~~~~~~~~~~~~~~~~







2010年1月10日 星期日

大隻四壯士 – 下集

大隻四壯士 – 下集

四名大隻佬在餐館內很辛苦捱完第一晚。收工後,三人捉了Macson入幽暗的後巷狂揼,是認真地、狠狠的揼。

第二晚,除了Macson照常上班,其餘三人寧願唔要第一晚的人工,自願劈炮。Macson為了交租和找卡數,繼續上班。

* * * *

有一晚,Macson在msn中,又通知Jerson、Kenson和Honson他們有新米路,有工做啦!約四人當晚出來見面,共商大計。當然立即遭到三人狂鬧!Macson的誠信早已宣佈破產。最後三人都因為銀包無銀,向現實低頭,也想知道Macson「乜嘢葫蘆賣乜嘢藥」,結果三人都肯出嚟見面。Macson約他們到茶餐廳見面,三人深夜赴約。

Macson說他在餐館工作時,有一名男客主動遞上卡片結識Macson,他叫Jeff,是一間小規模模特兒公司的經理人。Jeff正想捧一隊「大隻仔四人Boy Band」,試探吓市場反應。Jeff講明公司budget很少,只是「刀仔鋸大樹式」搏一搏。問Macson有無興趣試吓?

Macson立即預埋其餘三位兄弟,三人聽後,眼睛立即發光「嘩!入 娛 樂 圈 呀!」三人流露感激的目光,Macson終於可以帶罪立功,將功補過。

第二天,四人到Jeff公司會面,過程十分順利,一隊樂壇新Boy Band便告誕生。Macson辭退了餐館的工作,全力向樂壇發展。四人腦裡滿是」、「SMAP」、「Take that」、「Back Street Boys一堆樂隊名字,錢呀!女呀!車呀!樓呀!

第三天,四人再上公司開會,商討隊band的名字和形象。四人講出自己心目中的名字,都被marketing同事反對。四人認為呢期「Mister」樂隊咁紅,不如叫「Brother」啦,四人親如兄弟。Marketing同事和Jeff聽後搖頭反對。

經Marketing同事和Jeff商量後,一致通過,宣佈樂隊名字叫「Zister」,四人一齊「O咀」!原來大老細的風水師傅早已改好樂隊名字,只有叫「Zister」才能夠帶旺老細。Jeff只是扮民主叫四人扮開吓會俾吓意見咁啫。四人唯有超無奈地接受。

Jeff在演藝學院搵到一個讀音樂系的學生,出幾百蚊叫佢一手包辦作曲填詞編曲,用電腦合成音樂一腳踢,歌名叫《打出個QQ宇宙》,是一首快Beat跳舞歌。之後Jeff再求其搵個「演唱會和音」錄埋首歌,用電腦加工變成四把男聲。總之一切要用最少budget完成。「Zister」第一首派台歌完成了,下一步是要拍「MTV」。

電視台約了Zister星期日早上十時到舊機場那遍空地,拍攝他們首個音樂錄影帶。由於衣服沒有budget,Zister穿回以前健身院的教練制服,只是剪走對袖、車多塊布遮著公司logo、加多條銀色腰帶,便成為四件樂隊制服,再戴上萬聖節玩剩留低的面具眼罩,Zister的MTV服裝便大功告成。

MTV導演認為《打出個QQ宇宙》這首快歌最好有舞蹈畫面,問經理人Jeff有無準備排舞老師?由於無budget關係,Jeff當然無請到人編舞。幸而Macson先開聲:「無問題!我哋可以跳combat當舞步。」MTV導演無意見。

MTV導演roll機,拍了Zister夾口型唱歌、戶外跳combat的鏡頭。拍攝外境完畢後,下一個shot是移師到北角某dance studio內拍攝,他們需要乘van由啟德去北角。臨離開前,MTV導演問Jeff有無準備dancers?得四條友齋跳似乎冷清咗啲,由於無budget關係,Jeff當然無請到dancers嚟伴舞。

半小時後,大伙兒抵達北角某dance studio,當那隊crew 打好燈後,正準備拍攝之際,有十二名後生仔女趕到,他們聲稱是Zister的dancers。

原來剛才Zister趁在車程中,各自call了幾位跳combat的舊學生,話免費送一堂combat,仲可以上電視,結果找到十位學生願意趕來湊熱鬧。14人在鏡頭前,好齊好合拍咁跳combat,效果仲好過專業dancers,唔使夾一take過OK。MTV導演滿意收貨,其實最滿意的應該是Jeff,零budget便有服裝、有編舞、有伴舞,真是香港精神:「以小搏大」。

*  * * *

正如一般新晉組合,每年有幾隊殺入歌壇,但又無聲無色fade out殞落。Zister當然亦逃不過這個宿命,半紅不黑。模特兒公司唔再繼續投資Zister,改捧另一隊三人女子組合:Hotchacha。Zister正式解散,四人又恢復失業狀態。

有一晚,Macson在msn中,又通知Jerson、Kenson和Honson,告訴他們有新米路。約四人當晚立即到茶餐廳見面,共商大計。三人都因為山窮水盡,乜都要做,立即仆出嚟見面。

原來Macson經朋友介紹下,被中山某新開張娛樂城的健身院聘請成combat教練。因為那健身院規模不少,需要多聘三至四名教練,Zister始終都叫出過一隻EP,叫做歌星仔,在大陸很Buy這些帥哥仔。四人北移到中山做教練,上堂時播出《打出個QQ宇宙》教打combat。立即招攬很多國內的學生報名。四人搵到餐食,決定從始定居國內中山。

正所謂:「魚唔過塘唔肥」,Macson、Jerson、Kenson和Honson,唔離開過香港炮台山,又點可能過檔,到大陸中山闖一番呢?做人真係「今日唔知聽日事」、「呢步唔知下一步」。
.

* * * * * *

後記

這裡上下兩集加埋共2,820字,全都是因為我在某天,一個唔覺意睇咗以下呢個MTV而成,呢場因緣際會,皆由這個MTV而生。(注意:歌曲開始時間始於0:28秒)

15 則留言:

  1. 面前嘅路係點?唔行又點知

    係唔係咁?

    回覆刪除
  2. 我都無意中睇過呢個MTV..真喺非常"特別"

    回覆刪除
  3. Naruto

    正所謂:
    「前面有千變萬化,不會睇見 - 甄妮」

    ++++



    樂壇新人, 心口有個「勇」字!


    ++++

    Eric

    你都有睇?
    你身在英國, 但都好Update喎!
    咁特別嘅MTV,都有幸目睹

    回覆刪除
  4. 應該叫manson
    因為佢同我個fd同名所以我記得有個叫manson,唉

    回覆刪除
  5. 嘩!原來真係有隊咁既野架?

    《打出個QQ宇宙》以為係旺仔QQ糖主題曲!

    回覆刪除
  6. C

    我叫主角做Macson
    因為取其Madson(顛仔)之意

    +++

    M

    《打出個QQ宇宙》
    最初落筆是《打爆你出個QQ小宇宙》

    回覆刪除
  7. 我好Buy「魚唔過塘唔會肥」呢句

    回覆刪除
  8. 我喺香港睇㗎。。啱啱先至番英國。

    回覆刪除
  9. eric


    你剛回英國
    做乜回港唔call我呀?

    回覆刪除
  10. 我個兩個黑眼圈真係夠擋煞架!

    好彩你睇到呢個MV咋!!!

    回覆刪除
  11. 大部分時間去咗埃及囉,番到香港又唔舒服咗一大輪,唔知乃咗啲乜野!

    回覆刪除
  12. 仲以為佢地會一炮而紅tim!!

    Kelly

    回覆刪除
  13. c+

    我睇到呢個MV都算我時運高啦


    +++

    eric

    出埃及記?
    羨慕!!
    快啲post啲相分享吓好喎

    ++++

    kelly

    「仲以為佢地會一炮而紅tim!!」
    會架啦
    4andason今年走紅架啦
    快啲買佢哋碟片

    回覆刪除

LinkWithin

Blog Widget by LinkWithin