~~~~~~~~~~~~~~~~







2010年7月27日 星期二

超人手錶

超人手錶

全港Action figure比賽頒獎禮完畢後,Travis在後台接受記者訪問,記者問Travis這位新晉冠軍,幾多歲開始對Action figure產生興趣?Travis想了一想,慢慢道出…

* * * * * *

80年代初,香港經濟開始起飛,但很多人仍過著清貧的日子。七歲的阿超(即是今天的Travis),跟父母租住觀塘廉租屋,父親做地盤工人、母親因要照顧阿超,在家中做「家庭件工」:即是從附近山寨廠攞物料回家裝嵌或包裝,幫補家計。阿超十分聽話,課餘時都會主動幫媽媽「黐膠花」、「穿珠仔」、「黐公仔頭」。那一代的小朋友,不像今天般被溺愛,會做家務和比較聽話。

那一代的廉租屋,其中一個特點:就是鄰里關係比較密切,左鄰右里姓乜名乜做緊乜都知道。不像今天隔離屋有無人住都唔清楚。

阿超愛跟同邨的同齡小朋友到樓下玩,到黃昏食飯時候便會自動歸家。那時候電視台播映「日本超人片」,小朋友們通通都是超級擁躉。睇完超人片的後遺症,就是小朋友們會模仿「超人打怪獸」,當然他們不是真的打架,只是模仿招式和扮射死光扮死。但問題來了:小朋友們 誰來扮超人?誰來扮怪獸呢?

超人片中,男主角要靠一隻「超人變身手錶」,大嗌聲:「變身!」後,幾聲「焦焦焦」加上幾吓閃光,「噔!噔!噔!」男主角便變成十層樓咁高的超人,跟住落場打怪獸。

玩具商見到此商機,出產了這種「超人手錶」,在百貨公司內售賣,八十元一隻。如果小朋友戴著「超人手錶」,他便可以有權扮超人,無錶的小朋友,只有扮怪獸的份兒,阿超當然是後者啦。

阿超回家嚷著父母要買80元的「超人手錶」,媽媽當然唔理佢,解釋80蚊可以買好多餐餸。老豆不解溫柔,大聲鬧阿超:「玩玩玩?仲唔去讀書!」、「唔讀好書,想學老豆日日去擔泥呀?衰仔!」阿超咬著嘴唇退下。

第二天早上,媽媽接阿超放學,途中對阿超說:如果阿超下次測驗考到100分,媽媽就送他「超人手錶」,作為獎勵。阿超立即精神起來,有希望買手錶啦,阿超便可以變超人!

阿超回家立即專心溫習,屋邨小朋友們來到門口,叫阿超出去玩,阿超引拒了,心諗:「我買到超人手錶,先至收拾你哋!」

星期五舉行測驗,阿超好有信心去應戰。份測驗券難不了阿超,阿超考完,心情大喜!下周星期一派券後,便可以拉媽媽去百貨公司買「超人手錶」。

星期一老師派券,阿超接過測驗券後一看,竟然是95分!自己犯了一個唔小心錯誤,扣了5分。阿超十分失望,回家後悶悶不樂。媽媽知道阿超平日只考得60、70分,今次有95分已是大進步,但媽媽決定不買「超人手錶」給他,以身作則教導阿超:「規則就是規則,不能偷雞賴貓。」阿超扮不到超人,垂頭喪氣。

第二朝早起身,阿超發現右手手腕上,竟然被晝了一隻手繪的手錶!原來媽媽用黑色箱頭筆,在阿超右手,晝了一隻手錶作補償。阿超咧嘴笑了,落床找媽媽。

媽媽從抽屜中取出一隻平價塑膠電子手錶,送給阿超。原來昨天媽媽從山寨廠取電子錶殼回來,加裝錶帶。她發現工廠工頭,無意間數多一隻錶給她,媽媽把它留下,送給阿超。

阿超很高興,雖然手錶沒有機關,不懂發光發聲,但它是自己第一隻手錶。阿超多謝媽媽後,出門口跟小朋友玩。自已戴著太空電子錶(『太空』兩字是阿超自行加上),阿超終於可以扮第一次超人了,很爽呀!回家連睡覺時也捨不得除下手錶。

可惜第二天,其中一位小朋友買了最新款的超人雷射手錶,阿超的電子錶完全被比下去,扮不成超人。阿超唔玩,嬲爆爆回家。阿超在家中想:與其自己激氣,不如積極反擊。阿超見家中有顏色瓦通紙和汽水樽蓋,決定DIY做手工,用膠水左黐右黐,把電子錶改裝成「土砲超人手錶」,立即出去跟小朋友們比拼過。「大堆頭」製作,令阿超又爭回超人的角色。

如是者,當有小朋友買了新玩具錶,阿超便要回家把手錶「推土重來」改裝,而且愈戰愈強,size愈來愈大、外型愈來愈誇張,錫紙、螺絲釘、鐵線、雪條棒、燈泡…乜都用上。阿超便在這環境下訓練出他的創意和手工技術。

* * * * * *

阿超升上中學後,爸爸當上地盤扎鐵師傅,媽媽不用照顧阿超,去了製衣廠當車工。家庭的經濟條件改善了。阿超有零用錢,他唔食飯慳錢來買「高達」模型,在家中砌呀砌。因為砌得太靚的關係,班中那些有錢仔同學,願意出一百元手工費,把模型交給阿超叫他代砌。阿超有錢收、又有模型砌,何樂而不為呢?他從砌模型中獲得認同和肯定。

中五會考後,阿超只考得十分,讀不成預科也不考慮重讀。父親叫阿超去做電工學徒,起碼有一技旁身,做師傅自力更生。但阿超根本對電子技工無興趣,反而認為自己對美術設計有天份。媽媽學穿兒子心意,花很多口水去說服頑固保守的丈夫,更供學費給阿超去「大一設計學院」讀商品設計。

阿超在那裡學習顏色運用、視覺美學、商品製作。畢業後,Travis(阿超改了英文名)在一間美資公司做Product Development technician。工餘時間砌Action Figure,改裝Figure到出神入化。

在女朋友鼓勵下,Travis參加全港公開Action Figure比賽,憑著十幾年的經驗、技術和大膽創意,Travis打敗對手們,贏了公開組冠軍,有五千元獎金。獎金事少,闖出了名堂事大,相信Travis日後將會變成潮流達人,跟流行品牌cross-over,名利相收。

* * * * * *

第二朝早媽媽起身,媽媽發現右手手腕上,竟然被人用黑色箱頭筆晝了一隻手繪的手錶。當然是Travis的傑作。年邁的媽媽,咧嘴笑了。

Travis從抽屜中取出一隻三千元的名貴手錶,替媽媽戴在她手上。Travis用那筆比賽獎金買下這枚手錶,報答她那隻啟蒙塑膠電子錶和供讀設計學院的學費。

兩母子,相對微笑,血濃於水,何須再多言呢?

改編至廖惠玲的《手錶》



我細個的時候,睇《鐵甲萬能俠》、《幪面超人》、《鹹蛋超人》長大。也有跟小朋友玩「超人大戰機械獸」遊戲。不像現在的小朋友般幸運,要學小提琴、鋼琴、芭蕾舞、外語、珠算…仲忙碌過成年人。

預言書–關智斌
作曲:張敬軒
填詞:林若寧

萬能俠舊日伴隨自己 屋企通處飛
七歲幾膽敢預言自己 操一艘戰機
但到一定年紀 經不起經濟起飛
放下志氣 喜中帶悲

萬能俠大熱漸成歷史 彷彿一世紀
穿梭機附運舊時夢想 升空中跌死
為了生活而放棄 要奮鬥來贏盡厚利
世界是大人遊戲 那幼稚預言誰緊記

時光機 留給你 回憶裡 誰帶路
假使間給你再做 問你又會否寄望更高
傻瓜機 留給你 誰歡笑 誰憤怒
想當初預言無數 世界有太多變數

萬能俠昨日熱誠隊友 通通隱了居
新世紀福音熱潮動畫 一早不再追
面對生活流水 天真給幾次榨取
往日戰友 一一退隊

不記得夢幻樂園地址 消失於市區
一箱箱護衛地球漫畫 安息於廢墟
習慣失望和氣餒 有勇氣原來亦有罪
已到達大人年歲 那偉大預言無根據

時光機 留給你 回憶裡 朋友號
只懂得欺騙細路 奉勸別太早仰望太高
傻瓜機 留給你 誰苦戰 誰卻步
青春的預言無數 有那個信守到老

19 則留言:

  1. 卡臣;

    近日唔說教,咁勵志呀!這篇很有鼓舞性!

    回覆刪除
  2. 每個人都有自己的特長!
    張母子相邊個來架?

    回覆刪除
  3. coffee

    我的特長是食和瞓

    相中人?
    妳自己估吓啦

    回覆刪除
  4. 特長是食和瞓,即係好識享受人生啦!

    相中人,我睇下覺得阿強幾似個位母親,咁,小男孩是阿強,哦,原來卡臣即係阿強!

    回覆刪除
  5. 有人玩物喪志,有人玩物成大志。

    好鍾意主角最後為媽媽畫手錶嘅情節,真係人間有情!

    做乜相中細路好似嬲爆爆咁嘅?

    回覆刪除
  6. 呢篇好touching! 我搵番好多童年回憶, 住廉租屋, 媽媽帶我同細佬去山寨廠拎d手工返屋企做, 用好成績換取心儀的玩具...而家d細路真係好幸福!

    回覆刪除
  7. 呢篇自己故仔嚟架?你以前讀設計架?

    回覆刪除
  8. 有好多我既回憶呀~~~ 呢個故仔, 好熟悉,好鍾意呀 ! 可以轉載到我既 fb 嗎 ??

    回覆刪除
  9. coffee

    似阿強?
    幾時都話畫畫叻的人
    觀察力特別高
    好嘢!

    +++

    歪歪

    相中小孩不是嬲爆爆
    而是擺出一個chok樣
    好細個已經識扮憂鬱

    ++++

    phyllis

    same to me
    a lot of memories
    而家啲細佬唔捱得
    鬧兩句就自殺
    唉~~

    回覆刪除
  10. naruto

    呢個故事改篇他人作品

    不過我都有在天后讀過大一商業平面設計
    (已俾返哂阿SIR)

    ++++

    Brownie

    em..em...嘿嘿

    ++++

    kateyip

    轉載?
    求之不得啦
    多謝賞面呀

    這故事也有我的童年回憶

    回覆刪除
  11. chok樣?我要上網查下先知點解。原來個細路自細已經咁識做戲。

    回覆刪除
  12. 卡臣, 多謝你呀~~
    你個"紅" 既故仔, 我都轉左, 仲加埋條 link , link 番黎你呢度添~~~

    回覆刪除
  13. 真係連續幾篇都好「人間有情」!!
    希望大家都可以好似你故事入面既人物一樣孝順 :)

    回覆刪除
  14. 歪歪

    呢個細佬仔
    細細個已經識扮嘢:
    詐病/詐累/詐乘...

    +++

    folium

    咁熱天氣下
    再睇溫暖故事
    咪好熱囉

    +++

    kateyip

    轉發我的故事
    我向妳講聲多謝才是
    賞面賞面

    ++++

    Mz

    如果睇完覺得感動
    應該都有孝心啩?

    回覆刪除

LinkWithin

Blog Widget by LinkWithin