~~~~~~~~~~~~~~~~







2010年7月11日 星期日

得個「講」字

得個「講」字

廣東俗語,話人「大隻廣」,即是指那人口輕輕,得個講字,講過就算數。
今次數一數邊十項事情,最多人「講就無敵,做就無力」。

第十位:「我要持續進修!」
香港人追求「自我增值」,覺得自己學識不足,需要持續進修,保持自己的競爭力。碩士、學士、文憑、證書、外語、興趣班都大把選擇。但放工後已經身心疲累,有時又要加班,仲邊有力去攞form報讀呢?最後都係:「等公司遲啲無咁忙先算啦。」咁等吓等吓 睇吓點先啦。

第九位:「我搵日帶你去啦!」
父母揍仔女,十歲以下的細佬仔最鐘意扭計,仲要揀喺公共場所先至扭計,眾目睽睽下聲淚俱下,要阻止此情況,父母一係就打、一係就安撫:「我搵日帶你去啦!」、「我搵日買俾你啦!」。小朋友收聲後,過多兩日,父母仲會守諾言咩?立即失憶。一代傳一代,孩子長大後,一樣這般對待他們的孩子:「搵日先啦!」

第八位:「我要同父母去旅行。」
講開父母,一套日本電影《東京鐵塔》,喚醒我們要對年邁父母報恩。想跟父母去作短程旅遊,結果因為選擇目的地、旅費、公司忙難攞假、怕跟父母會悶,旅行團package等,搞到難於成行。口就話要去旅行,但得個講字,一直拖著。等到父母逝世後,先至後悔點解唔早啲去。

第七位:「一生總要去一次…」
旅遊熱門地點:東京、曼谷、台北、首爾,人人皆到過咁。但一些鮮有人去過的第三國家,去過就會感覺「超有型」!在朋友面前說:「一生總要去一次復活島、南極、墨西哥城、古巴、平壞…」講嗰陣真係好型,但又不去search如何申請visa、乘什麼交通工具。唯有睇National Geographic同Discovery Travel Channel,當自己去過。

第六位:「我會注重身體。」
沙士襲港後,大家開始注重自己身體,吃有機食物、服維他命丸、多菜少肉、少油走甜。身體狀況轉差時,對朋友宣佈:「我會戒煙」、「我會戒酒」、「我會早睡」、「我會做身體檢查」…講就係咁講,但當身體狀態好轉返少少的時候,咪繼續食煙、繼續劈酒、繼續夜瞓、繼續濫交。一句「該死唔使病」,大條道理繼續放縱生活下去。

第五位:「食埋呢餐我聽日就減肥。」
香港女士集體中了「瘦身降」,整天高呼「瘦身!纖體!節食!消脂!」不過美食當前,味蕾和嗅覺又好難抗拒面前的色香味誘惑。唔理咁多,大快朵頤。向席間朋友宣佈:「食埋呢餐我聽日就減肥。」結果呢?咪力不從心囉。做運動?聽日嘅聽日嘅聽日先算啦。

第四位:「我要炒老細魷魚!」
有邊個打工仔未受過上司氣架?公司有兩類人:第一類:粒聲唔出,在毫無先兆下遞上辭職信,辭職後十分決絕,不會回心轉意。第二類:成日呻話要辭職,但從來唔打辭職信,又無去搵其他工作。所以第二類人,一受完老細氣,返回座位大嗌:「我立即遞辭職信!」結果呢?等到公司清盤嗰日,貴為老臣子的他,仍然在公司緊守崗位。

第三位:「我哋搵啲嘢搞吓吖!」
「工字不出頭」,打工仔相信搞生意做老細,創業才可以發圍。但自己獨資搞生意的話,資金不足、膽量又不夠。唯有找幾位朋友或同事一齊合資搞生意,減低投資風險。幾個朋友摸吓酒杯底,一人提議:「不如…我哋搵啲嘢搞吓吖!」結果呢?一諗到搞什麼公司?經營模式?角色分工?資金多寡?回本期長短?….好煩喎,都係算罷啦,還是明天繼續返工比較實際。

第二位:「我應承妳,我以後會…」
情侶和夫妻之間,總有嗌交爭執,一方認輸,先道歉:「我應承妳,我以後會溫柔啲」、「我應承妳,我以後會專一」、「我應承妳,我以後會關心妳多啲」。講就係咁講,兩三日後,咪又係故態復萌。「江山易改,品性難移」,呢一句真係不容挑戰呀。

第一位:「如果我中咗六合彩頭獎,我會…」
你有無認識過朋友中咗六合彩頭獎吖?我就無啦,不過,唔知點解,個個朋友都曾經講過:「如果我中咗六合彩頭獎,我會立即辭職去環遊世界」、「如果我中咗六合彩頭獎,我會買天匯收租」、「如果我中咗六合彩頭獎,我會捐三份一去公益金」。結果呢?到目前為止,人仍然期期買,期期都俾哂馬會。中咗頭獎之後會如何如何?大家繼續對這張未兌現的支票發表意見吧!



邊個無幻想過中六合彩頭獎先?邊個唔想富甲天下先?唉,算啦,富貴命生成,唯有面對現實,腳踏實地工作罷啦。

富甲天下 – 農夫
作曲:DJ Galaxy
填詞:6 Wing.C Kwan

落雨不怕 落雪也不怕
富不過三代 窮不過三代

有小超人大超人有個中超人
有六叔有四叔仲有個五叔
我哋習慣叫佢做中五叔
因為佢讀完中五就已經冇讀
佢天不怕地不怕 駛乜怕經濟差
老細炒魷一於當俾自己放吓假
金融風暴 佢話特別涼爽
海嘯襲港 佢走去大浪灣度滑浪
沙士一過 五叔就娶咗一個護士
毒奶搞掂咗 就即刻生返兩個BB
有對兄弟又累兄弟
累到公司倒閉又大執位
但係人一世物一世
做乜鬼要船頭驚賊船尾驚鬼
天跌落嚟 都當係玩泥沙
落雨當淋花
五叔話 乜鬼都唔怕
已經係富甲天下

富不過三代 窮不過三代
(我瞓過街瞓睡袋)
(我買過間屋對海)
(哪怕個天塌下來)

有小超人大超人有個中超人
有六叔有四叔仲有個五叔
我哋習慣叫佢做中五叔
因為佢讀完中五就已經冇讀
佢讀得書少 但係冇有怕
淨係識一句英文會話 it doesnt matter
銀行擠提 佢仲排喺條隊隔嚟
搵個入錢嘅櫃位 仲撩埋女仔
經濟低迷 佢話人生在世
無所謂高低 最怕係無Ladies night
千金散盡過大海
本來無一物 何處惹塵埃
佢寧願要李嘉誠個髮型
唔情願要佢戶口嗰九個零
十個有九個都唔明 都唔化
五叔話 it doesnt matter
咁就富甲天下

富不過三代 窮不過三代
(我瞓過街瞓睡袋)
(我買過間屋對海)
(哪怕個天塌下來)

落雨不怕 落雪也不怕
It doesnt really matter
係得返呢啲 rapper
仲同你嘻嘻哈哈 嘻哈
嘻嘻哈哈 你就富甲天下

13 則留言:

  1. 我阿叔中過交合彩頭獎,跟住鬧哂交唔識人啦!

    回覆刪除
  2. 卡臣:

    如果我中咗六合彩,我肯定再無癮用photoshop同啲AV女裝扮。我會立即飛去日本,搵三幾個AV女來品嚐!以後唔洗再玩photoshop咁苦惱!得個「睇」字!嘻嘻!

    回覆刪除
  3. 卡臣講中左我好多野喎~~~~
    無秘密添~~~

    回覆刪除
  4. 你一野踢爆晒天下人,你怕唔怕好多人去搵你算賬^^

    回覆刪除
  5. naruto

    中獎後同全世界反面?

    好計喎!
    值得參考

    ++++

    佛爺

    祝你早日成行啦

    +++

    kateyip

    又會咁啱得咁橋?

    ++++

    ebenezer

    我數得出呢十項
    因為...全部都是我的「大隻廣」

    回覆刪除
  6. 撞見好耐冇見嘅朋友:"得閒出嚟飲茶/食飯。"

    回覆刪除
  7. 仲有啲老公出去滾,就會氹個情婦話會同個老婆離婚。最後個情婦浪費咗幾年青春,先醒覺個男人係得個「講」字。


    naruto 提到...
    『...交合彩頭獎...』

    有時打錯字反而更有趣!

    回覆刪除
  8. eric

    呢句又真係"得個講字"
    講到2046仲未出嚟

    +++

    歪歪

    交合彩?
    正喎
    點買好呢?
    同投注員交合?
    我諗naruto不是打錯
    乃有心搞gag

    回覆刪除
  9. 卡臣:
    我就成日都話有操番d腹肌出黎,一係真係操幾日,就停咗,一係就淨係用個腦操個腹肌...

    naruto:
    交合彩?嘩~點玩架?

    Eric:
    嘩!!!你個食飯例子,原全係我某個朋友,見親佢都話遲下約食飯!不過淨係係個心度同自己約,真係中哂!

    回覆刪除
  10. 交合彩 ? 六乂合彩? 係咪未中過頭獎, 發老脾,講粗口呢 ? 哈~~~

    "得閒出嚟飲茶/食飯。"<-- 呢個直頭係第零位 ! 無與倫比~~
    我舊時唔識野, 真係信左呢句野一排架~:(

    回覆刪除
  11. I.minor

    腹肌呢家嘢
    好蝦人
    聖誕新年果排(多party)
    必定六合一

    搵日出嚟飲嘢<---也是我的口頭禪呀

    +++

    kateyip

    交合彩
    拆開是:六乂人一口彩
    嘩60幾人,一人一啖
    分得好少喎

    回覆刪除
  12. I.minor

    好!一言為定
    我搵定位添
    準時到呀!

    回覆刪除

LinkWithin

Blog Widget by LinkWithin