~~~~~~~~~~~~~~~~







2009年3月1日 星期日

味道 By大隻權

味道 By大隻權

Vincent Hung,31 歲,身高 183cm,短髮,有幾分似黃宗澤。鐘意飲紅酒,鐘意打羽毛球,最鐘意睇o既消閒雜誌叫做《Wallpaper》。佢係一名建築師,獨居上環一個 800 呎o既唐樓單位,配合中西合壁o既裝修,甚至上過雜誌o既室內家居介紹版。

靚靚仔仔,有品味,正值壯年。公司同部門有 8 個女同事,其中 7 個都暗戀 Vincent,叫佢一聲「萬人迷」,都真係當之無愧。但係我地o既「萬人迷」 Vincent,都有佢o既煩惱......



因為 Vincent 不舉。

無錯,不舉。

男人最忌o既就係甩頭髮同不舉,頭髮烏黑濃密o既 Vincent 完全唔需要擔心前者o既問題,但係不舉呢個「男人最痛」o既問題,已經困擾o左 Vincent 五年。中西藥乜都食過,甚至o的咩氣功、針灸、推拿、拔罐、法輪功都試過,「小 Vincent」都係完全無反應,垂頭喪氣咁做人。

大把女送上門o既 Vincent,唯有一直保持住佢謙謙君子o既態度,就算有約會,都點到即止,真係打晒車輪都唔「上」。因為 Vincent 心諗,唔通真係臨陣脫腳比人笑都照去馬? 不如扮下君子好過。

呢一日係個普通o既星期三,朝早八點二十三分,Vincent 由佢上環o既屋企搭地鐵返去灣仔o既 Office。去到中環o既時候,人已經開始多起上o黎,逼下逼下,Vincent 拿住份免費報紙都無得睇。又再逼下逼下,有個個樣有八成似應采兒o既少女,比人潮逼o左去 Vincent 前面。撲鼻而來o既除o左一陣少女氣息同髮香之外,仲有一股好熟悉o既氣味,係 Vincent 曾經好鐘意用o既香水 CK One。

但係唔知點解,少女o既體香加上香水o既味道,當中o既化學作用竟然令到「小 Vincent」好有反應! 呢個反應,連 Vincent 自己都唔敢相信。

Vincent 佢好緊張,架地鐵亦都已經過o左佢應該落車o既灣仔站,直駛銅鑼灣方向。但係 Vincent 唔敢落車,佢o個一刻真係怕落o左車之後,佢「細佬」就會再昏迷不醒。而佢個腦亦都已經 function 唔到,因為o的血已經走晒落去佢細佬度。佢一路個思想都好掙扎,Vincent 雙手o係地鐵o既車廂入面,距離少女渾圓結實o既美臀只有 0.02cm o既距理,仲薄過岡本新出o個隻 Condom。佢好想一手就揸落去,個腦又諗返起之前睇過o個隻講「電車痴漢」o既 AV,下體仲越o黎越硬。

緊張到標晒冷汗o既 Vincent,好努力咁想克服自己突如奇來o既獸性。呢個時候,地鐵亦已經去到北角,少女要落車轉車,返去佢牛頭角個 Office。Vincent 唔理咁多,一於就追上前......

佢鼓起勇氣上前,拍o左一下少女o既膊頭。

『小姐,你好呀! 我可唔可以同你做個朋友呀? 我...我....我唔係壞人o黎o架! 我叫 Vincent,我比我卡片你丫,我真係唔係壞人o黎o架! 』平時能言善道o既 Vincent,緊張到講o野打晒「kick」。

少女接過卡片,望o左一望,又望到眼前呢個標晒冷汗o既型男,覺得佢都幾 cute,就甜笑話好。

『Nice to meet you! 咁你叫咩名呀? 』

『我叫 Mandy 呀......』





畫面一轉,數返去五年前,即係 2003 年。

讀大學o既時候,其實 Vincent 有個好好o既女朋友叫做 Mandy。Vincent 大 Mandy 一年,佢o地o係 O Camp o既第一日邂逅,Vincent 係 Mandy 條 team o既「組爸」。O Camp o既結束之時,亦都係佢o地開始之時。Vincent 當年好鐘意用o既 CK One 香水,亦都係 Mandy 送比佢o既第一份禮物。

倆小口甜甜蜜蜜,一切都好美好,直至 03 年。

03 年,人人都會記得,香港有「沙士」呢個傳染病。「沙士」破壞經濟,亦破壞o左 Vincent 同 Mandy o既呢一段感情。因為 Mandy 不幸染上o左「沙士」,離開o左人世。

而自從 Mandy 離開o左之後,Vincent o既「細佬」就好似跟住 Mandy 一齊走咁,再無起過身,連朝早咁「朝氣勃勃」o既時段都無起過身,keep 住播六點半新聞。

有可能係已經過o左身o既 Mandy o係個天上面送o左呢個 Mandy 比 Vincent 做禮物,又或者真係咁邪,總之同樣都係叫做 Mandy o既呢個少女,係五年o黎唯一一個令到 Vincent 有勃起衝動o既女人。香水味道成就呢份情緣,Vincent 為o左佢「細佬」著想當然發力狂追。而 Mandy 對於呢個黃宗澤咁款o既型男亦相當有好感,一個禮拜唔夠,自然自然佢o地就o係埋o左一齊。

不過當然啦,Vincent 亦都無將自己原本係不舉o既事,同佢上一任女友都係叫做 Mandy o既事,話比呢一個 Mandy 知。而 Mandy 亦都無將佢為o左同 Vincent 一齊,而飛o左原本諗住出年結婚,o係電器舖 做 Sales o既男友 Gary o既事話比 Vincent 知。兩個各有小秘密o既人,就開開心心咁o係 Vincent o個個一室 CK One 香味o既屋企度同居,過住神仙眷侶咁o既生活嘞。

- 完 –

……………………………………………………

大隻權哥,多謝你再一次拔刀相助。
呢個故事好過癮喎,好似講中我的隱疾,
我看得十分有共嗚!
等我買支CK One幫吓手先!

22 則留言:

  1. 多謝卡哥再次俾面轉貼!

    希望各位唔好嫌棄我呢個「小小鹹 多多趣」o既故仔就好。

    回覆刪除
  2. 仲講sars, 特區政府都唔知幾想大家忘記
    (忘記點解有sars, 忘記hk人幾同心同德抗痠, 忘記醫護人員的盡忠職守, 忘記政治問責制第一次穿崩, 忘記50萬人一齊上街.....)

    你重提舊事, 中聯辦會唔happy的

    btw, 當年我e仔都中左沙士, 好彩好番

    回覆刪除
  3. 好過癮的故事,見到似應采兒o既美少女,我都會考慮改性取向!!哈哈!!

    回覆刪除
  4. to 小瓶子 : 係咪 Happy Ending 大家都會開心o的呢?

    to 篤篤篤撐 : 阿爺好多o野都想我o地唔記得,例如七一唔記得上街,六四唔記得悼念,政府無能......

    但有o的o野發生過就係發生過,人們不會忘記.

    to Gwen : 講個秘密你知,應采兒係我女神o黎呀! (所以我都幾憎陳小春)

    回覆刪除
  5. 哈哈..個故事幾有趣!
    我諗起古天樂套片!

    回覆刪除
  6. 大隻權 提到...
    『...政府無能...』

    咁大家快啲幫手揾番個搽CK One嘅Mandy嚟送俾政府!

    回覆刪除
  7. 事必有因,幸好找到因由. 但大部份不舉者都是找不到原因的. 慘慘慘.

    回覆刪除
  8. 好似講中我的隱疾

    隱疾....????

    果故仔幾好睇!!!

    回覆刪除
  9. 故仔令我諗起徐四金嘅<香水>。

    http://www.books.com.tw/exep/prod/booksfile.php?item=0010323651

    回覆刪除
  10. 嘩嘩,小Vincent呢,真係.....

    好彩,以後唔洗食齋嘛!

    又,卡Sir,阿權支CK,我夾錢送!

    回覆刪除
  11. 當年CK One一出,周圍都喺個朕味。

    回覆刪除
  12. 阿大隻哥:

    我做組爸做咗三年,梗係遇唔到好似 Mandy 咁嘅女仔,真失敗!

    回覆刪除
  13. to 自由行 : 係咪"戀上你的床"? 我都有睇喎!

    to 歪歪 : Good sense of humor :)

    to 落入凡間的天使 :

    "大部份不舉者都是找不到原因的"

    莫非你感同身受?!

    to sze : 多謝!

    to 市場維京人 : "香水" 我有睇電影版,最尾萬人做愛o個幕好震撼!

    to 聶秀康 : 人身上o既體味都係吸引異性/同性既一種方法,所以香水長賣長有。

    to JC : I like CK One, too. 係 Mandy 送俾我o架! (shit! 暴露o左自己身份!)

    to C+ : 多謝妳支香水呀靚女,由妳親身送貨得唔得?

    to eric : 我屋企都係 CK One 味。

    to laulong :

    "我做組爸做咗三年,梗係遇唔到好似 Mandy 咁嘅女仔"

    應采兒我都無遇過,鄭欣宜就有唔少。

    回覆刪除
  14. 大隻權
    呢個故事教訓我地
    要選擇適合自己既香水(配上個人體味)
    希望在人間....

    回覆刪除
  15. 我又要睇卡臣出野!快啲出啦,攪咁耐仲唔出嘅我好攰啦....haha

    回覆刪除
  16. 好中意呢個故事呀!
    繼續努力!

    p.s.咁mandy一定唔使擔心vincent出去攪三攪四la!

    回覆刪除
  17. 過住神仙眷侶咁o既生活嘞。。。有幾神呀?

    回覆刪除
  18. naruto

    神神化化,神出鬼沒,神智不清 咁囉

    回覆刪除

LinkWithin

Blog Widget by LinkWithin