~~~~~~~~~~~~~~~~







2009年11月2日 星期一

比冰箱更冰霜的故事 - 上集

比冰箱更冰霜的故事 - 上集

要形容阿權和阿珍的愛情故事,可以用「凄美」這兩個字來形容。

生於80年代初的阿權,在李鄭屋邨長大。家貧沒有添置冷氣機,夏日炎炎,單位內悶熱得像個火爐。六歲的阿權,最喜歡打開雪櫃,讓流出的冷氣令自己涼快。當然被母親發現後,藤條炆豬肉。但阿權屢錯屢犯,自幼已經對冰箱產生一份莫名其妙的獨特感情。

踏入青春期的阿權,六尺高、單眼皮、北方人的面孔輪廓,活像韓國男明星「權相佑」。中五那年,阿權跟青梅竹馬的鄰居阿珍拍拖。阿珍有一對大眼睛、鼻高、下巴尖尖,活像韓國女明星「孫藝珍」。屋邨裏都可以找到這對明星面孔的金童玉女。阿權住在607室、阿珍住在609室。大家都是同校的同班同學,每天一起由屋邨返校,放學後一起到自修室溫習,在晚上十一時,一起回屋邨。

中五會考放榜,阿權考得幾分。他自知不是讀書材料,沒有打算重讀。阿珍在原校升讀預科。阿權不學無術,在屋邨附近的7-11便利店當店務員。因為阿權貪懶,他選擇返通宵班,因為深宵顧客更白天的少。

阿權最喜歡的工作,就是進入「飲品大雪櫃」內補貨。在密封又幽暗的大雪櫃裡,阿權把罐裝飲品,填補被客人買走的飲品。阿權在零度的大冰箱裏,冰寒透骨,他最喜歡這種冰冷溫度。兒時感覺,於心頭再次泛起。

為了增取拍拖時間,阿珍趁中六升上中七的暑假,她到阿權上班那間7-11便利店當暑期工,兩人晚上寓工作於娛樂,又可見面又可賺零用錢。

某一晚凌晨三時,當阿權在大雪櫃內補貨時,阿珍突然進入雪櫃來,兩人坐低傾偈偷懶。在攝氏幾度下,兩人口中呼出白煙。阿權突然握著阿珍的涷手說:「終有一日,我會帶妳去韓國首爾,一齊睇雪。」阿珍點頭同意,她哼出王菲的一首歌♫ 忘掉天地彷佛也想不起自己,仍未忘跟你約定假如沒有死,就算你壯闊胸膛不敵天氣,兩鬢斑白都可認得你 ♪」。阿珍用歌聲跟阿權約定了,決定一齊努力儲錢,向首爾逐步逐步出發邁進。

怎料三個月後,當二人儲夠五千元,就遇上他們第一次的人生交叉點。阿珍意外懷了阿權的骨肉。剛滿18歲的阿珍,應該奉子成婚?還是到深圳墮胎?

阿珍偷偷跟媽媽商量,怎料阿珍媽聽後,如遭雷擊。原來阿珍是「阿珍媽」跟「阿權爸」的風流孽種!一段發生在607室和609室的上一代風流賬,18年後報應在下一代身上。阿權和阿珍是一對兄妹,懷在肚裡的嬰孩,有可能是白痴。

深宵時,阿珍在屋邨的公園裡,告訴阿權知道:兩人原來是兄妹關係。阿權聽後雙腳乏力,倒跌在地上。突然戲劇性地行雷暴雨,沒有帶傘的兩人,全身淋濕。阿權向天大嗌:「why us?!」雨水和淚水在臉上亂爬。最後,兩人決定要打掉肚裡的BB。

阿珍媽阻止阿珍再見阿權,免得這對亂倫兄妹再錯落去。阿珍決定繼續和阿權一起,豈會怕媽媽的阻撓?阿珍反向媽媽要脅會向「阿珍爸」爆大鑊,供出媽媽是朵隔牆花。阿珍這一嚇果然令阿珍媽封嘴。媽媽晦氣地說:「妳想點就點!我唔理妳啦!」阿珍反要脅阿媽,才得以繼續見阿權。

阿權和阿珍拿著五千元,回深圳進行流產手術。兩人駐足在朋友介紹的黑市診所門前,擔心手術不安全,分分鐘有生命危險。阿珍突然問:「雖然係近親,但BB唔係絕對100%有問題,不如…..生佢出嚟啦?…..」阿權擔心大陸流產手術高風險,也萌起離開的念頭,但如何負擔養起一個小朋友,一時間,兩人都不知如何是好?

正當兩人猶豫躊躇之際。突然一輛電單車以高速駛至阿珍身旁,電光火石之間,搶走阿珍的背囊,原來是深圳電單車黨!阿珍慘被電單車撞倒彈起,一聲慘叫,碌兩個筋斛,瞓咗喺地上,痛苦地呻吟。

待續......

中集將於2009年11月3日星期二早上9:25,廷續悲情。

Photos by desertfox

29 則留言:

  1. oh!!! 簡直係世紀大悲劇! 更悲既係收到通知, 15號起公司的電腦再唔可以上網...嗚嗚!!

    回覆刪除
  2. 自由

    15號起公司的電腦再唔可以上網?
    嗚嗚~~真係我聽到都想喊埋一份!
    返工點捱呀?

    妳節哀順變啦..

    回覆刪除
  3. 巴打~ 你做咩爆我大隻權同阿珍個故事出o黎呀?!

    回覆刪除
  4. 阿權哥

    係咩?
    好似呀大哥你都有份參與加意見喎

    ps 多謝你一齊度橋先

    回覆刪除
  5. 嘩!!好感人呀!
    雷雨+俊男美女+淒美愛情 = 做電視劇一定收得
    卡臣唔通你想轉行做編劇?

    回覆刪除
  6. 野比大雄

    如果我轉行做電視編劇...

    飲食娛樂業一定歡迎
    因為大家晚上唔再留在家中
    外出消費

    回覆刪除
  7. 喂...卡臣偷橋啊!擺明就係韓國悲情例牌劇情+60年代港產粵語殘片或傷痛文學「雷雨」之流.....

    插句咀:自由仔巧可憐呀!返工無得上閒網不如劈炮啦!而家興呀!(講下啫.....$$$$都巧重要)

    回覆刪除
  8. 聶秀康

    話得男女主角似「權相佑」同「孫藝珍」就知我玩緊乜啦。

    仲有
    妳不如話韓劇啲「兄妹戀」 抄港產粵語殘片同「雷雨」啦!

    回覆刪除
  9. 只係見到個title 就覺得好有趣~XD
    冰箱和冰霜啊~ 好喜歡~~

    回覆刪除
  10. zoe

    「比冰箱更冰霜的故事」
    擺明就係跟某套韓國電影開玩笑啦

    回覆刪除
  11. 實在太好睇,好想知結局.

    回覆刪除
  12. 同父異母?係咪亞珍媽作故仔嚇亞珍架...
    不過點都好啦...
    吓?公司電腦再唔可以上網?
    最慘痛故事比亞行寫左...真係聽到都無心機...-.-!

    回覆刪除
  13. denzel

    係咪亞珍媽作故仔嚇亞珍架...
    ==>嘩!咁都俾你睇穿 ?!


    啊自由返工唔可以上網
    真係比砒霜更悲傷的故事

    回覆刪除
  14. >>妳節哀順變啦..
    咁帛金呢?? 淨係問侯係唔夠架!! ~

    回覆刪除
  15. >>自由仔巧可憐呀!返工無得上閒網不如劈炮啦!而家興呀!(講下啫.....$$$$都巧重要)

    錢係重要, 不過自由更重要...我要考慮無線上網!!

    回覆刪除
  16. 自由

    哦帛金嘛...
    燒俾妳囉
    妳今晚子時收啦
    飛機大砲都有

    另, update吓小弟
    妳是否仍在「嘥奴」工作?

    回覆刪除
  17. 期待中集

    一直都没有去韩国的冲动, 有机会反而想去朝鲜, 去看看那神秘的国家到底是怎么样.

    回覆刪除
  18. desertfox

    多謝你送的雪山相片先

    北朝鮮
    嘩! 好神秘的共產國家呀!
    秘製核彈...

    回覆刪除
  19. 要多隻遊艇、3個麻雀腳、2個妹仔呀!!!
    唉...你又提起我既傷心事, 真無出息!!

    回覆刪除
  20. 自由

    妳要咁少嘢咋?
    漏咗十個猛男
    幾千億現金...

    講無出息?
    幾時輪到妳吖
    唉~~

    回覆刪除
  21. 咁一於寫完呢個就寫個"比砒霜更悲傷的故事"啦。

    回覆刪除
  22. 小豬

    「比冰箱更冰霜的故事」之後
    已安排另一個戲謔故事
    繼韓國電影,
    下一個故事輪到日本電影

    回覆刪除
  23. >>自由仔巧可憐呀!返工無得上閒網不如劈炮啦!而家興呀!(講下啫.....$$$$都巧重要)

    錢係重要, 不過自由更重要...我要考慮無線上網!!

    回覆刪除
  24. 自由

    無線上網咪好囉
    15/11後
    繼續玩呀~~

    回覆刪除
  25. 卡sir, 呢個故仔雖然同今日既北風好match...

    但下個故仔可唔可以warm d 呀!? =p

    極需要暖流啊!!!

    回覆刪除
  26. c+

    sorry
    呢個故事真係好冰冷架!

    +++

    eric

    又俾你估到
    黑色幽默囉

    回覆刪除
  27. 很像在看韓劇呀...很dramatic...還要有中集和下集, 好!等我讀埋佢地先.

    回覆刪除

LinkWithin

Blog Widget by LinkWithin