~~~~~~~~~~~~~~~~







2010年7月5日 星期一

傷心尋回犬

傷心尋回犬

今天某日報的副刊版,有一格小小的報導,關於Jack和他的尋回犬的動人故事,教人嘖嘖稱奇。

* * * * *

Jack住在西貢村屋,是家族的祖傳物業。地下有個小花園,愛狗的他飼養了一頭一歲的金毛尋回犬,叫Woody。Jack放工回來,帶Woody行山行沙灘。人狗之間,孕育出真摰情誼。

好景不常,Jack要跟女朋友結婚了。女朋友在鴨脷州返工,如果要跟Jack住在西貢,就會令她返工長途跋涉。最後兩人妥協,決定搬到西營盤居住。

他們在西營盤區搵樓,兩人跟經紀睇樓,左撲右撲、身水身汗,十分港劇的場面。因為Budget的關係,只得很少選擇。
最後他們選了一個450尺小單位。問題來了:那大廈不容許養狗。那麼應該怎樣處理Woody呢?

在新婚太太強烈要求之下,Jack忍痛做了一個殘忍的決定:把Woody送給朋友吧!Jack有一個朋友叫「肥仔輝」,之前經常到Jack西貢家玩耍,肥仔輝很喜歡Woody,Woody也很喜歡肥仔輝,Woody每次都熱情地舐濕肥仔輝塊面。

Jack將搬屋一事告訴肥仔輝,碰巧肥仔輝住的私人屋苑可以養狗,Jack問肥仔輝可否收養Woody?其實肥仔輝一直都想養寵物,隨便做個順水人情,幫朋友自己又有狗玩,兩人一拍即合,Woody要搬去肥仔輝位於柴灣的屋企了。

Jack搬離西貢之日,肥仔輝來西貢接走Woody,人狗之間生離死別咁樣,Jack更眼濕濕,Wood十分有人性,依依不捨舊主人,吠聲中告別了Jack,車遠去人漸細,遠鏡見到綠山和一片海,十分台灣鄉土電影的場面。

* * * * * *

Jack搬到西營盤後,間中都有去肥仔輝柴灣屋企探Woody。每次Woody見到Jack都興奮到癲咗一樣。Jack離開時,Woody又唔捨得,亂跑亂吠。

Jack覺得咁樣對Woody的情緒不健康,正所謂:「賣仔莫摸頭」,走了就走不要再留戀。Jack鐵起了心腸,決定不再探訪Woody,讓Woody跟新主人開始新生活吧。

* * * * * *

一個月來,Jack沒有再去探Woody。可能新婚關係,Jack的焦點去了太太身上,睡房門長關,兩人用白床單包裹著半身,十分90年代港產片的場面啊。Jack漸漸淡忘了Woody的可愛狗樣。

某個星期一晚上8時許,氣急敗壞的肥仔輝致電Jack:「弊傢伙!我今晚放狗嘅時候,Woody突然癲咗咁,扯甩條繩....走失咗呀!」

Jack聽後,差點淡出他腦海中的Woody狗樣,立即湧現回來。Jack二話不說,立即趕去柴灣,在街上會合肥仔輝之後,在附近一帶搜索,沿途大嗌:「Woody~ Woody~」十分日劇的尋人場面啊!

可惜最後都係無發現,肥仔輝十分內疚,Jack反過來安慰肥仔輝,說有時Woody的情緒都會幾波動。Jack回家後,徹夜難眠,擔心著Woody,留落街頭,又餓又凍…

兩天後,星期三傍晚7時,當Jack放工返回西營盤住所時,在大廈地下門口見到一隻流浪狗背影,正在垃圾桶中找食物來吃,狼吞虎嚥。Jack定眼一睇,「吓!係Woody呀!」Woody渾身污糟、個肚凹哂,流浪了街頭兩天。

Jack走上前,Woody見到舊主人,歡喜若狂 尾狂擺!Jack諗起許多外國新聞,具靈性的狗憑第六感和嗅覺,千里迢迢,隻身找回舊主人。如今Woody用了兩天,由柴灣步行到西營盤,找回Jack,人狗重逢,喜極而泣,十分韓劇的賺人熱淚場面。

Jack立即call肥仔輝,告訴他已經尋回Woody這頭尋回犬。身在深圳東門的肥仔輝,戥Jack高興,一天光哂!Jack把Woody帶去獸醫診所檢查身體,Jack太太到診所會合他們。碰巧有位新聞副刊記者帶寵物到診所治療,聽到Jack描述呢單料,認為可以在寵物版報導一吓,即場影相加訪問。Woody飽食一頓和清潔後,是夜在狗酒店過夜。

第二天報紙副刊真的報導了Woody的事跡。Jack太太被靈犬Woody「千里尋主人」感動到,決定讓步由西營盤搬回西貢祖屋。Jack十分高興太太這個寬大決定,夫妻跟Woody在西貢村屋裡,樂也融融地生活,慢鏡柔鏡加弦樂托底,十分荷李活電影的ending場面。

肥仔輝喜見他們人狗團圓,但他對Woody沒有半點不捨得,因為這動人一幕是由他一手策劃出來。

肥仔輝的性格貪新鮮,見到別人的狗仔,攬頭攬頸好過癮,玩完放低,拍吓籮柚走得。一旦要負上照顧牠的責任:餵飼、放狗、洗澡、打針等瑣碎工作,肥仔輝便耍手擰頭。如像玩人家個BB仔就好地地,叫你養大佢,供書教學,你又堅決唔制。肥仔輝十分後悔收養了Woody回家,引證了「照顧佢一生,停停要諗真」的現實道理。

一個月後,肥仔輝疏於打理,Woody變得污糟又瘦弱。肥仔輝又不能把牠交給愛護動物會,想出一計:星期一晚肥仔輝告訴Jack:「Woody走失了」。其實Woody一直關在肥仔輝家中,兩人在街上高聲大叫,又點會搵到呢?

過了兩天,肥仔輝趁Jack大慨回家的時候,於七時左右,把可憐兮兮的Woody送到西營盤Jack屋企樓下,把食物放在垃圾桶旁,飢餓的Woody狂吃不走開,五分鐘後,Jack便出現,人狗團圓。Jack致電肥仔輝,躲在後街轉角暗處的肥仔輝,說自己身在深圳,製造自己不在現場證據。肥仔輝知道他這樣做,Jack便會對Woody終生不離不棄。

一段靈犬千里尋主的動人故事,拆穿了,其實只是一個「狗隻再遭遺棄」的殘酷故事。無奈Woody不能說人話,將肥仔輝的奸計拆穿。Jack信錯了肥仔輝這個損友,但肥仔輝的行動,換來Jack太的甘願犧牲,寧願自己每天搭1.5小時車返工,也不想拆散Jack和Woody的人狗情誼。總算是一個happy ending。




狗對人類忠心又唔記仇,有時仲好過人添呀。而狗又勝在唔識講人話,否則又會跟主人駁嘴駁舌,引起口角,頂心頂肺。今次沒有選梁詠琪的《傷心尋回犬》,揀來陳昇的《思念人之屋》,一樣講人狗之間的感情。




思念人之屋 - 陳昇
作詞:陳昇 
作曲:陳昇

住在窗台上的薄荷草
它在醒來時就迎著光
如果會說話 我想它會說
啊 這樣的天氣 只能思念人

獨自走在雨中的小黃狗 
它在散步的路上來拜訪我
想起她曾說 如果想到我 
卻找不到人說 就和牠聊天

But, don't talk to a dog at raining days.
So, don't talk to a dog at raining days.

我想牠有自己的寂寞 
所以才孤獨的走在雨中
Hello, Baby dog. 
是否你要借把傘 She is gone.

I am living in the house of missing you.
I am living in the house of missing you.

迷漫房子裡的咖啡香 
提醒我你在心靈的異鄉
不再屬於我,是否想到我 
他對你好嗎﹖ 
其實~我還好~。

But, don't talk to a dog at raining days.
So, don't talk to a dog at raining days.

我想牠有自己的心痛 
所以才濕淋淋的走在雨中
Hello, Baby dog. 
是否你和我一樣 She is gone.

I am living in the house of missing you.
I am living in the house of missing you.

23 則留言:

  1. 尋回犬唔傷心,但傷身,餓到肚扁哂

    無責任感嘅角色就用肥仔,標籤呀:)

    回覆刪除
  2. naruto

    如果唔用肥仔
    一於用大隻佬去擔任無責任感嘅角色
    (等我去頂)

    回覆刪除
  3. 卡臣:

    吠吠狗好過女人,唔會發脾氣,唔會離開你,唔會玩殘你!嘻嘻!

    naruto,我又標籤女人喇!嘿嘿!

    回覆刪除
  4. 呀!我本來都好感動,因為現實中真有狗狗千里尋主人的故事。

    >>肥仔輝知道他這樣做,Jack便會對Woody終生不離不棄。
    肥仔輝都ok可接受,他諗到咁好的辦法!
    始終係Jack因結婚先離棄Woody嘅,宜家連Jack太太都感動埋,幾好呀!

    回覆刪除
  5. 佛爺

    狗仔好過女人?
    睇你係咩嘢人
    有人需要女人
    有人只愛男人
    佛爺作為男人
    唔要狗要女人

    我有無估錯呢?

    回覆刪除
  6. coffee

    係喎
    大家happy ending
    係woody逼迫瘦身啫
    慘啲囉

    「照顧佢一生,停停要諗真」。
    共勉之

    回覆刪除
  7. 卡臣:
    真委屈你囉!

    佛爺:
    狗都會發脾氣架喎
    公仔就唔發脾氣,又唔會玩殘你!只有你玩殘佢~yeah

    回覆刪除
  8. naruto

    我唔委屈
    一早慣咗

    係呀
    公仔最好啦
    (吹氣嗰隻)
    唔會變心/唔物質主義/無公主病
    不過要勤加清潔囉

    回覆刪除
  9. 養貓貓狗狗真係好講愛心,我表姐表妹之前收養咗隻傻狗,每逢打風行雷就亂咁整哂d 屎係幅牆上邊,又會食自己d屎,最頂引就係佢會失驚無神放d屎係你返工隻鞋度,死未?(唔好意思,用哂屎尿汗染你呢度)

    回覆刪除
  10. 「傷心尋回犬」被安排尋回真正嘅主人,之後仲一家團聚,肥仔輝都算將功贖罪。

    記得好耐之前你問過海怡半島可唔可以養狗,點解唔覺你有寫過嘅?

    回覆刪除
  11. I.minor

    唔驚dirty
    我呢度又唔係無菌實驗室
    屎尿屁我唔mind喎

    我有個朋友生了BB
    家中那頭chow chow用牙扯爛件bb衫
    牠妒忌心好重!

    +++++

    歪歪

    多謝你咁有記性先
    「我問過海怡半島可唔可以養狗」
    那時寫「同一屋簷下」
    故事背景想set係海怡半島
    男主角藉詞放狗落街會情人
    後來我改變主意
    改了男主角去跑步
    海怡半島改了青衣的灝景灣

    得你對我的故事咁上心
    謝謝

    回覆刪除
  12. 卡臣:

    我 ... 我 ... 我 ... 被你睇穿咗添,點算呀?

    回覆刪除
  13. 佛爺

    俾我睇穿咗?
    唔係呀
    其他讀者朋友們都睇穿了


    吹氣公仔都會發出「吱吱聲」

    回覆刪除
  14. 佛爺:
    請注意,我係講公仔,無講吹氣架~

    而家D公仔識講野架,唔會只得吱吱聲

    不過我深信而家D吹氣公仔要佢出第二種聲難唔到D商家囉~

    回覆刪除
  15. 卡臣:

    吹氣公仔都會發出「吱吱聲」

    慘!瘀到痺!連吹氣公仔都未用過!

    回覆刪除
  16. naruto:

    唔好意思,我誤以為你唔敢用「吹氣」二字,所以幫你講埋。嘻嘻!

    回覆刪除
  17. 卡臣:

    我在你這裡有兩個留言不見了,而你在我那裡的兩個留言也只在電郵中見到,在帖子裡失了蹤,谷歌搞什麼?

    回覆刪除
  18. 佛爺

    咪係囉
    我留給你大姐姐60集的留言都消失了

    谷歌?
    不如改名叫「谷精」把啦!

    回覆刪除
  19. 多謝你嘅解答。

    另外,你知唔知今屆港姐候選佳麗叫Mona,佢有個孖生細妹叫Lisa。

    回覆刪除
  20. 歪歪

    Mona有個孖生細妹叫Lisa。

    咁橋?

    真係人生如戲,戲如人生

    回覆刪除
  21. 雖然悲情左 dd , 總算係 happy ending
    我鍾意 !

    回覆刪除

LinkWithin

Blog Widget by LinkWithin