~~~~~~~~~~~~~~~~







2010年7月18日 星期日

阿強在長沙

阿強在長沙

夏日炎炎,最好同陽光玩遊戲,大嶼山的長沙、貝澳和塘福的渡假屋,少年時代的阿強曾留下不少腳毛。那時候要到長沙,未有青嶼幹線,只能乘港外線渡輪到梅窩碼頭,再轉乘大嶼山巴士到長沙。吓?你未聽過梅窩碼頭?咁你一定錯過了王家衛的《旺角卡門》,張曼玉就在梅窩碼頭等劉德華,配樂是林憶蓮的《激情》。

講返長沙海灘,海岸線好長,水清沙幼,徐徐海風,樹影婆娑。不過阿強十幾年無再去過長沙,不知現時是否已受污染?

大家係咪以為阿強承接上一篇《Hot Summer》,今次講貝澳宿營?講塘福鬼故?講長沙遊記?哈哈,估中一半啦。阿強今次係講遊記,不過並非講大嶼山的長沙,而是講中國湖南省的長沙。

* * * * * *

阿強手執著張國榮1988年黑膠唱片《Virgin Snow》,封面是穿上黑色絨褸的哥哥,站在白色雪地上。阿強開始憶述:

1990年,20年前囉,阿強仍是一名學生。那時候,阿強除了跟父母回大陸探親和去過澳門之外,根本沒有出過埠。未搭過飛機,也沒有參加(境外)旅行團的經驗,「新界旅遊巴一日遊」就試過,都係跟父母去。大家唔好笑阿強,二十年前係咁架啦,邊似而家啲細路仔咁幸福,四五歲已經玩盡世界各地的Disneyland。

學生時代的阿強,比較活躍主動,健談又(懶)風趣。阿強朋友多,高班和低班的同學都認識不少。1990年學校放冬假前夕,阿強竟然被同校一名學兄看中(吓!)某天放學時,高一年級的學兄專誠找阿強。
學兄開門見山說:「我今年新年要帶一團旅行團去湖南長沙玩,但係團友人數有40人左右,我需要多一個幫手,睇你有無興趣做我副導遊?」
原來那個學兄於寒假做導遊,賺取生活費。
阿強聽後,不是興奮,而是先驚一驚,問自己有無信心能力做得到?

學兄解釋工作十分簡單:上車點吓名、人齊就叫司機開車、旅遊車上搞吓氣氛、酒店check in後派鎖匙給團友、吃飯時分配枱席、遊覽時照顧吓團友咁囉。
阿強擔心:「但係我未去過長沙,唔識路,驚唔驚俾人識穿?」
學兄:「我哋叫做『香港帶隊』,到長沙嗰邊就有當地『導遊』,佢哋識路同埋做嚮導。你唔使擔心。」
學兄沒有金錢報酬給阿強,只是提供一趟免費旅遊機會,阿強只是賺個「玩」,他需要回家考慮一晚。

阿強向父母提出,父母認為能夠免費旅遊都叫有著數,贊成阿強去試吓。1990年1月,阿強首次獨自上路出埠,第一次參加旅行團,但不是做團友,而是做副導遊。

在紅磡火車站見到40個團友陸續報到,團友們有的是二三個男仔結伴前來、或二三個女仔、或一家大小幾口,總之沒有老人家,因為這一團需要徒步行山,需要相當體力應付。阿強覺得一大班後生仔,應該會幾好玩。學兄介紹阿強是副導遊時,年紀輕輕的阿強,不禁有點心虛,手心冒汗。

直通火車到了廣州站後,再轉搭晚間火車,阿強首次乘火車軟臥。第二朝早上,火車已經到達湖南長沙。阿強從未到過咁北的地方。冬天寒風刺骨,口呼出白霧。對於怕熱唔怕冷的阿強,反而覺得天氣好舒服。

在長沙火車站外面,團友分乘兩輛旅遊巴士到酒店,學兄跟一架,阿強跟一架。阿強首次在巴士中,結結巴巴地向各團友搞吓gag,諗起都腳震震。

在酒店見到兩名當地導遊,他們懂操少少廣東話。午飯時,司機、帶隊和導遊另坐在一張枱吃飯,叫做「陪師飯」。當天作市內觀光,阿強叫做勉強應付到工作。

第二天遊天子山風景區,天陰陰刮大風,阿強跟團友一起登山。行到山腰,阿強望一望環迴景色,嘩!風景真係似中國山水畫喎!風起雲湧,氣勢磅礴 。令人想起金庸小說中的武林高人,華山論劍。黃昏時分回程,對腳好似斷咗咁。

行程安排了某天早上出發到張家界國家森林公園,阿強前一晚早點睡,想儲多點能量明天用。點知深夜12時團友致電房間,叫阿強立即出去酒店門口玩。吓?有咩好玩呀?原來是湖南第一場初雪降下,對於未見過真雪的阿強來說,是何等興奮!叫阿強出來玩的團友們,也是首次見雪,見到雪花飄揚,興奮到忘記了冰冷。

第二天早上,拉開窗簾,窗外的景色,經已舖上一層白色,好浪漫呀!出發到張家界,大家落車後,在雪地狂拍照。少不了的當然是「打雪戰」,由於阿強的身份是導遊,不是遊客,所以沒有帶相機替自己拍照。

20年前,張家界景區還未有興建「索道纜車」,團友們靠雙腳征服這條佈滿怪石嶙峋的「十里畫廊」,有些石岩像五隻手指、像飛禽、像走獸、像人物。阿強親身上了寶貴一課National Geographic節目。

由於落雪關係,山路變得十分濕滑。有當地小販兜售「草繩」,綁在鞋底,加強磨擦力,防止滑倒。價錢平宜又有効用,發揮民間智慧。

開心時間特別快,又係時候講拜拜,七天行程快將完結。阿強跟部分年輕團友玩得投契,有點依依不捨。由長沙火車站乘火車回廣州,再回香港,最後在紅磡火車站解散。大家交換聯絡號碼。阿強慶幸自己有參與這一趟旅程,沒有被團友識穿,自己又增廣見聞,雖然沒有酬勞,但美好的記憶是買不到的。

這段七天友誼就此終結嗎?不足十天,有兩個較活躍的團友,發起搞個飯局,在旺角某酒樓擺了兩圍,阿強是被邀請之列。旅遊間,團友們跟其他團友拍了合照,都在這個場合交換相片(那時未有facebook)。阿強從團友們取回40張相片,成為日後回味這旅程的hard copy。

席間,阿強跟其中一位男團友傾偈,阿強認為既然旅程都已經完結,不如向那男團友透露自己的真正身份是學生啦。
點知講到一半,那男團友已經搶白:「挑!一早都估到你係學生做part time啦!」阿強口窒窒:「吓…你一早估到…?」
男團友:「唔只我,我哋成班人一早估到哂啦,背後講你 你唔知啫!」

阿強一度沾沾自喜,以為自己可以瞞天過海,呃到大家,點知原來大家一早睇穿哂,一齊夾埋唔拆穿阿強啫。大家都唔想阿強尷尬,團友們好心地囉。

阿強第一次唔跟父母出埠,就已經獨立到當導遊(雖然沒有做過什麼,只是陪玩)。想起那夜初雪、那班團友的笑聲、那一幅幅的水墨風景、那美味的湖南菜,阿強感恩地覺得真的賺了。




阿強近日在網上看到以下這個笑話,在這裡轉載,祝大家笑口常開!

一個中年人問一個年輕人:「你有看過金庸的小說嗎?」
年輕人:「沒有。」
中年人:「那你知道金庸寫的十四部小說的書名第一個字,串起來會成為一首詩:『飛雪連天射白鹿,笑書神俠倚碧鴛』嗎?」
年輕人:「不知道,但是我有看羅琳(J.K. Rowling)的小說,她寫的七本魔法小說的書名第一個字串起來是『哈哈哈哈哈哈哈』了!」

講返港外線渡輪,阿強最喜歡在船尾open deck吹海風,喜歡吃船上的餐蛋麵,阿強都知道它唔好味,甚至好鹹或者唔夠熱,不過阿強喜歡藉它回味年輕的日子。阿強去年再乘搭該渡輪,點知已經沒有餐蛋麵、沒有open deck。吓!乜都無哂?唉! 往事只能回味,獨個漫步在記憶裡。

感覺號渡輪 – Fundamental
作曲:陳光榮
填詞:周禮茂

路途上也沒人車相撲 只得海風輕推她肩膊
她管她在感覺 似與外界一切隔膜
船頭看天空 船頭看波湧 然而看起像未移動

感覺上 在這片刻途上 六十分鐘也像是無限長
感覺上 在這片刻途上 連空間都開始擴張

同船亦有共同的感覺 不管一般世俗相束縛
跟她交換感覺 我倆共處一個角落
言辭更加真 情懷更加深 投緣更加多親切感

航程快終止 但像個開始 延長至一生一輩子

30 則留言:

  1. 阿強生得老積, 又遇上好心人.
    一個看得舒服的回憶錄. 真係好多身邊既野,話無就無, 留唔住, 又揾唔番...只有懷念!

    回覆刪除
  2. 嘩!真人真事呀?這回憶太美好喇!

    PS︰相中阿強好靚仔喎!

    回覆刪除
  3. 香港個長沙經不起大自然沖激,早幾年去,有一大段差不多無沙,救生員話有次打風吹哂落海。。。

    PS︰相中阿強好靚仔喎!x2

    回覆刪除
  4. 就因為阿強靚仔, d 團友至唔拆穿佢啫~~ 嘻!

    回覆刪除
  5. 睇見張照片,加上文字形容,才感受到長沙冬天好凍!

    這篇回憶錄寫得好感人!

    回覆刪除
  6. 有靚仔陪行,仲使咩嘢經驗啫,領隊都係因同一原因而揀咗阿強,睇來!可省靚招牌麻!:)

    回覆刪除
  7. Kateyip


    對於我呢啲中坑來說
    舊嘢不斷磨滅
    回憶以前的事情
    只能靠跟同輩傾偈
    和 睇相了

    +++

    coffee

    真人真事呀
    如果回憶錄是作的話
    便失去了它紀錄的意義

    阿強靚仔?
    妳心地好囉
    氹人~~

    +++

    naruto

    長沙已經變成咁
    又係嘅
    烏溪沙都變成銀湖天峰

    阿強靚仔?
    你心地好囉
    呃人~~

    +++

    kateyip

    啲團友至唔拆穿阿強
    因為唔想蝦細佬啫...我估

    ++++

    佛爺

    凍呢?
    Hot summer 之後
    Virgin Snow幫你消暑

    ++++

    coffee

    我阿強唔靚呀
    學兄揀我
    因為得我肯唔收報酬
    淨玩都肯去

    +++

    brownie

    張相係我阿強呀
    有相為証
    證明唔係亂吹水

    回覆刪除
  8. 我都好懷念渡輪上的餐蛋麵, 仲有以前細個搭火車時吃過的豉油王雞脾...而家呢D又成為集體回憶啦...

    回覆刪除
  9. Phyllis

    還有大戲院前的鹽焗蛋
    雞骴鴨腎

    而家戲院於商場內
    前面無哂小販囉

    回覆刪除
  10. 阿強你擺得張相出嚟,就梗係預咗會俾人讚啦,當年青靚白凈,實冧死你啲團友。

    其實做導遊都算係一種表演,要响成團人面前搞氣氛,真係唔容易。

    回覆刪除
  11. 歪歪

    post咗相出嚟
    證實了一件事:
    就係大家都心地好囉
    日行一善!

    搞氣氛就唔講得笑
    所以啲司儀咪好嘢囉
    (當然, 我也見過一些悶爆的結婚司儀)

    回覆刪除
  12. >>成班人,背後講你 你唔知啫!

    成班人講亞強靚仔呀!!
    唉..點解而家無d咁索既領隊/導遊架??????

    自由

    回覆刪除
  13. 自由

    好耐無見啦

    咪玩啦
    年少的我一嚿飯
    (雖然如今都係)
    感情生活一片空白

    回覆刪除
  14. 果然健身有益,強哥越活越年青!如果夠健談其實強哥大可向旅遊界發展,應該好適合你到處去的性格!
    到時開反間強記旅行社可讚助選港男!

    回覆刪除
  15. JC

    我阿強如今已經走哂樣
    外貌似taxi哥了
    阿門

    +++



    多謝妳鼓勵先

    如果強記旅行社真的開得成
    一定唔會屈旅遊強迫購物
    唔鬧客
    個個導遊都係大隻佬

    回覆刪除
  16. 阿強哥

    剛看到地產廣告「跑馬地樂天峰」主角黃德斌好似你呀!你得閒留言下啦!btw,大隻男導遊!!!太正點啦!如果搞得成強記旅社記得開卜公告我一定拖埋班好姊妹捧場

    回覆刪除



  17. 妳呢頂高帽
    太多謝啦
    黃德斌six pack腹肌
    我拍馬都追唔上

    如果強記搞得成
    妳是VIP
    半價招待呀

    回覆刪除
  18. week 40, 孩子还没有出来.

    没有facebook, 凭照片hardcopy回忆的往事, 往往较深刻.

    中国地大物博, 要玩, 真的一辈子都玩不完.

    很喜欢阿强的故事, 加油.

    回覆刪除
  19. 『搞氣氛就唔講得笑』

    乜唔係要講得笑先啱咩? :P

    『我阿強如今已經走哂樣
    外貌似taxi哥了』

    你依家嘅鬚根look都好有型啫!

    回覆刪除
  20. 沙漠狐

    咁BB唔想出嚟住
    唯有安心等待
    祝安康

    係呀
    你再回香港
    就乜舊嘢都拆哂
    影多啲相啦

    喜歡我阿強寫的故事?

    遲啲再寫

    ++++

    歪歪

    哈哈
    係喎
    矛盾咗添

    好!
    多謝安慰
    我繼續留鬚先

    回覆刪除
  21. 張曼玉就在梅窩碼頭等劉德華,配樂是林憶蓮的《激情》。
    >>>一定要搵埋個電話亭咀~~~~
    我記得張曼玉在碼頭著既平底布鞋ar....

    回覆刪除
  22. 篤篤

    我就記得張學友(烏蠅)
    在調頸嶺
    扔部冷氣機落海

    回覆刪除
  23. 扔部冷氣機落海....

    部冷气机这么重, 我们一般人抬不起来的. 还是由大隻强来扔吧.

    回覆刪除
  24. desertfox

    扔部冷氣機落海....<---咁唔環保
    攞去廢鐵回收
    都有幾十蚊啩

    回覆刪除
  25. 阿強大起底,原來以前好靚仔,
    上得山,又落得田擔泥,
    原來搵阿強做野真係好鬼抵!!!

    如果坐大船豪華位最後邊,好似重有open deck,不過真係唔係太肯定...

    餐蛋麵?以前就算飽到嘔,上船都要整個餐蛋麵止止嘔架!

    回覆刪除
  26. I.minor

    以前好靚仔?
    我阿強真係唔敢認啦

    你講起大船
    上年去搭
    得返啲飛翔船
    沒有選擇揀大船
    不知大船是否已經全部退役呢?

    和大船餐蛋麵同grade是:
    冰涷木瓜/冰涷菠蘿

    回覆刪除
  27. 亞強 原來咁早已經 出黎 lo

    回覆刪除

LinkWithin

Blog Widget by LinkWithin