~~~~~~~~~~~~~~~~







2010年3月19日 星期五

開心大發電

開心大發電

藝員科經理對面楚楚可憐的Babe,原本腦裡想講的嚴厲說話,一掃而空,見到眼紅紅的Babe,藝員科經理立即遞上紙巾,忙加安慰。

* * * * * *

電視台有一個資訊節目,叫《開心大發現》,幾個男女藝員,老中青合力介紹一些日常生活的冷知識。雖然在黃金時間播放,但弱台的收視率一向偏低,點夠隔離台的連續劇撼呢?監製一早想摺埋這個節目,但若果摺埋《開心大發現》後,又找什麼節目來頂替呢?在「少做少錯」的因循公司文化下,監製思前想後,都是決定暫時按兵不動。

《開心大發現》其中一位女主持患上大病,需退出休養一段時間。監製在藝員科求其選出一位19歲的女藝員Babe替代該主持空位。Babe原本主持吓六合彩搞珠,行行企企。Babe獲監製通知後,開心到跳起。認為是運氣來臨,可以有一番作為。

Babe收到開工通告,第一天到錄影廠工作,她對錄影廠上下所有員工,都逐一溫柔地打招呼,呢個細路女果然識撈。19歲的Babe卜卜脆、那隻爆牙、酒渦、水汪汪的大眼睛、聲音嬌嗲、有波有籮,熱情奔放,揩身俟勢,叫在場男士為之暈大浪。

正式錄影時,Babe向男主持嗲聲嗲氣,旁人都覺得過了火位,《開心大發現》另一位女主持;40歲的玲姐終於睇唔過眼,在cut機後,私下向導演投訴。導演應承會找Babe訓示一吓,怎料導演的說話還未開口,Babe的淚珠已經奪眶而出,導演不好意思,立即補飛說:「Babe,唔好喊,妳照番頭先咁做就OK啦!做得唔錯吖!」導演當無事發生行開咗。玲姐唯有死死地氣繼續開工。

Babe加盟第一集的《開心大發現》出街後,引起部份觀眾反感,批評Babe係咁發電電觀眾,因為《開心大發現》的主要觀眾群是師奶太太,師奶太太最大的敵人就是那些嬌滴滴的青春少女,驚死自己的老公會被Babe勾走咁。

電視台節目總監對於Babe發電一事都略有所聞,無奈公司文化腐朽,唔危害到自身利益咪由佢發都夠囉。師奶有師奶投訴,Babe繼續在節目中發電。

玲姐心中有火,終於頂唔順Babe,向監製申請調離該節目,一心諗著「死諫」監製,睇吓監製揀玲姐定係揀Babe?結果監製放棄鉛華盡洗的玲姐,亦不作挽留。玲姐被調去做飲食節目。《開心大發現》剩下Babe,更肆無忌憚地發熱發電。

玲姐跟女高層私交甚篤,玲姐私底下向女高層打Babe的小報告,女高層出email叫藝員科經理做啲嘢。藝員科經理召Babe入房傾偈。面對楚楚可憐的Babe,經理原本想講的嚴厲說話,一掃而空,見到眼紅紅的Babe,藝員科經理立即遞上紙巾,忙加安慰。藝員科經理被Babe電到三魂唔見七魄,由嚴厲的黑面變成色迷迷的笑瞼。

Babe用一雙電眼保住自己飯碗,繼續在鏡頭前向觀眾,大放電力。師奶的投訴創造了迴響,反而吸引到男網民注意,重新發現「性感電物Babe」,在討論區追捧成「最紅新上位女藝人」。Babe的出鏡片段上載到Youtube,點擊率高企,Babe一夜成名,帶動《開心大發現》有六點的收視率增長。

見到Babe變本加厲,加強電力,女高層向藝員科經理大興問罪之師。藝員科經理忙加解釋:「節目應該食正呢條水,由Babe狂電觀眾,Rating升呀!」女高層睇返數據,不得不向錢低頭,為了有更多廣告收入,唯有隻眼開隻眼閉,由Babe自把自為。

《開心大發現》受歡迎起來,很多男性觀眾慕名收看節目,欣賞Babe如何發揮電力。Babe被安排在《開心大發現》中獨自主持一個五分鐘環節,教OL、妹妹仔如何運用表情、聲線、動作、姿態、衣著、打扮去「電人」。這環節當然受到男女觀眾歡迎,慢慢由五分鐘加長至十五再加長至二十五分鐘,最後《開心大發現》慢慢被蠶食至剩番五分鐘。監製索性將節目改名叫:《開心大發電》。Babe獨挑大旗,其他主持靠邊站,只需俾吓反應,甚至無對白,淨坐陪笑就可以收工。

Babe做了多本八卦雜誌封面,人氣急升!監製見節目有起色,正準備搞「開心大發電衝破15點祝捷會」之際,傳來壞消息:Babe被敵台高薪挖角,替她賠錢毀約贖身即走。敵台最擅長的就是:見到弱台有乜節目收得,就照抄及改良。Babe擔當一個新節目《美女大發電》的主持人,邀請有份量嘉賓、靚人靚佈景、有聲有色。節目在大台獲得32點收視率,Babe領悟了「魚唔過塘唔會肥」的道理。

弱台經常替人作嫁衣裳,監製都見怪不怪,監製認為《開心大發電》應該改返名做《開心大發現》,原班男女主持歸位,再介紹一些日常生活冷知識。一切回復正常。彷彿什麼事情也沒有發生過。

玲姐重新調回節目中,如往常般開工。但玲姐仍然心有不忿,雖然Babe已經離開了,但玲姐仍記得Babe周圍放生電的得戚樣,向監製投訴但無功而回、更記得監製揀Babe唔揀自己。這一口氣難以嚥下,只能怪自己唔夠Babe青春美麗啦。

* * * * * *

一個月後,玲姐在化妝間看報紙時,哈一聲笑了出來。原來Babe在大台電了許多男高層,萬千寵愛。一時間Babe被勝利沖昏頭腦,對傳媒講錯說話,得罪咗大台的女高層。千祈唔好得罪有權力的女人,女高層下令封殺Babe,抽起Babe唔使主持《美女大發電》節目,雪藏無show做,Babe又變回昔日般行行企企,投閒置散。

Babe這位霎眼嬌,在弱台尚可以「也文也武」,管理層都會盡量遷就妳。但一到大台,靚過自己的藝員多的是,大公司要封殺一個微不足道的小藝員,眼也不會眨一吓。如今Babe因福得禍,只怪自己以為「發生電」是殺手鐧,而女高層唔會buy。

弱台曾經出現過一個可能挽回劣勢的曙光節目,無奈迴光返照,難敵宿命;不消一陣又打回原形。只好期待日後有另一次的大發現。




原本選了張立基的《Electric girl》給這位發電女郎,最後都係改變了主意,揀了發電站Power Station的《Some like it hot》,電力十足,熱情如火。

Some like it hot - Power Station

Some like it hot and some sweat when the heat is on
Some feel the heat and decide that they can't go on
Some like it hot, but you can't tell how hot 'til you try
Some like it hot, so let's turn up the heat 'til we fry

Feel the heat pushing you to decide
Feel the heat burning you up, ready or not

Some like it hot and some sweat when the heat is on
Some feel the heat and decide that they can't go on
Some like it hot, but you can't tell how hot 'til you try
Some like it hot, so let's turn up the heat 'til we fry

12 則留言:

  1. 今次D人物咁有跡可尋嘅?會唔會係真人真事改篇呢?

    回覆刪除
  2. 剎那嘅光輝,並不代表永恆;
    霎眼嘅嬌娃,就最叻將啲麻甩佬電暈!

    回覆刪除
  3. naruto

    我亂作一通啫

    ++++

    歪歪

    好句!好句!

    真的假不了
    假的真不了

    回覆刪除
  4. 哈哈...可惜弱台家下晚上黃金時間係韓劇婆媽集中營...媽媽大發現...邊有乜鬼惹火電眼美女,中年c9就大把....

    回覆刪除
  5. 聶聶

    如果中年c9一齊大發電<--場面都會幾震撼喎

    回覆刪除
  6. 卡臣
    C9識發電豬囉會爬樹...
    C9至叻發爛渣!

    回覆刪除


  7. 又唔好咁講
    c9都有優點架!
    (我驚我阿媽鬧我)

    回覆刪除
  8. Babe遇人不淑啫!如果她遇上一位同性戀的女上司,那便一天咣哂。男、女,都被佢電到直喇!嘻嘻!

    回覆刪除
  9. 好正, 好rich!!

    卡sir功力又深厚左, 恭喜!

    回覆刪除
  10. C+

    言重啦!
    一樣都係原地踏步啫
    無乜進步

    回覆刪除
  11. 你講「商台高層」呀!

    卡臣:

    我 ... 我 ... 我個人好含蓄嘅!嘻嘻!

    回覆刪除

LinkWithin

Blog Widget by LinkWithin