兒濕透衣襟

42 則留言:

  1. 卡臣:

    點解K房無Kiss東瀛魔女既?

    回覆刪除
  2. 卡臣:

    Kiss唔邪呀!係個頭至要傾斜架咋!嘻嘻!

    回覆刪除
  3. 佛爺

    K房中,我把口愛嚟唱歌同飲嘢,
    唔得閒KISS

    Karaokiss <---你發明

    回覆刪除
  4. >>我成長的愛情觀,也是由K歌中汲取,所以難免會偏向悲觀。林振強、林夕、黃偉文、周耀輝就是神父,K房就是教堂,K歌就是聖詩,培養虔誠的K教徒。

    妙絕!哈哈哈...仲有,「唱邪K」好攪嘢!

    回覆刪除
  5. coffee

    「唱邪K」呢家嘢,佛爺最知箇中樂趣。

    +++

    佛爺

    我脫教還俗啦!
    (直情唔唱)

    回覆刪除
  6. 嘩,大L...張孝武,我只識佢首擁南躉之歌!!因為我都係擁南躉!
    我仲記得廿年前啲卡拉ok碟賣好貴,成六七百蚊隻!

    回覆刪除
  7. 卡臣大哥:
    我一年都唱我唔多,除夕果日先唱左一次,重要係通宵....
    不過對我泥講,唱K最正就係同朋友一齊,大家不顧儀態大叫大唱先係最開心!

    回覆刪除
  8. Mac

    大L(張孝武),我識佢果首「發你個財」
    但我唔鐘意飲酒。

    嘩!乜廿年前啲卡拉ok碟賣成六七百蚊隻咁貴!我那時家裡沒有Laser Disc Player,只有VHS錄影機,唔知咁貴。

    +++

    馬田

    咁實情我2010年11月尾都唱了一次K,
    半工半私啦,在這裡可能見到我的影像。

    唱K也是一種出汗的運動

    回覆刪除
  9. 年輕時都好鍾意唱K,最叻就係憑歌寄意。後來人去樓空,無咗呢位聽眾,我都無再去唱囉。

    卡臣,條片入面唱「味道」嗰把聲係咪你嚟㗎?

    仲有呀,你數漏咗住家K,以前會租LD碟唱,後來普及DVD,家家戶戶都有私家房唱。

    回覆刪除
  10. 歪歪

    你年輕的故事好浪漫喎
    不如你寫成故事
    俾大家睇吓

    條片入面..沒有我把聲
    頭一鏡果個係我

    住家K..我沒有呀
    驚隔離屋報警投訴

    回覆刪除
  11. 我嘅過去一啲都唔浪漫,浪費啱啲,所以無謂寫喇,做反面教材咩!

    我認得你個樣,係認唔到你把聲啫。

    講真住家K同打麻雀聲一樣咁令人討厭,最絕係有啲仲打孖上𠻹,可惜參與兩者之中嘅人永遠都唔覺。

    回覆刪除
  12. 歪歪

    唔寫就唔逼你啦
    寫第二啲

    中國人出名製造噪音
    搭飛機時最能體會

    回覆刪除
  13. 89 年我走去買咗部卡拉 OK 大碟机,記憶裏成幾千銀,真係攞命。

    後來買部傳真機,要成九千幾。嗰年頭啲電子嘢就係貴到無倫!

    回覆刪除
  14. 校長

    嘩!乜貴得咁交關!
    負擔不起

    89年唱得最多是「血染的風采」

    回覆刪除
  15. 卡臣,
    乜原来你系唱K高手黎架?
    敢你把声系咪已经练到好似半个张学友甘样啊?
    我地尼度都重有好多人唱K,di阿伯大婶,唱下唱下,就去电视台参加乐龄人士歌唱比赛,落重本,扮到成个大歌星敢嘅款,过足歌星瘾,都几盏鬼架!

    回覆刪除
  16. 我唱歌超難聽,人地經常話我喺度 rap 歌背書,搞到我無晒自信一定要搵埋原唱者同我合唱

    回覆刪除
  17. 大都会和乡下真的不一样。

    我乡下没有K房,家家户户都是自己装置karaoke set,多数装在客厅。早晨或傍晚,K友就大展歌喉,左邻右舍都大饱耳福,可是有时要休息可烦死了!

    如果村里有卡拉ok比赛,哈,可热闹了。。。想象一下吧。。。。

    回覆刪除
  18. helloninie

    我唱k歌藝不精,娛人又自娛。
    我的歌聲像黃品源

    我們香港前陣子也有這類talent show,
    參賽者什麼人也有,很有娛樂性

    ++++

    largeheadboy

    我以前都要靠陪唱或找人合唱,
    後來膽子大了,變成霸咪獨唱。

    ++++

    cindy

    妳在鄉下地方?
    原來如此!
    家家唱k可趕賊。(噪音保安)

    妳想休息可考慮先飲醉酒

    +++

    naruto

    我揀做運動發洩

    回覆刪除
  19. 卡臣:

    唔係同你講笑,我從未唱過K。

    回覆刪除
  20. 佛爺

    我信你,
    我都有好多嘢未試過啦,
    攀石,滑雪,唱邪K....

    回覆刪除
  21. eben

    去酒廊唱大廳,好易跟人爭執或衝突。都係獨立K房安全啲。

    回覆刪除
  22. 『我的歌聲像黃品源』

    嘩,乜你唔單止樣同身形似,連聲都似𠹺,你响個劇度有冇唱返幾首飲歌?

    你响個回憶度分別寫台灣歌手打入香港同香港嘅K歌作詞人,其實當年啲國語歌嘅歌詞都好悲情。

    回覆刪除
  23. 卡臣:

    攀石我都未曾試過!滑雪好得人驚!衝落黎,越衝越快!嚇到腳軟!而且雪係軟既,跌低佐,好難爬番上黎!

    回覆刪除
  24. 歪歪

    我唱了「至少還有妳」和「my way」,
    香港啲悲歌先有市場,可能香港回歸後光輝不再啦。勵志歌真係十隻手指數得哂!

    +++

    佛爺

    呢啲X Game唔啱我呢啲老人家啦,你都要注意小心「馬上X」啊!

    回覆刪除
  25. 卡臣:

    我玩過一次滑雪咋!滑雪有兩種:Cross country同Downhill。Downhill至會有可能傷亡!而且班友通常係搏刺激,出佐滑雪區才會出事!

    回覆刪除
  26. 佛爺

    你果然博學,我只玩過坐雪兜,由斜坡「sir」下。

    我也玩過滑雪遊戲機,對著TV左搖右擺。

    回覆刪除
  27. 卡臣:

    我個人神神化化,博乜鬼學呀!一些知識係機緣巧合而知道,唔係自己努力既成果!

    回覆刪除
  28. 佛爺

    咁我識到你,你又講啲知識我知,都係一種機緣呀!

    回覆刪除
  29. 卡臣:

    哈哈!我也相信緣是存在,而且是奧妙的!

    回覆刪除
  30. 『我唱了「至少還有妳」和「my way」』

    卡臣,多謝相告,希望有一日可以聽到你唱。

    另外,我都覺得佛爺好玄,都係佢講鹹濕嘢嗰陣易明啲。

    回覆刪除
  31. hello你好呀。我好耐之前唔知點link link下入左你個blog,睇落覺得D故仔好得意,用左幾個月慢慢睇睇到最後 (好變態TIM),發現你原來係進念演員!HAHA我中學果時有睇過你地演出,對你都幾有印象架,所以呢個發現令我震驚左一陣仲好想話比你知!anyway加油呀,好期待你O既新作。 :)

    回覆刪除
  32. 歪歪

    我都希望有一天你能親身睇我演出,不過做得唔好就不要柴台。

    佛爺好勁架,一出口就擲地有聲。

    ++++

    ccch

    你好呀!首先多謝你肯花幾個月去重溫本人之舊作,十分之感動。有人會這樣做,難得。

    希望你有空看看我們的演出,其實我十分喜歡去年12月的《唱K回憶錄》,所以才寫了這三篇,還用了它的劇照。

    希望你繼續睇啦,ENJOY!

    回覆刪除
  33. 唔記得講,嗰晚現場睇,我同朋友都覺得呢幕你地坐得好型~

    回覆刪除
  34. 唱K呢家,我就麻麻地,因為唱得唔好,個人越大,就越小去,呢幾年次數係零

    原來卡臣又有新作,又miss咗,上次想睇你東宮西宮,可惜時間又夾唔啱

    回覆刪除
  35. largeheadboy

    再一次多謝捧場先,我哋的坐姿經過stylist執過,所以效果像幅畫。睇返似「最後晚餐」。

    ++++

    I.minor

    唱k好似老朋友,一段時間唔探佢,隔一段時間再見返,都無生疏。

    下一次再睇小弟的演出吧,如果你有空的話。

    回覆刪除
  36. >>旺角火車站上蓋的一間酒廊餐廳

    我啲同學都好鍾意去果度,可能你聽過佢哋唱歌,佢哋又聽過你唱喎!我好似只去過一次.後來變成k房時代我有時都會去,但冇乜唱,好唔抵呀!不過成班人,高興咔 okay lah,同去 disco 一樣,我唔跳舞嘅,但大家去咪一齊躍.
    反正同你一樣,以前最鍾意去呢啲地方的朋友,而家好深閨,呢啲日子已成為回憶了.

    回覆刪除
  37. SKII

    原來大家都可能在那裡出現過,太巧啦!
    妳講得啱,唔玩都跟大伙兒一起去趁熱鬧。
    我唔飲酒都落bar一樣。

    妳都寫篇回憶錄吧!懷舊吓!

    回覆刪除

LinkWithin

Blog Widget by LinkWithin