~~~~~~~~~~~~~~~~







2009年3月2日 星期一

Reboot自己

Reboot自己

多謝關心
我感激收到幾位blog友的電郵,問候我閉關是否有難言之隱?是否已經乾塘寫唔出啦?去外國整容呀?被大耳窿追債?俾老婆發現咗個blog?好多謝你/妳們的關心,唔使猜測啦,讓我講吓我閉關的原因。

江郎才盡
我並非大腦便秘,本人電腦hard disc內尚有十幾篇存貨,未去到「無嘢出」的山窮水盡之地步,我並非藝人歌手,去休息去充電陪家人攞靈感,只是宣傳用語,不能應用在我身上。

迷上癮
前排跟友人討論起寫blog,我自嘆說:「死啦!我真係中咗毒,每日喺辦公室開緊工、去到gym、返屋企,就是check吓blog留言、覆留言,睇吓blog友有冇新post,睇完又留言,每日就咁樣loop住loop住……」其實是「人玩blog?還是blog玩人?」自己沉迷地把時間壓了下去。

潮流巨輪
我接觸Blog始於2007年,每樣潮流玩兒定有起有滅,icq和Friendster都曾經人氣過。流行曲歌詞都寫道:「築得起 人應該接受 都有日倒下」、「要擁有 必先懂 失去怎接受」,我諗遲早都會有一日,大家都會玩厭Blog這玩兒而放低。屆時我會怎樣?告別Blog後,再沉迷落另一樣新玩兒?唔知道喎!不如嚟過演習先,試吓放低Blog十幾日,睇吓得唔得?

初戒不是完全戒掉,只是減低頻率,每天晚上回家後,才check自己的blog,post網友之撐場文章。而其他網友的blog,盡量唔睇唔留言。十幾日都OK易過,沒有內心掙扎、流鼻涕、流口水或手震躝地。

喫煙朋友
我有一個吸煙朋友,我問他有冇曾經考慮過戒煙?他抖一抖煙灰,呼出白煙後回答:「其實我都試過戒。某個星期五晚開始,我唔食煙,跟住星期六、日,一支都無食過,自己一啲問題都無,又無吊癮。跟住星期一,我就食番煙。」
「吓!點解唔堅持,一直戒落去?」
「因為我知道我可以控制自己,可以揀食、可以揀唔食,我呢一分鐘食,我下一分鐘可以唔食。」好有型呀!他再側側頭,輕輕吸下一口。
我封了他做偶像,心中暗暗把他的喫煙哲學copy and paste and save。

我想講的,就是這些。
Reboot自己,步向下一次hang機。

* * * * * *

鳴謝
我衷心多謝:大隻權、巴黎旅客、聶秀康、C+、Iriseyes、歪歪、the8,
多謝你/妳們的支持!
有人肯走出嚟撐自己,是十分幸福!
我會記著及珍惜的。

64 則留言:

  1. 卡兄: 小弟也曾很大blog癮, 後來慢慢找到個平衡點,也就寫下停下,還未想到戒blog 呢。

    小休一會也是好的,充電之後更多野寫!

    回覆刪除
  2. 渣前輩

    多謝你的鼓勵
    我明白了

    好,又重新出發!

    回覆刪除
  3. 唔怪得之唔見你post文啦!
    但我有自制能力,未去到要send email問點解既地步。咁你休息完未呀?

    其實我都係啱啱先開始寫blog,我希望冇咁快過氣啦!再講,就算舊既讀者走咗,又會有新既嚟呢!(好似我咪係你既新讀者囉。唔好愁啦!

    回覆刪除
  4. 你呢台戲,都係要繼續演落去架喇。固定每季度劇目,按時間表出戲,自己做番導演。

    (哈哈,唔知你明唔明我噏乜呢吓?)

    唏,係 "戒" 煙呀。

    回覆刪除
  5. 我尋日操返篇舊文先發覺我寫嘅文當時係想俾人睇,事後回望原來係俾以後的自己睇嘅。

    當然你的情況可能有所不同,你寫的咩十大或者果啲過癮的故仔,冇你自己的靈魂在裡面,寫或者純粹為了俾人睇。

    如果你將漂亮的外表(I mean你啲故仔)注入多啲血液令到佢成為有血有肉的真實的自己,你會好似我咁唔舍得戒。

    有靈魂又想癮晦啲可以學渣兄咁寫,疑幻疑真總過癮。

    回覆刪除
  6. 軍c9

    >>其實我都係啱啱先開始寫blog
    ==>一代新人葬舊人

    >>唔好愁啦!
    ==>我唔係愁無讀者走
    我都無愁到
    不過玩吓演習啫!
    (原來無乜大礙)

    +++++++

    小豬

    >>唔知你明唔明我噏乜呢吓?
    ==>明
    最好有命等攞終生成就獎

    >>係 "戒" 呀
    多謝妳
    已有朋友第一時間通知我改
    乜星期日早上咁多人起咗身?!

    回覆刪除
  7. HANA

    >>你寫的咩十大或者果啲過癮的故仔,冇你自己的靈魂在裡面
    ==>係咩?其實個個故仔都有「我」在內

    >>如果你啲故仔注入多啲血液,令到佢成為有血有肉的真實的自己
    ==>咁就悶親大家, 因真實的自己好宅男架!

    回覆刪除
  8. 終生成就獎? 係都俾我攞先喇,嗱唔好同我爭呀!

    其實喺你啲故仔裡面,又真係可以睇到「你」個喎。你的嘅功力,隨時都可以將自己啲宅男生活融入啲故仔度喇。

    保持番你一貫嘅風格都好,都可以有變奏嘅。另外,偶然試吓唔同嘅題材、風格,對自己都可以起到刺激作用架。

    回覆刪除
  9. >>乜星期日早上咁多人起咗身?!

    咁你話左係今日吖嘛。^^

    回覆刪除
  10. 卡哥,你再寫返,真係網民之福!

    呢排我去做 gym (中環 California),都有諗會唔會撞到你,可以問箇究竟點解你唔寫 blog。依家唔洗咯,一天都光曬,可以專心舉鐵!

    回覆刪除
  11. 卡卡:

    我都曾有你相同的感覺。

    Hana 講得很對:注入多啲血液令到佢成為有血有肉的真實的自己......

    我發覺多人看的網誌(不是我的那個),個性多很鮮明,讀者喜歡與作者同呼吸、共苦樂。

    這又是自然而然的。網誌是自己生活與情志的反映,我樂我笑,我悲我叫,歲月推移,便成了珍貴的生活紀錄了。

    而在同一個時空,以網會友,大家無任何利益計算,卻互相欣賞支持,問暖噓寒,又是另一種可貴處。

    回覆刪除
  12. 車,食古不化吖你!

    哩篇咪有啲血囉!

    我覺得好睇啲囉!

    明唔明吖?

    (我教人收得幾貴下嘛!)

    回覆刪除
  13. Cister, 整咩大家差唔多時候Deblog? 我都寫左篇咁上下既野...一齊 M 到乎?

    回覆刪除
  14. 恭迎卡兄粉墨出關!!

    我從06年開始寫blog,中間都停了大半年.
    一向覺得blog的好處是不用向觀者負責.
    寫停自便,自感自言,一卻都從個人出發.
    寫的無束就好.

    回覆刪除
  15. 卡臣: 做0左幾十年人...我都發現識放識收係好重要...識放唔識收...最終會攰 & 唔憤巢! 識收唔識放...最終會唔知足~


    大家分享嗄...由呢個井去吚一個井睇嗄....每個井都有唔同...都有屬於自己既一遍獨一無二的天空~

    寫 blog 既0野...停一停抖一抖...好似女人咁...食0左餐勁既第二日食返餐清淡既 balance 返~ 過幾日囉喎...咪又有 quota 食返餐勁囉~ (笑)

    等你餐勁既! hehe~

    回覆刪除
  16. 卡臣
    我比較簡單的去想,就是你去了外遊休息充電.
    人生就是很多不可預測的階段,上年這個時候我還祇是偶爾看看友人的blog怎知到現在我巳擁有自己的地方,寫是為了讓自己想法說出來,怎知煮了四送一湯連甜品就是沒人來開飯啊!多沮喪...幸好家下都有小量飯客定期賞面不懨我飯涼菜粗!更謝謝卡臣攪了那次飯局,讓我學會網上行並不虛幻,更可將我的幼嫩菜肴上了卡兄的飯卓,真見笑.
    我抽煙就如你的抽煙朋友一切都能自控相信寫blog亦然雖然我真有點上癮!
    希望卡臣亦當如此,就如人生種種一切隋心,舉重若輕不必太在意,長編大論都是相你繼續下去...卡叔天地正常營業.
    另:素顏封blog真令人有點沮喪,希望她回來!

    回覆刪除
  17. 卡兄~~~

    寫blog都係渣兄話"心理排洪",當排完洪時就是自己開始要在現實中生活,而網絡都係俾自己在另一個空間的一個身份,只要這身份繼續存在,偶然小休一段都唔錯呢~~~^^
    而我都係寫吓就停吓呢~~~
    所以小妹全力支持你小休去vocation散心呢!多D陪住你眼前人!

    回覆刪除
  18. 卡臣,
    miss you a lot!

    >>迷上癮
    當你見到有字underline而有衝動去click佢就真係迷上癮啦.

    回覆刪除
  19. 好野卡臣又返來~歡迎!歡迎!熱鬧歡迎!

    其實中blog毒與中上網毒也是一樣,不能自拔地每秒也「刷新」瀏覽頁,與吸毒差無幾,沒有手震、流口水,但對抗心癮更艱難。

    回覆刪除
  20. 卡 handsome:

    我是 2007 年 7月才接觸 blog 這玩意,中屬於後期的 blogger ,因為 blog 早在 1999 年已經有了。

    我想很簡略說說個人觀點,在寫 blog 初期,我是很活躍為很多事情( 社會事)發表很多意見,當時是 yahoo blog,的確引來很多迴響,也得到很多讀者支持,yahoo blog 的用家較為簡單,看得高興便會讚美,不合心意的便會不理,是很簡單直接。

    但當 yahoo blog 進行類似『金盾系統』的『字眼過濾』後,我轉為 blogspot 開 『陳大文部落』,在 2007 年 12 月期間,我覺得 blogspot 不錯,讀者群的知識水平比 yahoo 為佳,在下的寒酸小文章也得到支持,雖沒有金錢利益,但滿足感是有的。

    但 2007 年中至現在,我發覺 blogspot 的讀者群是有轉變, 很簡單地說,就得出以下結論,當然,是我個人觀察和觀點而已:

    1. bloggers 與 bloggers 之間如果從 blog 走出外界並且太熟的話,是很奇怪。

    2. 如果有 blogger 想在 blog對一些事情發表一下個人觀點,但又和其他 bloggers 很熟,就會出現『人地會唔會唔高興呢,死啦,點呢』這種困局。


    3. 當知道自己的 blog有一定支持者時,第一件事不是高興,而是要搞清楚,讀者是讀者,你是你,你才是作者,應該要由你自己作主。


    4. 要冷靜和清晰地去看讀者對自己的評價,一個網名不代表什麼,讚美和不滿也可能是其中一個群組當中一些人的反應,不代表自己文章真象。


    5. 通常真正面對面或真人電話對話,會較清楚彼此真性情,留言不代表讀者真正反應。


    自己 blog得到支持或強大支持,是令作者高興,但寫 blog 絕不能『上癮』,要記住,『作者是你自己』,是因為『你』的 blog 內容才引來支持,所以是由『你』為主,沒可能滿足不同組群不同人不同時間不同要求的。


    我只能說到這裡。



    從我閱讀卡臣文章,我直覺上認為卡臣的『乜乜十大』,其實就是卡臣的真性情,他是那種結集八十年代『林敏聰+林振強+周星馳+王晶feel 』的人,屬於通俗幽默和鬼馬諧趣那種。

    卡臣就像茶餐廳的鬼馬伙記,也像很健談友善的的士司機,有很多話題,很多世情幽默。


    卡臣所寫的『xx十大』,從內容看出,是夾雜了他自己日常生活遭遇在內,反而他的短篇小說,很大程度是為送禮而寫,由於是送禮,你要迎合不同人士喜好,這是『代筆』而不是『主筆』,所以你可能會感到很悶,寫的時候也會有壓力,情況就像打份工。


    我似乎感到你寫 blog 有點累,其實你是不會疲倦,你疲倦是因為你並非寫自己很喜歡的話題,但又有若干讀者讚美,你好像捨不得,但又矛盾地想做回自己,這是你要衡量的問題。


    你不妨詳細看我的見解,我強調是個人觀點而已。

    回覆刪除
  21. 真係佩服你咁坦白,將自己嘅困境講出嚟。

    其實你嘅Blog同一般人嘅Blog唔同,因為其他嘅通常都係講自己嘢,比較隨心所欲,但係你呢度講自身嘅嘢好少,係以故事為主,再加十大,仲規定一個月寫十篇,連埋寫留言,我都曾經講過你點得咁多時間,咁多靈感。

    希望你唔好覺得呢個Blog係一份責任,而應該係一個穫得樂趣嘅空間,如果你得唔到樂趣,我就情願你唔寫。而你嘅民調會唔會係一啲暗示呢?

    回覆刪除
  22. 我情願你這樣子。如果你和我的其他Blog友都戒了Blog的話,我在這邊會很寂寞的哦。

    Velkommen tilbake!

    回覆刪除
  23. 卡臣,

    你個"喫煙朋友"真係講得好,自己控制到就最好。

    有排我晚晚飲酒至訓到, 後來自己都覺得咁唔健康, 即刻唔飲成個星期。原來真係得呀。所以呢, 自己知道自己想點好重要。

    你慢慢休息下啦, 叉足電...我地可以慢慢等。

    回覆刪除
  24. 最重要是自己寫得開心愉快,鍾意寫唔鍾意寫,都冇所謂。我都驚會中上網毒,所以都漸漸減少上網時間。上班就一定唔會check㗎啦。夜晚上一個鐘左右啦。

    回覆刪除
  25. 卡臣,

    想寫咪寫囉,想停咪停囉,唔需要理人哋點睇吖。

    寫得好唔好,人哋可以俾意見,但最重要係寫你自己想寫嘅嘢。如果唔係,就好似陳大文部落所講,係代筆咯,咁就失去個性,而且冇咁好玩了。

    回覆刪除
  26. 瓶子

    >>我好大瘾啊....
    咁各有取向啦!

    +++++++

    小豬

    >>終生成就獎? 係都俾我攞先喇,
    ==>妳實至名歸啦!
    下一個老人金牌先輪到我

    >>偶然試吓唔同嘅題材、風格,對自己都可以起到刺激作用架。
    ==>咁我一於寫鹹故啦!

    +++++

    大隻權

    多謝恭迎先
    下次中環 California遇上的話
    我哋一齊入sauna房
    呵~呵~呵~

    +++++

    校長

    講得啱
    我老咗都會記得呢段日子
    認識過一班blog友
    互相欣賞支持,問暖噓寒

    回覆刪除
  27. C+

    >>Cister,...一齊 M 到乎?
    ==> cister,我真係咁啱M 到,
    借塊蝶護M 巾俾我使吓吖
    唔該

    +++++

    hana

    >>哩篇咪有啲血囉!

    ==> 有血?
    係呀!
    我 M 到!仲問C+借 M 巾用添呀!

    >>我教人收得幾貴下嘛!
    車!又無人求妳教我!

    +++++

    鏡田

    其實我寫Blog無乜壓力
    只不過測試吓自己對blog的沉溺

    我照常營業架!

    回覆刪除
  28. the8

    講得啱
    食得肉多就食吓素

    >>等你餐勁既!
    ==>我後天有新文啦!
    tue night 晚

    (高興妳不是cd rom呀 )

    ++++++



    寫blog有讀者有回應
    真是好有滿足感
    妳愈寫愈好啊!


    >>卡叔天地正常營業.
    ==>放心,我無事喎!

    >>素顏封blog真令人有點沮喪,
    ==>唉!真可惜啊!

    ++++++

    逍遙小妹

    >>而我都係寫吓就停吓呢~~~
    ==>或者我都會係咁

    >>所以小妹全力支持你小休去vocation散心呢!
    ==>同意贊成!

    >>多D陪住你眼前人!
    ==>抗議反對!

    回覆刪除
  29. 肥貓

    我未死喎
    星期二晚有新文啦

    唔使掛著我架!

    ++++

    小佚

    係呀!
    寫blog/internet
    是在Office中,最大的娛樂
    有冇福音戒毒中心介紹?

    ++++

    歪歪

    >>如果你得唔到樂趣,我就情願你唔寫。
    ==>嘩!引到你講真心話
    我澄清:我寫blog仍然得到樂趣

    不過試吓如果無咗blog
    自己會否吊癮啫?
    測試結果:合格!

    >>你嘅民調會唔會係一啲暗示呢?
    ==>係呀
    天下無不散之宴席
    始終有這一天來臨

    回覆刪除
  30. 卡臣 提到...
    『我寫blog仍然得到樂趣...
    天下無不散之宴席
    始終有這一天來臨』

    你仍然得到樂趣,我哋做讀者嘅梗係開心,但假如你有一日樂趣變咗做負擔,你即管同我哋講,唔好迫自己去繼續。就算你真係唔再寫Blog,咁都唔代表彼此友誼嘅結束。

    回覆刪除
  31. 大文master

    多謝你一番精闢意見:

    係呀!
    blog界文化:「埋堆」「敵友之分」「匿名」

    我見過某些blogger真身
    感覺良好!
    so far沒有一個讓我感到後悔

    如果講幽默和鬼馬諧趣
    我在山腳而大文在山頂
    真心話,誓神劈願呀

    >>由於是送禮,你要迎合不同人士喜好,這是『代筆』而不是『主筆』,所以你可能會感到很悶,寫的時候也會有壓力,情況就像打份工。
    ==>都唔係架
    送禮要度身訂做,如給自己一個訓練
    如果寫到對方話「中!」
    自己也有滿足感
    結果挑戰一個接一個
    不知間寫了23個
    幾過癮架!

    我也不是倦
    你提議我寫自己喜歡的題材
    咁...變態色情暴力的陰暗故事出籠啦!

    多謝你的寶貴意見!

    回覆刪除
  32. desertfox

    唔使驚
    香港咁多bloggers
    如天上繁星!

    ++++++

    jc

    >>你慢慢休息下啦, 叉足電...我地可以慢慢等。
    ==>吓?
    我啱啱返嚟,妳就叫我抖抖?
    咁有我心吖!

    ++++

    eric

    >>上班就一定唔會check㗎啦。
    吓!
    我是公司冗員
    唔check點捱到放工呀?

    回覆刪除
  33. 維京人

    多謝鼓勵

    但我都提過
    我hard disc內尚有十幾篇文
    我點會扼殺它們面世呢?

    ++++++

    歪歪

    >>就算你真係唔再寫Blog,咁都唔代表彼此友誼嘅結束。
    ==>嗚~嗚~
    明白哂!好爸打!
    我哋燒黃紙,斬雞頭

    回覆刪除
  34. 卡臣,

    講真,真係好鐘意睇你嘅故仔。所以都好期望你 hard disk 嗰十零篇 post 㗎。

    只係想話最緊要係寫自己想寫嘅嘢咁啫。

    Cheers!

    回覆刪除
  35. VIKING MAN

    >>只係想話最緊要係寫自己想寫嘅嘢咁啫。
    ==>電車男性幻想鹹故

    +++++

    篤兄

    一於在10日內減少用量
    睇吓自己會否口水鼻涕齊流?
    ...但演習的需要性.由你決定

    回覆刪除
  36. >>借塊蝶護M 巾俾我使吓吖

    給Cister的溫馨提示:
    M巾Out了已久,我們呀,早早轉用Tampon了.有要求的Sister,大多選用Playtex,亦直稱其名.

    你呀,身為Cister,別再娘了好嘛?

    又,你真要蝶護M 巾,我再娘都去找比你OK!?

    回覆刪除
  37. >>我見過某些blogger真身
    感覺良好!
    so far沒有一個讓我感到後悔

    唉!一額汗...!

    回覆刪除
  38. 卡臣,
    相信萬物都有定時...工作有時, 休息有時... 一切隨緣好了...
    祝: 源源不絕^^!

    回覆刪除
  39. 卡臣:

    想寫便寫! 隨心呀!!
    喂..我等緊你d"電車男性幻想鹹故"..hehe~~

    回覆刪除
  40. >>當你見到有字underline而有衝動去click佢就真係迷上癮啦.

    死喇我中咗肥貓講既見到有字underline有走去click既衝動...唔止underline...連有 colour 既事都想去 click 呀!

    死得喇!

    回覆刪除
  41. c+

    我真要蝶護M 巾,
    麻煩妳再娘都去找比我
    唔該!

    ++++++



    妳點會令我失望呀?

    ++++++

    denzel

    我祝返你攝影靈感源源不絕^^!

    ++++++

    自由
    >>喂..我等緊你d"電車男性幻想鹹故"..hehe~~
    ==>嘻嘻,大把存貨呀
    呵呵

    +++++

    the8

    >>唔止underline...連有 colour 既事都想去 click 呀!
    ==>咁妳有強烈好奇心啫
    優點嚟架!

    回覆刪除
  42. 好多留言啊,未及一一細讀。

    我的思想簡單,沒什麼好意見,
    只是想,反事隨心吧。

    一點分享,
    我的blog齡不長,
    但認識的blogger中,
    有些不寫了,
    有些說不寫,不久再執筆,
    而我還是默默的寫。
    為什麼呢?
    我想是我喜歡寫作吧,
    blog只是一個載體,
    寫自己的心情又好,
    試試寫不同的作練習也好,
    我想我永遠不會停下來,
    只差在載體有沒有變,
    我希望不會啦。
    因為我也喜歡別人來看,
    也喜歡別人來留言,
    但就是不強求。

    所以於我來說,
    沒有什麼中不中blog毒的,
    而寫作,也總不能說是中毒吧,
    直接寫感受又好,寫故事又好,
    每一次也能給自己一些省思,
    那就不錯了。

    我的出發點可能和別人不同,
    也可能不中point,
    無論如何,就是分享一下。

    共勉。

    回覆刪除
  43. 應該不是出發點,
    是切入點。

    哎,中文差。

    回覆刪除
  44. I am aware that there are a lot of bloggers in this world, but believe me when I say you are unique.

    Sometimes you really don't need to reply to all the replies. That will take some pressures off. There are just too many of us and you may seem overwhelmed sometimes.

    I am getting lazier as well, I realize that my blog output has dropped lately, and I wasn't even busy. I guess it is spring time and we all could use a rest.

    回覆刪除
  45. 阿卡"神"前輩,

    真的很佩服你們, 可有那麼多靈感落筆
    近這一兩年,小弟才懂部落格這東西
    看到你們的文彩,真的想去仿傚
    但有時自己只懂速成,一打得慢就沒有心機
    執筆忘字也是家常便飯,都是看看你們的文章好了

    煙會上癮的
    我本人不大相信政府的宣傳
    你該是"戒"不了"煙"的

    回覆刪除
  46. 小c

    多謝妳的分享
    我領會了一點

    >>而寫作,也總不能說是中毒吧,

    好!明白哂!
    有point!!

    ++++++

    數奇門

    ==>我回來了

    +++++

    desertfox

    有人向我講嘢
    唔應好似無禮貌
    所以有問有答
    遲啲可能改啦

    ++++

    查比斑特頓

    你都寫緊啦
    keep it up!

    >>你該是"戒"不了"煙"的
    我戒了煙,改食cigar

    回覆刪除
  47. 卡臣,
    你同我講寫野唔好有壓力,但你自己又有嘅?我寫緊個故仔回你送給我的故仔,你要再閉關的話,我就快D死俾你啦!哈哈!

    回覆刪除
  48. 南蠻

    有故事送給我?
    咁好?

    妳就快D死俾我啦!
    哈哈!

    回覆刪除
  49. 我覺得戒煙係煙到一支都唔食先算係自己控制到
    唔係話自己覺得戒到就故態復萌
    做人好多時就係比藉口自己
    我知道自己做到ga
    不過我唔做ja ma

    回覆刪除
  50. 卡臣;我先剛剛做佐你fans,你就...
    anyway,take care and can't wait to see your new style !

    回覆刪除
  51. keith

    >>做人好多時就係比藉口自己
    ==>呀!一巴巴摑過嚟呀!

    ++++

    小莫同學

    你收到的校園slogan適用嗎?

    我閉關至1/3之嘛
    今晚有新故事啦

    回覆刪除
  52. To Carson;
    嗯!好好啊!我聽日就開始廣播啦~哈哈

    回覆刪除
  53. e!真係又留到言啦喎~

    其實我對"迷上瘾"果段有d體會,
    因為卡臣係自己行開一陣,離開個 blog, 諗住預演下無人睇個 blog 既感受, 但呢個 exercise 係你主動, 如果真係一個二個 fans 都唔睇, 到時果種空虛同失落, 又點可以响預演時預習呢???? :(

    但呢個情形應該唔會發生既~ 放心 !

    我都覺得耐唔耐 reboot 都係好事, 預演下卡臣一朝發達,到處周遊列國, 唔得閒啋我地.. :D

    回覆刪除
  54. kateyip

    我想起那時候真的太迷寫blog
    好彩都有朋友支持吓
    否則無聲無色執咗佢都得

    祝我發達呀!多謝哂
    如果我發達,我一定唔返工
    日日寫blog
    正~~

    回覆刪除
  55. 諗諗吓, 發達後唔返工, 周遊列國都可以寫 blog 架喎~~~
    一于咁話啦~, 發左達都要寫!

    回覆刪除
  56. kateyip

    咁就承妳貴言啦
    發咗一定繼續寫

    回覆刪除

LinkWithin

Blog Widget by LinkWithin