~~~~~~~~~~~~~~~~







2009年11月12日 星期四

堅持到底就是勝利

堅持到底就是勝利

尚有五分鐘便是凌晨五時,廳中只剩下「豹紋」同「巴辣」兩人。互相瞄了對方一眼後,目光返回電視螢光幕;電視畫面只有一點暗光,已經停頓了12分鐘15秒,而時間亦好像跟隨停頓了。

* * * * *

「豹紋」和「巴辣」是一隊香港地下搖滾樂隊的其中兩位成員,樂隊的名字叫「Below」。取其「藏於地下 永不妥協」的意思。現在介紹一吓呢隊地下樂隊的五位成員:主音「豹紋」、結他手「死神」、低音結他手「雷門」、鍵琴手「火牛」、鼓手「巴辣」。

樂隊一行五人,都是Heavy Metal 的diehard fans。五人平時都是Heavy Metal服飾打扮,反主流市場,拒絕走到地上;玩自己相信的重金屬音樂。間中出吓地下死亡派band show。他們的手本名曲是「Rush car crush blood and flesh to trash」在超標的噪音中咆哮!汗水和口水灑向瘋狂的觀眾們。雖然每次出band show都有少少酬勞,但五人平分後,只夠搭車開飯。他們的正職只賺雞碎咁多,又要夾錢租band房,維修樂器,眾人都銀包拮据。

* * * * * *


有一晚,Below到band房練歌,死神來到時,怒氣難平。他剛在娛樂新聞睇到一單報導:「Motel簽約大公司出碟!」Motel跟Below是同期出道的地下樂隊,Motel專玩Industrial Punk,Motel曾經鄙視香港主流樂壇,而家轉戰主流。眾人聽後都咀藐藐!大駡Motel是「搖擺叛徒!」「跪拜主流!」「出賣靈魂!」「對錢妥協!」

大駡一輪之後,豹紋說:「又到月尾,又要交租喇,位位1,000蚊呀唔該。」眾人聽後顧左右而言他,剛才點解大家咁嬲Motel,其實心裡有點酸葡萄。暗地想如果Below由地下轉戰地上,學似Motel咁,可能名利相收,錢啊!女啊!車啊!樓啊!

豹紋身為Below的靈魂人物,當頭棒喝:「大家要堅持啊!堅持自己嘅信念同音樂理想啊!」隊員都是一腔熱血的年輕rock友,立即高舉和平手勢,Heavy4Metal式伸脷,咆哮幾聲「Wow!Wow!Rock n Roll!」憤怒的靈魂再次燃燒起來。

年少氣盛的五位,爭著自認最會「堅持到底」,各自舉出自己「堅持」的例子,自吹自擂,但沒有證據支持。
豹紋提出:「不如我哋搞個比試,鬥堅持,睇吓邊個先係『堅持王者』!」
雷門問:「贏咗有乜 jetso先?」
豹紋答:「贏咗嗰位,今個月唔使交band房租金,租金由其餘四人平均攤分。」
窮到濃的隊員聽後,立即舉腳贊成。豹紋宣佈比試於明晚凌晨12點,在豹紋家中舉行。
* * * * * *

第二晚凌晨12點,五位準時於豹紋家會合。豹紋解釋這個「堅持到底就是勝利」比試的規則:他今天向朋友影痴那裡,借了一隻愛爾蘭的超高深悶爆藝術電影DVD回來。片名叫《貝爾格萊德永遠不相信鋼鐵的眼淚》。片長6小時、只有15個分鏡頭,換言之,每個鏡頭都好長好耐先郁一郁。全片無對白;此片於「悶爆流行榜」長期高據首三位。

五人日間的正職,當體力勞動,下班已經筋疲力盡。雖然個個都慣了夜瞓,但都是打機、上網、煲劇、食宵夜、飲酒等娛樂。但要坐定定睇6小時藝術電影,不如殺咗佢哋好過。

五人坐在電視機前,互相監察,期間不許睇雜誌打機食嘢吸煙飲咖啡,每人每小時獲3分鐘Toliet time,超過3分鐘當輸。總之堅持到底的最後一個,就是勝利者。

五人同意後,半圓型圍著電視機坐,比賽正式開始!嘩!北歐藝術電影名不虛傳。一開場,鏡頭影著一間破舊鋼鐵廠內一部正開動的發電機,機械在動但一粒聲都無,悶底戲。

已經過了30分鐘,鏡頭郁都唔郁,套戲有少少風聲。鍵琴手火牛首先起身棄權,講咗句好勁好長嘅粗口後,「嘭!」一聲,奪門而出。

3點鐘,結他手死神終於放棄,倒頭而睡。4點半,低音結他手雷門也堅持不了,在sofa上大覺瞓。廳中只剩下兩人是清醒的。

尚有五分鐘便是凌晨五時,廳中只剩下豹紋同巴辣兩人。互相瞄了對方一眼後,再看電視螢光幕;電視畫面極暗,已經停頓了12分鐘,而時間亦好像已經停頓了。

巴辣的眼簾很重很重,他腦海裡想出很多刺激的事物來提神,可惜都是徒勞無功,頭很重、神智迷糊,巴辣望一望豹紋,嘩!點解豹紋雙眼仍然炯炯有神,仲大把貨添!唔通豹紋瞞著大家,他一早已經轉會,做咗 art film fan?

5點鐘,巴辣眼前視野開始矇矓,打自己幾巴掌後都無補於事,巴辣投降,席地而睡,昏死過去。豹紋大笑幾聲,堅持到最後,勝者為王!他打了一個大呵欠,起身伸了一個懶腰,關掉DVD機,扭台看收費電視,欣賞一場已經播到接近尾聲的歐洲杯總決賽,雙方正互射12碼定勝負。

今晚凌晨3時,歐洲杯總決賽準時開波,豹紋佔主場之利,先選擇自己的座位,座位的坐向,正好望到隔離屋客廳部42吋LCD電視機。豹紋開頭跟大家一樣死頂套藝術電影,幾度差點睡著。死頂難頂終於捱到3時,歐洲杯一開波,豹紋便偷望對面屋的電視機。欣賞一場精彩賽事,立即生猛番哂!

豹紋贏了錢又贏埋牙骹,今個月唔使夾錢俾Band房租金,在其他隊友前,豹紋又被尊稱為「堅持神」,因為成功捱完套藝術悶戲後,豹紋已臻神級。今次豹紋真係乜都贏哂!

Below繼續演出地下bandashow,五人在強勁音樂下,瘋狂咆哮。他們相信:堅持到不能堅持的時候,仍然要堅持下去。



海闊天空 - Beyond作曲/作詞:黃家駒

今天我 寒夜裡看雪飄過
懷著冷卻了的心窩漂遠方
風雨裡追趕 霧裡分不清影蹤
天空海闊你與我 可會變 (誰沒在變)

多少次 迎著冷眼與嘲笑
從沒有放棄過心中的理想
一剎那恍惚 若有所失的感覺
不知不覺已變淡 心裡愛 (誰明白我)

原諒我這一生不羈放縱愛自由
也會怕有一天會跌倒 背棄了理想
誰人都可以 那會怕有一天只你共我

仍然自由自我 永遠高唱我歌 走遍千里

25 則留言:

  1. 嘩,只看題目已經好"警世"...
    其實好多日常小事看似容易,但要堅持都唔容易架...

    回覆刪除
  2. 巴打,男人點會鬥堅持o架?男人梗係鬥持久啦!

    持久神威過堅持神喎!

    回覆刪除
  3. 阿權哥仔

    「堅持神」的全名是「堅硬又持久的卡X」

    回覆刪除
  4. 我想聽Rush car crush blood and flesh to trash!

    回覆刪除
  5. Beyond 精神長存!

    《貝爾格萊德永遠不相信鋼鐵的眼淚》如果是老作的,就真係作得好成功。睇到個名都怕。

    回覆刪除
  6. brownie

    「Rush car crush blood and flesh to trash!」
    我都想聽,
    應該係好dark side 的 gothic punk


    ++++

    cosmoalice

    《貝爾格萊德永遠不相信鋼鐵的眼淚》是我老作的,
    不過靈感來自一套電影《莫斯科不相信眼淚》
    (真有其電影,90年代初)
    我無睇過呀

    Beyond 精神長存!Yeah~~
    一起高呼Rock n Roll~~

    回覆刪除
  7. 最憎呢D嘈音樂隊

    Toliet time。。。呵呵

    回覆刪除
  8. 卡臣:

    好搞笑!不過我真係睇過一套講美國南北戰爭的舊片,亂世佳人。唔夠十五分鐘,係床上訓著佐。我從未睇過一套咁悶爆既戲!唉!

    回覆刪除
  9. 佛爺

    gone with the wind
    在其他人心目中是套經典呀

    奇勒機舖喎

    回覆刪除
  10. 卡臣︰

    令佛爺睡著果套Gone With The Wind的小說很好看架!

    回覆刪除
  11. 有黄家驹个阵时嘅歌好好听,好驰呢首海阔天空,可以称得上曲词具佳。

    回覆刪除
  12. belong 當年都五個人~

    我都最怕爆粗 band 友,超煩~

    回覆刪除
  13. 有部份係咪你以前的寫照呢?堅持都今天!

    回覆刪除
  14. coffee

    gone with the wind我只看過電影咋

    ++++

    helloninie

    海闊天空..我也十分喜愛呀!

    +++

    largwheadboy

    爆粗band友..那本漫畫..我十分鐘情

    ++

    嘿嘿

    喜欢重金属音乐!<--臨睡前聽一流

    +++

    I.minor

    我諗每個人唔多唔少都有樣嘢要堅持

    回覆刪除
  15. 喂,你呢篇似乎係「用陰招得到勝利」至啱𡃓!

    回覆刪除
  16. 歪歪

    或者叫
    唔理白貓定黑貓
    捉到老鼠就係好貓

    回覆刪除
  17. 卡臣:

    我就係因為被亂世佳人的名氣所累,原來該片勁在催眠!唔係控制佐我,係仆暈佐我咋!嘻嘻!

    我注專力失調,催眠唔到架!你都係,因為諗野天馬行空,都係催眠唔到架!如果你話被人催眠騙財,我肯定你講大話!嘻嘻!

    回覆刪除
  18. 『唔理白貓定黑貓
    捉到老鼠就係好貓』

    你寫嘅係毛語錄,唔係鄧語錄喎!

    回覆刪除
  19. 波斯貓?佛爺,乜你唔係最鍾意熊貓咩?

    回覆刪除
  20. 歪歪:

    都係你心水清,知道我最愛係熊貓!

    回覆刪除
  21. 佛爺

    我未試過俾人催眠
    俾人催....促就多

    歪歪更係心水清啦
    心細如塵架

    回覆刪除

LinkWithin

Blog Widget by LinkWithin